أناديكم ..أشد على أياديكم






كان نفسى طول عمرى أعيش  فى أيام ثورة 


وأنا فى ابتدائى كنت بحب قوى

 أى فيلم بيعرض مظاهرات ثورة 19

كنت بتفرج على المظاهرات بمنتهى الحب

 والرغبة ان ربنا يمنحنى الفرصة

 أشارك فى حدث زى ده

ماما لما حست بكده

 فهمتنى انها مش ممكن هتجيب بنتها من القسم

 لو قبضوا عليها

وأنا بسذاجتى تخيلت ان ماما ممكن تعمل كده فعلا

 وان القسم ده أقصى حاجة ممكن تحصل لى

فى اعدادى كان نفسى يبقى عندنا مكتبة

 ونبيع  فيها كل قصص ملف المستقبل ورجل المستحيل

 وأقعد فى المكتبة اقرأهم طول النهار

 من غير مااضطر أحوش فلوسهم من مصروفى 

فاكرة ان سعر القصة الواحدة وانا فى اولى اعدادى

 كان أقل من خمسين قرش

 وكان مبلغ محتاج فعلا مجهود فى الحصول عليه

بعد شوية وتأثرا بأدهم صبرى

 بدأت أحلم  انى مع جورج بوش الاب وياسر عرفات

 فى مجلس الامن

اللى مكانش فيه حد غيرنا احنا التلاتة 

وانى راكبة عربية جيب

 وداخلة أعمل عملية استشهادية فى فلسطين

 وانى سافرت روسيا فى مهمة سرية

 والكى جى بى  بيبذل أقصى جهوده لسجنى فى سيبيريا

قبل حادثة أديس أبابا بشهور

 حلمت ان قناص من اللى سمعت عنهم عند أدهم صبرى

 معاه بندقية حديثة قوى وبيحاول يقتل مبارك

فى ابتدائى واعدادى

 كانت مدرستى بتخلينا

 نغنى كل الاغانى الوطنية فى الطابور

 كان بيتوزع على كل فصل كلمات الاغنية

 اللى لازم نحفظها ونغنيها من غير نشاز

 ومن الاغانى دى

 اسلمى يامصر

 وأغنية تانية ماسمعتهاش بعد كده

 بتقول

 ياعرب والله حرام دمكم يروح هدر

 عيشوا فى محبة وسلام ده انتم فى الدنيا بشر

الحصص كانت طويلة والمدرسين كان بالهم طويل قوى

 وبيشرحوا ويخلصوا المنهج ويراجعوا ببساطة

 لكن مش عارفة انا قالبة الدنيا ليه

ده غير انى كنت المسئولة عن المناقشات السياسية

 فى حصص التاريخ بالذات

 والاساتذة كانوا بيجاوبوا بحب  واحيانا بحذر

ماقابلتش فى حياتى مدرس تاريخ  مش متميز

 عموما يعنى المدرسين اياهم

 كانوا نادرين طول مراحل تعليمى

 ومؤخرا بس اكتشفت

 ن دى من نعم ربنا اللى مكنتش حاسة بيها 

صدام حسين وغزو الكويت

 خلانى اتابع الاخباروأقرأ الجرائد بنهم 

فى الكلية كانت المتعة مركزة وحاضرة باستمرار

طبيعى جدا يكون فى ربط بين دراستنا

 وبين احداثنا الجارية

 وكان الاستاذ المساعد وقتها محمد عبد الرؤوف

هو ملاكى الجليل اللى بيعلمنى تاريخ 

والاجمل بيعلمنى أفكر ازاى

دكتور يونان لبيب رزق درس لنا فى سنة رابعة

 محاضرته كانت من أسباب متعتى

علشان المعلومات الجديدة والعرض الشيق والهدوء

 والاصرار على اقناعنا ان الشخصيات التاريخية العظيمة

 مجرد بشر

 ولازم نتعامل معاهم على الاساس ده

ونصف ساعة من كل محاضرة لازم تكون أسئلة عامة

 كنت بستغلها جدا علشان أفهم سياسة زى ماكنت أتمنى

الحزن كان رهيب انى مش قادرة اقنعهم فى البيت

أول ماكملت 18 سنة

 انى اعمل بطاقة انتخابية وعملتها وانا عمرى عشرين

كنت غاوية انتخابات واستفتاءات

ولما شفت القاضى فى انتخابات  2005

كنت مكسوفة جدا وعايزة أقوله انافرحانة قوى بوجودك

كان نفسى اسلم عليه بحرارة

 اقوله انى راجعة بيتنا وانا فرحانة ومش قلقانة

 لانى عارفة انك هتحمى صوتى وارادتى

