كنت معاهم

مش أنا رحت ابو الريش
اه والله
مش عارفة ابدأ ازاى وازاى أصلا جاتلى الجرأة انى اكتب وأنا كنت بستنى بوستات فاتيما بفارغ الصبر بعد كل لقاء
هفوتها لنفسى المرة دى علشان أول مرة بس

طبعا أنا مش قادرة اخالف طبعى اللى كله رغى بس هحاول ومقدرش اوعدكم قوى انى اختصر



- المستشفى شكلها من جوه معقول جدا بالنسبة للشكل المعروف للمستشفيات الحكومية ومنظر الاطفال المرضى وأهاليهم مش محتاج وصف ربنا يشفى كل مريض ويهون عليه وعلى أهله
بس معلش انا هتكلم بسذاجة

مش احنا بديهيا كده بنى ادمين وربنا سبحانه وتعالى كرمنا ووضح ده فى القرآن ومنطقيا برضه احنا مواطنين فى الدولة دى ولينا حقوق فيها
ليه الدولة تسيب أمهات واطفال فى عرض تبرعات ممكن تيجى أو لا 
ولو جت الوارد والمنطقى انها ماتكفيش
ليه بجد وأى شرع وأى قانون يقبل بكده؟
فاهمين كلنا ان ربنا خلقنا طبقات واننا مش ممكن هنكون زى بعض 
لكن مش بالطريقة دى!!
مهما كنت فقير أنا لى حق فى حياة تليق بى كانسان 
مش حقوده انا والله ومحدش من اجدادى كان ليه أى علاقة بالرفاق ماركس ولينين وغيرهم
لكن الدولة بدأت تعودنا كلنا ان اسلم طريق للوصول لبعض حقوقك هو التسول والدليل الاعلانات عن التبرع للمستشفيات
تانى
ليه محمد منير مثلا مع احترامى لموهبته وفنه واحساسه وتاريخه و.. و...ياخد 7 مليون علشان اعلان
هنفترض ان الكلام ده غلط
اخد مليون مثلا 
هو المليون ده مكانش ممكن يأثر بطريقة خيالية فى حياة ناس فى منتهى السعادة مثلا انها اخدت 100 جنيه
ولا الهطل اللى اسمه مسلسلات ولا التخلف اللى اسمه لعيبة كورة مالهمش لازمة وشاغلين لنا دماغنا بمشاكلهم وفلوسهم
انا على اد ماكنت فرحانة النهاردة على اد مازعلت من شكل الناس فى المستشفى
بياخدوا الهدايا وهما الحزن ساكنهم ممكن يكون علشان مرض أطفالهم لكن انا متأكدة ان احساسهم بالعجز مزود عندهم الشعور ده والعمال فى المستشفى متوقعين يكون ليهم نصيب فى التبرعات وطبعا مكانش فى استعداد لده
متعاطفة انا معاهم جدا ومع كل حد مش بياخد مرتب يكفيه يعيش بطريقة آدمية 
بس لغاية امتى هنسيب الناس للظروف يوم يعيشوا وشهور ماينفعش نسمى حياتهم دى عيشة من أصله
يامصر الهى ربنا يسعدك  .....كفاية كده
ماتسيبيش البعدا يبهدلوا فينا بالطريقة دى
هيكرهونا فيكى وكتير  مننا فعلا خلاص كفر بيكى واحنا لسه ماسكين فى حبال دايبة وبنعيط عليها علشان شوية بلادى وان جارت على عزيزة اللى اتربينا عليها زمان

- أغلب اللى كانوا موجودين شباب لكن لفت نظرى اتنين من كبار السن المبجلين

بابا ابو خالد

زى ماسمعت الكل بيناديه وزى مافهمت انه رغم سنه وتعبه ربنا يديله الصحة لكن جاى من بورسعيد علشان يشارك فى يوم زى ده

استاذ شيرين

للاسف مالحقتش اعرف بقية اسمه ولا مدونته لكن ياجماعة الناس الكبارات بتوعنا دول عسل قوى
ايه الذوق والاخلاق الرفيعة دى حتى مش رضى يفطر ولا يدوق حاجة الا لما اكلنا المتأخر ييجى لغاية عندنا وأصر على كده
خسارة والله اننا مانتمتعش بمعرفتهم ونتعلم نبص للدنيا واحنا مدينها حجمها الحقيقى


المدونيين


كنت رايحة وانا فرحانة جدا وخايفة فى نفس الوقت
خايفة من رد فعلهم واستقبالهم لى فى وسطهم وهما اصحاب من سنين
وخايفة من الصورة الجميلة اللى رسمتها لكل واحد فيهم انها تتغير بعد ماالافتراضى بقى حقيقى
نبدأ بترتيب الظهور

داليا (قوس قزح) 

وفى قول اخر وش الخير
ادتنى احساس بانها جد قوى وحنينة قوى كمان وفكرتنى بسرعة بآبى لما بتقول عليها مانتى الصغيرة وفى عقلى قلت عندك حق والله ياآبى

فاتيما

كنت رسمت لها صورة غاية فى الروعة ونجحت بجدارة انها تغير تفاصيل الصورة دى
للاحسن طبعا 
لأ ياجماعة طعمة بزيادة وعسولة ورقيقة كتير كتير جدا عن ما كنت متخيلة وطبعا أحسنت استقبالنا وعرفتنا على ناس كتير
بصراحة ياطمطم انت كنت عنصر اساسى جدا فى استمتاعى النهارده ومهما كتبت عن فرحتى انى شفتك وكلمتك أخيرا مش هاقدر

واندا 

كانت فرصة حلوة قوى انى اشوفها النهارده قبل ماتسافر وادتنى احساس بالشياكة والعقل الراجح وبنت واخدة من الاجانب شوية حاجات حلوة وضربتهم  فى الخلاط مع جيناتها المصرية طلعوا الانسانة الجميلة اللى انا فرحانة انى شفتها النهارده واندتى حبيبتى وكل شوية تقولى ياعرابية ومفرحانى تمام

منونه

كنت بحاول طول النهار استكشف الناس لوحدى ونجحت وفشلت احيانا
بس منونة خمنتها من الرقة ومن الصور اللى بتحطها على الفيس بوك لبنات شبهها وعجبتنى رقتها وطيبتها الواضحة وفنانة عسولة

