بحلم على قدى


بما ان فرصة تحقيق أحلامى دى 
تكاد تكون مستحيلة فى الدنيا 

أنا طمعانة فى عفو ورحمة ربنا سبحانه وتعالى
 وانه يدخلنى الجنة
 وهناك ميبقاش شغلى الشاغل زى زمان...
 الأكل والشرب والمناظر الحلوة
 لكن اتمنى انى اقعد مع كل أحبابى
 من غير قلق ولا خوف ولا زعل ولا مرض ولا موت
 ومكانى يبقى مع كل الشخصيات التاريخية اللى بحبها
بعد أهلى وأحبابى 
 ونحكى مع بعضنا واعرف منهم أسراركتير غايبة عنى
 ونتناقش فى الأحداث
واتفرج على شوية مشاهد كان نفسى اشوفها واحضرهابنفسى

نفسى اشوف حادث شق البحر لسيدنا موسى
 والموج جبال من الناحيتين  ...
عايزة احس بالرهبة والامتنان لربنا سبحانه وتعالى
اللى حس بيها اللى حضروا الموقف ده 

 نفسى اشوف صلح الحديبية
وابقى مش عارفة ايه اللى هيحصل
 واكون من الرجال من اللى اشتركوا فى البيعة
 واشوف الرسول عليه الصلاة والسلام تحت الشجرة
 بيمد ايده الشريفة يبايع المسلمين بيعة الرضوان
 وبعدين يضم ايديه على بعض
 ويبايع بيعة لعثمان
 وارجع رشا تانى واعيط قوى 

عايزة اشوف فرحة الرسول عليه الصلاة والسلام برجوع جعفر من الحبشة
عايزة اشوف لحظة احتضان الرسول عليه الصلاة والسلام لجعفر 
واشوفه لما عرف خبر استشهاده 
وراح بيته يحضن ولاد جعفر ويبكى 


عايزة اشوف وش خالد بن الوليد
 لما الرسول عليه الصلاة والسلام بعت له رسالة
 يقوله : أوحشتنا ياخالد 


واحضر الأنصار لما وجدوا فى أنفسهم بعد غزوة حنين
 من معاملة الرسول عليه الصلاة والسلام لأهل مكة
 والعطايا اللى راحت للمؤلفة قلوبهم
 والرسول عليه الصلاة والسلام بيعاتبهم
 وبيطمنهم وبيعترف بفضلهم وحبه ليهم ويدع لهم
 عايزة اشوف دموع الأنصار اللى قطعت القلوب
 واعيط معاهم من العتاب الرقيق للرسول عليه الصلاة والسلام
 وعايزة اقول معاهم
 بل لله ولرسوله المنة والفضل..
بل لله ورسوله المنة والفضل
ومع ان دعاء النبى عليه الصلاة والسلام مستجاب ..
لكن عايزة اسمع الدعاء وقتها
 وارفع ايديا للسما وأقول آمين


عايزةاشوف زوجة عزيز مصر
 لما سألوها عن سيدنا يوسف
 وقالت: ليعلم انى لم أخنه بالغيب 
بتجننى الجملة دى
بغض النظر عن ان مشاعرها ناحية سيدنا يوسف فى البداية 
كانت مستهجنة طبعا وحرام 
لكن بعد دخوله السجن هى ندمت 
وكلامها عنه كان حب بجد 

واطبطب على سيدنا يعقوب
 واموت بقى من العياط
وهو بيقول انما اشكو بثى وحزنى الى الله

 سيدنا موسى لما شاف النار فى سينا وراح عندها
 وأنا ابقى واقفة بعيد 
 لكن احس واسمع كلامه مع ربنا سبحانه وتعالى

 نابليون 
عايزة اعرف كان حاسس بالغدر وهو فى الجزيرة ؟
كان حاسس انه ممكن يموت مسموم ؟
كان بيحس بإيه لما يفتكر انتصاراته العظيمة
ومحمد كريم
 والأزهر 
ويافا 
كان بيحس بإيه لما ييجى على باله الأحداث دى؟

عايزة اشوف سبارتاكوس
 وجوايا فكرة غريبة قوى
 انى لما اشوف سبارتاكوس هلاقى أمل دنقل قاعد معاه
حاسة انى هفضل ساكتة
 واتفرج عليهم بس 
وهم بيتكلموا

 عايزة اشوف ناجى العلى
 واقوله انى دايبة فى حب حنظلة بكل تفاصيله
 وانى كل مرة اشوفه لازم ادعى له بالنصر

عايزة ابقى جنب الطيارة 
اللى هيركبها عرفات فى رحلته الأخيرة
 واطبطب على زهوة وهى بتعيط
 قدام جثمان والدها فى مطار القاهرة
 عايزة اكلمها فى التليفون واطمن عليها
 واشجعها تذاكر وتخلى بالها من نفسها

