فتحية

فتحية ماتت 

فتحية مشرفة المادة ومدرستى الأولى ماتت
 اللى لما كنا نحب نضحك معاها
 نقولها أبلتى فتحية
كده فتحية مش هتوزع الخطة ولا النشاط 

ولا هتقولى خدى الاذاعة
 وانا اقولها لأ بقى كده الشغل كتير
 وادينى وحدة التدريب
 وخلينى من الهواة فى الاذاعة 

فتحية مش هتتحايل عليا
عشان امشى بسرعة فى المنهج
 ولا هتقولى اعمل امتحان الميد تيرم 
وانا اقاوح شوية وبعدين اوافق 
وهى تبقى عارفة انى هوافق
 بس دى تقاليد يعنى 


فتحية مش هتوقفنى فى الحوش
عشان تقولى وصلتى لغاية فين ؟ 
ولا هتضحك لما اقولها معندناش مدرس أول يستفسر من مدرسينه على كلام فاضى زى ده

فتحية لما هتلاقى المدرسة فيها متابع
 مش هتجرى علينا 
 ولا هتقول لنا خلوا بالكم من دفاتر الغياب والدرجات ودفاتر الموهوبين والضعفاء 
ولا هتقول معملتوش ده ليه ؟؟
 رايحين فى داهية ان شاء الله 

واحنا نقولها جمعااااااااااااااء
جمعاء ياحاجة ان شاء الله ونضحك كلنا 

فتحية مش هتكلمنا تانى عن ولادها
 وانهم ماشاء الله حلوين وشطار ومؤدبين 
واحنا مش هنقولها اتق الله بقى
 وبطلى كلام على العيال ..
ارحميهم ياشيخة هيتحسدوا 

فتحية مش هشوفها ماشية فى الحوش
وخارجة من اوضتها وطالعة مبنى تالتة 

فتحية مش هتشتغل فى الجودة
 ولا هتطلع عنيها فيها
فتحية مش هتعمل لناالاجتماع الاسبوعى
 ولا هتقعد تتكلم معانا فى وصفات الاكل
 ولا أحلامها لولادها 

حسن رئيس الكنترول مش هيعرف يخضها
 ولا هيقولها وهى بتسلم الورق انه ناقص 
وهى مش هتفهمه بسرعة
 ولاهتكمل معاه اللعبة لغاية مايعترف
 انها ذكية وفهمته فى ثانية
أول مرة اخد بالى ان خمار فتحية حلو كده 
وانها هتوحشنى قوى كده

لما النهاردة هاروح اعزى ولادها
 مش هلاقيها موجودة 


ولا هتكون بتحكى انها لما خرجت من المستشفى تعبانة قوى وفى يوم لقت عندها شوية صحة صغيرين 
دخلت المطبخ عملت لهم أكل
 والعيال فرحوا قوى بوجودها وسطهم
 وبالأكل اللى من ايديها 
فتحية كانت فرحانة
 انها بس عرفت تطبخ لهم 


فتحية مش هكتم الخضة اللى حسيت بيها لما جت المدرسة فى يوم وبنتها ماسكة ايديها 
ولقيت وزنها قل قوى وكنت عايزة اعيط بس قلت لنفسى شوية بس وهترجع كويسة تانى 

أنا كررت جملة فتحية ماتت لنفسى كتير 
لانى مش عارفة اصدق واقتنع انها ماتت 
مش فتحية بس 
أنا عندى أزمة كبيرة مع الموت ..
مش فاهماهومش عارفة استوعبه 

لما الموت بياخدهم
 بلاقيه قربهم منى اكتر من الاول 

انا هفضل مدة طويلة اعانى شوية
 واتونس شوية.. بوش فتحية
 اللى هيبقى قدامى طول الوقت 
وبخيال فتحية
 اللى هيعدى فى المدرسةقدامى

بحس انى نفسى التفت
 الاقيها فى الاماكن اللى دايما كانت فيها 
فى نفس الوقت بخاف التفت لانى عارفة انى مش هلاقيها وهزعل اكتر 

اعمل ايه فى نفسى 
لما بتفكرنى بالمواقف اللى زعلنا فيها سوا 
وليه المواقف دى كانت تستاهل ومهمة ومصيرية وقتها 
ودلوقت ولا ليها لازمةولا تساوى
وياترى الدنيا التافهة دى تستاهل !!

