فيما يرى النائم


رأت فيما يرى النائم 

انها واقفة فى اوضتها 

ولابسة فستان فرح رقيق وبسيط قوى


الغريب انها مش فى كوافير مثلا ولا حد معاها 

بتلبس الطرحة الرقيقة 

لقتها مقطوعة قطع صغير 
ازاى عروسة تلبس طرحة مش حلوة كده ؟؟
مش مهم 
ده اللى قالته لنفسها 
خارجة من الاوضة وبتظبط الطرحة لقت اخوها قدامها 
بيقولها ازاى طرحة فرحك تبقى مقطوعة كده وتلبسيها 
بصت للطرحة تانى لقت فعلا فيها قطع تانى 
واكبر من اللى هى شافته ومكانش باين من الأول 




وبعدين بقى فى العطلة دى ..هتتأخر على الفرح كده

قالت مش مشكلة ومحدش هياخد باله من مشاكل الطرحة 

نزلت الشارع لوحدها بفستانها وطرحتها 
ولفت كتير قوى والعجيب ان محدش حسسها ان فيه حاجة غريبة 
ايوه هى عروسة ولابسة فستانها وطرحتها وماشية فى الشارع 
ازاى الناس بتتعامل معاها عادى خالص ومش شايفين فستانها 
مشيت كتير وقابلت صديقاتها وزملائها فى كل مراحل حياتها 
ايوه الدنيا كلها كانت موجودة ..أو بعتت مندوبين عنها 
ابتدائى ..اعدادى ..ثانوى ..الكلية ..الشغل 
وبرضه الشىء العجيب جدا 
ان محدش من اللى شافها علق على لبسها خالص 
خالص يعنى
وبعدين بقى ..هى الناس دى مش بتقولى مبروك ليه !
ليه محدش منهم اتكلم عن الفستان أو حتى القطع اللى فى الطرحة ؟؟
الناس دى مش شايفانى عروسة ليه ؟؟

بعد مشاوير كتير قابلت زميلتها فى الشغل 
اسمها نعمة 
الكلام فى الحلم كان من غير صوت خالص بس مفهوم 
هى ماقالتش حاجة لنعمة ..
بس نعمة كانت فاهمة لوحدها أسباب حيرتها 
وقالت لها محدش شافك عروسة لانك استعجلتى
 ولبستى الفستان ده بدرى ..ده مش معاده خالص 


عارفة لو استنيت شوية كمان ..هيبقى ده فعلا معاد الفرح 
وكل الناس هتشوفك وتشوف فستانك 

-----------------------------------

قامت من النوم متلخبطة على الاخر 
وليه تتلخبط!! ..مش هى صلت استخارة كتير قوى !
مش هو اثبت اكتر من مرة ان التوافق بينهم هيبقى صعب قوى!
لكن هو كان بيعتذر عن تصرفاته 
وبيعتذر بشدة كمان
 وده اللى كان مخليها مترددة فى قرارها 

ليلة الحلم ده صلت استخارة تانى 
يارب ..أنا تعبت ..أنا عايزة موقف حاسم 
ميبقاش فيه تردد ..نكمل ولا نخلص بقى من السيرة دى ؟ 

يارب بكرة فيه مقابلة مهمة مع الأهل وأنا مش هحضرها 
يارب مددك وعونك ..ارحمنى من الحيرة 

نامت ..شافت الحلم أعلاه 
قامت من النوم ..حكت لهم الحلم 
سكتوا كلهم 
راحوا ورجعوا وحكوا لها اللى حصل 

من ورا قلبهم قالوا رأيك الأهم بالنسبة لنا 
لو عايزة تكملى مش هنعترض ..ده قرارك
بس الصورة تبقى واضحة قصادك
مش الكل كان ده رأيه
أقربهم لقلبها وهو أصلا هادى
زعق وقال لا
مفيش حاجة اسمها تقرر
مينفعوش مع بعض أصلا 

هى هادية وساكتة وتفاصيل الحلم قدام عنيها 
خلاص ياجماعة ..انا عاملة الأكل من بدرى 
 وانتم اتأخرتم هناك وانا هموت من الجوع 
لما يتصل تانى حد يرد عليه يقوله ..كل شى نصيب 

3 التعليقات:



الازهرى يقول...

الإستخارة تكشف الكثير

وليس الإستعجال خطأ
ولكن الخطأ فى عدم القابلية للتراجع عن الخطأ حين يظهر
والأكثر خطا من يرى يرى الخطأ ولا يقول

تحياتى دوما

يا مراكبي يقول...


كده 7 بوستس ورا بعض مُرتبطين ببعض، كلهم عن موضوع واحد مُتَّصِل

موضوع الفناه وخطوبتها الغريبة اللي بدأتيه ببوست: ضل راجل ولا ضل حيطة

واضح إن عندك لسه كتير تقوليه وتحكيه عن الموضوع ده

لننتظر :-)

حفيدة عرابى يقول...

أسامة
عاقل طول عمرك :)

------

باشمهندس أحمد
ضل راجل ولا ضل حيطة خارج السياق خالص على فكرة :)
وان باشمهندس أحمد عندى فى المدونة وبيقرأ اللى كتبته ومتابع ..انه لشرف عظيم :)