آه يابراح عمال بيضيق


من قال لا فلم يمت 
وظل روحاً أبدية الألم 

------------

ممكن تستوعب يامجلس العسكر 
لو قلت لك 
ان روحى مخنوقة من وجودك 
وانى اكتشفت ان مجرد متابعة أخبارك 
فضلا عن مناقشتها 
والقلق من تصرفاتك على البلد 
اللى هنفرح بيها بإذن الله
بيقضى كل يوم على جزء من روحى 
و انى معنديش غير روح واحدة 
وخايفة حتى بعد ماتمشى 
معرفش ارجع اللى ضاع منها بسببك 

--------------

يارب تكون الغُمة دى 
زى أجواء الخطاب التالت و(سأظل )
وفرجك دايما قريب يارب 

17 التعليقات:



ابراهيم رزق يقول...

و اللى بيقول اه بيرتاح قليلا

اشعر ان مبارك تحول الى مجلس عسكرى
نفس التفكير و الجمود
يعنى ايه يمنعوا التصريح بقنوات جديدة
يعنى غلق مكتب الجزيرة مباشر و فى الطريق 16 قناة
و غدا هيقطعوا الاتصالات و النت
لا يتعلمون

قولى اه يمكن ترتاحى
مع انى عمالة اقولها لا ارتحت و صوتى اتنبح و مش قادر يطله الاه
تحياتى

لورنس العرب يقول...

تفتكري لو كان هناك "مجلس رئاسي" كان سرضى عنه الناس؟
هل المشكله في الموجودين الان انهم يرتدون البدله العسكريه؟

يا مراكبي يقول...

الحل اننا نسّرع رحيل العسكر دول بأي شكل

مش مهم البحث عن الكمال دلوقت في كل شيء .. الكمال لله وحده .. ومافيش حاجة هتتعمل صح 100% من أولها كده واحنا لسه في سنة أولى حرية .. ويمكن كي جي وان كمان

:-)

حفيدة عرابى يقول...

أستاذ ابراهيم
أهلا بحضرتك
بس احنا اتغيرنا عن أيام مبارك :(
امبارح كان يوم عصيب من أول عدم حضوره للمحكمة ..مع قانون الطوارىء الليلة اللى قبلها ...كتير
عايز يرجعنا لورا واحنا معاندين وبثبت رجلينا فى الارض بس بيساعد الاكتئاب ضدنا
ربنا يكشف الغُمة
تحياتى لحضرتك

حفيدة عرابى يقول...

لورنس العرب
أهلا بحضرتك

فكرة المجلس الرئاسى دى كانت حلمى فى ال18 يوم بتوع مبارك
لما الدنيا كانت حلوة قوى ويمشى هو بس واحنا هنعمل ونصلح كل حاجة
وتراجعت عنها لسبب واحد بس علشان البلد دى متتأخرش بسببنا واحنا عايزينها تمشى لقدام
علشان هنتخانق على الاعضاء فى المجلس وطريقة اختيارهم
لكن لو فى ظروف تانية الفكرة نفسها مش وحشة

مشكلة العسكر مش البدلة العسكرية
مشكلتهم انهم تربية مبارك ونظامه واحنا ماشيلناش مبارك علشان نكمل حياتنا مع عياله وتربيته

تصرفاتهم الكام شهر اللى فاتوا واضحة للكل
الناس دى بتخلى الثورة مجرد أحداث خلت مبارح يسيب قصره وبس
وسايبة مليون مبارك فى كل حتة مخليانا مش عارفين نتنفس

أنا رايحة الشغل دلوقت وعندى مدير جديد تربية مبارك
وبعد بكرة رايحة انتخابات النقابة وأبرز المرشحين برضه تربية مبارك
هرمنا بقى من أجل هذه اللحظة اللى يفارقوننا فيها

تحياتى لحضرتك

حفيدة عرابى يقول...

باشمهندس أحمد
أهلا بحضرتك
يمشوا امبارح معنديش اعتراض خالص
الله يصبحه بكل الخير المستشار طارق البشرى
هو اللى خد دماغى فى السكة دى من أيام الاستفتاء وقال ده أحسن حل فى الظروف دى
قللوا فترة وجودهم معاكم ويمشوا
وكل حاجة هتتصلح من غيرهم

يارب

صحيح احنا متلخبطين خالص بس حلوة برضه
كى جى وان حرية والله ..تستاهل تعب الاعصاب ده :)

تحياتى لحضرتك

فاتيما يقول...

لأ
مش طالبة يأس خاااااااااااالص دلوقتى

مالكم يا عيال

انا مالى شكلى هطلع الوحيدة اللى متفائلة ليه كدا ؟؟!!!!

انا شايفة الحاصل نذير خير
مش شر
الغباء المعتاد اللى هينقلب بسحره على الساح
هيا عادتهم ولا هيشتروها يعنى ؟؟

بلاش الإحباط دا

يا جماعة
الشر لا يقتل بضربة واحدة
والحرب جولات

والمجلس ديل مبارك
واحنا عاوزين نسقط النظام

اللى نفسه انقطع
ياخد جنب ويريح شوية
اللى اصلا ملوش ف الثورة
ينقطنا بسكاته
اللى بيهاجمها م الاول
يجعجع كالعادة ولا فارقة

يوم الجمعة ف الميدان
بنوتة اسمها فاطمة معرفش تفتكريها يا فيدو ولاّ لأ ...
المهم انى بشوفها كل مرة
بعد صلاة الجمعة وهتاف الميدان
واحد اتنين الثورة راحت فين
سألتنى ...
وبعدين ؟
قولتلها ولا قبلين
احنا زى مااحنا
وهما زى ما هما
والحرب شغالة ولن تهدأ
واللى فاكرها فسحة وهتخلص
او الإحباط هيقتلنا ...
يبقى بيحلمممممممم


