يعنى نسكت ؟!
ناكل ونشرب ونروح الشغل ونرجع نشوف فيس بوك وننام 
وخلاص على كده ؟
منحلمش ؟ 
يعنى مطلوب مننا ننسى ؟ 
واللى مش قادر.. يعمل ايه ؟

محدش يسكن فى العمارة اللى فى الشارع اللى ورانا 

العمارة اللى فى الشارع اللى ورانا فيها حاجة غلط
مش فضول ولا تطفل اللى خلانى اعرف ده وأقوله
لكن الصوت عالى
أنا ساكنة فى بيتنا ده من 34سنة والعمارة دى غريبة بجد 


أولا : السكان فيها بيتغيروا بسرعة
الكلام ده من أيام الايجار القديم اللى السكان فيه بيعمروا فى الشقق زينا كده 

مش الايجار الجديد هو السبب خالص

ثانيا : مش ممكن على كم الدموع والصراخ والتهديدات والخناقات والطلاق اللى تم فى شقق العمارة دى
تقريبا مفيش شقة فيها كانت مستقرة فى حياتها الزوجية
لو فيه زوجين مااتخانقوش مع بعض خناقة رهيبة فيها ضرب وبوليس ومأساة يعنى
يبقى الجيران مع بعض يحسوا ان فيه حاجة غريبة فيقرروا يتخانقوا مع بعض خناقة من اياهم 


ثالثا: رجالة العمارة دى أوالرجال سكان  الأدوار اللى بتكشف أوضتنا فى منتهى الصفاقة
متهيألى يتعدوا على الصوابع اللى ماحصلش فى مرة وظبطت حد فيهم بيتلصص علينا 

جدير بالذكر انى مخلية بالى قوى والشباك لو مفتوح بتبقى الاوضة زى البلكونة أو الصالون اللى فيه ضيوف بالظبط
يعنى مفيش حاجة تشجع حد على التلصص البغيض ده 


دلوقتى أنا عايزة أنام واطفى التليفزيون بس الخناقة الرهيبة الجديدة
اللى فيها طفل بيصرخ برعب على بكاء وعويل والدته خلانى حذفت البوست اللى كنت بكتبه عن أحوالنا السياسية الجميلة الرائعة
وخليت التليفزيون زى ماهو بصوته العالى  عشان مبقاش تلصصت عليهم بطريق غير مباشر لو قفلته ..

حتى لو التليفزيون كان فيه أحمد موسى وبعده رولا خرسا

الخلاصة ..محدش يسكن فى العمارة اللى فى الشارع اللى ورانا 

اللهم ثورة

ماتركزوش قوى مع الناس فى موضوع الكهربا اللى بتيجى أحيانا
آه مفيش مانع ننبه ان كان فيه افترا ضد مرسى فى موضوع طوابير البنزين والكهربا
بس دى كانت عوامل ثانوية
لان الاعلام فى خطته الشهيرة كان بيعتمد على الكهربا والبنزين كعوامل مساعدة
لكن أساس الخطة كان اكبر من كده
الكلام كان عن الجيش والحدود والمستقبل والبلد اللى هتضيع لو الناس وافقت ان الاخوان يحكموا
شلاتين اللى مرسى سابها للسودان وقناة السويس اللى راحت لقطر والآثار اللى اخدتها الامارات والنيل اللى النجاشى هياخده خلاص
أنا فيه واحد محترم فضل يقسم بالله كتير وانا اقوله بس ماتحلفش ان مرسى باع سيناء  للغزاوية وجابوا الخيام وقعدوا فى أرضهم الجديدة خلاص .
دولة مبارك اللى بتحكمنا دلوقتى مش غبية ومش هتغلب يعنى عشان تدى الناس مسكنات لأزماتهم الطاحنة
دولة مبارك اللى بتحكمنا دلوقتى هتقنع الناس يستحملوا عشان فيه أهداف اكبر هتتحقق
ايه يعنى لما تستحمل الغلاء وغيره مقابل اننا هنحميك من الارهاب وهنحافظ على هوية الدولة وهنحمى حدودها من الأعداء
يبقى الصح اننا زى مابنتكلم فى تفاصيل الحياة اليومية ..نتكلم برضه فى الكلام التانى
قريب -وربنا يخلف الظنون -أنا مش متوقعة ان ثورتنا اللى اتسرقت ترجع تانى بسرعة
بس مش مشكلة ..هو أنا على الأقل كنت اتخيل انى هاعيش لغاية مااشوف ثورة ضد مبارك ونخلعه هو وابنه ونخلص من الأشكال دى ! صحيح الأشكال دى لسه بتحكم برضه بغض النظر عن الوجوه والأسماء ...لكن بعد اكتئاب ويأس لازم نرجع للمبدأ الصح
ان اليأس خيانة ...

