الناس خافت قضية البنات ترفع شعبية الاخوان 
قالوا كل حاجة بقى ...
قالوا ايه اللى وداهم هناك ؟ 
وقالوا دى بنات باردة ومعندهاش احساس وطالعين يضحكوا فى القفص ..معندهمش دم 
شوية وقالوا الاخوان بيتاجروا ببناتهم ..يالعار 
الاخوان بيشيروا صور لبنات وبيركزوا على صورالجميلات عشان يكسبوا الناس فى صفهم ....
شوية تانى ودخلنا فى مرحلة نشر فيديو للاخوانيات قدام بيت الدكتورة الجامعية وهم بيعتدوا على البواب ..وهاصو بقى 
آدى الاخون وبناتهم ...قلة أدب ...وزعلانين انهم اخدوا 11سنة سجن! ..خليهم يتربوا 

طيب يافندم دى قضية ودى قضية 
اللى اتسجنوا فى اسكندرية غير اللى تظاهروا فى القاهرة 

عمل نفسه مش سامعك ..
بنات الاخوان عايزة تتربى والقاضى بيربيهم وخلاص 

كان متوقع حكم النهاردة ..
مش مفاجأة خالص ...وتخيلت انى مش هلاقى ردود الأفعال المستفزة اياها ...بس فيه ناس معينها لا ينضب 
عابوا على الاخوان التبرير -وكان عندهم حق أحيانا - ولما بقوا مكان الاخوان تفوقوا عليهم بمراحل ...انا برضه مكسوفة لكم والله 
تبريراتكم النهاردة متوترة كده ومفيهاش الروح بتاعت زمان 

تحايلتم عشان ماتجيبوش سيرة القاضى الفاشل اللى لازم وزارة العدل الميمونة تحاسبه ازاى حكمه يقع كده بسرعة من أول جلسة فى الاستئناف ؟
قلتم كل الكلام اللى معناه ان الحكم جنائى وطبيعى ومنطقى وقاضى الاستئناف أصدر حكم بيخلى الأعمى يقول القضية سياسية 
ازاى اخرج من القفص فى أول جلسة احضرها بعد جلسة الحكم العجيب ؟!

كلمنى عن القضاء الشامخ ..كلمنى عن دولة مبارك 
ماتكلمنيش ..لانك مش هتعرف تقنعنى بمنطقك المتهافت 

متخليش كرهك للاخوان ينسيك نفسك وانسانيتك وعقلك أحيانا

كنت بضحك على نفسى ان السن والخبرة هيخلونى اتعامل مع الموضوع ده بطريقة ناضجة عن كده .....لكن لا سن ولا تكرار وقوع الحدث ده بيغير منى ومن تصرفاتى ومن اللى بيعمله عقلى الباطن وقتها
الموت ...
لما حد بيموت أنا مش بعرف استوعب اللى حصل
فى الوقت الصعب اللى بعد الوفاة مباشرة أنا كنت قوية وبخلص حاجات مهمة لازم تتعمل
والناس ايه بقى ..رشا شاطرة ..عرفت تتحرك وتتصرف ..
أنا عارفة انى لا شاطرة ولا عرفت اتصرف
أنا ببقى مذهولة وعقلى بيقولى كلام وحكايات غريبة
مثلا ..
بيقولى انى فى كرب وموقف صعب ..بس مؤقت
كل ده مؤقت يارشا ..مشكلة وهيعدى وقت وهتتحل ان شاء الله
ده البيه عقلى وكلامه
المأساة ان نفس العقل ده عارف ان المشكلة مستمرة...وان اللى مات مش راجع تانى
وان كلنا هنفضل نعانى من الفراق لغاية ماربنا يكرمنا بصحبتهم من تانى
يارب ...يااااارب
لكن وقتها ...أنا باكون فى دنيا تانية
لدرجة إنى فى مرة لقيت عقلى الباطن بيعاتب اللى ماتت فجأة وشابة
ليه بقى مارجعتش ...فات وقت كتير ..وباباها ومامتها زعلانين وهى اكيد عارفة
ليه مش بترجعى بقى ...مش كفاية كده!!
لما اكتشفت ان عقلى بيقولها كفاية كده... قلقت على نفسى
وحاولت مع نفسى تعقل كده وتفهم وتتعامل مع الموت بخبرة سنها
واقتنع انى عقلت واتغيرت ...
 ومع أول حالة وفاة بعدها
 يرجع عقلى يتعامل معاها بنفس الطريقة المعتادة

