مراسيل


- مدرستنا المتواضعة عندها كشف للزوار مع انها معندهاش خشخاش

- شهداء اكتوبر الاحياء عند ربهم حماكم الله من أيام لا تستحقكم 

- بفكر جديا أغير رأيى فى أغانى عبد الحليم الوطنية  ازاى يغنى ياجمال ياحبيب الملايين!!!

- حسن نافعة متعاطفة مع جهودك الى النهاية وأخشى انه لاحياة لمن تنادى

-ان تأتى متأخرا خير من الاتأتى أصلا... عن اكتشافى المتأخر للمخزنجى

- تميم البرغوثى أحترت والله أحب الام المصرية ولا الاب الفلسطينى ولاالشعر الرائع ولا الفكر المتميز روح يابنى وانا راضية عنك 

-أرجوك تكلم حتى اراك 

-سعد الصغير احترمت فيك جدا صدقك مع نفسك 

-الى نساء الارض على الاخص ...ولكن الزمان عدو لدود للورود

- قاطعت كاظم لسببين سكوته التام بعد احتلال بلاده والسيدات الفضليات  محتكرى شعار بحبك ياكاظم لكنى اضبط نفسى مستمتعة باغانيه

-الامام الشافعى رحمك الله رحمة واسعة وأمثالك أسعدت أيامى

- فاتيما يقول سبحانه وتعالى (وعزتى وجلالى لأنصرن من لاحيلة له حتى يتعجب أصحاب الحيل)
ربنا يجعل رجوع يوسف  بسرعة وفرحتك بيه من نصرك ورزقك

طلعت السادات .. مش قادرة أسمعك  ..حقيقى كفاية الله يكرمك

- هند الفاسى ...مش ذنبك لوحدك

-زعيم المنافقين زمان وصف نفسه بالاعز ووصف الرسول عليه الصلاة والسلام بالاذل
مافيهاش حاجة أبدا لما منافقى العصر الحديث يعملوا شوية بوسترات

-الاخوة شركاء الوطن ..المرارة شديدة فى القلب 

- مشايخنا الكرام لا أسكت الله لكم حساً

-اتعلمت فى التربية والتعليم لماأستأذن يترفض طلبى 
ولما أعمل اللى أنا عايزاه محدش بيحاسبنى
ونعم التربية والتعليم

-أجمل حاجة انه أول مااتولى الحكم كان كل اهتمامه بالبنية الاساسية يعنى واخدين بالكم كهربا ربنا يحفظها ومياه ربنا يحميهاومتسافرش هى كمان سياحة لاسرائيل

14 التعليقات:



شمس النهار يقول...

احوليت

:)))))

كل دي مراسيل

ده مش مراسيل ولا بوست
دي قنابل يدويه موجهه

نصيحة اللي يقرا البوست ياخد له ساتر


لي تعليق واحد بس
الشيوخ بتوع الازهر اللي كانوا ساكتين علشان ماهماش فوفو جونيك للكميرا فامابيطلعوش لا في التليفزيون الارضي ولا الفضائي
ربنا كرمهم وبعت لهم قناة الازهري الفضائيه
ربنا يكرم اللي عملها

تحياتي

غير معرف يقول...

طبعا فى قنابل حدفتيهازى ما قالت شمس وربنا يستر المهم عاوز اعلق على قنبلتين الاولى منهم :-
فعلا فى التربية والتعليم لو حبيتى تستأذنى ولا حد هيسأل فيكى وانا شفت تجارب زى دى بنفسى ولعلمك استغربت جداا ان ممكن حد يغيب اسبوعين وماحدش يقوله كنت فين رغم انه فى الاصل كانت طالبه اجازه اسبوع واترفضت .
الحاجه التانيه شيوخ الازهر الافاضل للاسف لا أعرف لماذا يختفوا صادف كثير جداا بس الكلام ده من سنوات انى كنت اتواجد فى منطقة الازهر كثيرا فكنت اصلى العصر فى مسجد سيدنا الحسين وكنت احضر لبعض مشايخ الازهر دروس بعد صلاة العصر صدقينى يا ابنتى ماأراه اليوم من شوية شباب صغيرين ( شياكه وزى القمر ) مع احترامى الكامل لهم لا يمثلون اكثر من قطرة ماء فى محيط علم هؤلاء الافاضل بس ازاى نوصلهم للفضائيات هيكون صعب متهيألى لازم يشوفوا لبس كاجول الاول ولا حول ولا قوة الا بالله وكل سنه وانتى طيبه .
عمك مدحت

فاتيما يقول...

