ما أحلى الرجوع اليها


فيها أحلام قلتها وحققتها لى
فيها أحلام لسه أنا ما قلتهاش
لأ لأ أم كلثوم مش هتغنى 
ده كان جزء من حوارى مع صديقة امبارح 
كنا بنتكلم عن مقال فى الشروق 
والكلام خدنا لغاية المدونة وقلتلها ان ده بالظبط شعورى ناحية المدونة
كتير ممكن يستغربوا ليه الاهمية الكبيرة لشىء يعتبر جماد
لكن بالنسبة لى وخصوصا فى الفترة اللى حسيت انى ممنوعة أو مش عارفة أكتب فيها 
كانت الكلمات اللى غنيتها أم كلثوم هى شعورى ناحية مدونتى بالظبط
وخصوصا جزئية فيها أحلام لسه أنا ماقلتهاش
زى ايه الاحلام دى؟
زى انى لسه معبرتش عن نفسى  زى ماانا عايزة وزى ماأعرف أناعن نفسى
زى انى لسه ماحستش ان مدونتى ممكن أفيد بيها نفسى وغيرى
مدونتى دخلتنى فى عالم افتراضى كان بعيد جدا عنى 
والاجمل انه عجبنى
وعرفنى افتراضيا بأشخاص احترمتهم وحبيتهم
حتى لما عملت حساب على الفيس بوك 
كان أول حاجة دورت عليها أصدقاء البلوجر
ولما لقيتهم حسيت انى كنت لوحدى فى فضاء كوكب الفيس بوك
وانى لى عزوة وأصحاب وأخوات وأحباب هناك
وان فى ود أنا حاسة انه حقيقى بينى وبينهم بالرغم من افتراضية علاقتنا لغاية دلوقت
هل أنا حالمة ومتوهمة وهربانه من العالم الحقيقى لهنا؟
منكرش انى أحيانا بزهق من متاعب العالم الحقيقى ولما باوصل لهنا بلاقى مدونتى بتدينى الفرصة أتكلم وأفضفض زى ماأنا عايزة
مثلا
هنا مفيش زميل عمل مستهتر وعلشان كده مش بيحاولوا يطلبوا منه شغل وبيدوا الشغل لأمثالى
وهنا مفيش زميل عمل مؤذى لما بيعدى وقت من غير ماحد ينوله جانب من اذاه بنحمد ربنا باخلاص وندعى يستمر الحال ده شويه
وهنا مفيش قريب زعلانة منه ومعنديش حل فى اللحظة دى لمشاكلى معاه
هنا مفيش مسئوليات بتضغط أحيانا لدرجة انى ساعات بتمنى انى أهرب منها كلها
لكن اللى أنا متأكده منه انى عايشة ومتفاعلة جدا مع عالمى الحقيقى والا أبقى بموت 
لكن هنا عندى أحساس انه بيتى وسكنى 
أنه بيتعامل معايا شبه معاملة ماما ربنا يديها الصحة لما أرجع من الشغل أحكى لها بالتفصيل حصل ايه طول النهار
ولما طول الوقت اللى انا موجوده فيه فى البيت نتكلم ونفضفض ونحكى حصل ايه وهنعمل ايه
يمكن مش بنفس الشكل ولا نفس الاهمية بالنسبة لى
يمكن حتى فى كلام كتير كتبته ومش نشرته 
علشان الست هانم أمريكا اللى بتدور ورانا
وبتجمع كل اتصالاتنا وصورنا وهمومنا وأفراحنا من المواقع الالكترونية
الخلاصة انى عندى أحلام لسه ماقولتهاش ومستنية من مدونتى انها تكون معايا وانا بحققها ومعايا وأنا مش عارفة أحققها ونتكلم سوا لغاية ماتتحقق بأذن الله
اتكلمت كتير أنا النهارده
لأنى سعيدة جدا انى عرفت تانى أرجع أكتب هنا تانى 
هعتبر البوست ده من ضمن فضفضاتى وكتر خيركم لو حد أهتم يقرأه ويوصل لهنا
وعلشان كده هقفل التعليقات المرة دى