الستات اللى بميت راجل أهمهم
ساجى

ايه الجدعنة دى والشخصيات القيادية والحنية دى كلها 
اتشرفت والله بتعرفى عليها

رودى

والمجهود الكبير فى التخطيط والتوزيع

مش عارفة حسيت ان البنات عساسيل كده وطيبين قوى رغم ان كلامى معاهم قليل منهم مثلا
مروة عبد الفتاح
وسونى 2000
وشوية منهم شقاوات
زى كيكى عووو وكيارا


نيجى بقى لشباب الجيل الصاعد
أول واحد عرفته

أستاذ ضياء (بيوتفل مايند)

عرفته من صورته على الفيس بوك وبصراحة كنت رايحة وانا بحترمه جدا وروحت وانا مش عارفة ايه العدد المناسب اللى ممكن أكرره من كلمة جدا


استاذ مصطفى ريان

عرفته من صورته على الفيس وادانى احساس ان كلام فاتيما عن طيبته واقعى جدا 
انا اللى كلمته وعرفته بنفسى وهو مش يعرفنى خالص وحملته أمانة سلام لمدونا المميز (تايه فى وسط البلد) صاحب صور جدى الغالى اللى منوره المدونة

واستاذ وليد الدوغرى جارى العزيز

االى كان قايم بالواجب وزيادة وانقذنا بالمياه اكتر من مرة علشان كان نفسنا نفطر فى بحيرة فكتوريا بجد من كتر العطش 


ناس تانية كنت متشوقة جدا انى اعرفهم وشكلهم مش غريب على ابدا بس اتكسفت اروح لهم اقولهم أنا عارفة صوركم  لكن مش عارفة انتم مين
بس كلهم كده شباب يفرح
هو الظاهر مواليد التمانينات دول فيهم حاجة لله

- استاذ خالد صاحب مدونة همس الاحباب انا سمعت كتير عن شهامته وجدعنته لكن النهارده اتأكدت انه هو الشهامة والجدعنة ذات نفسها
ماشاء الله عليه شايل هم كل واحد فينا وتقريبا مفطرش من كتر ماكان بينظم وبيوصل لنا الاكل بنفسه
حسسونى ان كل واحد بيتكلم عن مستقبل البلد دى وهو حزين غلطان لانه ماشافهمش

- كنت فرحانة قوى وتعبانة قوى وأول مرة أحس بهبوط كده فى رمضان لدرجة انى كنت بمسك الهوا فى المترو وانا راجعة وحاسة انى مش هاعرف اوصل البيت

- نصيحة رهيبة لما تحبوا تاكلوا بره البيت وانتم مش متعودين على كده ياريت يعنى ماتطلبوش فراخ
لانكم مش هتعرفوا تاكلوها كويس واطلبوا  بذكاء حاجة ممكن تتاكل بسهولة 
 خصوصا لو انتم مش متعودين تاكلوا بالشوكة والسكينة زى ناس نعرفهم
وخاصة لو دماغكم تربست انكم لازم تاكلوا والشوكة فى اليمين وتبقوا متلخبطين ياعينى وانتم بتقطعوا الفراخ اللى مش بتتقطع بالسكينة 
وبعدين تركنوا السكينة وتاخدوا الشوكة فى اليمين وتحاولوا تاكلوا 
وتستنوا الناس تقل حواليكم شوية علشان تاخدوا جزء من الفراخ وتاكلوه بايديكم ماهى فلوسنا ياناس وشقيانين بيها
والناس بقوا شايفنكم وانتم حالتكم تصعب على الحكومة
نطلع من الموضوع ده بايه على رأى خيخة 
انى فرحانة جدا ومرهقة جدا


وبمناسبة خيخة
وانا بكتشفها وبسلم عليها واحنا مروحين  بعد ماسألت عليها كتير
حد بيعرفها على وقالها حفيدة عرابى وبتعلق تعليقات غريبة عندك
لا والله يانوران هى مرة واحدة حسيت ان الخيط الرفيع قوى بين التلميح والتصريح ضاع فى بوست ما
فقلت لك كده وانت ماعجبيش كلامى والموقف انتهى
ومرة كمان كان فى مشكلة حصلت وانا بعت تعليقين حتى كنت ناوية اخليهم بغير معرف قلت علشان هى مش تعرفنى وممكن متقبلش كلامى ونسيت عادى يعنى وبعته بالاكاونت بتاعى والتانى بعده مباشرة كملت فيه كلامى واعترفت لك فيه باللى كنت ناوية عليه وليه التجربة فشلت
وحسيت بعدها ان نوران بذكاء قدرت تغير الموقف ونجحت فى كده والمياه رجعت لمجاريها

كفاية كده علشان انتم زهقتم منى وأنا كمان نفسى أنام 

تصبحوا على خير







67 التعليقات:



قوس قزح يقول...

انا كنت سعيدة جدا بحضورك
و اد ايه حسيت انك شخصية متعاونة و حابة تعملى الخير

جزاكى الله كل خير يارب
و دايما تتجمعى معنا على الخير

Lady E يقول...

ربنا يجزيكم كل خير

وأكيد اليوم كان حلو بكل المدونين الرائعين اللي اتكلمتي عنهم وحلو بعمل الخير

كلامك خلاني كأني كنت معاكم

غير معرف يقول...

الانسانه الطيبه حفيدة عرابى تحية خالصه لك من كل قلبى وياريت نقتدى بك ونعمل زيك انا فكرت فعلا لكن كان عندى مأمورية شغل فى احدى مدن القناة ورجعت الخميس متأخر وده يمكن عشان حظكم حلو كنت هتشوافوا عمكم الصعيدى لكن ربنا حب يخليكم تكملوا رمضان على خير .... ربنا يا بنتى يكرمكم جميعا أفكارك رائعه يارب حد من اللى اتكلمتى عنهم يفكر شويه فى آخرته ويعمل حاجه ليها .
عمك مدحت

Wanda يقول...

عرابية
يارب التعليق يتنشر بدون معاكسات بقى :-)

اولا كل سنة و انت طيبة متاخرة يومين تعليقيا بس انشاء الله مقبولة اسبوعيا :-))

ثانيا دا انا الاسعد يا عرابية
و يابخت تلامذتك بيك
انسانة هادية و رصينة ولما بتعمل حركة او فعل بيبقى لقصد الخير و الفايدة مش مجرد فعل

ثالثا انا متفقة معاكى فى ارائك و ملحوظاتك جدا و يارب نلاقى الحال اتغير للاحسن بادين ناس قلبهم ابيض زي

رابعا خذى دول :-***********************************************************************************

:-) الترجمة عند قواميس فطوم :-)))

كيــــــــــــارا يقول...