متفقة مع شمس نهار المدونات
و الاخ مدحت

دى قنابل مش مراسيل


و عاوزة اقولك انى عندى نفس حالة الهم دى من متابعة الاخبار بصفة يومية و الحال عمال يميل و ينحدر نحو الأعمق على رأى نزار قبانى


مش عارفة اعلق على ايه و لا إيه؟؟

حكاية كاظم دى انا زيك فيها
لأنه احسن من غنى الأشعار
بعد ام كلثوم فى رأيى
و قدر يقربها للناس بكل مستوياتها فيما عدا نظام النحنحة بتاعه كان يبقى تمام ع الىخر
و حكاية موقفه السياسى دى يا فيدو انا تقريبا وصلت فيها لقناعة
الفنان العربى زيه زى أى حد تانى
مكبل بديكتاتورية انظمة الحكم
و صعب تطالبيه يبقى قوى و صلب
يكفينى يقدم فن محترم و كتر خير الدنيا
المهم ميفتحش بوقه و يتحفنا زى الاخ تامر حسنى و لا يغنى للى راجع م العملية زى الاخت شيرين
و ف الخر لو يركزوا ف الغنا و يخلوهم ف حالهم
يكسبوا احترامنا
ع الاقل حيادين
بس ارجع و اقولك
حساباتهم مع السلطة شكل تانى
فيه حاجات احنا منعرفهاش للأسف


قصة هند الفاسى دى
انا كمان معاكى فيها
هيا صناعة اهلها و بلادها
و الراكعين قصاد فلوسها و نفوذها
مش ذنبها انها كانت كدا
فيه ناس لو مشيت ف سكة مبتقدرش ترجع
و لو قدرت
مبتعرفش للأسف ..فبتكمل


طلعت السادات دا بابا الله يرحمه كان بيقول عليه كلمة واحدة مفيش غيرها
هجاااااااص

انا كمان عرفت المخزنجى متأخرة
هوه راجل محترم فعلا و قيمة
حاجة تحسسك ان مصر دى لا تنضب ابدا
و ان الالم ممكن يتحول لأروع شىء
لو الأنسان استخدم علمه و عقله و احساسه صح

اكتر مرسال عجبنى و جداااا
تذكرك لهولاء الرجال
اللى هما السبب ف بقية الكرامة
اللى فضلالنا
و للأسف لم يجن الشعب ثمار تضحياتهم
و الأنكى و الأضل
ان الغاز بيروح
لمن ارقوا دمائهم



اما

مرسالك ليا
هشيله جوا قلبى
بس هبوسه الاول
و ابوسك انتى كمان


و الحضن

لما اشوفك ان شاء الله


تسلمى

البوست تحفة

tarek momen يقول...

مراسيل جامدة جدا
ده الصيام عامل معاكي شغل هايل
تحياتي

Wanda يقول...

عرابية
اخيرا حعرف اعلق عندك
اولا كل رمضان و انت فى حالة فرحة ربانية :-)
ثانيا حمد الله على سلامة البلوج بتاعك الى كان مغلبنى و مش عارفة اراضيى فين
لدرجة كنت حعملك نداء عندى :-)
ثالثا المراسيل ديه متماشية مع
اصطباحات فطوم الجانبية
المرة دى فاهمة اغلبها :-)
شطورة مش كده :-)

حفيدة عرابى يقول...

شمس هانم
نورت مدونتى:)
بعد الشر على حضرتك

وبعدين قنابل ايه يافندم كده الاخوة مباحث أمن الدولة شعبة مكافحة المدونات يحطونا فى دماغهم واحنا عايزين ناكل عيش فى البلد دى:))

شيوخ الازهر يمكن دول الجملتين الوحيدتين اللى قصدت اخليهم ورا بعض
المرارة من تصرفات شركاء الوطن
وشيوخنا اللى بيسكتوا على أحداث ماينفعش فيها سكوت
لو رجل الدين مايقولش بعلو صوته
حرام
مين يقولها؟

المهم ان حضرتك شرفتينى وأشرقت على مدونتى النهارده
وده يضيع تأثير أى أخبار من اياهم:)

حفيدة عرابى يقول...

استاذ مدحت
أهلا بحضرتك
المدونة دى هى اللى طلعت بيها من الدنيا
قنابل ايه بس:))
وأول سطر فيه خشخاش
كده التهمة لابسانى
ومش هيقولوا ربنا يسامحهم دى بلعت بانجو

التربية والتعليم لاحظتها كتير بجد لما أحاول استأذن رسمى مش حاجة ودى يعنى تطبق اللوائح والقوانين
لكن لو زوغت ولا حاجة
عندهم نظرية (دعها تمر) المهم انى مااتكشفش
أنا عاية حقى فى البلد دى بما يرضى الله
مش عايزة أنصب علشان أوصله
لكن فى كل الاماكن لازم اتعلم النصب وانا مش بحبه والمأساة انى خايبة فيه كمان:)
يمكن علشان كده مش طايقاه