 أفنان البنوتة العسولة وحشتنى ومش معايا تليفونها
عايزةاشوفها فى الجنة زى الفصل بالظبط
 امورة ورقيقة وعصفورة
 واقولها عصفورة انت بل زغلولة
 وهى تضحك 

عرابى باشا حبيبى ..
لأ كلامى معاه هيبقى كتير:)

 سالومى وهى ندمانة على قتل سيدنا يحيى

 سيدنا عيسى عليه السلام
 واقوله ايه كم الوداعة اللى فيك دى:)
 مملكتك فعلا مش ممكن تكون فى هذا العالم

ماما حبيبتى
:)
ده احنا هنحكى حكاوى
يارب تكون من نصيبنا 

15 التعليقات:



Ramy يقول...

(:

أبتسامة كبيرة قد البوست

ربنا يحقق لك أمنيتك

كل سنة و انتى طيبة يا أستاذة

و عيد فطر سعيد عليكى

(:

لورنس العرب يقول...

نسأل الله ان يكتب لك ولنا الجنه ونكون جيران فيها مع سيدنا محمد صلى الله عليه وسلم

أما بالنسبه لليومين دول . .

كفايه عليكي تشوفي مرسي

هو ده اللي متوفر في الوقت الحالي

كل سنه وأنتي طيبه يا ميس

فاتيما يقول...

الله

الله يا فيدو




ايـــه الجمـــــال دا يا بنتى ؟!!


طب ربنا يارب يكرمك بما تتمنى
وأحلـــــــــــــــــــــــى



انا بحبك يا فيدو

بجد


كل سنة وانتى طيبة
وكل سنة وماما واخواتك بأحسن حال
وكل سنة وانتى صديقتى الغالية
وكل سنة وانتى جميلة وصافية كدا
زى منتى

:-*

حفيدة عرابى يقول...

رامى
ازيك يازميل
أخبارك ايه
تسلم الأيادى على الشيكولاته مالحقتش اشكرك يومها
وانت طيب وبخير دايما يارب :)

حفيدة عرابى يقول...

لورنس العرب
ازى حضرتك عامل ايه
كل سنة وانت طيب وبخير
اللهم آمين ..يرزقنا جميعا الجنة وصحبة الرسول عليه الصلاة والسلام

احنا بنتكلم فى الجنة وأحلامنا ..ايه اللى جاب سيرة مرسى دلوقت ؟ :)

حفيدة عرابى يقول...

طمطم
كل سنة وانتى طمطم حبيبتى
اللى مش متخيلة انى ممكن اكون فى لقاء من غيرها
كل سنة وانتى قلبك كبير ورقيقة وفنانة زى ماانتى
كل سنة وانت بخير يارب وكل أحبابك ويجمعك بكل أحبابك يارب
السنة الجاية ان شاء الله هاكون باركت لك على حاجتين مع بعض ان شاء الله :)
سلم لى على ماما وماجد وقوليلهم كل سنة وهم طيبين

موناليزا يقول...

ياااه يا روشا
تعرفى انى كنت لسه من يومين برضه عمالة اتخيل كده وعمالة اعمل فى مشاهد لغاية ما اتمنيت من كتر حلاوتها انى اسيب الدنيا بقى

ربنا يجمعنا فى الجنة يا حبيبتى

وكل سنة وأنتِ مس رشا الرقيقة الجميلة المثقفة:)

مهندس مصري يقول...

:) البوست جميل
كل سنة و انتي طيبة

حفيدة عرابى يقول...

موناليزا
كل سنة وانت طيبة وبخير
ربنا يبارك فى عمرك فى الطاعات
اكتبى بقى اللى حلمتى بيه ...اشمعنى انا ؟ :)

حفيدة عرابى يقول...

مهندس مصرى
الله يكرمك يافندم
كل سنة وحضرتك طيب وبخير :)

norahaty يقول...

أحلامك جميلة زيك
بالضبط والربـــط
ربنا يجمعنا تحت ظله
يوم لا ظل الأ ظــــــله

norahaty يقول...

والبقاء لله
فى ابلة فتحية
هى لم تموت مادامت
تاركة مشاعر جــــميلة
زى اللى عبرتى عنها دى

حفيدة عرابى يقول...

اللهم آمين يادكتور نور
ده من ذوقك بس على فكرة :)

يا مراكبي يقول...

كل دي وأحلام على قدك؟

أمال لو مش على قدك كنتي حلمتي بإيه كمان؟

:-)

ربنا ينولك كل ما تتمنيه ان شاء الله

حفيدة عرابى يقول...

ده لسه فيه أجزاء تانية :))
ربنا يكتب لك السعادة والرضا ويبارك لك فى كل حياتك ياباشمهندس