عن الحاجة لطبيب
يقدر يمنع التلج الخفيف يغلف أعضائها وأعصابها فى لحظات القلق
بتسيطر عليها فكرة انها تبقى مركزة قوى مع اللى بتحبهم
تبص فى عنيهم وهم بيتكلموا
تشيل جواها منهم ....النظرة
والضمة
والابتسامة
والصوت
والحنان
ولفة الطرحة
وطريقة المشى
وبيناموا ازاى ..
عشان لو جت أيام واتحرمت من وجودهم
يبقى معاها منهم اللى يخفف عنها
واللى يقلل من شعورها القاتل بالحرمان منهم
لكن ساعات بتبقى مش قادرة تعمل كده
كل ماتبص فى عنيهم تمنع بسرعة دموعها تظهر
تستغرب قوى ان الروح الحلوة دى ممكن تمشى
وان الجسد ده هييجى يوم ويسكن تماما ولازم يبعد
بس الفراغ مينفعش تحضنه ولا يحضنها
مش هتكفيها الذكريات
اللى حوشته منهم مش ممكن هينفعها وقت غيابهم
محتاجة هى الطبطبة الربانية
....................
يوسف
البلكونة هى كلمة السر فى بيتنا
لما الدنيا تخنقنى قوى
اخرج البلكونة واسمح لدموعى تنطلق
وابص للسما
واكلم ربنا سبحانه وتعالى
ولانى تقريبا عارفة نفسى
بلاقينى مكسوفة اطلب
وبعدين افتكر هو أنا ناوية اطلب من مين !
اتشجع قوى
وبعدين احس بالحبل
الحبل ده بيحسسنى بسلام نفسى رهيب
بحس انى ماسكة حبل فى ايديا وطرف الحبل التانى فى السما
وانى ماسكة فى الحبل قوى..قوى
ومش عايزاه يفلت من ايدى
وأقول كل اللى نفسى فيه
يارب أنا مااستاهلش
أنا مينفعش اطلب أصلا
بس أنت ربنا ..اطلب من مين تانى
عبادك كثير أما أنا فليس لى رب سواك
اتشجع اكتر
واطلب طلبات بحسابات العقل والمنطق مستحيلة
والحبل الغريب ده يقولى ايه المستحيل ؟
انت بتطلبى من ربنا
اطلبى كتير
اطلبى اللى أنت عايزاه
أنا مفيش مرة بمنتهى الأمانة
طلبت الا لما ربنا استجاب
عارفة انى مينفعش اجرب
بس أنا متأكدة انى جربت كتير
ومفيش مرة طلبت الا وربنا استجاب طلبى
ممكن مش فى نفس الوقت
ممكن بعد ماانسى الطلب ده من الأصل
ممكن الأحداث تفهمنى....
ان اللى حصل عكس اللى كنت عايزاه بالظبط
بس بعد شوية بلاقى انى كنت فى المطلق عايزة الستر
وربنا سترنى
وانى كنت عايزة افرح
وربنا فرحنى بالحاجة اللى تستاهل الفرح
النهاردة أنا قلبى واجعنى
بس أنا عارفاه الوجع ده... ومش وحش خالص
أنا ماسكة فى الحبل
وواثقة قوى قوى فى الاجابة
الدعاء الحمد لله من قلبى قوى
بس قلبى ابن اللذين ده فى عز ماهو متشحتف كده
جواه بعيد حتة مطمنة خالص وهادية قوى
يارب... يوسف
يارب يوسف يرجع لمامته
فاتيما عايزة يوسف بخير حتى لو بعيد
طبيعى ده ..عشان هى أم
أنا بقى عايزاه يرجع لها
ويبقى بخير معاها
فاتيما عندها هاجس ان يوسف ممكن ميعرفهاش
أو ينسى الأيام اللى قضوها سوا
أو الكلام والسنين يغيروه من ناحيتها
فاتيما بتحاول تستوعب كل ده
عشان لو حصل متزعلش
