يوسف

البلكونة هى كلمة السر فى بيتنا 
لما الدنيا تخنقنى قوى 
اخرج البلكونة واسمح لدموعى تنطلق 
وابص للسما 
واكلم ربنا سبحانه وتعالى 
ولانى تقريبا عارفة نفسى 
بلاقينى مكسوفة اطلب 
وبعدين افتكر هو أنا ناوية اطلب من مين !

اتشجع قوى 
وبعدين احس بالحبل 
الحبل ده بيحسسنى بسلام نفسى رهيب 
بحس انى ماسكة حبل فى ايديا وطرف الحبل التانى فى السما 
وانى ماسكة فى الحبل قوى..قوى
 ومش عايزاه يفلت من ايدى 
وأقول كل اللى نفسى فيه 

يارب أنا مااستاهلش 
أنا مينفعش اطلب أصلا 
بس أنت ربنا ..اطلب من مين تانى 
عبادك كثير أما أنا فليس لى رب سواك 

اتشجع اكتر 
واطلب طلبات بحسابات العقل والمنطق مستحيلة
والحبل الغريب ده يقولى ايه المستحيل ؟
انت بتطلبى من ربنا 
اطلبى كتير 
اطلبى اللى أنت عايزاه 
أنا مفيش مرة بمنتهى الأمانة 
طلبت الا لما ربنا استجاب 
عارفة انى مينفعش اجرب 
بس أنا متأكدة انى جربت كتير 
ومفيش مرة طلبت الا وربنا استجاب طلبى 
ممكن مش فى نفس الوقت 
ممكن بعد ماانسى الطلب ده من الأصل 
ممكن الأحداث تفهمنى....
 ان اللى حصل عكس اللى كنت عايزاه بالظبط 
بس بعد شوية بلاقى انى كنت فى المطلق عايزة الستر
 وربنا سترنى 
وانى كنت عايزة افرح
 وربنا فرحنى بالحاجة اللى تستاهل الفرح 

النهاردة أنا قلبى واجعنى 
بس أنا عارفاه الوجع ده... ومش وحش خالص
أنا ماسكة فى الحبل 
وواثقة قوى قوى فى الاجابة 
الدعاء الحمد لله من قلبى قوى
بس قلبى ابن اللذين ده فى عز ماهو متشحتف كده 
جواه بعيد حتة مطمنة خالص وهادية قوى 

يارب... يوسف 
يارب يوسف يرجع لمامته 
فاتيما عايزة يوسف بخير حتى لو بعيد 
طبيعى ده ..عشان هى أم
أنا بقى عايزاه يرجع لها
 ويبقى بخير معاها
فاتيما عندها هاجس ان يوسف ممكن ميعرفهاش 
أو ينسى الأيام اللى قضوها سوا 
أو الكلام والسنين يغيروه من ناحيتها 
فاتيما بتحاول تستوعب كل ده 
عشان لو حصل متزعلش
 وتعرف تتعامل مع يوسف باللى فيه مصلحته 
فاتيما كده بتفكر صح 
فاتيما أم ... والأمهات دايما تفكيرهم كده 

لكن أنا عايزة كل حاجة يارب 
وكل حاجة عندك بس
 ومش عند حد غيرك 

أنا عايزة يوسف راجل وبخير وفاهم وحاسس ومقدر 
عايزة يوسف فاكر ماما وحبها ليه 
ومستوعب الفراق ده كان ليه
 واتعذبت ماما  فى بعده ازاى 
عايزة يوسف مؤدب زى ماما ماكانت بتربيه 
وشاطر زى ماما مابتتمنى 
وفنان زى ماما بالظبط 
عايزة يوسف العاقل 
اللى يقرأ مدونة ماما حرف حرف
 بقلبه وبعقله وبروحه 

عايزة يوسف اللى مع كلمة يسمعها من ماما
مع كل حضن من ماما 
مع كل نظرة عين منها 
مع كل ابتسامة من قلبها 
يقوم يحضنها
 وبعدين كل شوية ومن غير مناسبة
 يتكلم ويقولها بحبك ياماما 

وشوية يسكت ويحضنها تانى
يحضنها بس ويخليها تسمع دقات قلبه 
أنا عايزة فاتيما ترتاح
 لدرجةانها تنام فى حضن يوسف يارب 
أو تنام فى حضن يوسف لغاية ماترتاح يارب 

أنا عايزة اذاكر له واضحك معاه 
واقوله انى هخبى على ماما المرة دى انه مش مذاكر كويس
لكن المرة الجاية كلمتى لاممكن تنزل الأرض أبدا 