والله معاكي حق بجد في كلامك

اليوم كان جميل اوي اوي

بس انا مش كنت شقية بئا انا كان ضغطي منخفض ومهنجه يبقي ازاي شقية بئا ؛)


يارب اشوفك كتير بئا في الايام الجاية :)

كل سنة وانتي طيبة ياثكر

همس الاحباب يقول...

جزاكى الله خيرا
مع الاسف ماسعدتش بالتعرف على حضرتك
مع انى كنت حريص على ذلك
بس مع الاسف كنت عامل زى ام العروسة فاضية ومشغولة
وان شاء الله نلتقى دائما على خير ويكون هناك مساحة من التعارف
دمتى بخير

فاتيما يقول...

ابو العروسة يا خالد ابو العروسة يا جدع
أمها ايه بس ؟؟

معلش توابع اليوم بقى


يا فيدو انا عاوزة اعلق على كل سطر كتبتيه يا عزيزتى

احاول الم ف الكلمات

***********
دى قبل ما انسى
يعنى بوسة
حسب القاموس الونداوى السواح ف الكون


انتى على فكرة زى ما توقعتك
و يمكن احلى
و ماشاء الله اهدى

انتى اصلك ثورية الهوى فى كتاباتك
عرابية و واخدة ف وشك كدا
و متقبليش بأى ظلم
و اللى كتبتيه ف مقدمة البوست جزء اصيل منك
اللى يشوفك يا لهوى
انتى هادية كدا و رزينة علطول؟!!

انا اسفة انى ملحقتش اقعد معاكى كفاية
هيا الأيام الزحمة بتكون كدا
محدش بيلحق يتكلم مع حد
بس الكل بيمشى و هوه فرحان
لأننا انجزنا المهمة الحمدلله بنجاح

كل انطباعتاك عن الناس الحلوة
موافقاكى فيه

عرفتى ليه يا فيدو انا بحبكو قوى
و شيفاكوا احلى ناس و صحبة و عالم

احنا بنتجمع ع الخير
و مفيش غيره
بنتلم من شرق و غب
بكل المهن و المستويات و الطباع
عشان نعمل حاجة
فرق نغير بيه الواقع
و لو بأقل الامكانات
المنظر اللى شوفتيه ف المستشفى و ضايقك
تخيلى لو محدش خالص افتكرهم ف اليوم دا و شاف حتى نظرة الحزن دى و حاول يطبطب بأى شكل
احنا و غيرنا بنعمل اللى نقدر عليه

و يا ريت ربنا يقدرنا نعمل اكتر و اكتر

ان شاء الله تحضرى بؤجات الخير
و اى مناسبة تانية
ساعتها احساسك بالغحباط هيقل كتير
لما تلاقى نفسك بإنتظام
بتحاولى تعملى أى فرق
و لو بسيط

انتى حد جميل قوى يا فيدو
و مكنتش عاوزة اطلعك من حضنى عشان انتى ليكى عندى كتيييييير قوى
و اللى ف القاموس الونداوى يبقى
××××××××××××××××××××××××

حديث الفراخ بقى
فيا ماما براحتك
المثل بيقول
كل اللى يعجبك
و انا بزود عليه
بالطريقة اللى تعجبك
و لا يهمك

عقبال كل مرة متجمعين
و مبسوطين
و فرحانين

كل سنة و انتى حبيبتى

حفيدة عرابى يقول...

قوس قزح
أنا كنت أسعد
ولو تفتكرى انت كنت اول حد كلمته وانا مش عارفة أسأل على مين
وقلت لك مدام داليا وفرحت قوى لما طلعتى انت
بالنسبة للتعاون انا كنت تايهة جدا
لانى اول مرة ومش فاهمة التوزيع يكون ازاى
فسماح المرة دى معلش:)
يارب متجمعين دايما فى الخير
وجزاكم الله خيرا على مجهودكم ودعوتكم
الدال على الخير كفاعله

حفيدة عرابى يقول...

ladyE
أهلا بيكى
اليوم كان جميل فعلا باصحابه اللى دعوا ليه ومتحمسين جدا لتكراره
المرة الجاية ان شاء الله تكونى معانا

حفيدة عرابى يقول...

استاذ مدحت
كان يبقى من حسن حظنا والله لو حضرتك شرفتنا
ان شاء الله المرة الجاية حضرتك تكون معانا
ومتنساش حضرتك انك شجعتنى اروح
جزاك الله خيرا

حفيدة عرابى يقول...

واندتى
التعليق سمع الكلام وطلع مؤدب اهوه
كل سنة وانتى طيبة ومقبولة دايما ايا كان وقتها
ولأ معلش انا الاسعد ياواندتى
أنا هادية!!!؟
طيب انت تبقى ايه؟
لا ياحبيبتى الانطباعات الاولى عنى لاتدوم
كويس انك اتفقتى معايا فى الملاحظات:)

وانت كمان خدى دول
********************************************************************
مش هى دى ولا ايه:)

حفيدة عرابى يقول...

كيارا
وفى قول فاتيما ( البنوتات العسولات)
يمكن علشان انا كنت عارفة حكاية المصاصات ودخلت مدونتك قبل كده وبعدين العينين فيها رقة وشقاوات
حتى مع الضغط المهنج
سلامتك الف سلامة
ويارب اليوم ده يتكرر ياثكر:)

حفيدة عرابى يقول...

استاذ خالد
ربنا يجازيك خير ويكتبه فى ميزان حسناتك
ويبارك فى اولاد حضرتك
ده انا افتكرت حاجة كمان من الجدعنات
وهما بيتكلموا على الحساب وحضرتك بتقولهم اللى يدفع يدفع وانا اكمل مش مشكلة
مفيش كده ابدا دلوقت يافندم
انا صحيح مااتكلمتش مع حضرتك بس اتشرفت بوجودى معاكم
ربنا يديمها نعمة علينا

حفيدة عرابى يقول...