عبد العزيز مات امبارح
عبد العزيز ابن خالتى
كنت عارفة انه هيموت من فترة
من يوم مالقيت شكله متغير لما زرته
مش ده شكل التعب اللى بيخف
مش دى أعراض الكبد اللى كتير حواليا شفت معاناتهم منه
هو عنده حاجة تانية ..مااتكلمتش ..والكل كان عارف وفاهم ومااتكلمش
لغاية ماأخته قالت لى بصراحة من كام شهر
 ان الدكتور فهمهم ان الموضوع منتهى
وخلاص المرض انتشر فى اكتر من مكان والكبد كده منتهى
المفروض انى اخدت الصدمة خلاص وزعلت وعيطت واكتئبت وخبيت عن ماما
وبعدين قولتلها بالتدريج ...
لكن خبر الوفاة برضه صدمنى
واستدعى كل التعامل العقلى اللى بيعذبنى معاه كل مرة
كل اللى بيموتوا بيفضلوا شهور قدام عينى بالظبط
أنام واصحى واشتغل واضحك واتخانق وهم قدامى ومعايا
الشكل والضحكة وطريقة الكلام وتفاصيل يمكن مكنتش اعرف انى واخدة بالى منها وهم لسه معانا
وعقلى ماشى نفس الطريق بقى ..ده وضع مؤقت ..مشكلة وهتتحل ...هيرجع تانى
وازهق من نفسى
يابنتى مش راجع ...يابنتى هو خلاص كده انتهى بالنسبة للدنيا
هتروحى بيتهم مش هتلاقيه ..لو اتصلتى بيه ياعبيطة مش هيرد عليكى
يابنتى خلاص الموضوع انتهى ....
لكن مفيش فايدة منى

حاجة تانية كمان 
هدى قالت لى يوم وفاة منى ...دى أول الأحزان مش آخرها
وكلامها كان صح قوى
عايزة اتكلم عن عبد العزيز الله يرحمه ويثبته عند السؤال ويهون عليه وحشة القبر ويرزقه الجنة .....عايزة احكى عنه
بس عشان اركز ..واكتب ..لازم اعيط شوية على جملة هدى 


عن الانقلاب 3

بعد الانقلاب بقى عندى قائمة طويلة للشخصيات اللى اشتركت فى الانقلاب وساعدته 
كل يوم القائمة دى بتزيد أسماء جديدة 
نيتى تجاه الأسماء دى ..انى لو معرفتش أحاسبها فى الدنيا 
فأنا هختصمها قدام ربنا سبحانه وتعالى يوم القيامة
حد متخيل أنا بكره النااس دى اد ايه
يمكن ولا أنا عارفة اوصف كم الكراهية دى
النهاردة فكرت انى بستهبل 

هو أنا هابقى فاضية يوم القيامة ؟!!!
مش كفاية هول الموقف وتطاير الصحف وسؤال ربنا عزوجل 

مش كفاية الذنوب اللى هتفضحها الجوارح
هشوف نفسى ومصيرى ولا هاقول لربنا سبحانه وتعالى  عالم الغيب على اللى عملوه 

يارب ...اجبر كسرنا وانصرنا على القوم الظالمين واسلل سخائم صدورنا 

عن الانقلاب 2

وتلاقى بروفايل كل واحد فيهم بقى عبارة عن مارشات عسكرية ونشيد الجيش وأغانى وطنية ...ومن غير ماتنطق تلاقيه بيقولك الا الجيش ياخونة 
طب ارد أقول ايه ؟!! ماهو أهلى مش موطنهم الأصلى تل أبيب والله 
بس أنا كان تصويتى بنعم فى تعديلات الدستور فى مارس 2011 عشان فترة إنتقالية قصيرة والجيش يرجع ثكناته بسلام بعد مايسلم السلطة لرئيس منتخب 
عملت حسابه والله الجيش ده وخفت عليه هو والبلد ...وأنا عارفة انه مؤسسة فاسدة زيه زى كل مؤسسات دولة مبارك...وقلت لنفسى مش مهم ..الصيت ولا الغنى هنخليه جيش منظر كده لغاية مانظبط حاجات كتير فى البلد ونصلحه براحة خالص من غير دوشة وبالتدريج ....