عايزة يوسف يقابل كل سكان بلوجر
 اللى شافوه وحضنوه وحبوه من كلام ماما عنه 

عايزة يوسف يارب 
أنا عايزاه يرجع ويفرح ويفرحها
 ويقولها ياماما فى كل ثانية 
أنا عايزاها تحب وتتجوز اللى بتحبه 
ويبقى عندها  بنات وولاد وكبيرهم يوسف 
يراعى ويدارى معاهم على الحاجات الغلط 
عشان ماما متعرفش وكده 

يارب ....
ده القلوب من صنعك وبين ايديك 
والفرح والشقاء ملناش فيه 
اكتب لقلبها وقلوبنا الفرح يارب 
متخليش الظلم يطول ويفتنا يارب 
أنا قلبى مليان ثقة فى الاجابة يارب 

فكرت كتير ان الكلام ده ميكونش للنشر 
بس أنا عايزة اروح بيت فاتيما النهاردة 
وأبات عندها وفى سريرها
 ونفضل نحكى عن يوسف
 وعن كل حاجة فى الدنيا لغاية الصبح 
ومش عارفة اعمل كده 
خلى البوست مكان ليلة البيات ياطمطم
 لغاية ماربنا يدبرهالنا 

تانى عايزة اقولك 
كل سنة ويوسف طيب وبخير وراجل تفرحى بيه 
كل سنة وانت أحلى وأرق ماما فى الدنيا

الصورة عسولة قوى 
يوسف شبه ماما  :)

17 التعليقات:



فاتيما يقول...

مكنتش مستنية تكتبى البوست
وكنت عارفة كل حرف فيه
ومتخيلاه
ومتأكدة من غير ما اطلب
ان دا بيحصل


فيه ناس حواليا
حتى لو محناش قريبين
بالمسافات
هما قريبين من قلبى
وبيحضنوه من سكات
مبيقولوش كتير لكن جواهم كلام
انا عارفة وحاسة قيمته وغلاوته
وغلاوتى وغلاوة يوسف عندهم ازاى


انتى م الناس دى يا فيدو


ربنا يسمع منك
ومن كل حد بيدعى ليوسف
ويعوضنا كلنا خير
انا عارفة ان آخرة الصبر دا خير
ربنا مبيعملش حاجة تأذى
احنا بس اللى المفروض نستنى
وبعدين نتلقى الهدية
جوايز الصبر زى ما د.ستيتة زمان
قالتهالى ...


الجايزة دى
ليكم فيها نصيب كبير
زى ما بقى ليكم ف يوسف نصيب


انا مش عارفة اقول أى حاجة

بس
التدوينة دى على قلبى
برد وسلام
ومحبة خالصة


و ... ربنا يخليكى ليا


---------------------

https://lh3.googleusercontent.com/-AxVjaBOMpLs/TXqIBQNLiPI/AAAAAAAADvk/-fFfRzJjWaQ/Hugs+%2526+kisses.jpg

----------------------



sony2000 يقول...

نفسي
يوسف
يجي لماما قريب
نفسي

شمس النهار يقول...

بعد كل الكلام ده
لااملك الا اني اقول امين
وربنا يفرح قلب فاتيما بحضن ابنها

الازهرى يقول...

اللهم ىمين
ومفيش حاجة اسمها مستحيل فى الدعاء

لإن بتطلبى ممن يقول للشىء كن فيكون

بإذن الله هيرجع
ومش بعيد لأ قريب

موناليزا يقول...

أنتِ جميلة أوى بجد
وأنتِ عارفة انى بحبك

ربنا يفرحنا كلنا يااارب

بيطرية ومش بايدى يقول...

