مين أنت ؟؟


برغم كل الظروف والملابسات
 والعوائق والمشاكل ومواعيد القطارات .....الخ 

لكن فى مكان بعيد قوى فى قلبى 
أنا عندى  يقين انى هقابلك 
اليقين ده لقيته فى قلبى بإرادة الهية 
ومش هقابلك وبس 
لأ ده أنا هقابلك و هنبقى متفاهمين
 وفى منتهى السعادة  وهنكمل حياتنا سوا ان شاء الله 
هقابلك امتى وفين وازاى وحياة ايه اللى هنكملها سوا؟؟
 وايه مبررات ومسوغات السعادة دى ؟؟
كل دى  تفاصيل مش مهتمة بيها أبدا
 القطعة البعيدة جدا فى قلبى اللى انت هناك فيها 

حياتى العادية
 أنا بحاول بكل الطرق ابعد فيها شبحك عنى ..
اشتغل شوية ..اذاكر شوية
طول الوقت بحاول اشغل نفسى بكل حاجة غيرك
 وبقنع نفسى انى عرفت ارتب اولوياتى ووقتى 
واظبط حياتى على الوضع اياه
 اللى أنا معترفة انه مش عاجبنى بس لازم ابقى راضية بيه 
وان عدم وجودك  فى حياتى دى حاجة مش كويسة أبدا
 بس أنا شاطرة وعرفت اتكيف معاها 

بس باعترف لنفسى أحيانا بينى وبينها  انى بكدب عليها
 مع كل شرارة حب بالمحها  بين اتنين بافتكرك
مع كل حزن بحسه  من ألم فراق اتنين 
كان نفسهم يكملوا سوا 
مع الرغبة القوية جدا جوايا
 ان يكون لى دور فى اسعاد كل حبيبين على الارض 
ياراجل ده أنا كان نفسى أكلم زهرة سليمان
واعقلها واخليها تبطل اللى بتعمله مع على البدرى 
ده أنا ساعات كان بيبقى نفسى أقابل ابو ليلى العامرية
 وأقوله يرحم ليلى وقيس من تقاليد بتقتل مش بتحيى 
ده أنا حبيت عمرو حمزاوى عشان خاطرك 

بيروحوا وييجوا 
وساعات بتبقى بينى وبينهم  مشاريع ارتباط 
وأحيانا كنت بحاول اقنع نفسى انى خلاص قابلتك 
وانك خلاص الشخص اللى قدامى 
بس نفسى دى..
 على اد مابتسمع كلامى كتير الحمد لله
على اد ماكانت بتعاند خصوصا فى الحاجة اللى تخصك 
أصلى استخارة واحلم الحلم اياه 
واعرف انه مش أنت 
واضحك على نفسى واصبر شوية 
وافوت حاجات مش عجبانى شوية 
وبعدين اقف كتير على حاجات تانية 
مش ممكن تكون هى صفاتك أبدا 

عموما
 أنا متأكدة انك عارف الكلام ده من غير ماأقوله 
ومن غير مانتقابل 
وانك طبعا موجود فى الدنيا من زمان 

بص بقى 
هو أنت لما تيجى لازم تكون عارف شوية حاجات كده 
أولها انى رخمة جدا 
ولا تتوقع انى اعترف لك بأى حاجة من الكلام ده على طول 
ده أنت هاتشوف أيام !!
طب ليه الرخامة دى ؟؟
 مش عارفة والله 
طبع بقى هانقول ايه 
وبعدين لو انت أنت 
أكيد هتبقى عارف وفاهم 
من غير ماأبقى مضطرة اتكلم 

انت هتتعامل معايا ازاى ؟؟
دى حاجة أنا مطمنة لها 
بنفس درجة اطمئنانى ليقين وجودك 

أنت هتبقى ايه فى حياتى ؟؟
لسانى مش ممكن هيعرف ينطق 
قلبى بس هو اللى هيبقى مليان امتنان 
لربنا سبحانه وتعالى 
اللى خلق القلوب والارواح 
وخلاناعرفنا اننا هنتقابل 
وان لقانا هيبقى سكن 

لأ لأ 
كده مينفعش خالص 
أنا مش هاتكلم تانى دلوقت
انت كده هتعرف عنى حاجات كتير 
أنا عايزاك تبقى عارفها لوحدك 

مين أنت ؟؟
معرفش 
فين أنت ؟؟
معرفش 

بس مش قلقانة خالص على فكرة 

13 التعليقات:



حفيدة عرابى يقول...

بوست جميل جداً

وأحب أُؤكد ليكي إن بالفعل ربنا سبحانه وتعالى خلق لكُل إنسان منا النُص التاني اللي بيكملُه تماماً وبيكون مُتوافق معاه

لكن امتى الواحد بيقابلُه؟ وفين؟ هو ده الأمر المخفي عننا جميعا

وفي النهاية أحب أقولك المثل الإنجليزي:
It is never too late

خالص تحياتي
أحمد القاضي - يا مراكبي
--------------------------

التعليق من الباشمهندس أحمد القاضى
كده أنا برىْ يابيه
وشكرا جزيلا جدا على الدعم المعنوى

حفيدة عرابى يقول...