نفضى عنك الهم يا فيدووو
والبراح شكله بيضيق صحيح
بس وحياة البلد الله
لهيضيق عليهم هما
مش علينا


الوحش يترنح ف ايامه الاخيرة
واحساسى دلوقتى
نفس احساسى بعد الخطاب التالت بدقايق زى انتى ما قولتى

ساعتها
كلمتنى بسكوتة وهيا مفلوقة م العياط
وبتقولى خلاص مفيش فايدة
معرفش ليه قولتلها بثبات رهييييييب
وحياتك ليمشى
ومش قاعد فيها
كنت بقولها بثقة ويقين
وكأنى بقول اسمى كدا ...


انا النهاردة بقولهالك انتى كمان
زى ما قولت لبسكى

وحياتك لتكون آخرتهم
ولو طال الوقت

والبراح هيضيق عليهم
ان شاء الله


طولة البال والصبر بس
وبلا احباط والنبىىىىىىىىىى


الحاضرين ف اسكنكرية سألوا عنك يا جميل واولهم رانيا ليس فقيرا من يحب وكلهم كلهم ....

المرة الجاية تكونى معايا بقى


سلامى وحبى
وبوساتى وحضوناتى
و خديلى حتة تكون جنبك ف البراح ....

حفيدة عرابى يقول...

طمطومة
أزيك ياحبيبتى عاملة ايه :)
شوفى ياستى ماهو أنا هاشرح لك الظروف

البوست كان بعد جولة مريرة وطويلة بقى من تويتر لفيس بوك
فطبعا تأثيرها كان روح مخنوقة بشدة
عادى شوية وبتفك لوحدها ماتقلقيش

النهاردة طبعا مش قادرة أقاوم وعملت نفس الجولة ولسه بخطى فى المود اياه
تلاقى ربنا بعت لى أخبار من بعيد كده جميلة وتحسى انها مدد

حالا الحمد لله أنا متفائلة :)
لكن ده ميمنعش انهم يخنقوا برضه دى حاجة بديهية :)

كان نفسى جدا ابقى معاكم والله بس النصيب بقى معلش
تتعوض مرة تانية ان شاء الله

بوسات وحضونات كتير كتير :)

Ramy يقول...

ما ضاقت إلا لما فرجت


هما بيحطوا نهيتهم بأديهم

تصرفتهم عامله زى المخلوع فى نهاية ايامه

و المشكلة انهم مبيعلموش و لا يمكن علشان مدرسة واحدة

sony2000 يقول...

والله من كتر ماالواحد بيفكر مش عارف يقول ايه؟

well يقول...

اممممممممم ..
الاستيعاب بقى بيقل
وفرجك ديما قريب يا رب


...
تحياتى

مهندس مصري يقول...

بيحفروا قبورهم بإيديهم

حفيدة عرابى يقول...

أستاذ رامى
أهلا بك :)
مدرسة واحدة ..هما مش هيتحركوا غير لما الفرقة اللى زادت بينا من يوم ماشرفونا تخلص بقى ونعرف ان حماية البلد دى من حكم عسكرى أهم من مناصب وانتخابات عايزين نكسبها

تحياتى لك يازميل

حفيدة عرابى يقول...

سونى
ربك فى التدبير
شرفتينى ياجميلة

----------
ويل
الخوف بس ان العسكر تعجبهم القعدة معانا هو سبب الوجع فى الروح
تحياتى لك

---------

باشمهندس محمد
ايدى على كتفهم :)
تحياتى لحضرتك

norahaty يقول...

وفرجك قريب يارب
المهم هل ياترى لما
يحصل الفرج دا باذن الله
حنرضى عنه ونرضى به ولا
حنفضل كدا تايهين ومتلخبطين
من كتر ما قرانا وشوفنا وسمعنا
وحللنا و(اتحللنا)!!!!؟
الصراحة مش عارفة!
هل سأصدق اى
إنسان
يتصدى للقيادة
أن قلبه على البلد
بعد كل اللى جرى؟
وبعد ما أنكشف
المستور فى
كثير من
الأمور

حفيدة عرابى يقول...

دكتور نور
ازيك يادكتور
اسفة على التأخير فى الرد
ماتقلقيش يادكتور اللخبطة اللى احنا فيها طبيعية
هو احنا كنا عملنا ثورات قبل كده ؟؟:)
واللى جاى لازم يبقى عارف انه هيتحاسب أول بأول ومش لازم نثق فيه بمعنى اننا نسلمه البلد بسهولة
موظف عندنا ونتابعه ونشوف شغله
شرفتينى يادكتور :)

المعتصم يقول...

السلام عليكم ورحمة الله وبركاته
ايه ده
اسيبكم شوية ارجع الاقى البراح بيضيق
لأ ماينفعش كده
طب والامل فى بكرة الواسع اللى كله براح بإذن الله
راح فين الامل ده
احنا ماصدقنا قلنا اننا اتغيرنا
طبيعى جدا جدا جدا انه فيه ناس تحاول ترجع بينا لورا وتضايقنا بس احنا لازم نتحمل ونكمل
مش كده برضوا
لانهم مهما عملوا مش هيقدروا يرجعونا تانى للى كان زمان
****
المهم انتى عامله ايه
اخبارك ايه
يارب تكونى بخير وفى احسن الاحوال
****
ســــــــلام