أصلا هو كان رائع وانا بشرح له

 ان اسمى مكتوب غلط فى الكشوف

ورد على بسرعة يبقى ماينفعش تنتخبى

قلت له لأ

 انا اخدت جواب من مأمور القسم بتعديل اسمى ومختوم يافندم

الحبر الفوسفورى كان اختيارى

 لكن كنت مصرة انى استعمله

 مشاعرى تراوحت وقتها بين انى عايزة اقول لكل الناس

 أنا شاركت فى انتخابات رئاسة الجمهورية يابشر

 وبين انى مكسوفة من شكل الحبر

 اللى من توترى بهدلت بيه ايديا

انتخبت أيمن نور بالمناسبة

 وكمان أقنعت واحدة زميلتى زوجها فى الحزب الوطنى

 وبطاقتها الانتخابية عليها شعارهم الميمون

 انها تيجى معايا وتنتخب أيمن نور

جميلة اسماعيل وبثينة كامل ومحسنة توفيق ونوارة نجم

 شخصيات ملهمة بالنسبة لى 

كفاية قوى انهم بيخرجوا وبيعملوا حاجة

 وانا كل اللى بقدر اعمله انى معجبة بنشاطهم بس

مضطرة أختصر وأكلمك مباشرة

يمكن يكون كل كلامى ده محاولة منى

 لتبرير خوفى وجبنى

لكن طول عمرى يامصر وأنا بحبك ومش عارفة ليه 

قلبى كان بيدق بمنتهى الحماس

 وانا فى تالتة ابتدائى لما كنا بنحيى العلم 

محستش ابدا ابدا انى عايزة أسيبك وأمشى

 فى المرات النادرة اللى لسانى نطق فيها الكلمة دى

كان من ورا قلبى 

كنت فاكرة بعد كل أحلامى دى

ا نى هيكون لى دور فى تغيير حالك

أحلامى الثورية كانت من أحب صفاتى لى 

كل ما أشوف مظاهرة

 أحس انى فرحانة بيهم وخايفة عليهم

 وخايفة على نفسى لو أنا مكانهم وزعلانة انى مش معاهم

كنت بدعى لحركة كفاية من قلبى

 لما خرجت المصرين بعد سنين للشارع

دموعى  خنقتنى لما شفت الشباب عند بيت خالد سعيد

 بينادوا عليه

ولما وقفوا على البحر رافضين الظلم 

ونفسهم فى أمل ييجى من بعيد

طيب ايه السبب الرئيسى لكل الكلام ده

انى مكتئبة من ساعة ماوصل لى دعوة على الفيس بوك

 أنى أشارك فى مظاهرة عابدين احياء لوقفة عرابى

كان نفسى اكتب عن الموضوع وقتها 

وبعدين قلت لنفسى هتقولى ايه!!؟

 وانت بتقدمى نفسك للناس بصفتك حفيدته

واحفاده الحقيقين حسوا بيه

 وعايشين ذكرى أجمل يوم فى حياته من غيرك

  ذكرى حادثة كان نفسك تحضريها

كنت زمان واثقة من نفسك قوى انك لازم هتكونى موجودة

وهتساندى جدك الغالى

  لدرجة انك عملتى حسابك

انك بعد عفو ومغفرة ورحمة ربنا ودخولك الجنة

 تكون أهم متعة لك فيها انك تقابليه

 وتسمعى منه بالتفصيل وبدقة ايه اللى حصل

وايه كان شعوره وقتها

 وكان متوتر

 ولا احساسه بالمسئولية اداه قوة أفشلت خطط الخديوى 

جات لى الفرصة أخيرا

لكن للأسف مكنش عندى أدنى استعداد

 انى اتناقش مع ماما انى ممكن ممكن يعنى اروح مظاهرة

وضاعت الفرصة وهتضيع زيها مليون

 انا أدعى انى ثورية الهوى

 لكن أنا أجبن من انى أسيب بيتى

 واشارككم ياغاليين على قلبى ولو من بعيد 

سامحونى







وأهديكم ضياء عيني ..ودفء القلب اعطيكم
-----------------------


فاتيما 


والبوست العبقرى ده


شبابيك حى البلوجر


سبب حقيقى لرجوعى أكتب هنا وبسرعة

29 التعليقات:



MR.PRESIDENT يقول...

مبروك الرجوع يا حفيدة عرابي
عوده كريمة
وربنا يوفقك

انا نفسي اكون ثوري بس خايف من المستقبل
شويه

ثم فكرت اكون اصلاحي وبحاول .. لأن الاصلاح مع عدم الخضوع هو السبيل الأمثل ولا ينفصل احدهما عن الآخر .