أنت بقى فضلت تعاير المصوتين بنعم عشان جهلة وجبناء ومغيبين ومضحوك عليهم بالزيت والسكر والمادة التانية
لكن أنا بصفتى مخطوفة ذهنيا فضلت مترقبة ومستنية الانتخابات بطريقة رهيبة ومع كل انتخابات كان فيه نكد ..زى مايكون فيه حد عنده اصرار يوقعنا مع الجيش قبل ماتخلص الانتخابات وييجى الرئيس اللى هيستلم السلطة

أنت رفضت الانتخابات واحتكرت الثورية والوطنية لنفسك و قلت لا انتخابات تحت حكم العسكر ..يسقط يسقط حكم العسكر ... زى الفل ..بحب أنا جدا يسقط يسقط حكم العسكر.. لكن هنسقطه ازاى يافندم من غير قلق داخل الجيش ؟!...أنا كنت مصرة على السلمية وانت بتتريق طول الوقت وتقول ان السلمية ماتت

معجبنيش تصرف ضباط 8إبريل وطلبت بس معاملة آدمية ليهم فى السجن وماوافقتش أبدا على خروج حد من الجيش وانضمامه للتحرير ..عشان حاجات كتير منها خوفى على الجيش ومنها انى مش ممكن استوعب ان العسكرى يروح يتحامى فى المدنى
خرجوا من غير سلاح فعلا بس كان رأيى فيهم فى أقل الاحوال ومع افتراض كتير من حسن النية إنهم عيال خايبة ومش مؤتمنة على الوطن

لكن طبعا أنت الثورى الهمام وأنا واللى زيى ربنا ينتقم منهم بتوع نعم اللى خربوا البلد
لازم تناضل معاهم والا متبقاش وطنى وفضلت تستنى وتحرض على خروج غيرهم من الجيش وانضمامه ليك فى التحرير
هتيجى النهاردة تقولى أنتِ من الخوارج ولا من الصليبين والتتار زى ماقال المسلمانى ولا خاينة بتشتم فى جيش بلدها وواقفة مع الارهابيين العملاء هاقولك راجع نفسك وبروفايلك يا ثائر مفيش منك
ضياء اللى العسكر اعتقلوه-يارب ينجيه من شرهم - كان واقف جنبى والمنصة بتهتف فى التحرير ..يسقط ..يسقط حكم العسكر ..وبيقولى مامعناه كده غلط ..البلد هتبوظ لو اسقطنا حكم العسكر بالطريقة دى .. أقوله وأنا فى منتهى السعادة بس لازم تتقال الجملة دى عشان يخافوا ياضياء
لازم يعرفوا اننا رافضينهم فيتحركوا ويسلموا السلطة لرئيس مدنى

لما العسكرى عمل الاعلان الدستورى المكمل عشان يحرج مرسى وينزع منه سلطاته ...أنت كنت مع العسكرى ساعتها عشان مرسى وحش والعسكرى حلو ومينفعش مرسى الوحش يبقى معاه كل السلطات ...لو السلطة مع العسكرى هتببقى حلوة وعسولة لكن الاخوانى لأ ...
لما مرسى بقى عزل طنطاوى وعنان ...أنت قلبت أفكارك وقلت ازاى يكرمهم؟! ..ازاى مايحاكمهش على الدم اللى سال فى عهدهم ؟؟

رد أنت على نفسك عشان أنا تعبت من الكلام ومتبقاش تزايد على وطنية حد بعد كده
عشان كده غلط

