الجيش والشرطة إيد واحدة

شغلت نفسى فى استرجاع حالى بعد حادثة البدلة 
لغاية ماشفت اخر فيديو تعذيب على فيس بوك 

ايه ده 
هو اللى بيسمح لنفسه يضرب ويكهرب ويهين أى كائن حى
 ممكن نعتبره كائن حى برضه !
ولا هو بيوصلنا رسالة ان اللى يقدر على حاجة يعملها 
طب مااحنا سيادتك قدرنا من كام شهر كده ولا نسيت 


ايه كم الاستمتاع اللى كانوا حاسين بيه 
وكان ظاهر على شكلهم وتصرفاتهم طول الوقت !!
هى الناس دى ينفع تتعامل مع البشرمن غير حواجز كده ؟؟
دول خلاص عدوا مرحلة ان التأهيل النفسى ممكن يجيب نتيجة معاهم 


طب محدش بلغهم ان البلد دى قامت فيها ثورة 
وفى يوم عيد الشرطة كمان
وكان من أهم أسبابها لا انسانيتهم فى المعاملة 
ولا نسيوا يوم الهروب العظيم فى 28 يناير 


ولا المسلسل البايخ أحداثه بقت بتجرى بسرعة كده ليه 
وتفعيل الطوارىء فتح نفس الداخلية للشغل قوى 
ماهو أصل فيه ناس كده بتتخنق من جو الحرية 
ومتعرفش تعيش ولا تشتغل الا فى جو الارهاب 
ارهاب غيرهم طبعا 


طب وبالنسبة للاخوة فى  الجيش 
ايه يعنى 
ايه النظام ؟
هو حضراتكم برضه علموكم فى الكلية الحربية 
ضرب القفا للمواطن المصرى يبقى ازاى؟
وايه أفضل السبل لكهربته علشان يعترف 

أنا حاسة ان الثورة كانت فرصة جميلة
 لتحسين العلاقات وإزالة الضغائن القديمة مع الشرطة 

وبعدين هو الضرب بالقفا لذيذ ...صح ؟؟
كهربة البلطجى ممتعة ؟؟

انك تضرب بمنتهى البشاعة واحد ميقدرش يضربك
 دى حاجة بتسعدك ؟؟...واضح يافندم 
 أصل اللى ميعرفش من الاساس معنى الانسانية.
نعلمهم احنا الانسانية ازاى 


البشاعة الحقيقية بقى 
انك تلاقى التعليقات من عينة يستاهلوا 
ده بلطجى واللى بيتعمل فيه حلال 
هنا بقى بلاقينى تعبت بجد 
ماهو مينفعش نفضل نهاتى طول عمرنا كده 

هو مش حضراتنا برضه أتباع ديانات سماوية 
فى الكتاب المقدس لحد فينا
 كلام عن تعذيب البلطجى وانتهاك انسانيته ؟؟
أصل أنا واثقة ان اللى بيعبد بقرة 
هيتكسف يكتب فى كتابه عنها ان تعذيب البلطجى  حلال 

البلطجى ياسادة والسفاح والارهابى 
وكل التوصيفات اللى ممكن تخطر على بالكم 
مش الحق ولا الصح ولا الانسانية 
مهما كانت جريمتهم انهم يتعذبوا 

الدين كما أفهمه حضراتكم 
انهم يروحوا لقاضى 
والقاضى لو استقر فى يقينه جرمهم
يحكم بحكم ربنا فيهم 
الحكم الشرعى معروف 
ومش بيحكم بيه خريج شرطة أو حربية 

البلد دى عمرها ماهتحس ان قامت فيها ثورة 
الا لما الكل يتعامل نفس المعاملة 
اللى اسمها إنسانية دى 
بمزاج حضراتكم أو غصب عنكم 
صدقونى بمزاجكم أو غصب عنكم 

على فكرة أنا مكنتش موافقة 
على ربط بلطجية التحرير على النخل 
ولا ضربهم وتعذيبهم 
واللى عرفته ان كتير من الثوار كانوا رافضين الفعل ده 


7 التعليقات:



Ramy يقول...

أولا تعليقى على البدلة

فيلم بااااايييييخ جداً

مش عارف هما لسه فاكرنا هُبل و لا هنفضل نصدق و خلاص

.............

أما للضرب انا مشفتش الفيديو

بس أنتى قلتيها هما عدوا مرحلة العلاج دول يسيبوا الدنيا كدة حد جديد نضيف يمسكها

..........