وتعرف تتعامل مع يوسف باللى فيه مصلحته
فاتيما كده بتفكر صح
فاتيما أم ... والأمهات دايما تفكيرهم كده
لكن أنا عايزة كل حاجة يارب
وكل حاجة عندك بس
ومش عند حد غيرك
أنا عايزة يوسف راجل وبخير وفاهم وحاسس ومقدر
عايزة يوسف فاكر ماما وحبها ليه
ومستوعب الفراق ده كان ليه
واتعذبت ماما فى بعده ازاى
عايزة يوسف مؤدب زى ماما ماكانت بتربيه
وشاطر زى ماما مابتتمنى
وفنان زى ماما بالظبط
عايزة يوسف العاقل
اللى يقرأ مدونة ماما حرف حرف
بقلبه وبعقله وبروحه
عايزة يوسف اللى مع كلمة يسمعها من ماما
مع كل حضن من ماما
مع كل نظرة عين منها
مع كل ابتسامة من قلبها
يقوم يحضنها
وبعدين كل شوية ومن غير مناسبة
يتكلم ويقولها بحبك ياماما
وشوية يسكت ويحضنها تانى
يحضنها بس ويخليها تسمع دقات قلبه
أنا عايزة فاتيما ترتاح
لدرجةانها تنام فى حضن يوسف يارب
أو تنام فى حضن يوسف لغاية ماترتاح يارب
أنا عايزة اذاكر له واضحك معاه
واقوله انى هخبى على ماما المرة دى انه مش مذاكر كويس
لكن المرة الجاية كلمتى لاممكن تنزل الأرض أبدا
عايزة يوسف يقابل كل سكان بلوجر
اللى شافوه وحضنوه وحبوه من كلام ماما عنه
عايزة يوسف يارب
أنا عايزاه يرجع ويفرح ويفرحها
ويقولها ياماما فى كل ثانية
أنا عايزاها تحب وتتجوز اللى بتحبه
ويبقى عندها بنات وولاد وكبيرهم يوسف
يراعى ويدارى معاهم على الحاجات الغلط
عشان ماما متعرفش وكده
يارب ....
ده القلوب من صنعك وبين ايديك
والفرح والشقاء ملناش فيه
اكتب لقلبها وقلوبنا الفرح يارب
متخليش الظلم يطول ويفتنا يارب
أنا قلبى مليان ثقة فى الاجابة يارب
فكرت كتير ان الكلام ده ميكونش للنشر
بس أنا عايزة اروح بيت فاتيما النهاردة
وأبات عندها وفى سريرها
ونفضل نحكى عن يوسف
وعن كل حاجة فى الدنيا لغاية الصبح
ومش عارفة اعمل كده
خلى البوست مكان ليلة البيات ياطمطم
لغاية ماربنا يدبرهالنا
تانى عايزة اقولك
كل سنة ويوسف طيب وبخير وراجل تفرحى بيه
كل سنة وانت أحلى وأرق ماما فى الدنيا
الصورة عسولة قوى
يوسف شبه ماما :)
بحلم على قدى
بما ان فرصة تحقيق أحلامى دى
تكاد تكون مستحيلة فى الدنيا
أنا طمعانة فى عفو ورحمة ربنا سبحانه وتعالى
وانه يدخلنى الجنة
وهناك ميبقاش شغلى الشاغل زى زمان...
الأكل والشرب والمناظر الحلوة
لكن اتمنى انى اقعد مع كل أحبابى
من غير قلق ولا خوف ولا زعل ولا مرض ولا موت
ومكانى يبقى مع كل الشخصيات التاريخية اللى بحبها
بعد أهلى وأحبابى
ونحكى مع بعضنا واعرف منهم أسراركتير غايبة عنى
ونتناقش فى الأحداث
واتفرج على شوية مشاهد كان نفسى اشوفها واحضرهابنفسى
نفسى اشوف حادث شق البحر لسيدنا موسى
والموج جبال من الناحيتين ...