أنا مش ناوية ادخل اوضتها
 عشان اخد الخرايط
 ولا استلم كتب خارجية واوديها عندها 
لانى مش هشوف ابتسامتها
 لما بناخد كل الكتب نديها لها 
ولما حد فى المدرسة بيكلمنا عن كتاب
 نقوله فى دولاب فتحية ولما تيجى بكرة هتوزعهم واطلب منها اللى انت عايزه 


دايما بتخيل ساعة الموت انه مؤقت
 وان المشكلة الكبيرة دى هتخلص
 بس عايزة شوية صبر 
لما أستاذ مجدى مات
 كانت أول مرة استوعب طبعى الغريب ده 

وانى فضلت شهور ومجدى قدام عينى بالظبط
 ومش راضى يبعد عنى 
فى نفس الوقت اللى فضلت فيه شهور
 عينى ماتروحش اصلا على مكان الكانتين
 اللى كان بيشتغل فيه 
فى الكنترول...
 كان بيتهيألى انى لو التفت
 هلاقيه بيعمل شاى
وكنت بزعل قوى من فكرة انه الغائب الحاضر


ليلى 

ليلى الحلوة الرشيقة الرقيقة المتكلمة
 لما ماتت برضه مش مصدقاها
أنا قاومت اكتر من مرة
 انى اقول لبنتها اللى بتموت من سيرتها
 ماما عاملة ايه ؟ سلميلى عليها قوى 

منى 


منى وصلتنى لدرجة احساسى انى مش طبيعية خالص 
أنابعدوفاة منى عدت عليا أيام..
 عقلى الباطن كان بيعاتبها 
مامتك وباباكى هيموتوا عليكى يامنى
 وانتى عارفة كده 
ماتيجى بقى ...كفاية كده 


مش عارفة أفهمك ياموت ..
مش عارفة استوعب اننا ضعفاء قوى كده 
وان الروح العظيمة من عظمة اللى خلقها
 لو خرجت بيبقى ملناش لازمة خالص كده 
الغياب ياموت ...
الغياب اللى انت بتسببه رهيب 
رهيب قوى
 وكمان وانت واخدهم بعيد عنى بتقربهم منى
بتقربهم قوى معنويا 
وبتخلى دماغى مركز قوى معاهم 
وشايف قوى كل الحلو اللى فيهم 
ويزعل دماغى شوية عليهم 
ويرجع تانى يقولى ده وضع مؤقت 
وشوية وكل حاجة هتتحل 

مش عارفة ده صح ولا غلط 
يعنى لما عقلى الباطن بيضحك عليا
ويقولى ان مفيش حاجة
 وانها مشكلة مؤقتة ان شاء الله
 وهتنتهى احسن 
ولا الافضل انى افهم وبسرعة
 ان الفراق هياخد كل أيام الدنيا
 اللى أنا عايشاها
  وهيبقى لغاية يومى أنا
 اللى معرفش امتى 

الله يرحمك يافتحية 
ويغفر لك ويعفو عنك 
ويثبتك عند السؤال 
ويرزقك الجنة 
يارب 
يارب 
يارب 

متقلقيش على ولادك ياحبيبتى 
زعلانين طبعا 
بس ربنا هيكرمهم 
وهيخلصوا تعليم ويتجوزوا ويخلفوا 
والصغير والكبير هيحكى لولاده عليكى 

بنتك العسولة الكبيرة 
هتخلى بالها من الصغيرين 
اكلهم ولبسهم وكل حاجتهم 
متقلقيش عليهم 
لما هتتجوز
ربنا هيكرمها بواحد عارف ربنا 
هيراعيها ويعوضهاشوية عن فراقك ياحبيبتى 
وهيبقى الحضن اللى اتحرمت منه بغيابك 
وهيشجعها ويساعدها تخلى بالها من الصغيرين 