وانا كمان يا ربنا
عايزاه يرجع
اقولك ع حاجة
انا ف مرة كتبت تعليق عند فاتيما زماااااان اووووى وكان بغير معرف وقتها
كنت بقولها فيه انه هيرجع وقريب وكان ساعتها رمضان وقولت لها انه هيقضى معاكى العيد ده واعياد تانية كتييييرة
وقعدت احلف لها انه هيجى وربنا هيستجيب وهيرجع لك عشان انتى صابرة ومتحملة كل ده
قولت لها وانا مش فاهمة اى تفاصيل لاى حاجة انى باتمنى كتير اكون من انواع البلطجية الاخيار يعنى يبقى عندى قوة بس ماافتريش ع الناس الغلبانة بالعكس انى اعرف اجيب لهم حاجتهم اللى تفرحهم ان يبقى عندى السلطة اللى تخلينى اعرف اجيب لها يوسف برضاه وغصب عنهم هما عشان هى بس تفرح وتقر عيناها به
ساعتها كان عيد ميلاد يوسف اظن العاشر
وكانت فاتيما بتحتفل بيه برده ع المدونة
وقولت لها خليكى فاكرة انه راجع وانا قولتلك اهو
وحلاوتى ساعتها انى هاتقدم له واخطبه بقى وانتى توافقى عليا
وانا هاكون نفسى من دلوقتى عشانه وحاجات كده
:")
ان شاء الله هيرجع قريب وهنحتفل بيه كلنا ومش عارفة ليه مش متخيلة يوسف مش حنين
اصله مينفعش ماما تبقى فاتيما وهو ميبقاش حنين ومينفعش ماما تبقى فاتيما ويبطل يحضن ويبوس فيها
مينفعش ميبقاش شاطر وذكى وحبوب وفنان وليه ف السياسة والمسيرات كمان وبيعمل يُفط ويألف هتافات ومصاحب عيال صغيرين وبيلعب ف شعرهم وبيديلهم مصاصات وحلويات كل ما يقابلهم
هيجى ويشوف كل الهدايا اللى ماما كانت بتجبيهاله وهو مش معاها
وهيعرف انها عمرها ما بطلت تفكر فيه
هيعرف ان ماما جابت الهدايا وهى عارفة انه لو كان معاها كان هيطلبها فجابتها وشالتها عندها لحد ما يجى

انا لسه قارية بوست فاتيما من ساعة بالظبط وفكرت انى اكتب بوست برده زى بتاعك كده
بس بطبيعة الحال سيادتك الخطوة الاولى ف كل حاجة حلوة :)
وانا هاكتفى انى اقول آميــن هقولها اوووى هقولها من جوه هقولها لربنا يارب انت قادر على كل شيئ
يارب

لورنس العرب يقول...

كل سنه وانتي طيبه يا ميس
عقبال 100 سنه

حفيدة عرابى يقول...

الأعزاء أصحاب التعليقات
عارفة انكم هتعذرونى انى مش رديت على تعليقاتكم
بس حسيت انى طلعت طاقتى النفسية فى البوست وآمين اللى كنت حاساها طالعة من قلوبكم مينفعش معاها كلام تانى
رجوع يوسف لطمطم والسعادة اللى ربنا كاتبها لقلبها بإذنه دى حاجة بوقتها بس
لكن جاية جاية بإذن الله
مينفعش اشكركم لان قلوبكم حلوة
لكن ممكن اقول الحمد لله اللى عرفنى بناس زيكم :)

حفيدة عرابى يقول...

لورنس العرب
وحضرتك طيب وبخير وصحة وسعادة يافندم
سعيدة جدا ان حضرتك فاكر وبتهنينى كمان
لسه برضه عندك اصرار تقاطع فيس بوك ؟:)

لورنس العرب يقول...

المقاطعه أحسن من المشاكل يا ميس
ما انتي عارفه الناس متعصبه ازاي
بيتكلموا كان الراجل السياسي ده أبوهم او واحد من العائله الكريمه
كذا مرة اقول لهم مش للدرجه دي يا اخوانا- بس مفيش فايده

يا مراكبي يقول...

آمين
آمين
آمين

يا مراكبي يقول...

وتصفيق حاد على المشاعر الرائعة دي

ربنا يديم الود

L.G. يقول...

انا حاسة انك خايفة في يوم تحسي احساسها انت حاسة انك متتحمليش تكوني مكانها .. يمكن ؟
انا بحمد ربنا اني مش مكانها مكنتش ااقدر
لا يكلف الله نفسا الا وسعها واكيد ربنا حيعوض صبرها خير ان شاء الله ويرد لها ابنها كما رد يوسف لسيدنا يعقوب عن قريب وكما رد موسى لأمه .. امسكي في الحبل جامد بأه
:)

norahaty يقول...

ربنا يرد كل حبيب لحبيبه
آمين يارب العالميــــــــــــــن

well يقول...

مَا كَانَ يُغْنِي عَنْهُمْ مِنَ اللَّهِ مِنْ شَيْءٍ إِلَّا حَاجَةً فِي نَفْسِ يَعْقُوبَ قَضَاهَا ..
...........
ان شاء الله هيرجع بالسلامة

بيطرية ومش بايدى يقول...

حلمت بيكى امبارح انتى وفاتيما
مش فاكرة اى تفاصيل
بس صاحية مبسوطة :)

well يقول...

كل عام وانتى طيبة بمناسبة السنة الهجرية الجديدة ..
عودى يا استاذة