عايزة احس بالرهبة والامتنان لربنا سبحانه وتعالى
اللى حس بيها اللى حضروا الموقف ده
نفسى اشوف صلح الحديبية
وابقى مش عارفة ايه اللى هيحصل
واكون من الرجال من اللى اشتركوا فى البيعة
واشوف الرسول عليه الصلاة والسلام تحت الشجرة
بيمد ايده الشريفة يبايع المسلمين بيعة الرضوان
وبعدين يضم ايديه على بعض
ويبايع بيعة لعثمان
وارجع رشا تانى واعيط قوى
عايزة اشوف فرحة الرسول عليه الصلاة والسلام برجوع جعفر من الحبشة
عايزة اشوف لحظة احتضان الرسول عليه الصلاة والسلام لجعفر
واشوفه لما عرف خبر استشهاده
وراح بيته يحضن ولاد جعفر ويبكى
عايزة اشوف وش خالد بن الوليد
لما الرسول عليه الصلاة والسلام بعت له رسالة
يقوله : أوحشتنا ياخالد
واحضر الأنصار لما وجدوا فى أنفسهم بعد غزوة حنين
من معاملة الرسول عليه الصلاة والسلام لأهل مكة
والعطايا اللى راحت للمؤلفة قلوبهم
والرسول عليه الصلاة والسلام بيعاتبهم
وبيطمنهم وبيعترف بفضلهم وحبه ليهم ويدع لهم
عايزة اشوف دموع الأنصار اللى قطعت القلوب
واعيط معاهم من العتاب الرقيق للرسول عليه الصلاة والسلام
وعايزة اقول معاهم
بل لله ولرسوله المنة والفضل..
بل لله ورسوله المنة والفضل
ومع ان دعاء النبى عليه الصلاة والسلام مستجاب ..
لكن عايزة اسمع الدعاء وقتها
وارفع ايديا للسما وأقول آمين
عايزةاشوف زوجة عزيز مصر
لما سألوها عن سيدنا يوسف
وقالت: ليعلم انى لم أخنه بالغيب
بتجننى الجملة دى
بغض النظر عن ان مشاعرها ناحية سيدنا يوسف فى البداية
بغض النظر عن ان مشاعرها ناحية سيدنا يوسف فى البداية
كانت مستهجنة طبعا وحرام
لكن بعد دخوله السجن هى ندمت
وكلامها عنه كان حب بجد
واطبطب على سيدنا يعقوب
واموت بقى من العياط
وهو بيقول انما اشكو بثى وحزنى الى الله
سيدنا موسى لما شاف النار فى سينا وراح عندها
وأنا ابقى واقفة بعيد
لكن احس واسمع كلامه مع ربنا سبحانه وتعالى
نابليون
عايزة اعرف كان حاسس بالغدر وهو فى الجزيرة ؟
كان حاسس انه ممكن يموت مسموم ؟
كان بيحس بإيه لما يفتكر انتصاراته العظيمة
ومحمد كريم
والأزهر
ويافا
كان بيحس بإيه لما ييجى على باله الأحداث دى؟
عايزة اشوف سبارتاكوس
وجوايا فكرة غريبة قوى
انى لما اشوف سبارتاكوس هلاقى أمل دنقل قاعد معاه
حاسة انى هفضل ساكتة
واتفرج عليهم بس
وهم بيتكلموا
عايزة اشوف ناجى العلى
واقوله انى دايبة فى حب حنظلة بكل تفاصيله
وانى كل مرة اشوفه لازم ادعى له بالنصر
عايزة ابقى جنب الطيارة
اللى هيركبها عرفات فى رحلته الأخيرة
واطبطب على زهوة وهى بتعيط
قدام جثمان والدها فى مطار القاهرة
عايزة اكلمها فى التليفون واطمن عليها
واشجعها تذاكر وتخلى بالها من نفسها
أفنان البنوتة العسولة وحشتنى ومش معايا تليفونها
عايزةاشوفها فى الجنة زى الفصل بالظبط
امورة ورقيقة وعصفورة
واقولها عصفورة انت بل زغلولة
وهى تضحك
عرابى باشا حبيبى ..