مبدئيا السؤال اللى هتناقش فيه بصفة مستمرة
ايه الخطر اللى كان بيهدد الهوية المصرية ؟
هو مين عدوى الحقيقى ؟ 

الصف الثورى

من المفارقات الغريبة ان الناس تكلمك عن نقاء الصف الثورى وتعيب على الغريم السياسى تعاونه مع أعداء الثورة وبعدين مع الأسف ..مع الألم تعمل نفس الشىء 

لما البرادعى عمل جبهة الانقاذ انقاذا للبلاد والعباد من ديكتاتورية مرسى دخل التحرير وايده فى ايد السيد البدوى وسامح عاشور وغيرهم من رموز الفلول
ياعالم الرحمة حلوة ..طب هنتكلم بعدين فى مرسى واعلانه الدستورى
ازاى يابرادعى ياضمير الثورة... يابوب... تخذل الثورة كده؟! ..
التحرير ؟! أنت والفلول ؟!
طبعا الانتقاد ده مش ممكن يمر كده بسهولة
لان بسرعة سمعت الرد عليك من ان مرسى هو اللى عين الفلول وهو اللى كرمهم واداهم قلادات ...الخ
وكمان دى سياسة وميكيافيلى الله يحرقه وضح ده فى كتابه الشهير

وصلنا بقى للموقف التانى
تلاتين يونيه ...عند اللى شايفينها ثورة
ياناس ده الفلول موجودين بكل أطيافهم بلا استثناء !
ده حملة شفيق موجودة!
فيه ناس بايتة بقالها كام يوم عند وزارة الدفاع ومش بتهتف غير انزل ياسيسى
الداخلية كانت معاكم فى اليوم ده
آه والله الداخلية اللى الثورة أصلا قامت عشانها 
هى هى الداخلية اللى أنتم ناقمين على مرسى ان مكانش عنده خطة لتطهيرها 
أنتم نازلين تشيلوا مرسى لانه قال للداخلية أنتم فى القلب من ثورة يناير 
هى الداخلية اللى قتلت جيكا والجندى
الجميل بقى ان الداخلية كانت لذيذة فى اليوم ده ورجالها شالوا صور الشهداء 
كان من المشاهد العبثية الكتير للأسف اللى مش عارفة استوعب انى عشتها لغاية النهاردة ...تقريبا زى ماقال صديق ان كل فرد داخلية كان شايل صورة الشهيد اللى قتله 

الجيش بقى دلع (المتظاهرين)  على الآخر
رقص فى الشارع مع البنات بالزى العسكرى
تقريبا الشرطة العسكرية كانت نايمة وقتها 
كوبونات هدايا من فلوس باباه على حبايبه فى التحرير
كان فاضل الطيارات تكتب للمتظاهرين فى السما ..بحبكم كلكم
طيب كده الصف الثورى كان نقى ؟!
هو راح فين الصف الثورى فى الهم ده أصلا!

