الجيش والشرطة إيد واحدة

- الأربعاء، 28 سبتمبر 2011

شغلت نفسى فى استرجاع حالى بعد حادثة البدلة 
لغاية ماشفت اخر فيديو تعذيب على فيس بوك 

ايه ده 
هو اللى بيسمح لنفسه يضرب ويكهرب ويهين أى كائن حى
 ممكن نعتبره كائن حى برضه !
ولا هو بيوصلنا رسالة ان اللى يقدر على حاجة يعملها 
طب مااحنا سيادتك قدرنا من كام شهر كده ولا نسيت 


ايه كم الاستمتاع اللى كانوا حاسين بيه 
وكان ظاهر على شكلهم وتصرفاتهم طول الوقت !!
هى الناس دى ينفع تتعامل مع البشرمن غير حواجز كده ؟؟
دول خلاص عدوا مرحلة ان التأهيل النفسى ممكن يجيب نتيجة معاهم 


طب محدش بلغهم ان البلد دى قامت فيها ثورة 
وفى يوم عيد الشرطة كمان
وكان من أهم أسبابها لا انسانيتهم فى المعاملة 
ولا نسيوا يوم الهروب العظيم فى 28 يناير 


ولا المسلسل البايخ أحداثه بقت بتجرى بسرعة كده ليه 
وتفعيل الطوارىء فتح نفس الداخلية للشغل قوى 
ماهو أصل فيه ناس كده بتتخنق من جو الحرية 
ومتعرفش تعيش ولا تشتغل الا فى جو الارهاب 
ارهاب غيرهم طبعا 


طب وبالنسبة للاخوة فى  الجيش 
ايه يعنى 
ايه النظام ؟
هو حضراتكم برضه علموكم فى الكلية الحربية 
ضرب القفا للمواطن المصرى يبقى ازاى؟
وايه أفضل السبل لكهربته علشان يعترف 

أنا حاسة ان الثورة كانت فرصة جميلة
 لتحسين العلاقات وإزالة الضغائن القديمة مع الشرطة 

وبعدين هو الضرب بالقفا لذيذ ...صح ؟؟
كهربة البلطجى ممتعة ؟؟

انك تضرب بمنتهى البشاعة واحد ميقدرش يضربك
 دى حاجة بتسعدك ؟؟...واضح يافندم 
 أصل اللى ميعرفش من الاساس معنى الانسانية.
نعلمهم احنا الانسانية ازاى 


البشاعة الحقيقية بقى 
انك تلاقى التعليقات من عينة يستاهلوا 
ده بلطجى واللى بيتعمل فيه حلال 
هنا بقى بلاقينى تعبت بجد 
ماهو مينفعش نفضل نهاتى طول عمرنا كده 

هو مش حضراتنا برضه أتباع ديانات سماوية 
فى الكتاب المقدس لحد فينا
 كلام عن تعذيب البلطجى وانتهاك انسانيته ؟؟
أصل أنا واثقة ان اللى بيعبد بقرة 
هيتكسف يكتب فى كتابه عنها ان تعذيب البلطجى  حلال 

البلطجى ياسادة والسفاح والارهابى 
وكل التوصيفات اللى ممكن تخطر على بالكم 
مش الحق ولا الصح ولا الانسانية 
مهما كانت جريمتهم انهم يتعذبوا 

الدين كما أفهمه حضراتكم 
انهم يروحوا لقاضى 
والقاضى لو استقر فى يقينه جرمهم
يحكم بحكم ربنا فيهم 
الحكم الشرعى معروف 
ومش بيحكم بيه خريج شرطة أو حربية 

البلد دى عمرها ماهتحس ان قامت فيها ثورة 
الا لما الكل يتعامل نفس المعاملة 
اللى اسمها إنسانية دى 
بمزاج حضراتكم أو غصب عنكم 
صدقونى بمزاجكم أو غصب عنكم 

على فكرة أنا مكنتش موافقة 
على ربط بلطجية التحرير على النخل 
ولا ضربهم وتعذيبهم 
واللى عرفته ان كتير من الثوار كانوا رافضين الفعل ده 


آه يابراح عمال بيضيق

- الأحد، 11 سبتمبر 2011


من قال لا فلم يمت 
وظل روحاً أبدية الألم 

------------

ممكن تستوعب يامجلس العسكر 
لو قلت لك 
ان روحى مخنوقة من وجودك 
وانى اكتشفت ان مجرد متابعة أخبارك 
فضلا عن مناقشتها 
والقلق من تصرفاتك على البلد 
اللى هنفرح بيها بإذن الله
بيقضى كل يوم على جزء من روحى 
و انى معنديش غير روح واحدة 
وخايفة حتى بعد ماتمشى 
معرفش ارجع اللى ضاع منها بسببك 

