جواب

أول جواب ...
 كان بيحكى فيه عن كل تفاصيل أيامه فى الغربة
 اللى كانت جديدة  بالنسبة له 

وان غيابها عامل فرق فى حياته 
وانه بيتمنى الايام تعدى عشان تبقى معاه

بيكلمها عن الشيكولاته
اللى استناها بره العربية عشان تاخدها
وازاى كان فرحان ومستغرب فى نفس الوقت 
لما قالت له انها مش هتقدر تاكلها 
وهتخليها معاها لغاية ماهو يرجع بالسلامة 

بيوصف لها مشاعره كانت ايه فى المطار 
وهو بيسلم عليها 
وهى مكسوفة حتى تمد ايديها تسلم عليه 

وبيفكرها لما قال لها ليلة الخطوبة تدعى له 
عشان عنده امتحان فى السفارة 
وهى اعترفت له بعد كده ..
انها دعت ربنا ماينجحش ولا يسافر
بيحكى اشترى ايه وبياكل ايه وازاى
وكل حاجة بيشتريها ..بيفكر هتنفعها لما تيجى ولا لأ
اشتكى من الهندى اللى بيشتغل معاه
ومبهدل الاكل توابل وشطة
وبيحلم باليوم اللى تبقى معاه وجنبه
كلامه رقيق ...والحنان اللى فى صوته 
كان مسموع من سطور الجواب 

كتب لها عن آية ربنا سبحانه وتعالى 
لما جعل بين الزوجين سكن 
وانه من أول مرة شافها
حس انه يعرفها من زمان
وانها نصه التانى
هى حبيبته 



هى تقريبا حفظت الجواب 
هى ممكن تسمعه 

هى بتسترجع كلامه دايما وهى لوحدها 

بتنتهز أى فرصة عشان تفتح شنطتها
 وتقرأ ولو سطرين من جوابه
كانت حاسة انها خفيفة 
وانها أميرة 
ولابسه فستان طويل وواسع وحلو قوى زى فساتين الاميرات 
ورافعة طرف الفستان وطالعة سلالم خيالية
-------------------------


الجواب الأخير ..كان جوابها هى
جواب الوقت الضايع
وابراء الذمة
لاخر مرة قالت له انها مستنية تصرفه
وحكت له التفاصيل المملة للمشاكل
اللى هو عارفها
كلمها ...
ووعدها يتصرف
وكانت عارفة انه مش هيعرف 



بعد وصول الجواب  بتلاتة وعشرين يوم
كانت بتخلع دبلته من ايديها
وهى بتكلمه فى التليفون
الدبلة دى حكاية لوحدها 



واذا الدنيا كما نعرفها 

8 التعليقات:



فاتيما يقول...

:(

بيطرية ومش بايدى يقول...

انا من ساعة ما قريت بوستك زمان
بعنوان
"أنت "
وانا مبهورة
ايوة بقى ؛)
ربنا يحبك يارب
==
تعليق خارج النص عارفة
بس كلمتين محشورين ف زورى من زمان :*

مصطفى سيف الدين يقول...

بيقولوا البعيد عن العين بعيد عن القلب
بس الدنيا ساعات بتاخدك معاها في شلالها لبعيد علشان تفرقك من اللي بيحبوك و لما بتتفرق بتبقى عايش في مكان لوحدك عايز تتأقلم معاه و تتكيف فيه بيبقى مستعد انك تتنازل عن حاجات كتير علشان بس تقدر تعيش و لما بتفوق من غيبوبتك بتكتشف مدى فداحة الخسارة اللي خسرتها و مدى الم الفقد
القصة في منتهى الوجع و بتحصل كل يوم
تقبلي تحياتي

حفيدة عرابى يقول...

طمطم
ليه التكشيرة ياحبيبتى ؟ :)
أنا نفسى ارغى معاكى من يوم ماكنا فى اسكندرية
بس مش عارفة ايه اللى مانعنى من الرغى
وحشتينى اوى ياطماطم :)

حفيدة عرابى يقول...

بيطرية

:)

حفيدة عرابى يقول...

أستاذ مصطفى
أهلا بك يافندم ..شرفتنى
تعليقك جميل اوى يافندم
بس أنا كنت عايزة اقول ان حتى الم الفقد الوقت لما يعدى والدنيا لم تشغلنا بيتحول لحاجة تانية مختلفة خالص
بيبقى خبرة ..بيبقى قدرة اكتر على الاحتمال ..بيبقى شجن لذيذ وجميل وبيوجع فى نفس الوقت
المهم انه بيضطر يتغير
حتى الم الفقد بيتغير

حضرتك شرفتنى يافندم

فاتيما يقول...

صباح الورد يا فيدو
هبعتلك ميل
يا ريت تفتحيه بسرعة

لورنس العرب يقول...

عوووووووووووووووو