التدوينة دى


إيه

اقول إيه ؟


قمة الرقــــة


مش لاقيــة كلمة أدق توصفها


حسيتك كتباها بقلب يمامة بيضا
انا بحب المخلوقة البريئة دى
بحسها قمة الحزن
وقمة النقاء
وقمة التسليم بأمر الله


العنونا ضحكنى مرتين
ضبطت نفسى بفتكر حسين فهمى وسعاد حسنى بتكتبله ورقة ف المدرج ..
وبتقوله .. من أنت ؟

واقتكرت أبو سيف الله يمسيه بالشر
أبو القذاذيف .. معمر
وهوه بيصرخ ... من أنتم ؟؟!!


ضحكتينى
ونغبشتى ف قلبى

وخدتينى ورجعتينى


بوسات وحضونات بزيادة المرة دى
عشان مودى اللى إتظبط
بسبب المكتوب دا
------------------
ده تعليق فاتيما

حفيدة عرابى يقول...

بعد السلام والتحية
أما بعد
من رئيس الجمهورية

أولا ربنا يكرمك ويرزقك من حلاله
تانيا إنا معك منتظرون
تالتا ربنا يوفقك ويكرمك
قااااادر يا كريم


بالمناسبة الكل بيحلم بنفس الحلم ومش عايز اكون سلبي بس الحياة مش كلها سعادة ومش كلها تعاسة حبه من ده علي حبه من ده عشان تعرفي قيمة السعادة
----------------

ده تعليق الريس بسام
ومش كده وبس بصراحة هو كتب كام استيتس على فيس بوك
عن نفس موضوع التعليق وواضح طبعا انهم موجهين ليا بطريق غير مباشر
بس أنا مش باخد بالى خالص من تعليقات المساندة الأخوية دى :)

حفيدة عرابى يقول...

حلو قوي
قوي قوي يعني
تدوينة الشهر بالنسبالي
----------
ده تعليق نجرو

حفيدة عرابى يقول...

كده أنا بريئة وتمام ونشرت الاربع تعليقات اللى جم على البوست

:)
خالص الشكر للاخوة المعلقين والقارئين فى صمت وعابرى السبيل :)

فاتيما يقول...

:-*
على جبينك

حفيدة عرابى يقول...

:)
تسلمى ياطمطم
ممكن طيب اتنين كمان على خدودى علشان مش سلمت عليكى وأنا ماشية المرة اللى فاتت :)

اندروميدا يقول...

مين انت ؟ .. فين انت ؟ ... الاجابه ... الحبيب المجهول ... رائعة موسيقار الاجيال محمد عبد الوهاب ورفيق دربه الشاعر حسين السيد ... فلقد تذكرتها علي الفور وانا أقرأ كلماتك الرقيقه ... كما تخيلت ذلك المجهول يردد مع نزار قائلا ... اشربي قهوتك الان .. ولا تستعجليني .. فانا اجهل اوقات العصافير، كما اجهل وقت الياسمين .. فاعذريني .. ان انا قصرت في التعبير عما يعتريني .. فانا اجهل في اي نهار سوف أعشق .. ومتي يضربني البرق ، وفي اي بحار سوف اغرق .. وعلي اي شفاه سوف ارسو ... وعلي اي صليب سأعلق .. اه ... لو اعرف مايحدث في داخل قلبي ... إن أمر الحب ياسيدتي من علم ربي .. فاتركي الامر لتقدير السما .. ربما ندخل في مملكة العشق قريبا ... ربما

تحياتي لك

حفيدة عرابى يقول...

اندروميدا
أهلا وسهلا بحضرتك :)
أنا حظى طيب والله بالتعليقات الجميلة على البوست ده وكنت ناوية أحرم نفسى منها

فعلا عنوان البوست كان متاخد من الأغنية الشهيرة ..

كلمات نزار قبانى رائعة جدا
تعليق حضرتك أسعدنى يافندم
شكرا جزيلا

norahaty يقول...

كل شىء بأوان
الصبر طيب

حفيدة عرابى يقول...

دكتور نور
:)
ماتقلقيش عليا يادكتور
أنا راضية مش صابرة وبس :)
نورتينى يادكتور

well يقول...

#شئ من بعيد ندانى #
..
يا استاذة ورقك اتكشف....اجمل حاجة ان الانسان يتعب شوية عشان يكتشف اللى قدامه
وبعدين على رأى واحد مش فاكره بيقول السر هرم من ورق الكتشونة لو ورقة انسحبت الهرم كله بيقع وينكشف السر
بس واضح انه ابن حلال وامه دعياله # ماتخفيش مش بحسده#

ربنا يقرب البعيد .. ويجعلوه احسن وافضل..وربنا يسعدك
بوست نابع من مكان بعيد طاب وطابت كلماته

تحياتى

حفيدة عرابى يقول...

:)
لأ ياويل ماتقولش كده
ده أنا فى منتهى الغموض اهو
وماقلتش غير شوية صغيرين خالص ميلحقش يعرف منهم حاجة
أنا مش عارفة كنت مصرة ازاى أقفل التعليقات على البوست ده وأحرم نفسى من كل المشاعر والكلام الحلو ده
ربنا يسعدك ياويل واسمع عنك كل خير دايما