كفاية كده النهاردة

عن الانقلاب 1

دى مش معركتك 
دى معركة العسكر والاخوان 
يعنى ملناش فيها 
نكبر دماغنا ونريح نفسنا 
عشان نستعد لمعركتنا احنا بقى مع الاستبداد 
عارف لما تقف مع الاخوان ..هيسيبوك لوحدك قدام العسكر 
أول مايحسوا ان فيه مصلحة ما ..هيتفقوا معاه ويبيعوك 
أنا عارفهم اكتر منك ..يبيعوا أبوهم عشان مصلحتهم 
----------------------------------
ده االكلام اللى باشوفه مكتوب باكتر من طريقة طول الوقت 
المفاجأة بقى ..ان حساباتى فيها ده 
يعنى أنا مفترضة عشان ابقى واقعية ..عشان ابقى شاطرة ومش مغيبة 
ان ممكن فعلا المفاوضات مع العسكر توصل لمرحلة انسحاب الاخوان أو غيرهم من الشارع ....من غير ماتتحقق الأهداف اللى نزلوا وهننزل الشارع عشانها 
بس ده ميهمنيش 
آه والله لو حصل مايهمنى 
المهم أنا كنت نازلة فعلا أو معنويا ليه ؟
ومش مهم مين معايا ومين سابنى 
أنا مع صوتى وارادتى اللى العسكرى ضيعهم بجرة قلم 
مع المؤسسات المنتخبة اللى كنت هاموت عليها بعد الثورة 
أنا مع استرداد فرحتى واطمئنان قلبى 
لما مصر بقى عندها برلمان بمجلسيه ورئيس ودستور 
لمامرسى اتكلم فى خطاب جامعة القاهرة عن عودة المؤسسات المنتخبة 
والمخرج سلط الكاميرا على الكتاتنى 
مع اللى صحيوا طول الليل يناقشوا الدستور عشان نقطع الطريق على اللى دايما بيعطلونا ......وبيمنعونا نبنى لبلدنا مؤسسات ترحمها من الفوضى 
أنا موقعتش على تمرد ولا عندى ذرة ثقة فيها 
وأخطاء مرسى كانت ممكن تتعالج بانتخابات برلمانية وضغط عشان حكومة من المعارضة يشكلها حزب الأغلبية فى البرلمان
أنا مع لجنة يشكلها برلمان منتخب تعدل المواد المختلف عليها فى الدستور
أنا مطلبتش من حد يعزل رئيسى المنتخب ويعرض بلدى لفوضى 
ومانزلتش يوم تلاتين ولا وافقت على تلاتة يوليه 
والأهم بقى انى مافوضتش السيسى يقتل الناس فى الشوارع بحجة الارهاب
ممكن اعدد اختلافى مع الاخوان كان فى ايه 
بس شايفة ده دلوقتى ندالة وطعن فى ضهرهم فى أشد فترات ضعفهم
بس عمرى ماشفتهم خونة ولا ارهابيين 
ولا عمرى استسهلت الدم والغدر فى حق حد 
ولا عمرى برضه هانسى الدم اللى سال فى الحرس الجمهورى والمنصة والنهضة ورابعة على ايد العسكر
زى مانا مش ناسية دم محمد محمود وكوبرى قصر النيل والجمل ومجلس الوزراء وماسبيرو
ومش ناوية انسى ان العسكر جناح من أجنحة دولة مبارك 
ولا منظر الجثامين فى الاكفان سواء اللى لحقناها وعرفناها أو اللى اتحرقت 
أو اللى لحقنا أو ملحقناش ننقذها من جرافات العسكر 
ولو كلمتنى عن الدم فى سيناء 
هاقولك فين شغل اللى انت فوضته يقتلنا بصفته  كان مدير المخابرت الحربية ؟
ليه معرفناش من بدرى مين قتل جنودنا فى رفح قبل الفطار؟ 
ومين اللى بيستهدف الجيش والشرطة هناك ؟
وايه حكاية الطيارة بدون طيار.. وتصريحات المتحدث العسكرى كانت مرتبكة ليه ؟
وبصفته وزير دفاع حتى قبل الانقلاب ....من امتى حماس بقت هى العدو؟ 
وليه مخابراتنا مارفضتش ترشح مرسى للرئاسة مادام عندها اتهامات ليه بالتخابر؟ 
الخلاصة.....
ان كراهية بعضنا للاخوان غلبت عندهم كل رفضهم لأى شكل من أشكال حكم العسكر 
كرهوا الاخوان لدرجة انهم وهم ثوار بيطلبوا من العسكرى (دولة مبارك ) تقضى علي الاخوان 
ويبقى اللى مع الشرعية خاين وارهابى أو جاهل ومغيب 

اخلع رئيس منتخب من الشارع واعمل دستور فيه مادة بتمنع عزل الرئيس عن طريق التظاهر !!
حلو حكم العسكر 