لأ كلامى معاه هيبقى كتير:)
سالومى وهى ندمانة على قتل سيدنا يحيى
سيدنا عيسى عليه السلام
واقوله ايه كم الوداعة اللى فيك دى:)
مملكتك فعلا مش ممكن تكون فى هذا العالم
ماما حبيبتى
:)
ده احنا هنحكى حكاوى
يارب تكون من نصيبنا
:)
ده احنا هنحكى حكاوى
يارب تكون من نصيبنا
فتحية
فتحية ماتت
فتحية مشرفة المادة ومدرستى الأولى ماتت
اللى لما كنا نحب نضحك معاها
نقولها أبلتى فتحية
كده فتحية مش هتوزع الخطة ولا النشاط
ولا هتقولى خدى الاذاعة
وانا اقولها لأ بقى كده الشغل كتير
وادينى وحدة التدريب
وخلينى من الهواة فى الاذاعة
فتحية مش هتتحايل عليا
عشان امشى بسرعة فى المنهج
ولا هتقولى اعمل امتحان الميد تيرم
وانا اقاوح شوية وبعدين اوافق
وهى تبقى عارفة انى هوافق
بس دى تقاليد يعنى
فتحية مش هتوقفنى فى الحوش
عشان تقولى وصلتى لغاية فين ؟
ولا هتضحك لما اقولها معندناش مدرس أول يستفسر من مدرسينه على كلام فاضى زى ده
فتحية لما هتلاقى المدرسة فيها متابع
مش هتجرى علينا
ولا هتقول لنا خلوا بالكم من دفاتر الغياب والدرجات ودفاتر الموهوبين والضعفاء
ولا هتقول معملتوش ده ليه ؟؟
رايحين فى داهية ان شاء الله
واحنا نقولها جمعااااااااااااااء
جمعاء ياحاجة ان شاء الله ونضحك كلنا
فتحية مش هتكلمنا تانى عن ولادها
وانهم ماشاء الله حلوين وشطار ومؤدبين
واحنا مش هنقولها اتق الله بقى
وبطلى كلام على العيال ..
ارحميهم ياشيخة هيتحسدوا
فتحية مش هشوفها ماشية فى الحوش
وخارجة من اوضتها وطالعة مبنى تالتة
فتحية مش هتشتغل فى الجودة
ولا هتطلع عنيها فيها
فتحية مش هتعمل لناالاجتماع الاسبوعى
ولا هتقعد تتكلم معانا فى وصفات الاكل
ولا أحلامها لولادها
حسن رئيس الكنترول مش هيعرف يخضها
ولا هيقولها وهى بتسلم الورق انه ناقص
وهى مش هتفهمه بسرعة
ولاهتكمل معاه اللعبة لغاية مايعترف
انها ذكية وفهمته فى ثانية
أول مرة اخد بالى ان خمار فتحية حلو كده
وانها هتوحشنى قوى كده
لما النهاردة هاروح اعزى ولادها
مش هلاقيها موجودة
ولا هتكون بتحكى انها لما خرجت من المستشفى تعبانة قوى وفى يوم لقت عندها شوية صحة صغيرين
دخلت المطبخ عملت لهم أكل
والعيال فرحوا قوى بوجودها وسطهم
وبالأكل اللى من ايديها
فتحية كانت فرحانة
انها بس عرفت تطبخ لهم
فتحية مش هكتم الخضة اللى حسيت بيها لما جت المدرسة فى يوم وبنتها ماسكة ايديها
ولقيت وزنها قل قوى وكنت عايزة اعيط بس قلت لنفسى شوية بس وهترجع كويسة تانى
أنا كررت جملة فتحية ماتت لنفسى كتير
لانى مش عارفة اصدق واقتنع انها ماتت
مش فتحية بس
أنا عندى أزمة كبيرة مع الموت ..
مش فاهماهومش عارفة استوعبه
لما الموت بياخدهم
بلاقيه قربهم منى اكتر من الاول
انا هفضل مدة طويلة اعانى شوية
واتونس شوية.. بوش فتحية
اللى هيبقى قدامى طول الوقت
وبخيال فتحية
اللى هيعدى فى المدرسةقدامى
بحس انى نفسى التفت
الاقيها فى الاماكن اللى دايما كانت فيها
فى نفس الوقت بخاف التفت لانى عارفة انى مش هلاقيها وهزعل اكتر
اعمل ايه فى نفسى
لما بتفكرنى بالمواقف اللى زعلنا فيها سوا
وليه المواقف دى كانت تستاهل ومهمة ومصيرية وقتها
ودلوقت ولا ليها لازمةولا تساوى
وياترى الدنيا التافهة دى تستاهل !!