طمطم
خدى دول كمان************************
انت ياطمطم مش زى ماتوقعتك
انت ماشاء الله أصغر وأجمل مما تخيلتك مع انى بصراحة بصراحة كنت شفت لك صور قبل كده
بس الصور تجيب ايه فى الروح العسولة دى

بالنسبة لهدوئى
لا ياماما اللى بتشوفيه هنا هو الاصل
والوش الهادى ده لما بكون جديدة على الناس بس او حاسة بهبوط ودايخة زى امبارح:)
مش عارفة بيطلع منين بس ساعات بلاقينى هادية كده

انا كانت عنيا عليكى انت وواندتى طول اليوم
واكيد مكنش ينفع نقعد مع بعضينا فى الوقت ده بس تتعوض ان شاء الله

انطباعاتى عن الناس
جزء منها من كلامهم فى مدوناتهم
وجزء كبير جدا جدا من وصفك انت ليهم
بجد المجموعة كانت حلوة قوى بالرغم من انهم من الشرق والغرب
سبحان الله اللى خلى الخير يجمعهم ويحببهم فى بعض كده
انا كنت حاة المدونين لوحدى
وشعورى زاد بالشكر لربنا اللى حط الناس الجميلة دى فى طريقى

هحاول انحى جانبا جينات الثورة العرابية شوية
بس اللى ضايقنى بجد ان الناس محتاجة كتير فعلا وابتسامتهم حزينة
والكتير ده حقهم ياطمطم ماينفعش اصلا يبقى منحة
ماعلينا احاول انضم لفريق ايقاد الشموع مع انضمامى الجينى لفريق لعن الظلام:)

انت كنت عنصر اساسى فى سعادتى ياطمطم
ذوقك ومجاملتك وعرفتينى على ناس حلوة

بحبك

كيــــــــــــارا يقول...

ياكزوووووووفي ياني

وثي بئا احمريكا دوقتي

ربنا يخليكي ياثكر

وان شاء الله بجد اليوم دا يتكرر

عارفه

احنا بنتقابل في لقاءات كتير اوي

بس لقاء رمضان دا حاجه تانيه خالث

ربنا بيبارك فيه اوي وليه كاريزما كدا

ربنا يدمها يااااااارب

شاب فقرى يقول...

جزاكى الله كل خير
ونورتى
وفعلا كلامك فى بداية البوست عندك حق فيه
الواحد اتوجع جامد من اللى شافه وبيدعى على البعدا اللى مش سايبين اى حاجة للغلابة وبيدعى عالبعدا اللى مش حاسين بالغلابه فى البلد دى
وبيقول ربنا يريحنا من الهيافات اللى كلت دماغ الخلق
يلا ربنا كريم
تحياتى لوجودك معانا
انا اسف مكنتش اعرفك ولا اعرف المدونة
بس اتشرفت بيكى
وربنا ما يقطع لك عادى فى الخير ابدا يارب
شاب فقرى

قلــ"بـــلال"ــــــب فارس يقول...

اتمنى ان تشارك انت وزوارك فى الصالون الفكرى
http://qalbfars.blogspot.com/2010/08/blog-post_29.html

مصعب صلاح يقول...

السلام عليكم
ربنا يوفقكم والله ع الجهد وريارب دايما

كــركــبــة دمـــاغ ㋡ يقول...

انا مبسوطه وسعيده وفرحانه اني اتشرفت بشخصيه زي حضرتك

يمكن ما اتلكمناش كتير

بس غصب عني حبيتك واحترمتك جداً

حصلي الشرف بمعرفتك بجد

وربنا يجمعنا على الخير دايماً

غير معرف يقول...

ياااه يا الله شوفتى عمل الخير بيجمع الناس مع بعضهم ازاى ربنا يكرمكم جميعا وزى ما قلتلك كنت فعلا أتمنى أكون موجود فى عمل خير زى ده ... وأن شاء الله هيحصل فى مناسبة خير حتى لو ماكنتش اعرف اى حد هروح وأشارك مع الشباب اللى يفرح القلب ده ربنا يزيد من أمثالكم .
عمك مدحت

بسنت يقول...

السلام عليكم يا عرابيه
انا قريت البوست بتاعك وقلت انا اكيد ما شفتكيش لان دى كمان اول مره أزور واعلق فى مدونتك
بس بعد ما قريت بوست فاتيما تأكدت انى شوفتك يوم الخير الجميل دا
مادمتى كنتى ملازمه لبيطريه ومش بأيدى تبقى كدا كنتى قاعده جنبها من ناحيه وقت الافطار وانا كنت قاعده الناحيه التانيه بس لو اعرف انو انتى كنت اتعرفت عليكى اكيد لكن كله نصيب سبحان الله لان اللى كانوا قدامى كلهم (شله نبويه) ما كانوا مدونيين فتوقعت باقى الطرابيزه مش مدونين غير استاذ شيرين الكردى طبعا
على العموم كل سنه وانتى طيبه ودايما سباقه بالخير
وان شاء الله تكون فى فرصه تانيه احسن

شمس النهار يقول...

بنبسط جدا جدا
لما بتحصل التجمعات الجميلة دي

ويرجع المدونين يكتبوا انهم امبسطوا

ربنا يسعد ايامكم يارب

تحياتي

(احمد سكر ) يقول...

اليوم فعلا كان روووعه بس محصلش نصيب اتعرف ع حضرتك بس اكيد ان شاء الله هيكون فى مره تانيه للخير بردو .... كل سنه وحضرتك طيبه

حفيدة عرابى يقول...

كيارا( البنوتات العسولات)

مش تتكسفى خالص ياعسولة
ان شاء الله ربنا يجمعنا دايما فى الخير

---------------------
شاب فقرى مع انه مش فقرى ولاحاجة

انا كمان اتشرفت بمعرفة حضرتك
وسعيدة ان كتير بيشاركونى رأيى فى البعدا
ربنا يبعدهم كمان وكمان:)
ربنا يديم تجمعنا الجميل ده وشكرا على شهامتك وقت الفطار كنتم تشرفوا بجد
جزاكم الله خيرا

-------------------
قلب بلال فارس
عُلم يافندم وجارى التنفيذ

------------------
مصعب صلاح

اللهم آمين
والمرة الجاية ان شاء الله تكون معانا

------------------
كركبة دماغ

شوفى انا زعلانة من نفسى جدا
بس والله نسيت خالص اسم مدونتك
ده انت بريئة وعسولة خالص
وهادية ومتديش خالص على كركبة دماغ
اكيد ربنا كان راضى عننا لما يجمعنا كلنا كده وتبقى مشاعرنا حلوة قوى كده ناحية بعض من اول مرة
ربنا يسهل لازم نتقابل تانى ان شاء الله
ربنا يكرمك ياعسولة يابسكوتة ويكتب لك الخير دايما