المهم كان الرد الرهيب واحنا مالنا بغيرنا ؟ احنا نازلين لأهدافنا احنا ومنقدرش نمنع حد ينزل يعبر عن رأيه
وبعدين مرسى هو السبب ِ

المنطق قبل ماينتحر قال انكم كده بتزودوا عددهم ..بتحققوا لهم أهدافهم هم
كان الرد ...امممم ...المهم نشيل مرسى والاخوان والشعب العظيم اللى نزل الشارع ده هيفرض ارادته على الفلول 

وحصل اللى حصل
ولان الأعزاء بجد اللى دارت بينى وبينهم الحوارات دى ثوريين فعلا
ولانى اتكلمت عن الناس اللى مقدرش ازايد على وطنيتهم
بسرعة ماعجبتهمش الأحداث بعد تلاتة يوليه
بسرعة فهموا ان فيه ترتيبات لحاجات مش ممكن هترضينا بتتجهز
وبدأت اعتراضاتهم تظهر
فرحت بقى ومعنوياتى بقت فى السما وقلت ننزل بقى نقاوم نظام مبارك اللى راجع بقوة ده
الحمد لله الصورة واضحة اهى
لقيت الرد التالى ...
الصف الثورى مش نقى
الاخوان هيكسبوا من نزولنا ..هيرجعوا السلطة تانى لو وقفنا معاهم ضد العسكر
هيستغلوا عددنا وحراكنا لمصلحتهم
لأ مش هينفع خالص نزول
الصف الثورى مش نقى

طيب 

الرقص ضد العنف

كانت ايه رسالتك اللى عايزة توصليها من الرقص فى الشارع ؟

 لمين الرسالة ؟ 


وصلت ؟ 


تابعتى ردود الأفعال وتأثيرات الرسالة دى على حد غير الصديقات اللى شاركوكى الرقص
أو الأصدقاء على فيس بوك وتويتر ووسائل الاعلام ؟ 


نجحتى ؟ 


ايه معيارك للنجاح ؟ 

أنتِ حرة؟ 


دينيا شايفة انك اتصرفتى صح ؟ 


فكرتى فى طرق تانية ممكن توصلى بيها رسالتك ؟ 


شايفة ازاى اللى انتقدوا تصرفك ده ؟

اليأس خيانة

أنا فاكرة ...
المواطن السودانى اللى نزل يرقص فى الشارع بعد بيان التنحى 

والمواطن السودانى التانى اللى كتب رسالة لقناة الجزيرة وبيقول لمصر فيها :والله أم الدنيا وأبوها كمان ...فيه كتب تاريخ ممكن نخليها بس عن أسباب اعتقاد المواطن ده ان مصر أم الدنيا وأبوها كمان ...مهما جار الزمان 

وماما لما هيصنا بعد التنحى ونظرتها لينا وخروجها من الاوضة عنيها مدمعة مع انها كانت بتتمنى اللحظة دى زينا ....الشعب العاطفى ده اكبر دليل على ان مبارك خسرنا ....آه والله العظيم بعد التلاتين سنة هو الخسران مش احنا ..كان ممكن بينا ومعانا يعمل دولة مالهاش مثيل ...لكن هو احتقرنا لدرجة انه بعد كل الفساد كان عايز كمان ابنه يكمل معانا 

انى كنت اتمنى من مبارك خطاب على غرار (فهمتكم ) أو يحترمنا ويعتذر على اللى حصل فى البلد فى عهده من غير (لم أكن أنتوى) وحركات الذئاب دى 

زغاريد -هى اسمها زغاريد فعلا ؟ - نوارة على الجزيرة ..ومفيش خوف تانى ومفيش ظلم تانى ..مع اننا لسه فى نفس الخوف والظلم ..بس ولو ..اللحظة دى ماتتنسيش وفيها أمل

انى كنت خايفة من عمر سليمان وشايفاه أخطر من مبارك والشريف وسرور وكل العصابة ولما قالوا ان عمر سليمان من مرشحى الرئاسة حسيت باكتئاب رهيب وان اللى اقترح عمر سليمان للرئاسة تعمد اهانتى بطريقة بشعة .....وبعدين عمر سليمان مات ...آه وربنا مات ..عادى خالص يعنى ...زيه زى غيره ..ومش شماتة فى الموت ابدا ...بس انا بهدلتنى أيامها ...كنتِ خايفة منه ليه ياهانم ؟! ليه بنى آدم مهما كانت سطوته ممكن يخوفك كده وهو اصلا بنى ادم ....يعنى ضعيف زيه زيك وميقدرش يرد ملاك الموت زيك بالظبط 