أنا مش ناوية ادخل اوضتها
عشان اخد الخرايط
ولا استلم كتب خارجية واوديها عندها
لانى مش هشوف ابتسامتها
لما بناخد كل الكتب نديها لها
ولما حد فى المدرسة بيكلمنا عن كتاب
نقوله فى دولاب فتحية ولما تيجى بكرة هتوزعهم واطلب منها اللى انت عايزه
دايما بتخيل ساعة الموت انه مؤقت
وان المشكلة الكبيرة دى هتخلص
بس عايزة شوية صبر
لما أستاذ مجدى مات
كانت أول مرة استوعب طبعى الغريب ده
وانى فضلت شهور ومجدى قدام عينى بالظبط
ومش راضى يبعد عنى
فى نفس الوقت اللى فضلت فيه شهور
عينى ماتروحش اصلا على مكان الكانتين
اللى كان بيشتغل فيه
فى الكنترول...
كان بيتهيألى انى لو التفت
هلاقيه بيعمل شاى
وكنت بزعل قوى من فكرة انه الغائب الحاضر
وكنت بزعل قوى من فكرة انه الغائب الحاضر
ليلى
ليلى الحلوة الرشيقة الرقيقة المتكلمة
لما ماتت برضه مش مصدقاها
أنا قاومت اكتر من مرة
انى اقول لبنتها اللى بتموت من سيرتها
ماما عاملة ايه ؟ سلميلى عليها قوى
منى
منى وصلتنى لدرجة احساسى انى مش طبيعية خالص
أنابعدوفاة منى عدت عليا أيام..
عقلى الباطن كان بيعاتبها
مامتك وباباكى هيموتوا عليكى يامنى
وانتى عارفة كده
ماتيجى بقى ...كفاية كده
مش عارفة أفهمك ياموت ..
مش عارفة استوعب اننا ضعفاء قوى كده
وان الروح العظيمة من عظمة اللى خلقها
لو خرجت بيبقى ملناش لازمة خالص كده
الغياب ياموت ...
الغياب اللى انت بتسببه رهيب
رهيب قوى
وكمان وانت واخدهم بعيد عنى بتقربهم منى
بتقربهم قوى معنويا
وبتخلى دماغى مركز قوى معاهم
وشايف قوى كل الحلو اللى فيهم
ويزعل دماغى شوية عليهم
ويرجع تانى يقولى ده وضع مؤقت
وشوية وكل حاجة هتتحل
مش عارفة ده صح ولا غلط
يعنى لما عقلى الباطن بيضحك عليا
ويقولى ان مفيش حاجة
وانها مشكلة مؤقتة ان شاء الله
وهتنتهى احسن
ولا الافضل انى افهم وبسرعة
ان الفراق هياخد كل أيام الدنيا
اللى أنا عايشاها
وهيبقى لغاية يومى أنا
اللى معرفش امتى
الله يرحمك يافتحية
ويغفر لك ويعفو عنك
ويثبتك عند السؤال
ويرزقك الجنة
يارب
يارب
يارب
متقلقيش على ولادك ياحبيبتى
زعلانين طبعا
بس ربنا هيكرمهم
وهيخلصوا تعليم ويتجوزوا ويخلفوا
والصغير والكبير هيحكى لولاده عليكى
بنتك العسولة الكبيرة
هتخلى بالها من الصغيرين
اكلهم ولبسهم وكل حاجتهم
متقلقيش عليهم
لما هتتجوز
ربنا هيكرمها بواحد عارف ربنا
ربنا هيكرمها بواحد عارف ربنا
هيراعيها ويعوضهاشوية عن فراقك ياحبيبتى
وهيبقى الحضن اللى اتحرمت منه بغيابك
وهيشجعها ويساعدها تخلى بالها من الصغيرين
عارفة عبده الصغير ده
مش هيستنى لما يكبر
ويبقى راجل عشان يخلى باله من البنات
أنا حاسه انه من دلوقت هيعمل كده
فتحية مش تسيبهم خالص
وانت فى دار الحق
اللى ربنا كرمنا وخلانا مؤمنين بيها من غير مانشوفها
لو ينفع تطلبى من ربنا انك تيجى لهم كتير فى الحلم
تطبطبى عليهم وتحضنينهم وتخليهم يعافروا فى الدنيا
وتعالى لى فى الحلم يافتحية
أنا حاسة انك هتوحشينى قوى
انت أصلا وحشانى جدا من أول ماسمعت الخبر
فتحية
بحق دار الحق اللى انت فيها
سامحينى
سامحينى على أى حاجة أوكلمة
قلتها بقصد أو من غير قصد
وزعلتك
سامحينى بالله عليكى
سامحينا كلنا
بحق دار الحق اللى انتى فيها