عارفة عبده الصغير ده 
مش هيستنى لما يكبر 
ويبقى راجل عشان يخلى باله من البنات 
أنا حاسه انه من دلوقت هيعمل كده

فتحية مش تسيبهم خالص 
وانت فى دار الحق 
اللى ربنا كرمنا وخلانا مؤمنين بيها من غير مانشوفها 
لو ينفع تطلبى من ربنا انك تيجى لهم كتير فى الحلم 
تطبطبى عليهم وتحضنينهم وتخليهم يعافروا فى الدنيا 

وتعالى لى فى الحلم يافتحية 
أنا حاسة انك هتوحشينى قوى 
انت أصلا وحشانى جدا من أول ماسمعت الخبر 

فتحية 
بحق دار الحق اللى انت  فيها 
سامحينى 
سامحينى على أى حاجة أوكلمة 
قلتها بقصد أو من غير قصد 
وزعلتك 
سامحينى بالله عليكى 
سامحينا كلنا 
بحق دار الحق اللى انتى فيها 
واننا غلابة لسه تايهين فى دار الباطل 

ربنا ارحم من جرت عليه المقادير 
ربنا عبادك كثير أما نحن فليس لنا رب سواك 
لا تعاملنا بعدلك 
اشملنا برحمتك 
رحمتك ياالله 
للأحياء والاموات  

11 التعليقات:



ابراهيم رزق يقول...

ربنا يرحمها رحمة واسعة
ويسكنها فسيح جناته

مش عارف ليه كنت متخيل بتكتبى بوست عن فتحية تانية خالص

مرة تانية ربنا يرحمها و يصبر عائلتها

تحياتى

عاشقه الرومانسيه يقول...

البقاء لله ياروشا
وجعتى قلبى عليها وابكيتينى على نفسى
المفروض فعلا نبكى على انفسنا انما الناس اللى ماتت دى راحوا عند من لا تضيع عنده الحقوق
ربنا يرحمها ويحسن خاتمتنا
ادعى لها كتير بالخير واحنا فى ايام الخير

مصطفى سيف الدين يقول...

الله يرحمها و يغفر لها
و يسكنها الفردوس الأعلى من الجنة
البقاء لله انا لله و انا اليه راجعون
شدي حيلك يا استاذة رشا و ربنا يصبرك على الفراق
نبكي على الدنيا و ما من معشر جمعتهم الدنيا و لم يتفرقوا

مصطفى سيف الدين يقول...

الله يرحمها و يغفر لها
و يسكنها الفردوس الأعلى من الجنة
البقاء لله انا لله و انا اليه راجعون
شدي حيلك يا استاذة رشا و ربنا يصبرك على الفراق
نبكي على الدنيا و ما من معشر جمعتهم الدنيا و لم يتفرقوا

اندروميدا يقول...

انا لله وانا اليه راجعون ... ربنا يرحمها يارب ... ويتقبلها في عباده الصالحين ... ويدخلها بفضله ورحمته الجنة .. بإذن الله .

ورغم ان المقام .. ليس بمقام فرحة ... ولكنها سنة الله في خلقه وكونه .. حزن وفرح الي حين .

كل عام وانتي بخير بمناسبة عيد الفطر المبارك .

حفيدة عرابى يقول...

أستاذ ابراهيم
عاشقة الرومانسية
أستاذ مصطفى
أستاذ اندروميدا

عظم الله أجركم ولا أراكم مكروها فى عزيز لديكم

تسلم أياديكم ودعواتكم

حفيدة عرابى يقول...

كل سنة وانتم جميعا بخير وطيبين

مهندس مصري يقول...

الله يرحمها رحمة واسعة من عنده

حفيدة عرابى يقول...

مهندس مصرى
اللهم آمين

يا مراكبي يقول...

البقاء لله

أصعب شيء هو فقدان الصديق القريب جداً بالشكل ده

حفيدة عرابى يقول...

عظم الله أجرك ياباشمهندس