----------------------
استاذ مدحت

الحمد لله ان حضرتك نويت تبقى معانا
علشان فرحتنا تكمل
وربنا يسهل اليوم ده بقى قريب ان شاء الله

-----------------------
بسنت
انت كنت قاعدة جنب بيطرية واحنا نفطر
خلاص عرفتك وزعلت اكتر انى معرفتكيش وقتها
وكمان انا حاسة انى شفت تعلقات ليكى عند تايه فى وسط البلد
وعندى شعور اننا اصدقاء على الفيس
لو ده صح
فانا متغاظة جدا انى مااتعرفتش عليكى
وبجد الحاجة اللى كانت ناقصة اليوم الجميل ده ان حد يتطوع ويعمل تعارف بينا كلنا
لانى زعلت جدا لما قرأت بعد كده ان ناس كتير كان نفسى اشوفهم وكانوا موجودين
وانا معرفهمش
انا ياستى اللى كنت حرانة وعطشانة
ودايخة وبترجى من ربنا اسمع اذان المغرب وشوية وهيحصلى اغماء وكمان متلخبطة وبعافر مع الفراخ
متهيألى كده عرفتينى:))
-------------------

شمس هانم

ان شاء الله المرة الجاية تكونى معانا وتنورينا لانى نفسى اشوف حضرتك جدا
وسلامتك حضرتك الف سلامة

---------------

استاذ احمد سكر

انا حظى كان كويس يافندم لانى شفت حضرتك
بس معرفتش حضرتك الا بعد كلامنا على الفيس لما رحت شفت الصور
ربنا يجازى حضرتك خيرا على مجهودك
وان شاء الله فى مرات تانة نتعرف اكتر
تحياتى لحضرتك

мαησηα يقول...

رووشا حبيبتى ..

ده انتى قمر والله وزى ما توقعتك

ع فكرة هادية وماتقوليش لأ

انتى هادية وعاقلة كده الله عليكى

يا اوختى بجد انا كده حبيتك اوى اوى وبقيتى بتوحشينى اكترررر اعمل انا ايه دلوقتى بقه :((

وشوفتى بجد يوم ميلادك كان يوم جميل وحلو علينا ازاى يا سكرة انتى

ع فكرة كان نفسى اغنيلك يلا حيوا ابو الفصاد بس نسييييت للاسف

كمان كنت عايزة اقعد معاكوا شويات كتييييير بس بردو مالحقتش :((

تعالوا بقه اللكاء الحريمى وخلونا نتقابل ونقعد مع بعضينا كتير ان شاء الله يا حبيبتى

رووشا انا بحبك اوى

بيطرية ومش بايدى يقول...

طبعا لا تعليق بعد كل الكلام اللى اتقال ده لانه وباختصار
يوم ميلاد الباشا الكبير
فلازمن وحتما ولابد يكون يوم تحفففة


دمتى بكل خيييييييير

حبة ادب كده على الماشى عشان الناس اللى موجودة هنا يعنى
لكن متاخديش على كده:D

Sameh Ezzat - (خواطر خاطر) يقول...

وانا وانا وانا واللهي كنت موجود

مايش نصيف اني اتعرف عليكي

كل سنه وانتي طيبه ومتجمعين ف الخير ديما يارب

حفيدة عرابى يقول...

منونتى
يابنتى انا عارفانى:)
هادية ايه بس
ده المدونة اسمها لقد خلقنا الله احرارا
ده اول انطباع بس
والانطباعات الاولى لاتدوم
المهم بجد والله انت كنت شبه الصورة اللى فى بالى
بس على ارق واهدى وجالى احساس قوى انى شفتك قبل كده
كنا زملاء فى الجامعة
مع ان فى فرق دفعاااااااات بينا
بس انتى فعلا
وكل الناس هناك فى اليوم ده كانوا حلوين بجد واليوم كان مفرح بطريقة عجيبة
لو فرصة ممكن نتقابل تانى قريب
بس المشكلة بس
انى من ساعة ماروحت الفيس وانا فى اجازة
لما الدراسة تبدأ ببقى مشغولة جدا
ربنا يسهل ياأرق منونا

حفيدة عرابى يقول...

ست الضاكتورة البيطرية
مشكرين ياباشا
اخجلتم تواضعنا
عقبال كل مرة
وابقوا عدوا الجمايل:))
مع انى باكره الجملة دى جدا
بس لقيتها مناسبة للموقف قوى:)

حفيدة عرابى يقول...

استاذ سامح
انا شفت حضرتك هناك
ووبعد مارجعنا بقينا اصدقاء فيس بوكيين
انا اتشرفت بمعرفة حضرتك يافندم

Admin يقول...

اول مره بس مدونه زى العسل

بسنت يقول...

عرابيه
هى ياستى اللى بتعلق عند الفيلسوف الكبير (تايه) واللى ضيفاكى على الفيس بوك
واللى كانت قاعده بينك وبينها خطويتين
وما اتعرفناش
بس فكراكى كويس وان شاء الله لو اتقابلنا صدفه مره تانيه هعرفك بدون تعارف من حد

وعلى فكره انا خدت فراخ بردوا بس هى الحاجه الوحيده اللى عجبتنى وكلتها فى الفطار

تايه في وسط البلد يقول...

السلام عليكم ورحمة الله

صدقا تمنيت لو انك استفضتي قليلا في الكلام عن هذا اليوم الرائع والروح الجميلة التني سرت به بينكم..كنت مدعوا اليه بواسطة المدونة الفاضلة نهر الحب وحاولت حضوره لكن ظروف الحياة حالت دون ذلك

كنت ومازلت اصر دوما علي ضرورة التوسع في مثل هذه اللقاءات النبيلة بين المدونين وبعضهم ولمثل هذه المقاصد وان كنت لم اتمم صدق النية بجدية الحضور والعمل..وان كنت أأمل في الايام القادمة بعض الانفراج الذي يسمح لي بتدارك هذا التأخر

عليكي ولك جزيل السلام والتقدير والاحترام استاذتي العزيزةوانني هذه الأيام اراكي اكثر مما اري مصطفي ريان العزيز !!!

