الصف الثورى

من المفارقات الغريبة ان الناس تكلمك عن نقاء الصف الثورى وتعيب على الغريم السياسى تعاونه مع أعداء الثورة وبعدين مع الأسف ..مع الألم تعمل نفس الشىء 

لما البرادعى عمل جبهة الانقاذ انقاذا للبلاد والعباد من ديكتاتورية مرسى دخل التحرير وايده فى ايد السيد البدوى وسامح عاشور وغيرهم من رموز الفلول
ياعالم الرحمة حلوة ..طب هنتكلم بعدين فى مرسى واعلانه الدستورى
ازاى يابرادعى ياضمير الثورة... يابوب... تخذل الثورة كده؟! ..
التحرير ؟! أنت والفلول ؟!
طبعا الانتقاد ده مش ممكن يمر كده بسهولة
لان بسرعة سمعت الرد عليك من ان مرسى هو اللى عين الفلول وهو اللى كرمهم واداهم قلادات ...الخ
وكمان دى سياسة وميكيافيلى الله يحرقه وضح ده فى كتابه الشهير

وصلنا بقى للموقف التانى
تلاتين يونيه ...عند اللى شايفينها ثورة
ياناس ده الفلول موجودين بكل أطيافهم بلا استثناء !
ده حملة شفيق موجودة!
فيه ناس بايتة بقالها كام يوم عند وزارة الدفاع ومش بتهتف غير انزل ياسيسى
الداخلية كانت معاكم فى اليوم ده
آه والله الداخلية اللى الثورة أصلا قامت عشانها 
هى هى الداخلية اللى أنتم ناقمين على مرسى ان مكانش عنده خطة لتطهيرها 
أنتم نازلين تشيلوا مرسى لانه قال للداخلية أنتم فى القلب من ثورة يناير 
هى الداخلية اللى قتلت جيكا والجندى
الجميل بقى ان الداخلية كانت لذيذة فى اليوم ده ورجالها شالوا صور الشهداء 
كان من المشاهد العبثية الكتير للأسف اللى مش عارفة استوعب انى عشتها لغاية النهاردة ...تقريبا زى ماقال صديق ان كل فرد داخلية كان شايل صورة الشهيد اللى قتله 

الجيش بقى دلع (المتظاهرين)  على الآخر
رقص فى الشارع مع البنات بالزى العسكرى
تقريبا الشرطة العسكرية كانت نايمة وقتها 
كوبونات هدايا من فلوس باباه على حبايبه فى التحرير
كان فاضل الطيارات تكتب للمتظاهرين فى السما ..بحبكم كلكم
طيب كده الصف الثورى كان نقى ؟!
هو راح فين الصف الثورى فى الهم ده أصلا!

المهم كان الرد الرهيب واحنا مالنا بغيرنا ؟ احنا نازلين لأهدافنا احنا ومنقدرش نمنع حد ينزل يعبر عن رأيه
وبعدين مرسى هو السبب ِ

المنطق قبل ماينتحر قال انكم كده بتزودوا عددهم ..بتحققوا لهم أهدافهم هم
كان الرد ...امممم ...المهم نشيل مرسى والاخوان والشعب العظيم اللى نزل الشارع ده هيفرض ارادته على الفلول 

وحصل اللى حصل
ولان الأعزاء بجد اللى دارت بينى وبينهم الحوارات دى ثوريين فعلا
ولانى اتكلمت عن الناس اللى مقدرش ازايد على وطنيتهم
بسرعة ماعجبتهمش الأحداث بعد تلاتة يوليه
بسرعة فهموا ان فيه ترتيبات لحاجات مش ممكن هترضينا بتتجهز
وبدأت اعتراضاتهم تظهر
فرحت بقى ومعنوياتى بقت فى السما وقلت ننزل بقى نقاوم نظام مبارك اللى راجع بقوة ده
الحمد لله الصورة واضحة اهى
لقيت الرد التالى ...
الصف الثورى مش نقى
الاخوان هيكسبوا من نزولنا ..هيرجعوا السلطة تانى لو وقفنا معاهم ضد العسكر
هيستغلوا عددنا وحراكنا لمصلحتهم
لأ مش هينفع خالص نزول
الصف الثورى مش نقى

طيب 

الرقص ضد العنف

كانت ايه رسالتك اللى عايزة توصليها من الرقص فى الشارع ؟

 لمين الرسالة ؟ 


وصلت ؟ 


تابعتى ردود الأفعال وتأثيرات الرسالة دى على حد غير الصديقات اللى شاركوكى الرقص
أو الأصدقاء على فيس بوك وتويتر ووسائل الاعلام ؟ 


نجحتى ؟ 


ايه معيارك للنجاح ؟ 

أنتِ حرة؟ 


دينيا شايفة انك اتصرفتى صح ؟ 


فكرتى فى طرق تانية ممكن توصلى بيها رسالتك ؟ 


شايفة ازاى اللى انتقدوا تصرفك ده ؟

اليأس خيانة

أنا فاكرة ...
المواطن السودانى اللى نزل يرقص فى الشارع بعد بيان التنحى 

والمواطن السودانى التانى اللى كتب رسالة لقناة الجزيرة وبيقول لمصر فيها :والله أم الدنيا وأبوها كمان ...فيه كتب تاريخ ممكن نخليها بس عن أسباب اعتقاد المواطن ده ان مصر أم الدنيا وأبوها كمان ...مهما جار الزمان 