واننا غلابة لسه تايهين فى دار الباطل
ربنا ارحم من جرت عليه المقادير
ربنا عبادك كثير أما نحن فليس لنا رب سواك
لا تعاملنا بعدلك
اشملنا برحمتك
رحمتك ياالله
للأحياء والاموات
فيما يرى النائم
رأت فيما يرى النائم
انها واقفة فى اوضتها
ولابسة فستان فرح رقيق وبسيط قوى
الغريب انها مش فى كوافير مثلا ولا حد معاها
بتلبس الطرحة الرقيقة
لقتها مقطوعة قطع صغير
ازاى عروسة تلبس طرحة مش حلوة كده ؟؟
مش مهم
ده اللى قالته لنفسها
خارجة من الاوضة وبتظبط الطرحة لقت اخوها قدامها
بيقولها ازاى طرحة فرحك تبقى مقطوعة كده وتلبسيها
بصت للطرحة تانى لقت فعلا فيها قطع تانى
واكبر من اللى هى شافته ومكانش باين من الأول
وبعدين بقى فى العطلة دى ..هتتأخر على الفرح كده
قالت مش مشكلة ومحدش هياخد باله من مشاكل الطرحة
نزلت الشارع لوحدها بفستانها وطرحتها
ولفت كتير قوى والعجيب ان محدش حسسها ان فيه حاجة غريبة
ايوه هى عروسة ولابسة فستانها وطرحتها وماشية فى الشارع
ازاى الناس بتتعامل معاها عادى خالص ومش شايفين فستانها
مشيت كتير وقابلت صديقاتها وزملائها فى كل مراحل حياتها
ايوه الدنيا كلها كانت موجودة ..أو بعتت مندوبين عنها
ابتدائى ..اعدادى ..ثانوى ..الكلية ..الشغل
وبرضه الشىء العجيب جدا
ان محدش من اللى شافها علق على لبسها خالص
خالص يعنى
وبعدين بقى ..هى الناس دى مش بتقولى مبروك ليه !
ليه محدش منهم اتكلم عن الفستان أو حتى القطع اللى فى الطرحة ؟؟
الناس دى مش شايفانى عروسة ليه ؟؟
بعد مشاوير كتير قابلت زميلتها فى الشغل
اسمها نعمة
الكلام فى الحلم كان من غير صوت خالص بس مفهوم
هى ماقالتش حاجة لنعمة ..
بس نعمة كانت فاهمة لوحدها أسباب حيرتها
وقالت لها محدش شافك عروسة لانك استعجلتى
ولبستى الفستان ده بدرى ..ده مش معاده خالص
عارفة لو استنيت شوية كمان ..هيبقى ده فعلا معاد الفرح
وكل الناس هتشوفك وتشوف فستانك
-----------------------------------
قامت من النوم متلخبطة على الاخر
وليه تتلخبط!! ..مش هى صلت استخارة كتير قوى !
مش هو اثبت اكتر من مرة ان التوافق بينهم هيبقى صعب قوى!
لكن هو كان بيعتذر عن تصرفاته
وبيعتذر بشدة كمان
وده اللى كان مخليها مترددة فى قرارها
ليلة الحلم ده صلت استخارة تانى
يارب ..أنا تعبت ..أنا عايزة موقف حاسم
ميبقاش فيه تردد ..نكمل ولا نخلص بقى من السيرة دى ؟
يارب بكرة فيه مقابلة مهمة مع الأهل وأنا مش هحضرها
يارب مددك وعونك ..ارحمنى من الحيرة
نامت ..شافت الحلم أعلاه
قامت من النوم ..حكت لهم الحلم
سكتوا كلهم
راحوا ورجعوا وحكوا لها اللى حصل
من ورا قلبهم قالوا رأيك الأهم بالنسبة لنا
لو عايزة تكملى مش هنعترض ..ده قرارك
بس الصورة تبقى واضحة قصادك
بس الصورة تبقى واضحة قصادك
مش الكل كان ده رأيه
أقربهم لقلبها وهو أصلا هادى
زعق وقال لا
مفيش حاجة اسمها تقرر
مينفعوش مع بعض أصلا
أقربهم لقلبها وهو أصلا هادى
زعق وقال لا
مفيش حاجة اسمها تقرر
مينفعوش مع بعض أصلا
هى هادية وساكتة وتفاصيل الحلم قدام عنيها
خلاص ياجماعة ..انا عاملة الأكل من بدرى
وانتم اتأخرتم هناك وانا هموت من الجوع
لما يتصل تانى حد يرد عليه يقوله ..كل شى نصيب
جواب
أول جواب ...