كل التحية وأأمل ان تحمل الايام لقاءا قريبا يغمرني بالشرف

ملحوظة: اختنا بسنت انتوت ان تحولني الي ( فيلسوف )مع اني حريص علي الاستحمام كل يوم!!! فأرجو ان توصيها بي خيراً!!

حفيدة عرابى يقول...

ADMIN
أهلا وسهلا بحضرتك
شكرا جزيلا يافندم

------------------
بسنت

شوفى مادام بتنادينى وبتقولى عرابية
يبقى احنا أصحاب ان شاء الله
لكن انا رجعت تانى اتغاظت من نفسى قوى شوفى للمرة الكام
لان فاتيما قالت لى اسامى مدونات بعض البنات اللى كانوا واقفين
وبيطرية قالت لى خواطر شابة
وانها قلت لها خواطر مين يابنتى دى خواطر شابة دى مدونة مغربية
والبنت مصرة وانا كمان لان فى مدونة مغربية اسمها خواطرشابة وضيعت فرصة كمان للتعارف ومكنتش اعرف اسم مدونتك الا لما دخلتها بعد اللقاء
و كمان كنت جاية من الصعيد ياحبيبتى وانا عمالة اشتكى من الحر وعايزة افطر عند بحيرة فكتوريا
ربنا يجعله فى ميزان حسناتك ان شاء الله
ونعوض عدم تعارفنا ده المرة الجاية ان شاء الله
-----------------

الفيلسوف الكبير تايه فى وسط البلد

وعليكم السلام ورحمة الله وبركاته

ان شاء الله فى مرة تانية قريبة حضرتك تكون موجود وتشوف بنفسك الفرحة معانا لانها فعلا فرحة جديدة والحمد لله لغاية دلوقت وهى متعلقة بالروح ومش عايزة تسيبها

انا مش حكيت كتير عن تفاصيل اليوم لاسباب كتير منها انى مكنش لى دور فعال فى المستشفى
لانى مش عارفة ايه المطلوب منى بالظبط
ولا المبلغ المتوافر والهدايا اد ايه ولا عدد الاسر ولا حالتهم وصحة اطفالهم عاملة ازاى
كل دى تفاصيل مكنتش اعرفها وقتها وطلبت منهم اننا لازم نكون مع حد عارف هنعمل ايه علشان مش نلخبط الدنيا

والاطفال وامهاتهم الافضل مش يتوصف حالهم

بس واحد من أبطال اليوم استاذ ضياء
قالى موقف هسيب وصفه لحضرتك

لما طلع مرة تانية فى دور كان تم فيه توزيع الهدايا لقى طفل صغير بيجرى وبيغنى بره العنبر وبيقول جابولى لعبة حلوة وجابولى هدوم جديدة


وكمان كنت محرجة وانا بكتب لانى شخصيا بستمتع ببوستات فاتيما التفصيلية
بس كتبته علشان أسجل فرحتى اللى حسيت انها تستاهل

الارهاق الشديد كان مخلى التر كيز ضايع ده انا انجزت بالبوست ده

اتمنى الظروف تتحسن وحضرتك تكون موجود فى مرة تانية

العزيزة بسنت قالت الفيلسوف الكبير
مش أى فيلسوف وخلاص
يبقى فيه اختلاف يافندم لاتقلق:)

حاجة كمان حضرتك مصر تحرجنى بيها
كلمة أستاذتى
أنا متأكدة لو أعتبرنا السن انى اكبر سنا من حضرتك بكتير
لكن صدقا شعورى ان حضرتك استاذى لانى بستفيد كتير جدا من مدونة حضرتك والنقاشات هناك
فبتحرجنى والله لما تقولى استاذتى
وكمان بحس انى هلاقى شعرى أبيض كل مرة أسمع فيهاالكلمة دى
اتفقنا؟:))

Sagy يقول...

والله يسلم زوقك
انت الى كلك حنيه وجدعنه
واتشرفت بحضرتك

والفضل لله ولماما قوس قزح الى بتجمع كل الألوان الحلوة والى بعشق حنيتها وقلبها قوس قزح لولا فضل الله وطلبها لحضورى مكنتش شفت الناس الجميله الى زيك

يارب دايما نفضل متواصليين ويديم المعروف

حفيدة عرابى يقول...

ساجى
أنا أول مرة أشوف حضرتك
بس حقيقى بحترم جدا السيدات اللى وقت الجد بيبقوا رجولة قوى:))
مع احتفاظهم بحنانهم الامومى الفطرى
بتطلع منهم حاجات جميلة
سعيدة جدا بتعرفى على حضرتك وأتمنى انى أشوفك تانى كتير:)

فشكووول يقول...

ازيك يا حفيدة عرابى
السلام عليكم
والله بيقولواكان يوم حلو وحظه وحش اللى ما راحش
ربينا يزيدكو فى الخير
تحياتى

أم الخــلـود يقول...

اصحى يا نايم ووحد الدايم

أرجوا من المدونين الموقرين أن يضعوا شعار الحملة واسمها فقط فوقها

(حملة الجسد الواحد)

في الشريط الجانبي لمدوناتهم كدلالة على وحدة صف أمة محمد

http://dndanh111.blogspot.com/2010/06/blog-post_14.html

ومن أجل قيام الولايات المتحدة الإسلامية

http://dndanh111.blogspot.com/2010/06/blog-post_17.html

جعله الله في ميزان حسناتكم .. آمين

مهندس مصري يقول...

الحمد لله
واضح انه كان يوم جميل
متجمعين في الخير دايماً
و عقبال ما نشوف الوشوش الطيبة دي كلها على خير

حفيدة عرابى يقول...

استاذنا الكبير فشكول
وعلكم السلام ورحمة الله وبركاته
احنا اللى حظنا وحش اننا ماشوفناش حضرتك
تتعوض المرة الجاية ان شاء الله

-----------
أم الخلود
شكرا لمجهودك

---------------
مهندس مصرى

من ناحية جميل هو كده فعلا
ربنا يديم علينا تجمعنا للخير
المرة الجاية تكون كل الناس موجودة وبخير بأذن الله

اقصوصه يقول...

رمضان كريم :)

دموع القمر يقول...