وأخاف أعمل لايك 

عشان ممكن يكون معمول لى هايد 

آه والله 


تلاتين يونيه بكل تداعياتها ماليش فيها 
مش بتاعتى ولا بتمثلنى 
ولا ناوية اعترف بيها 

من مارس 2011 اخترت طريق نعم على تعديلات الدستور 
لأسباب كتير أهمها اقتناعى ان الفترات الانتقالية القصيرة مفيدة اكتر
               وان العسكر لازم يرجع الثكنات بسرعة وبطريقة سلمية    


عينى دمعت وأنا فى اللجنة 

عشان عايزة لمصر دستور جديد 
بس المصلحة كانت فى التعديلات 
ده اللى أنا مقتنعة بيه من ساعىتها 


كنت مؤيدة جدا جدا لمسار الانتخابات 

عشان البلد تبنى مؤسساتها والعسكر يرجعوا بسلام 
وابقى ابطلت كل حججهم 
وفاتيما تقولى مش هيمشوا بالانتخابات 
ابص لها وابقى مقتنعة برأيها 
وأقولها ربنا يستر 

الصدمة كانت فى تصرفات النخبة
 اللى اصرت على فترة انتقالية طويلة 
تحت ادارة نفس العسكرى ..
اللى بيهتفوا ضده ..يسقط يسقط حكم العسكر 
لمجرد بس ان الانتخابات دلوقتى معناها فوز الاخوان 
لانهم على الارض من زمان واتقنوا لعبة الانتخابات 
ونرهن البلد عند العسكرى مش مشكلة 
لغاية مانستعد احنا 


مكانش فيه أخطاء من الاخوان ؟؟ 

ياااه كتيييير ...وحافظينها كلنا 
بس أنا مالى ...أنا عايزة مسار الانتخابات ده



حتى الشورى ..نزلت المرتين وباصرار 

ليه يابنتى ؟ 

دول اللى هيختاروا أعضاء تأسيسية الدستور 
وعايزة أقول يارب ...أنا عملت اللى شوفت انه صح 


اكتئبت لما عمر سليمان رشح نفسه 
اكتر من زعلى من ترشح شفيق 
ازاى عمر سليمان يفكر أصلا يرشح نفسه 
احنا فين هنا؟! ...
عشان نختار اللى قالنا عودوا الى دياركم !


اكتئبت تانى 
لما العسكرى عمل اعلانه الدستورى المكمل 
وفرحت قوى بعزل طنطاوى وعنان 


ومكانش عاجبنى مرسى 

بس بعد صدمة أبو الفتوح فى المركز الرابع 

مكنتش اقدر اقاطع أو ابطل صوتى 

خسارة شفيق قربى للوطن 



طيب مرسى أنا عايزاه ينجح فى ادارة الدولة 

أنا انتخبته ونجح ولازم أسانده وأعارضه 
لخبطة بقى من مرسى 

مع فشل ...مع تصرفات عجيبة 

بس وجوده قدامى أمان اكتر من العسكرى على الثورة 

وأمان طبعا عن شفيق 


تمرد ماليش فيها 
ومكنتش عايزة انتخابات مبكرة 
لان اللى عايزينها معندهمش استعداد يتعاونوا معاه 
هم من البداية عاملين حسابهم يشيلوه 

ساعدهم هو ...بس للأمانة برضه 

الاعلام كان فاجر والتحريض كان شديد 
والدولة العميقة والمش عميقة 
كانت ضده وببشاعة 


وعن تمرد ...
اخدت مساعدات كتير من الدولة العميقة 



مش عارفة اتعافى نفسيا من تداعيات تلاتين يونيه 

فين صوتى ؟
وارادتى ؟
ووقفتى فى طابور الانتخابات ؟
فين قلقى من كل حاجة ممكن تعطل الانتخابات ؟
والانتخابات البرلمانية اللى انا مستنياها 
والحكومة البرلمانية اللى هتقلل من تداعيات فشل مرسى وقلة خبرته ؟ 

مفيش ....؟!