تترات الجزيرة واختيارها لمقتطفات من خطب عبد الناصر والسادات ومبارك 

أم كلثوم ربنا يسامحها ويغفر لها هى والجزيرة ال18يوم بعيط لما اسمع ..أنا ان قدر الاله مماتى ..لاترى الشرق يرفع الراس بعدى ...
برضه دى ممكن يتعمل فيها كتب تاريخ 

التحية العسكرية للشهداء ...رغم كل اللى شوفناه بعدها من المجلس العسكرى ..مهما كان انهم ضحكوا علينا وان دى من خطط خداعنا ...بس برضه بحبها ومؤثرة ومفقدتش قيمتها ولا معناها 

نجرو لما كتب على بروفايله فى الجمعة اللى قبل التنحى ..
بلادى بلادى بلادى ..لكِ حبى وفؤادى 
ويومها حسيت انى رغم حبى للنشيد الوطنى طول عمرى لكن ماشفتوش قبل كده بالجمال ده 
نجرو برضه لما لاقانى باغنى بعد رحيل مبارك ..
وقال لى : رشا هانم ....رشا هانم .....مبارك رجع 

لما عمرو خدنى معاه أول فبراير للتحرير وقلت له يومها انا مش هانسى اليوم ده ....
أنت مورا حبيبى ....وقالى يبقى لما اقولك اكوى لى هدومى متبقيش تعترضى وتكوى وانتى ساكتة .....وانى عيطت واتخانقت معاه يوم التنحى وقلت له انا مش مسامحاك عشان كان نفسى اكون فى الشارع لحظة التنحى 

انى كنت هاموت بعد خطاب سأظل ..ومكنتش عارفة أنام أبدا وبحاول افسر الاعراض اللى عندى ياترى هى هتبقى بجلطة مخ ولا قلب ..وانى كنت باروح لعمرو اوضته اطمن عليه واشوفه نام ولا لأ ...الاقيه صاحى وانا عارفه انه كان مرهق جدا واقوله يابنى نام ربك هيدبرها ..وهو يقولى مش عارف اخد نفسى -ابن الكلب ده -عايز مننا ايه تانى !!

انى مكنتش متخيلة انى فعلا هاشوف مبارك فى القفص ومتوترة ومستنية الجلسة تبدأ عشان اشوف ياترى هيتحججوا باجراءات الأمن ولا هيعملوا ايه ومن أول لحظة شوفته فيها قلت لنفسى بصوت عالى ...ده هو !!!
معرفتش انطق بعدها وخصوصا بعد ماالقاضى نادى عليه وقال ...افندم ..أنا موجود 
مش ممكن على كم الدروس والمعانى فى اللحظة دى ..لدرجة انى قررت بعدها اعتبر مبارك تاريخ خلاص واتعامل معاه على الأساس ده ...بس فى لحظات الاحباط بلاقينى نسيت قرارى وجبت له القديم والجديد 

قبل ماتبدأ حفلات الندب والولولة النهاردة ...لا سمح الله الثورة مش بنى ادم مات ودى الذكرى بتاعته ...الثورة وسيلة ..لسه معرفناش نستغل الوسيلة دى لغاية دلوقت ونعمل اللى عايزينه لبلدنا ...برضه ده مش مبرر لليأس والاحباط 

لو مصر كانت دولة أى كلام ومرمية ملهاش لازمة فى أى مكان فى الخريطة ..مكناش هنشوف اللى شوفناه وبنشوفه من بداية الثورة للنهاردة 
هندفع تمن ان اللى عايزين نفرح بيها تبقى..... مصر 

اليأس خيانة يارجالة

11فبراير 2013 على فيس بوك 

يناير ...2

يناير كان فيه السيد بلال 
أبانا الذى فى أمن الدولة كلمه فى التليفون وقال له  عايزينك شوية
جهز بطانيته وراح له
كان متعود على كده
تحت كلمة (متعود) حط خطوط كتير هنحتاجها بعدين
بس المرة دى  مااستحملش 