التحرير و النخل

برغم كتير عارضوا بس حصل

و حصل ليه لأن أكتر من 30 سنة و احنا بنتربى على كدة و محتاجين فترة علاج و نقاهه

..................

فاتيما يقول...

والله يا فيدو
اللى ف الفيديو دا واحد على مية م اللى بيحصل من انتهاكات ولا نراها لكن بنسمع عنها بس
وخيالنا بيتوجع لما نحاول نستشعرها

هولاء ليسوا ببشر
كل الاديان والأعراف بتقول
انك لو ف حالة حرب ...
انتا ملزم بحماية اسيرك وعدم امتهانه
أسيرك
اللى كان عدوك من لحظات
اللى لو اتواربت عنه هيقتلك ...
لكن
ما دام رهن سيطرتك
تبقى ملزم تحافظ عليه

هذا عدو وطنك
طب نقيسها بقى على اللى مش عدو ولا نيلة وواحد حظه العثر وقعه تحت نفوذك ....

يبقى تتقاس ازاى


الفيديو دا مجرد حاجة خفيفة
وماخفى كان أبشع

بالنسبالى مكنتش جديدة
الشرطة العسكرية سوابقها معروفة
ومعروف انها داخلية الجيش
زى المخابرات الحربية ماهى أمن الدولة كدا ...

ربنا ياخدهم الكل كليلة
ونرجع نبنيها على نضافة


انا بفكر بتفكير عبيط وساذج
وبقول
يا ترى كل نفر ف الفيديو دا
منظره ايه دلوقتى قصاد اهله واصدقائه وجيرانه والبنت اللى بيحبها وولاده ..الخ الخ

طبعا كل واحد هيبرر
ويقول دول مجرمين
مدمنين
أى نيلة

بس يعنى
دا لو قتال قتلة
انتا ملزم تحميه م الأذى
وملزم كمان قبل ما تحميه
تضبط نفسك
وتبقى راجل
راجل بجد
مش راجل بصاعق كهربا
وكف بيلطش ف خلق الله ...


التفسيرات اللى بقراها ف المقالات وبتتجسد اهى صوت وصورة وفعل ...

مبارك ربنا ينتقم منه ويورينا فيه اياته وعبره ...
جّرف هذا البلد و أفسد اخلاقياته ومبادئه وقدامنا وقت عقبال ما كل دا ينضف ...

ان شاء الله هينضف
ورانا ايه غير كدا ؟!!!


لو جاية بكرة ...
انتى عارفة مطرحى ...
:)
بوساتى وحضونات يا حبيبتى

شمس النهار يقول...

موضوع المشير والبدلة والهنكره اللي حصلت دي
ماتدخلش في زمتي ببصلة
وعلي راي واحدة صحبتي
قالت لي بيفكرني بأغنية هابطة بتقول تعبتني وياك ياغزال
والصبح بدلة والعصر بدلة طب قولي قبله ناويلي علي ايه
:))))))
ضحكتني الصراحة
اما كلبات التعذيب تصدقي ماقدرتش اكملها
ولأطبعا مش بني ادم اللي يقدر يسحق كرامة بني ادم مايبقاش بني ادم
ونقول يااااااااااارب
وننزل بكره

حفيدة عرابى يقول...

أستاذ رامى
أهلا بحضرتك
فيلم بايخ بس لخبطنى وشغلنى ونكد عليا ووترنى

الفيديو زعلنى كم الاستمتاع فيه
ازاى ابقى برتكب فعل بشع كده ومستمتع وبتصور
الابشع زى ماقلت ان لسه فيه ناس موافقة وبشدة على اللى حصل
وشايفة ان البلطجى يستاهل
وده محتاج تعب وشغل كتييييير على ماتزرع فى الناس ان مش حقك أبدا تهينهم بالطريقة دى

نورتنى يازميل

حفيدة عرابى يقول...

طمطم
تعليقك ماينفعش يتعلق عليه ياجميلة :)
لما نتقابل بكرة ان شاء الله نقطع فى فروتهم براحتنا بقى
بوسات وحضونات مؤقتة ان شاء الله

حفيدة عرابى يقول...

شمس هانم
طب تسيبينى كده ياشمس هانم من غير ماتقوليلى الاغنية دى :)
ده انا على اخر اليوم اللى بعد البدلة كنت خارجة لقيتنى بالبس كيس الشراب وسايبة الشراب جنبى

وننزل بكرة ان شاء الله يافندم :)

مهندس مصري يقول...

متفق معاكي في كل كلمة