السيسى عزل مرسى وحل الدستور 
اللى كنت بادعى ربنا كتير يخلص على خير 
مع اعترافى ان بعض المواد كانت محتاجة تعديل 
بس مستعجلين ليه 
البر لمان المنتخب مننا هيعدلها 


فين مرسى ؟ محتجز بأمر العسكرى 

طب اعتبره مبارك ياأخى 
وخلى الراجل يروح شرم يتفسح 
مش فاكرة تقريبا الجزيرة اذاعت بيان لمرسى بعد الانقلاب 
وشريط الأخبار تحت بيتكلم عن نقل مرسى لجهة غير معلومة 
ايه ده ؟!!! 
هو مين فوض السيسى ده يتصرف كل التصرفات دى ؟
شعب تلاتين يونيه؟ 

طب وأنا ؟ احنا طيب فين ؟ 

ازاى يسمح نفسه يغير خريطة الطريق 
اللى وافقت عليها من مارس 2011
الشعب معاه وكانوا أغلبية فى تلاتين يونيه ؟ 

وأنا مش معاه 
والصندوق هو الحكم بينا




آه أنا بحب الصناديق 

وعارفة انها مجرد آلية ومش كل الديموقراطية 

بس مين عنده آلية دقيقة غير الصناديق نحتكم ليها 



هيكل والبرادعى والبطريرك وشيخ الأزهر 

وكل اللى ساعد العسكرى يرجع تانى 
حسبى الله ونعم الوكيل 
مقتنعة ان خطر العسكر على الثورة كبير جدا
كبير لدرجة انى مينفعش اقارنه بخطر الاخوان 


الاعلام اللى عايز قطع رقبته 
ارتاح دلوقتى ؟؟ هيبقى هادى شوية ؟ 

حسبى الله ونعم الوكيل 


الأصدقاء الثوار 

عندهم العسكر جميل خلصهم من الاخوان ؟!
أو وحش ..بس بركة خلصنا من الاخوان

العسكرى مالوش أمان 

هيدور نفسه علينا كمان شوية 

مهما كان نبل أهدافكم 

الداخلية والجيش وعكاشة وأتباعه 
كانوا فى التحرير يوم تلاتين 

ده غضب شعبى تم استغلاله بخبث 


طب انتم راضيين بالانقلاب ده ومسمينه ثورة ؟!

ازاى مع ضابط داخلية بجح شايل صور شهداء الثورة 
ياناس الباطل كان معاكم فى التحرير 


مفيش فايدة ..



روحى مخنوقة 

روحى مخنوقة وياما صدقت الصداع القاتل بعد الانقلاب راح 
ودلوقتى بلاقينى مش عارفة اتنفس من الغضب والدم المحروق 
التعليقات انهاردة على فيس بوك عن بنات المنصورة 
رجعتنى بسرعة لعدم القدرة على التنفس دى 


صحيت فى يوم لقيت واحدة غالية عليا قوى 

علقت تعليق سخيف 

وسابت  فى الانبوكس كلام معناه 
انها مش قادرة تشوف كلامى 
حاولت بس ماقدرتش 
فعملت لى بلوك 

التانية بقى 
روحت بنفسى بروفايلها
 عشان اطمن عليها بقالى كام يوم مش شايفاها 
لقيت مارك بيقولى دى حذفتك 

شكرا يارجالة 
اخدت بلوك كتير الأيام اللى فاتت 
لكن من ناس تانية مش بنتواصل مع بعض قوى
لكن الاتنين ضايقونى
بس الغالية الاولى ...نكدت عليا قوى 
لكن مش مشكلة 
ايه الهيافة النفسية دى يابنتى ؟! ...
ده احنا ياما شوفنا


احساس انها مش بلدى ومش بتاعتى ومقهورة وماليش فيها 

أنا ماحستش الاحساس ده بالقوة دى ولا حتى أيام مبارك 


عارفة ان مرسى مش راجع

مع انى اتمنى رجوعه مش للحكم 
لكن رجوع بطريقة تقلل الاستقطاب وتمنع الاقصاء
  يبقى ليه دور فى استفتاء أو انتخابات رئاسية مبكرة 

يطمن الناس اللى بتتكلم عن الشرعية وأنا منهم 

ان الجيش بعد عن السياسة واننا احنا اللى بنقرر مصيرنا 

عن الارهاب الفكرى بعد الثورة
 والا بقيت مغيب وجاهل وخاين وغبى 
ازاى تدافع عن الاخوان ؟! 
آه ادافع عن الاخوان وادافع عن اللى يعجبنى 