شيوخ الازهر الاجلاء على راسى فعلا مش قولا
بس انا متغاظة ومفروسة من فكرتهم عن طاعة ولى الامر
لغاية امتى نطيعه طيب
المسيحيين بجد بحسدهم على البابا
صحيح انا مش موافقة على تصرفاته وشايفاها تكريس للفرقة مش للوحدة
بس هو زعيمهم الدينى ومتولى كل امورهم
مع انه اسلوب غلط على مصير الدولة
بس مجمعهم ومحسسهم بانتماء وبيلعب بكل الخيوط وبيستغل ضعف وعورات النظام لصالح شعبه
واحنا شيوخنا عندهم العلم الغزير
وسايبنا نعانى لوحدنا وكمان يغيظونى ويقولوا لازم تسمعى الكلام
علشان كده قلتلهم لا أسكت الله لكم حسا
الموضوع شكله هيقلب قنابل بجد:)
تحياتى لحضرتك

حفيدة عرابى يقول...

فاتيما
تالت مرة يتقالى قنابل فى البوست ده:)
يعنى عدة جرائم
ترويع وتعاطى وسرقة خشخاش
ربنا يستر:))
كاظم انا سمعته باخلاص من اول ماظهر بس بداياته معايا كانت اغنيته عن بغداد ولما غنى لاطفال العراق
طبعا اغانيه التانية جميلة بس اتخنقت من سكوته وكمان الدباديب وبحبك ياكااااظم
مش بحب النحنحة بجد:)
هند وطلعت نتيجة طبيعية لمجتمعنا
أما المخزنجى فجميل قوى احساسه وعقله وكلامه

البوسات والحضونات ببذل والله قصارى جهدى علشان مش يفوتونى

حفيدة عرابى يقول...

استاذ طارق
أهلا بحضرتك
رأيك أعتز بيه جدا
بس أنا كنت خايفة الكلام ده يكون بيفطر:))
تحياتى لحضرتك

حفيدة عرابى يقول...

واندتى حبيبتى
حمدلله على السلامة
شفتينى ياواندتى وانا قاعدة من غير مدونة
كانت أيام بايخة
عارفة حنيتك ياعسولة ونداءاتك
صباحات فطوم زى ماقلت لك قبل كده ملهمة
حتى لو انا قرأت الخبر قبل مااشوف الصباحات بحب جدا اقرأ تعليقاتها على الاخبار والجمل القصيرة اللى ممكن تنقيها منها
انت شطورة على طول ياواندتى
نورت بلدك:)

مصعب صلاح يقول...

السلام عليكم
اتفق معاكي في حاجات كتير
لكن بالنسبة لحليم ..
طبيعي ان يشكر في جمال لان الناس كانت فعلا بتحبه دي جنازتة أكبر جنازة في الشرق الوسط
لأن بصراحة مفيش أمتع من " عدى النهار "
أو " موال النهار "
الله يرحمك يا حليم

حفيدة عرابى يقول...

مصعب صلاح
وعليكم السلام ورحمة الله وبركاته
فى ناس كتير فعلا كانت سعيدة بالحالة اللى عيشهم فيها عبد الناصر
وانا بحب اغانى عبد الحليم الوطنية لانى حسيت انها كانت صادقة جدا مش نفاق ومجاملات
لكن كنت اقصد انهم استغلوا الاغنية وخلوها شعار للحملة المؤيدة لجمال مبارك

الغلط عندى انا انى مش وضحتها:)
ربنا يرحمه ويرحمنا وامواتنا جميعا

فاتيما يقول...

كل سنة و انتى طيبة يا فيدوووووو
عيد ميلاد سعيد يا حبيبة قلبى
لو ما اسعدناش الحظ و شوفناكى النهاردة
فنا ببعتلك الف بوسة و الف حضن
و امنية ان ربنا يحققلك كل اللى تتمنيه و احسن الف مرة
كل سنة و انتى طيبة يا حبيبتى
و معانا
وواخدين بحس بعض دايما ف الخير
بوسات و حضونات
و كل سنة و انتى طيبة
♫♪♥♫♥☺♥♫♥♫♪☼☻
-------------------------------
http://www.glitter-graphics.com/graphics/816459
-------------------------------
http://www.glitter-graphics.com/graphics/415647
--------------------------------
http://www.glitter-graphics.com/graphics/1200207

حفيدة عرابى يقول...

وانت طيبة ياطمطم
انا بكتب بعد مارجعت من اليوم الجميل
واجمل حاجة فيه انى شفتك ياطعامة
طلعتى ياطمطم أرق وأطعم من كل الوصف اللى سمعته عنك
ومن كل خيالاتى
ربنا يديم الود والمحبة بينا ياحبيبتى