كان بيحكى فيه عن كل تفاصيل أيامه فى الغربة
اللى كانت جديدة بالنسبة له
اللى كانت جديدة بالنسبة له
وان غيابها عامل فرق فى حياته
وانه بيتمنى الايام تعدى عشان تبقى معاه
وانه بيتمنى الايام تعدى عشان تبقى معاه
بيكلمها عن الشيكولاته
اللى استناها بره العربية عشان تاخدها
اللى استناها بره العربية عشان تاخدها
وازاى كان فرحان ومستغرب فى نفس الوقت
لما قالت له انها مش هتقدر تاكلها
وهتخليها معاها لغاية ماهو يرجع بالسلامة
بيوصف لها مشاعره كانت ايه فى المطار
وهو بيسلم عليها
وهى مكسوفة حتى تمد ايديها تسلم عليه
وبيفكرها لما قال لها ليلة الخطوبة تدعى له
عشان عنده امتحان فى السفارة
وهى اعترفت له بعد كده ..
عشان عنده امتحان فى السفارة
وهى اعترفت له بعد كده ..
انها دعت ربنا ماينجحش ولا يسافر
بيحكى اشترى ايه وبياكل ايه وازاى
وكل حاجة بيشتريها ..بيفكر هتنفعها لما تيجى ولا لأ
وكل حاجة بيشتريها ..بيفكر هتنفعها لما تيجى ولا لأ
اشتكى من الهندى اللى بيشتغل معاه
ومبهدل الاكل توابل وشطة
ومبهدل الاكل توابل وشطة
وبيحلم باليوم اللى تبقى معاه وجنبه
كلامه رقيق ...والحنان اللى فى صوته
كان مسموع من سطور الجواب
كان مسموع من سطور الجواب
كتب لها عن آية ربنا سبحانه وتعالى
لما جعل بين الزوجين سكن
وانه من أول مرة شافها
حس انه يعرفها من زمان
وانها نصه التانى
هى حبيبته
هى تقريبا حفظت الجواب
حس انه يعرفها من زمان
وانها نصه التانى
هى حبيبته
هى تقريبا حفظت الجواب
هى ممكن تسمعه
هى بتسترجع كلامه دايما وهى لوحدها
بتنتهز أى فرصة عشان تفتح شنطتها
وتقرأ ولو سطرين من جوابه
كانت حاسة انها خفيفة
وانها أميرة
ولابسه فستان طويل وواسع وحلو قوى زى فساتين الاميرات
ورافعة طرف الفستان وطالعة سلالم خيالية
-------------------------
الجواب الأخير ..كان جوابها هى
جواب الوقت الضايع
وابراء الذمة
لاخر مرة قالت له انها مستنية تصرفه
وحكت له التفاصيل المملة للمشاكل
اللى هو عارفها
كلمها ...
ووعدها يتصرف
وكانت عارفة انه مش هيعرف
بعد وصول الجواب بتلاتة وعشرين يوم
كانت بتخلع دبلته من ايديها
وهى بتكلمه فى التليفون
الدبلة دى حكاية لوحدها
واذا الدنيا كما نعرفها
جواب الوقت الضايع
وابراء الذمة
لاخر مرة قالت له انها مستنية تصرفه
وحكت له التفاصيل المملة للمشاكل
اللى هو عارفها
كلمها ...
ووعدها يتصرف
وكانت عارفة انه مش هيعرف
بعد وصول الجواب بتلاتة وعشرين يوم
كانت بتخلع دبلته من ايديها
وهى بتكلمه فى التليفون
الدبلة دى حكاية لوحدها
واذا الدنيا كما نعرفها
يوم 14
قال لها :هكلمك يوم 14
استغربت ومافهمتش ليه
مش عارفة ليه اليوم ده بالذات ؟
وليه أصلا محدد يوم المكالمة بالتاريخ كده ؟
كان عندها هاجس ان فيه مناسبة ما فى اليوم ده
لأ مش هاجس ...