والصح اللى بيعمله الاخوان اللى مش شياطين أنا معاه 
ومش هاسمح لمبارك واعلامه يحددوا لى مين عدوى 

ومش شايفة الاخوان خونة ومتهمين بالتخابر 
والشيخة ماجدة تكلم المخابرات اللى مشغلاها 

ماليش دعوة بيها
وحماس حبيبتى ونور عينى 
ومش هياخدوا سيناء 
وطول عمرهم هيبقوا على راسى هم وكل مقاوم للصهاينة 




بترغى ليه 
عايزة اتكلم ...روحى مخنوقة 

محدش عنده شوية هوا..
 لواحدة مخنوقة ومش عارفة تتنفس ؟

لله شوية هوا 

يارب افرجها علينا ..
فوضت أمرى اليك ياصاحب الأمر 


ممنوع دخول الزنوج والكلاب 

التنبيه الصادم فى عز انتشار التفرقة العنصرية فى أمريكا 

افتكرته لما دخلت مدونة 
ولقيت صاحبها عامل تنبيه ان مدونته للآدميين بس
 وممنوع دخول الاخوان 

استمروا ياجماعة 
خلونى اشوف روح الثورة الحقيقية 

عقلى الباطن عمل حاجة غريبة جدا امبارح 
انتهز فرصة انى نايمة وقدم لى حلول مباشرة قوى لمشكلتين 
واحدة منهم قديمة وحيوية والتانية جديدة لكن ملهاش نفس الاثر 
حتى وانا بحلم كنت مستغربة الحلول قوى من كتر ماهى مباشرة 
مش حلول مباشرة بمعنى مفيدة 
لا هى اقرب لحلول ساذجة وسطحية
مش لاقية معنى لده 
غير ان عقلى الباطن زهق منى 
وبيقولى انتى عايزة ايه طيب 
قالبة الدنيا ليه وكئيبة على الفاضى ليه 
القديم اتكلمنا فيه كتير وخلاص فهمنا الراحة هتكون فين 
والجديد فى كل احواله مش محتاج كل الدوشة دى 

شكرا ياعزيزى 
أنت عقل باطن حلو على فكرة

أسوأ عام دراسى فى حياتى 
سىء لدرجة انى محتارة اتكلم عنه عشان اخلص من اللى سايبه فى قلبى ومخليه تقيل ؟
ولا اسكت واستحمل وجع  دماغى  
واستحمل كمان احلامى  اللى بتعيد لى تانى كل مشاكله وأشخاصه واخفاقاته عرض تانى 
أنا كنت مستنية الإجازة دى بفارغ الصبر ومش عايزة اضيعها زى وقتى الضايع بقالى سنين على فيس بوك 
 محتاجة اعمل حاجات كتير قوى
مثلا........
عايزة اتعامل مع بعض الاشخاص بطريقة (فى فمى ماء)
عايزة ابقى طبيعية وابعد عنى القلق اللى قاتلنى بقاله كام سنة ده 
عايزة اخلص من التضارب اللى أنا عارفاه 
واسترد حاجات بتضيع وانا ببص لها وهى بتبعد وتضيع باستهتار مصطنع 
عايزة ابص فى المراية تعجبنى عيونى 
جهاد وحنان بقى ده تعليقهم الأساسي معايا 
مال عنيكى يابنتى دبلانة ليه وبتكبرك وبتدبل كل يوم زيادة ليه  ؟
اضحك طبعا وأغير الموضوع بس أنا زعلانة 
ومستغربة من حيرتى أتكلم عن اللى واجع دماغي ولا لا 
اتكلم يمكن ارتاح ولا أنا فعلا فقدت القدرة على الحكى ؟
الأيام تجاوب 

أنت العالم بالحال

مش حساسية ...دى أعراض هشاشة 

ياجابر المنكسرين 

على الحافة ..وحتى مش بتتمنى السلامة 

دموع قريبة وقلب مضطرب يرجو السكون 

بيتكلموا عن حد تانى 

والروح المرهقة 

وملهاش نفس 

خلى بالك عشان هم زعلوا ...

يزعلوا بقى .....ده حرث فى بحر