وماما لما هيصنا بعد التنحى ونظرتها لينا وخروجها من الاوضة عنيها مدمعة مع انها كانت بتتمنى اللحظة دى زينا ....الشعب العاطفى ده اكبر دليل على ان مبارك خسرنا ....آه والله العظيم بعد التلاتين سنة هو الخسران مش احنا ..كان ممكن بينا ومعانا يعمل دولة مالهاش مثيل ...لكن هو احتقرنا لدرجة انه بعد كل الفساد كان عايز كمان ابنه يكمل معانا 

انى كنت اتمنى من مبارك خطاب على غرار (فهمتكم ) أو يحترمنا ويعتذر على اللى حصل فى البلد فى عهده من غير (لم أكن أنتوى) وحركات الذئاب دى 

زغاريد -هى اسمها زغاريد فعلا ؟ - نوارة على الجزيرة ..ومفيش خوف تانى ومفيش ظلم تانى ..مع اننا لسه فى نفس الخوف والظلم ..بس ولو ..اللحظة دى ماتتنسيش وفيها أمل

انى كنت خايفة من عمر سليمان وشايفاه أخطر من مبارك والشريف وسرور وكل العصابة ولما قالوا ان عمر سليمان من مرشحى الرئاسة حسيت باكتئاب رهيب وان اللى اقترح عمر سليمان للرئاسة تعمد اهانتى بطريقة بشعة .....وبعدين عمر سليمان مات ...آه وربنا مات ..عادى خالص يعنى ...زيه زى غيره ..ومش شماتة فى الموت ابدا ...بس انا بهدلتنى أيامها ...كنتِ خايفة منه ليه ياهانم ؟! ليه بنى آدم مهما كانت سطوته ممكن يخوفك كده وهو اصلا بنى ادم ....يعنى ضعيف زيه زيك وميقدرش يرد ملاك الموت زيك بالظبط 

تترات الجزيرة واختيارها لمقتطفات من خطب عبد الناصر والسادات ومبارك 

أم كلثوم ربنا يسامحها ويغفر لها هى والجزيرة ال18يوم بعيط لما اسمع ..أنا ان قدر الاله مماتى ..لاترى الشرق يرفع الراس بعدى ...
برضه دى ممكن يتعمل فيها كتب تاريخ 

التحية العسكرية للشهداء ...رغم كل اللى شوفناه بعدها من المجلس العسكرى ..مهما كان انهم ضحكوا علينا وان دى من خطط خداعنا ...بس برضه بحبها ومؤثرة ومفقدتش قيمتها ولا معناها 

نجرو لما كتب على بروفايله فى الجمعة اللى قبل التنحى ..
بلادى بلادى بلادى ..لكِ حبى وفؤادى 
ويومها حسيت انى رغم حبى للنشيد الوطنى طول عمرى لكن ماشفتوش قبل كده بالجمال ده 
نجرو برضه لما لاقانى باغنى بعد رحيل مبارك ..
وقال لى : رشا هانم ....رشا هانم .....مبارك رجع 

لما عمرو خدنى معاه أول فبراير للتحرير وقلت له يومها انا مش هانسى اليوم ده ....
أنت مورا حبيبى ....وقالى يبقى لما اقولك اكوى لى هدومى متبقيش تعترضى وتكوى وانتى ساكتة .....وانى عيطت واتخانقت معاه يوم التنحى وقلت له انا مش مسامحاك عشان كان نفسى اكون فى الشارع لحظة التنحى 

انى كنت هاموت بعد خطاب سأظل ..ومكنتش عارفة أنام أبدا وبحاول افسر الاعراض اللى عندى ياترى هى هتبقى بجلطة مخ ولا قلب ..وانى كنت باروح لعمرو اوضته اطمن عليه واشوفه نام ولا لأ ...الاقيه صاحى وانا عارفه انه كان مرهق جدا واقوله يابنى نام ربك هيدبرها ..وهو يقولى مش عارف اخد نفسى -ابن الكلب ده -عايز مننا ايه تانى !!

انى مكنتش متخيلة انى فعلا هاشوف مبارك فى القفص ومتوترة ومستنية الجلسة تبدأ عشان اشوف ياترى هيتحججوا باجراءات الأمن ولا هيعملوا ايه ومن أول لحظة شوفته فيها قلت لنفسى بصوت عالى ...ده هو !!!
معرفتش انطق بعدها وخصوصا بعد ماالقاضى نادى عليه وقال ...افندم ..أنا موجود 
مش ممكن على كم الدروس والمعانى فى اللحظة دى ..لدرجة انى قررت بعدها اعتبر مبارك تاريخ خلاص واتعامل معاه على الأساس ده ...بس فى لحظات الاحباط بلاقينى نسيت قرارى وجبت له القديم والجديد 

قبل ماتبدأ حفلات الندب والولولة النهاردة ...لا سمح الله الثورة مش بنى ادم مات ودى الذكرى بتاعته ...الثورة وسيلة ..لسه معرفناش نستغل الوسيلة دى لغاية دلوقت ونعمل اللى عايزينه لبلدنا ...برضه ده مش مبرر لليأس والاحباط 

لو مصر كانت دولة أى كلام ومرمية ملهاش لازمة فى أى مكان فى الخريطة ..مكناش هنشوف اللى شوفناه وبنشوفه من بداية الثورة للنهاردة 
هندفع تمن ان اللى عايزين نفرح بيها تبقى..... مصر 

اليأس خيانة يارجالة

11فبراير 2013 على فيس بوك