هى كانت متاكدة ان فيه مناسبة فى اليوم ده
عرفت منين ؟
لأ... مجرد احساس داخلى
وصوته وطريقة كلامه
سألت نفسها كتير
ايه المناسبة فى يوم 14 ؟؟
لا عيد ميلاده!
ولا عيد ميلاد مامته ولا باباه ولا حد من اخواته !
ولا عيد الأم ولا حتى عيد تحرير سيناء!
حكت لوالدتها واخواتها ...
ومحدش عرف ممكن تكون ايه المناسبة
والدتها قالت ...لازم تكلمى والدته
وتحاولى تعرفى منها بطريق غير مباشر ..
ايه مناسبة اليوم ده عندهم
عشان نستعد ونشوف هنعمل ايه
هى أصلا مالهاش فى حكاية طريق غير مباشر دى
عشان كده حكت لوالدته باقتضاب عن سبب السؤال
وبرضه والدته مكانش عندها اجابة لسؤال الساعة
ماله يوم 14 ؟
ايه المناسبة اللى فى اليوم ده؟
ايه المناسبة اللى فى اليوم ده؟
بعد يومين
بتتفرج على جورنال قديم وسرحانة شوية
عنيها وقعت على اعلان لمطرب شهير
وحفلته الجديدة يوم 14 فبراير ...عيد الحب
يانهاااااااااااااااااار أبيض
ده تعليقها
فى البيت ..فيه ايه يابنتى ؟
هى....إحم ..إحم قوى يعنى
أصل ...أصل ...14 فبراير يبقى عيد الحب
بس ازاى ؟؟
هى فاكرة لما كانت فى الكلية
ان عيد الحب كان فى نوفمبر
مش موضوعنا ...خلينا فى اللى احنا فيه
كانت محرجة جدا من مامتها واخواتها
ولما جه 14 فبراير
والدته اتصلت بيها ..وبابتسامة بتغمز كانت باينة فى التليفون
قالت لها ...كل سنة وانتى طيبة
ماهو النهاردة عيد بقى
ان ان اااااااااااااااااااااااااااااااان
طب ليه كده بس الاحراج ده ؟؟
والدته كانت خلاص بلغته باللى حصل
واتصل هو يوم 14
طول المكالمة بيضحك ويقولها ماشى
هو: يعنى مش عارفة يوم 14 فيه ايه ؟
هى : لا والله ...أنا كنت فاكرة انه فى نوفمبر
هو: وقلتى لمامتك.... ؟
هى: بتهز دماغها ..على اساس انه شايفها يعنى
هو : وقلتى لمين تانى ؟
هى: اخواتى
هو : واخواتك كمان ؟؟ ضحك متصل
هو : قولى كمان قولتى لمين ؟
هى: وواحدة صاحبتى
هو: ماشاء الله ..ماشاء الله
هو : بس الذ مافى الموضوع انك سألتى والدتى
هى: ماتفكرنيش بقى ..
أنا مكسوفة عشان كلمتنى النهاردة
قالت لى كل سنة وانتى طيبة
ماهو النهاردة عيد بقى
لما هواجسها بقت حقايق مطلقة
ومش نافع معاها أى تبريرات
حاولت تنسى الذكرى المرتبطة باليوم ده
وخصوصا انه هيتكرر كل سنة
بذلت مجهود كبير ....
عشان تعمل احلال فى دماغها
14 فبراير ..ده ذكرى اغتيال الحريرى
آه ..رفيق الحريرى ...شفتى لبنان عاملة ايه ؟
ونصر الله وخلافه مع 14 آذار
لانهم أصلا بيتهموا سوريا بضلوعها فى جريمة الاغتيال
تأكدت من الشفاء
لما فات وقت
وبقى يوم 14 فبراير
يستدعى لعقلها الذكرى دى
بابتسامة هادية ....وراضية الحمد لله
بس برضه فيها شوية شجن صغننين خالص
الاشتراك في:
الرسائل (Atom)
