يوم 14

قال لها :هكلمك يوم 14 


استغربت ومافهمتش ليه 

مش عارفة ليه اليوم ده بالذات ؟
وليه أصلا محدد يوم المكالمة بالتاريخ كده ؟
كان عندها هاجس ان فيه مناسبة ما فى اليوم ده 
لأ مش هاجس ...
هى كانت متاكدة ان فيه مناسبة فى اليوم ده 
عرفت منين ؟ 
لأ... مجرد احساس داخلى 
وصوته وطريقة كلامه


سألت نفسها كتير 

ايه المناسبة فى يوم 14 ؟؟
لا عيد ميلاده!
 ولا عيد ميلاد مامته ولا باباه ولا حد من اخواته !
ولا عيد الأم ولا حتى عيد تحرير سيناء!


حكت لوالدتها واخواتها ...
ومحدش عرف ممكن تكون ايه المناسبة 


والدتها قالت ...لازم تكلمى والدته 


وتحاولى تعرفى منها بطريق غير مباشر ..
ايه مناسبة اليوم ده عندهم 

عشان نستعد ونشوف هنعمل ايه 

هى أصلا مالهاش فى حكاية طريق غير مباشر دى 
عشان كده حكت لوالدته باقتضاب عن سبب السؤال 


وبرضه والدته مكانش عندها اجابة لسؤال الساعة 
ماله يوم 14 ؟
ايه المناسبة اللى فى اليوم ده؟


بعد يومين 
بتتفرج على جورنال قديم وسرحانة شوية 
عنيها وقعت على اعلان لمطرب شهير 
وحفلته الجديدة يوم 14 فبراير ...عيد الحب 
يانهاااااااااااااااااار أبيض 
ده تعليقها 

فى البيت ..فيه ايه يابنتى ؟

هى....إحم ..إحم قوى يعنى 
 أصل ...أصل ...14 فبراير يبقى عيد الحب 

بس ازاى ؟؟ 
هى فاكرة لما كانت فى الكلية 
ان عيد الحب كان فى نوفمبر
مش موضوعنا ...خلينا فى اللى احنا فيه 
كانت محرجة جدا من مامتها واخواتها 

ولما جه 14 فبراير 
والدته اتصلت بيها ..وبابتسامة بتغمز كانت باينة فى التليفون
 قالت لها ...كل سنة وانتى طيبة
ماهو النهاردة عيد بقى 
ان ان اااااااااااااااااااااااااااااااان 
طب ليه كده بس الاحراج ده ؟؟ 

والدته كانت خلاص بلغته باللى حصل 
واتصل هو يوم 14 
طول المكالمة بيضحك ويقولها ماشى 

هو: يعنى مش عارفة يوم 14 فيه ايه ؟
هى : لا والله ...أنا كنت فاكرة انه فى نوفمبر 
هو: وقلتى لمامتك.... ؟
هى: بتهز دماغها ..على اساس انه شايفها يعنى 
هو : وقلتى لمين تانى ؟ 
هى: اخواتى
هو : واخواتك كمان ؟؟ ضحك متصل 
هو : قولى كمان قولتى لمين ؟
هى: وواحدة صاحبتى 
هو: ماشاء الله ..ماشاء الله 
هو : بس الذ مافى الموضوع انك سألتى والدتى 
هى: ماتفكرنيش بقى ..
أنا مكسوفة عشان كلمتنى النهاردة 
قالت لى كل سنة وانتى طيبة
ماهو النهاردة عيد بقى 

لما هواجسها بقت حقايق مطلقة 
ومش نافع معاها أى تبريرات 
حاولت تنسى الذكرى المرتبطة باليوم ده 
وخصوصا انه هيتكرر كل سنة 
بذلت مجهود كبير ....
عشان تعمل احلال فى دماغها 
14 فبراير ..ده ذكرى اغتيال الحريرى 
آه ..رفيق الحريرى ...شفتى لبنان عاملة ايه ؟ 
ونصر الله وخلافه مع 14 آذار 
لانهم أصلا بيتهموا سوريا  بضلوعها فى جريمة الاغتيال 

تأكدت من الشفاء 
لما فات وقت 
وبقى يوم 14 فبراير 
يستدعى لعقلها الذكرى دى 
بابتسامة هادية ....وراضية الحمد لله 
بس برضه فيها شوية شجن صغننين خالص

2 التعليقات:



richardCatheart يقول...

يالهههههههههههههوى عليكى يا ابله انتى بتطلعنى ليه لساااااااااااااااااااااااااااااااااابع سما وتنزلينى على جدور رقبتى ايه الوحشيه المفرطه دى


دى ختمت خاتمه بنت لذينا على فكره فى التعليق اللى فات كنت اقصد بالوجع دمعه وطلعت صح :) وعلى فكرة انا مش من اللى بيشفوا دا وحد بيكتب الا ناااااااااااااااادر

وعلى فكرة بصرف النظر ان الكلام دا حقيقى او محض خيال يخصك او يخص غيرك
انتى حد بيكتب فحتتتتتتتتتتتتتتتتتتتت
احساسك فى الثرد رااااااااااااائع يا رشا ورب العزة انا بكرة القرأه ودا معروف عنى بس بقراء غصب ثقافه مضطرة بالعربى ههههههههههه فعلشان احساس حد واسلوبه يشدنى دا صعب

ارجوكى ماتبطليش كتابه


بحبك يا اببببببببببببببببببلتى اوووووى :)


صباحك زى ضحكتك حلوة وصافيه ومن القلب

حفيدة عرابى يقول...

انتى عسل يامارو
ومخدوعة فيا بجد
بس تعليقاتك تجنن وحلوة قوى
وتلاقينى رايحة جاية عليها اخد طاقة ايجابية
أيامك كلها حلوة زيك ياغزال اسكندرية :)