24 ساعة ومات فى ايديهم 

لغاية النهاردة مفيش متهم فى القديسين 



فى يناير برضه 
دفنوا تلاتين جثة مجهولة الهوية 
من ضحايا مجزرة فض اعتصام رابعة 
بقالهم اربع شهور فى المشرحة
 من غير ماحد يتعرف عليهم 
ويرحمهم ويدفنهم 
تحت الخبر ده 
مسموح لك بالبكاء والعويل
 وانك تطبطب على نفسك 
وعلى كتف وقلب غيرك 
مسموح لك تتخيل حال أم متعرفش ابنها عايش ولا ميت 
وهتعيش وتموت بشك قاتل
 ان واحد من التلاتين هو الغالى اللى راح منها 
مسموح لك كمان تكتئب وتغضب وتضرب برجلك فى الأرض 
مسموح لك تشتم 
بس كل ده مالوش لازمة 
لو مافهمتش انه ...

من أجل هذا خلقت الثورة 


فى يناير كانوا بيقولوا ..ارفع راسك فوق أنت مصرى 
وأنا صدقتهم 

عن يناير ..1

شِوف يامحمد ياخويا هاعيش عمرى اقول يارب ارحمه واغفر له وارزقه الجنة 
يارب زرع فى قلوبنا الأمل بألم الاحتراق 
يارب اغفر لحظة اليأس بحق الألم اللى طهرته بيه 
يقولوا الثورة راحت ..أو اتسرقت أو ماتت يامحمد ..وتلاقينى ساعات من همى أقول معاهم ..بس افتكرك وأقول لأ 
والله يامحمد كان نفسى أشوفك واحكى لك على اللى جرى 
عن الأمل 
عن صفوت لما قال مصر ليست تونس 
عن الأمل تانى وتالت وعاشر يامحمد 
عن فهمتكم ..وعن الحرية للتوانسة 
عن هرمنا يامحمد من أجل هذه اللحظة  ..وأنت يا حبيبى مشيت صغير 
عن الشعب يريد اسقاط النظام ..ونبض القلب اللى فرح ورقص واتخض وطار فى السما لما العيال قالوها فى التحرير 
هو أنا قلت لك انى كنت ممنوعة من النزول ؟
وانى كنت حاسة ان (الشعب يريد اسقاط النظام) فيها سحر 
وانى لو كررتها كتير هتتفتح أبواب السما زى مااتفتحت المغارة 
وربنا هيساعدنا ونسقط النظام 
النهاردة سيطرت على دماغى نوارة وزغاريدها ودموعها ومفيش ظلم تانى ومفيش خوف تانى 
أنا باعيط يامحمد كل ماافتكر نوارة فى الموقف ده 
أنا باعيط يامحمد كل ماافتكر ابن ال...اللى ضحك علينا لما وجه التحية للشهداء 
تعرف انى مهما زعلت من نوارة ومهما بعدت عنها مش هنسى لها انها كانت معانا فى اليوم ده 
رجعوا تانى يامحمد ...
بمنتهى البجاحة رجعوا تانى 
عارف علاء ؟ علاء رياضة ؟ بيقولى النهاردة انه عيط لما شاف فتحى سرور بيتكلم فى التليفزيون وعن الدستور ..وأنا كالعادة اتخنقت ودمعت ومنعت دموعى بالعافية 
بس مايرضيش ربنا يامحمد ...والله مايرضى ربنا 
يعنى أنت تزهق وتحرق نفسك ياحبيبى من الظلم 
وربنا يمكن من نيتك الطيبة يخليك أيقونة الثورة 
وبعد ده كله ممكن نصدق ان الثورة الحلوة  دى تضيع ؟! 
لأ يامحمد ...بحق ربنا العدل اللى ميرضاش بالظلم 
يناير حلو يامحمد ..صحيح بقاله سنتين مش بيفرحنى
بس هو حلو وربنا مش هيضيع مننا الحلم ده والأمل
الله يرحمك ويحسن إليك ويغفر لك ويرزقك جنته ويبعدك عن ناره