النهاردة عملت حاجة كنت خايفة وأنا بعملها .. افتكرت حاجة من ذكرياتنا سوا وأنا بتكلم مع ماما وجت لى الجرأة وحكيتها ببساطة وكملت الكلام بعدها عادى  بس ذهنى كان مشغول .. اكمل كده ياهدى ؟! احكى عنك بصوت عالى زى ماعملت النهاردة ولا احتفظ بحضورك الطاغي فى قلبى .. أنا تقريبا ماليش ذكريات الا ومرتبطة بيكى ياهدى .. احنا عملنا الحاجات سوا أو حكيناها لبعض فمش عارفة لسه أفهم انى هكمل فى الدنيا لوحدى ... على فكرة أنا اللى حصل ده بيصحى فى قلبى ندم انى ماتجوزتش ومعنديش عيال يكونوا معايا فى آخر عمرى ..أنا خايفة أعيش كتير وخايفة أبقى وحيدة ياهدى  .. أنا كنت شايلاك للأيام الجاية بس انت مشيتى بدرى قوى .. قدر الله وماشاء فعل وإنا لله وإنا إليه راجعون 

النهاردة عيد ميلادك وأنا مش فاهمة ازاى ده يحصل .. ازاى الأيام بتكمل دورتها عادى خالص مع ان اللى كنا بنعلم ونميز بيهم الأيام راحوا .. يارب تكونى مرتاحة ياهدى ومبسوطة .. يارب تكونى شوفتى مقعدك من الجنة واطمنتى لعفو ربنا ورحمته بيكى ..