بحسدكم على اللقاء دا والله بس اعمل ايه
بصى بقى قرار وزارى من بيطريه هتشدى الرحال وتشاريكنا فى مشروع شجعنى شكرا
ههههههه
كل سنة وانت طيبة :)

ولد تحت الصفر يقول...

:)

يباركلكم ربنا

حفيدة عرابى يقول...

اقصوصة
الله أكرم:)
شرفتينى
-------------
دموع القمر
شرفتنى فى أول زيارة
انا بعتذر مش هاقدر أشد الرحال
مرة تانة ان شاء الله:)
---------------------
ولد تحت الصفر
يباركلك يااستاذ ولد تحت الصفر
حضرتك عامل ايه:))

غير معرف يقول...

العرابية الاصيلة .... كل سنه وانتى بخير بكره العيد وطبعا انا دلوقتى بكتبلك من صعيد مصر وانا فى وسط اسرتى ويارب يجعل أيامك كلها أعياد وخير وبركة .
عمك مدحت

حفيدة عرابى يقول...

استاذ مدحت
كل سنة وحضرتك والاسرة طيبين وبخير
يارب يديم تجمعكم دايما

حـــواديت يقول...

ادام الله علينا اعيادنا دهورا
بها ومنها سعادتنا
وكل سنة والف سنة واسرة المدونين دائما وابدا بخير ورحمه وحب واكرام

Wanda يقول...

كل سنة و انت طيبة يا عرابية
و انشاء الله تشوفى ثورة فى التعلم قريب و لا ده حصل امبارح خلاص ؟؟

د. ياسر عمر عبد الفتاح يقول...

شكله كان يوم ظريف
ربنا يشفي كل مبتلى بالمرض

كل سنة والأمة كلها بخير
وتقبل الله منا ومنكم

بعودة الأيااااااااام

norahaty يقول...

كل سنة وأنتِ طيبة
عارفة أنى تأخرت شوية
ولكن:كل لحظة وأنتِ بخيــر

norahaty يقول...

كل سنةوأنتِ طيبة
عارفة أنى تأخرت شوية
ولكن:كل لحظة وأنتِ بخيــر

norahaty يقول...

كل سنةوأنتِ طيبة
عارفة أنى تأخرت شوية
ولكن:كل لحظة وأنتِ بخيــر

حفيدة عرابى يقول...

حواديت
اللهم آمين وحضرتك طيب وبخير
شرفتنى فى اول زيارة يافندم


واندتى
وانت طيبة وبخير معلش هو الرد متأخر
الله يخليك ياواندتى
بس مش عارفة ايه ثورة التعليم اللى حصلت؟


د/ ياسر عمر عبد الفتاح
اللهم آمين
كان يوم جميل فعلا
ان شاء الله المرة الجاية حضرتك تكون موجود معانا فيه
كل سنة وحضرتك طيب وبخير
البلوجر نور بعد طول غياب يافندم


الدكتورة العسولة
وانت طيبة وبخير
لو بدرى أو متأخر او مفيش خالص:)
القلوب مسلمة ومعيدة وفرحانة بمعرفتنا الجميلة
لا تقلقى:)

خواطر شابة يقول...

عزيزتي انتظر زيارتك لمدونة ليالي مصرية الرابط موجود على مدونتي لنتمم معا قصة قلب كامل
مشاركتك تهمنا
دمت بكل الود

غير معرف يقول...

عرابيه الاصيلة .. أنتى فين العيد خلص والكحك كمان وكله رجع شغله زلا بتستعدى للمدرسة ده حتى الكتب لسه مانزلتش بجد مستنين حاجه رائعه منك .. وكل سنه وانتى يارب طيبه وبخير .
عمك مدحت

حفيدة عرابى يقول...

خواطر شابة
عُلم وجارى التنفيذ :)



استاذ مدحت
أهلا بحضرتك
فى أقرب فرصة ان شاء الله
لا تقلق حضرتك
شكرا جزيلا على سؤالك :)

شمس النهار يقول...

كل سنه وانتي طيبه

انتي فين مارجعتيش ليه المدونة

تحياتي

كلمات من نور يقول...

ربي يكرمكم ودايما يجمعكم بحبه وحب الخير للناس كلها .......عيد سعيد

اندروميدا يقول...

جميل قوي استايل المدونة ... وخصوصا انها مزينة بصور الزعماء العظام .

وجزاكي الله خيرا عن هذه الزيارة ... ووفقك دائما الي طريق الخير والثواب .


تحياتي في مرور اول

GiGi world يقول...

ايه ياحميل كنت عايزه اقولك على حاجه بس انتى مش عامله اشراف


كان عندى خبر عايزه اقوله لحبيبه قلبي حفيده عرابي


يومين بقى واقولك يافمر

بحبك مووووووووووووووووووووووووووووووووووووووت

حفيدة عرابى يقول...

شمس هانم
نورتينى
خايفة بس اعمل بوست مراسيل مفخخ تانى:)

كلمات من نور
أهلا بحضرتك
شكرا جزيلا وكل سنة وحضرتك والاسرة بخير

اندروميدا
أهلا بك فى اول زيارة
شكراجزيلا على المجاملة واتمنى زيارتك تتكرر

جيجى حبيبتى
نعمل اشراف علشان خاطر عيونك ياقمر
مقدرش انا استنى يومين:)
مع انى حاسة يعنى
ان الموضوع يعنى
كده
صح؟
:)

غير معرف يقول...

قوليلى يا عرابيه انتى مستنيه عيد الاضحى عشان نقولك كل سنه وانتى طيبه مرة تانيه ... انتى فين يا بنتى بصراحه انا ابتديت اقلق لانى كل ما بتابع حد ينزل بوست كل شهرين او تلاته مش عارف ربنا يستر عليكى خاصة وان الدراسة ابتدت ... كنت برضو عاوز اسألك عن شخص معين وهو السيده ام مالك معندكيش اخبار عنها انا كنت اسمع من ايجى صاحب مدونة هكذا علمنى سيدنا محمد عنها الان هو لا يكتب وكنت ادعو لها ربنا يكرمها يمكن طولت عليكى شويه ربنا يكرمك وخدى بالك من تلاميذك اكيد حظهم كويس لان استاذتهم بتحب بلدها وتاريخها .. ربنا يوفقك ان شاء الله .
عمك مدحت

غير معرف يقول...