--------------

يارب تكون الغُمة دى 
زى أجواء الخطاب التالت و(سأظل )
وفرجك دايما قريب يارب 

مين أنت ؟؟

- الثلاثاء، 6 سبتمبر 2011


برغم كل الظروف والملابسات
 والعوائق والمشاكل ومواعيد القطارات .....الخ 

لكن فى مكان بعيد قوى فى قلبى 
أنا عندى  يقين انى هقابلك 
اليقين ده لقيته فى قلبى بإرادة الهية 
ومش هقابلك وبس 
لأ ده أنا هقابلك و هنبقى متفاهمين
 وفى منتهى السعادة  وهنكمل حياتنا سوا ان شاء الله 
هقابلك امتى وفين وازاى وحياة ايه اللى هنكملها سوا؟؟
 وايه مبررات ومسوغات السعادة دى ؟؟
كل دى  تفاصيل مش مهتمة بيها أبدا
 القطعة البعيدة جدا فى قلبى اللى انت هناك فيها 

حياتى العادية
 أنا بحاول بكل الطرق ابعد فيها شبحك عنى ..
اشتغل شوية ..اذاكر شوية
طول الوقت بحاول اشغل نفسى بكل حاجة غيرك
 وبقنع نفسى انى عرفت ارتب اولوياتى ووقتى 
واظبط حياتى على الوضع اياه
 اللى أنا معترفة انه مش عاجبنى بس لازم ابقى راضية بيه 
وان عدم وجودك  فى حياتى دى حاجة مش كويسة أبدا
 بس أنا شاطرة وعرفت اتكيف معاها 

بس باعترف لنفسى أحيانا بينى وبينها  انى بكدب عليها
 مع كل شرارة حب بالمحها  بين اتنين بافتكرك
مع كل حزن بحسه  من ألم فراق اتنين 
كان نفسهم يكملوا سوا 
مع الرغبة القوية جدا جوايا
 ان يكون لى دور فى اسعاد كل حبيبين على الارض 
ياراجل ده أنا كان نفسى أكلم زهرة سليمان
واعقلها واخليها تبطل اللى بتعمله مع على البدرى 
ده أنا ساعات كان بيبقى نفسى أقابل ابو ليلى العامرية
 وأقوله يرحم ليلى وقيس من تقاليد بتقتل مش بتحيى 
ده أنا حبيت عمرو حمزاوى عشان خاطرك 

بيروحوا وييجوا 
وساعات بتبقى بينى وبينهم  مشاريع ارتباط 
وأحيانا كنت بحاول اقنع نفسى انى خلاص قابلتك 
وانك خلاص الشخص اللى قدامى 
بس نفسى دى..
 على اد مابتسمع كلامى كتير الحمد لله
على اد ماكانت بتعاند خصوصا فى الحاجة اللى تخصك 
أصلى استخارة واحلم الحلم اياه 
واعرف انه مش أنت 
واضحك على نفسى واصبر شوية 
وافوت حاجات مش عجبانى شوية 
وبعدين اقف كتير على حاجات تانية 
مش ممكن تكون هى صفاتك أبدا 

عموما
 أنا متأكدة انك عارف الكلام ده من غير ماأقوله 
ومن غير مانتقابل 
وانك طبعا موجود فى الدنيا من زمان 

بص بقى 
هو أنت لما تيجى لازم تكون عارف شوية حاجات كده 
أولها انى رخمة جدا 
ولا تتوقع انى اعترف لك بأى حاجة من الكلام ده على طول 
ده أنت هاتشوف أيام !!
طب ليه الرخامة دى ؟؟
 مش عارفة والله 
طبع بقى هانقول ايه 
وبعدين لو انت أنت 
أكيد هتبقى عارف وفاهم 
من غير ماأبقى مضطرة اتكلم 

انت هتتعامل معايا ازاى ؟؟
دى حاجة أنا مطمنة لها 
بنفس درجة اطمئنانى ليقين وجودك 

أنت هتبقى ايه فى حياتى ؟؟
لسانى مش ممكن هيعرف ينطق 
قلبى بس هو اللى هيبقى مليان امتنان 
لربنا سبحانه وتعالى 
اللى خلق القلوب والارواح 
وخلاناعرفنا اننا هنتقابل 
وان لقانا هيبقى سكن 

لأ لأ 
كده مينفعش خالص 
أنا مش هاتكلم تانى دلوقت
انت كده هتعرف عنى حاجات كتير 
أنا عايزاك تبقى عارفها لوحدك 

مين أنت ؟؟
معرفش 
فين أنت ؟؟
معرفش 

بس مش قلقانة خالص على فكرة 

الاشتراك في: الرسائل (Atom)