قوليلى يا عرابيه فاكره البوست بتاعك عن التدريب ... عند ما نزل البوست ده تقريبا كان بداية معرفتى بمدونة حضرتك وانا قاعد افتكرته مش عارف ليه يمكن عشان انا كانت بداية حياتى العمليه منذ مايقرب من 28 سنه وحتى تاريخه فى مجال التدريب يمكن لذهولى من الطريقة اللى بيتم فيها التدريب فى التربية والتعليم بالاسلوب الذى شرحتيه يا بنتى التدريب ده حكاية انا شخصيا اعشقه اعشق دراسة الاحتياجات التدريبيه وتحليلها وتصميم البرنامج وتنفيذه ومتابعة المتدربون والمدرب يااااااااااه ده حكاية طويله وصعبه ولازم اللى يشتغل فيه يكون فعلا بيحب التدريب تعرفى لو استرسلت هتكرهى اليوم اللى كتبتى فيه عن التدريب بس باختصار فعلا لو بلدنا اهتمت بالتدريب من حتى 15 سنه كان زمان القوى البشريه عمله صعبة بجد مش عارف ايه اللى فكرنى بس جه على بالى قلت شوية صداع للعرابيه من عمها مدحت وخلاص .
عمك مدحت

حفيدة عرابى يقول...

استاذ مدحت
أهلا بحضرتك
معلش هما شوية كسل تدوينى مع بداية الدراسة مع دماغى فاضية
حاجات كتير كده لكن ربنا يسهل فى أقرب فرصة أكتب حاجة جديدة
ومش عارفة أشكر حضرتك ازاى على سؤالك الدائم
الله يكرمك


بالنسبة للتدريب
حضرتك قلت أول خطوة دراسة الاحتياجات التدريبية وتحليلها
ده استحالة يكون متوافر عندنا فى ادارتنا على الاقل
لأن التدرب بيتم كتسديد خانات وورق من غير أى اعداد
انا ادعى ان طول السنين اللى انا بشتغل فيها لم استفد الا نادرا من تدريب الادارة
مع انى بالنسبة لزملائى تم ترشيحى لتدريبات اكتر منهم
وده برضه من سوء التخطيط
اوقات كتير جدا مكنتش الادارة بتختار غيرى
اسمى لمااتكرراكتر من مرة مفكروش يتعبوا نفسهم ويشوفوا مين تانى فى المدرسة من حقه يحصل على التدريب
الحالة الوحيدة اللى كان ممكن استفيد فيها من تدريب لما يكون المدرب من خارج الادارة واستاذ فى الجامعة
كان تعب المواصلات والمحاضرات بيهون مقابل الاستفادة
لكن حتى فى المدرسة وحدة التدريب من اختصاص مدرس لا يمتلك أى خبرات تدربية
مجرد بس مين عايز يتحمل مسئولية الوحدة
السنة اللى فاتت مسئولة الوحدة مصرة تدربنا على التعلم النشط الموضة الجديدة
خلاص ياستى احنا قرأنا وفهمنا وبدأنا نغير من أساليبنا
استحالة طبعا لازم وقت كل اسبوع لتدريب كل مدرس بيبتكر حجج علشان يهرب منه وليهم كل العذر حقيقى
والاجمل لما فرضت علينا نظام الكشكول والتحضير يبقى ازاى
واحنا كمادة الدراسات لينا طريقة فى التحضير بتاخد وقت اطول بس جميلة قوى
بحيث كمان أى متابع أيا كان تخصصه ممكن يعرف منها سير الحصة كان ازاى

اعترضت كالعادة وقلت ان طريقنا ليها معنى الف مرة عن الطريقة الجديدة وان التعليمات الفنية دى من اختصاص موجه المادة بس
وفين لما الموجه اعترض وقال لازم ترجعوا للطريقة القديمة

لو كلمت حضرتك عن اللى بنشوفه فى تدريبنا انا اللى هضايق حضرتك فعلا

كفاية ان حضرتك تعرف انى خايفة يجيلى تدريب الايام
لان زملائنا فى مواد تانية عندهم تدريب اسبوع على المناهج الجديدة
ولما يكون كل واحد فينا عنده 20 حصة فى جدوله
وتاخدونى تدريب فاشل فى الادارة ايام الدراسة
مين هيتحمل العشرين حصة
يبقى التدريب بالنسبة لنا عقاب
كنت زمان لما الاقيه فاشل كده أقرأ الجرائد ويبقى كل همنا هيخلص ونروح امتى


شكلى كده طولت على حضرتك
بس بجد انا ماقلتش كل اللى عندى

norahaty يقول...

حبيبتى دا
انتِ شايلة
منهم كتير أوى
كل دا شايله وساكتة
قولى وفضفضى أحنا متابعين

غير معرف يقول...

على فكره انتى ما طولتيش ولا حاجه بالعكس اللى قلتيه ده كله ده يادوب يعتبر مقدمه فى نقد خلل فى اى موضوع اى كان وعلى فكره انا على معرفة كبيره بمشاكل التدريب فى المدارس بس حضرتها(لغة عربيه ).. بس عشان تعرفى انى عارف بتفكرى ازاى ؟؟ تعرفى ليه حوالى شهرين بعمل دراسة لاحتيجات حوالى 50 فرد فى مواقع العمل وبكره ان شاء الله هكون فى القاهره فى احدى الجهات المتخصصه فى تدريب الادارة العليا لتراجع دراستى ثم تقوم هذه الجهة بعمل دراسة لتحديد البرامج التدريبية اللازمة لهم وده كمان بعد عقد اكثر من لقاء مع المرشحين للتدريب .. بجد والله ربنا يكون فى عون الطلبه لان المفروض ان التدريب على المناهج الجديد كان تم بمجرد انتهاء امتحانات الثانوية العامه وعلى الاقل نصف الايام المقررة للتدريب تكون عملى تحت اشراف واضعى هذه المناهج كان الله فى عونكم مع اطيب امنياتى بالتوفيق .
عمك مدحت

غير معرف يقول...

مصر فى مهب الريح

فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 – العدالة الاجتماعية .. وأطفال الشوارع والذين يملكون كل شىء .
5 – ضرورة الاتحاد مع السودان لتوفير الغذاء وحماية الأمن القومى المصرى.
6 – رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.

لمزيد من التفاصيل أذهب إلى مقالات ثقافة الهزيمة بالرابط التالى http://www.ouregypt.us