اندروميدا يقول...

انا أدعى انى ثورية الهوى
لكن أنا أجبن من انى أسيب بيتى
واشارككم ياغاليين على قلبى ولو من بعيد
ـــــــــــــــــــــــ

اعتقد ان في هذه الكلمات الاخيرة قدر من القسوة علي النفس ... لاسباب كثيرة .

- الثورة عبر كل العصور الماضية ... لا تتم باتفاق مسبق ... او من خلال دعوة ما .... فالثورة هي تعبير صاخب عن حالة حصاد لظروف متراكمة قبلها علي مدار سنوات او عقود .
- ان الثورة هي التي تصنع ابطالها ... وليس العكس ... فمهما كان المرء ثائرا ... لايمكن ان يمارس ثورته او ان يقوم بها الا اذا توافرت الظروف لذلك .... كما ان هنالك العديد من المفكرين ساهوا في قيام ثورات بعضها دموي الي اقصي ... دون ان يشاركوا فيها ... او ربما ماتوا قبل حدوثها بسنوات .

- كذلك اري ان هنالك خلط في البوست ما بين الثورة ومفاهيم اخري من النشاط السياسي ... فالمشاركة في الانتخابات امر لا يمت للثورة في شئ ... وانما هي وسيلة من الوسائل المتعارف عليها ديموقراطيا لتداول السلطة... فهي حق وواجب علي المواطن .... كذلك الوقفات الاحتجاجية ... هي اقرب الي مفهوم العصيان المدني او الثورات البرتقاليه ... وهي تعبير عن قوي الرفض الشعبي كوسيلة ضغط لتداول السلطة ... مع استبعاد استخدام القوة في هذا ... ولعل غاندي هو الرائد في ذلك .... ولكنها وسيلة ليست ناجحة في معظم الاوقات لانها تتطلب قدرا عاليا من الحشد والتنظيم ... ومن قبلها تتطلب شخصا كاريزميا كالخوميني مثلا ... الذي اقام ثورة في بلاده وهو جالس في فرنسا ... وسميت بثورة الكاسيت .

فلا داعي ان تقسو علي نفسك كثيرا ... فالثورة في تاريخ الشعوب كالقدر ... لا يمكن ان تقوم بمشيئتنا ... ولا يمكن ان نحذر منها ان حان ميعادها... وربما ان وقعت .. قد تجدي نفسك سائرة مع الحشود الهادرة في الشوارع دون خوف او تردد ... ويبقي في النهاية حب الوطن ...الذي يمكننا ان نخدمه بصور كثيرة و مختلفة .

تحياتي لك

فاتيما يقول...

الاول
ميرسى على آخر جزء
متتصورييش الجملة الاخيرة
عملت فيا ايه؟
معقولة حاجة اكتبها
و توصل بالشكل الرهيب دا ؟

بس مش غريبة
انا بحس كتير
اننا شبه بعض قووووى يا فيدو
و طبيعى نبقى حاسين ببعض


تصدقى بالله
بمناسبة البوست بتاعك بقى
انا لما عرفت بمعاد الوقفة دى
و تانى يوم لما كتبتها ف الصباحات
كنتى انتى اول و اكتر واحدة ف بالى
كنت عاوزة اكتبها ف الصباحات
و اقولك الاحرار اهم
يا فيدو


بصى
اندروميدا قرب كتير
من اللى عاوزة اقوله
انتى قاسية شوية على نفسك

و هقولك ليه

هوه اكيد الصح
ان كلنا نخرج
ف الوقفة دى
كانت على بعد شارعين من بيتى
و كنت همووووووووت
و انزل اقف معاهم
بس عملت زيك
و احجمت ...ليه؟


خفت


بس مخفتش
على نفسى قوى
اكتر ما خفت على اهلى


تصدقى مخفتش على
يوسف
لأنى اللى كنت هعمله دا
هعمله عشانه
و عشان ولاد الناس اللى بحبهم
و ولاد الناس كلها
و عشان بكرة بتاعهم
ميبقاش زى بتاعنا


بس برضو خفت
وزى انتى ما عملتى حساب مامتك
انا كمان عملت حساب امى
و اخواتى اللى هيتبهدلوا ورايا
عشان يطلعونى و ممكن و اكيد يحصلهم مضايقات رهيبة بسببى
و كفااااهم بهدلة
انا وعدت امى مكتبش ف السياسة
و بقول الصباحات بتعوضنى نوعا ما
و تخلينى اقول رأيى ف الاحوال
غير التعليقات عندك
و عند احمد سعيد
و ستيتة
و اى حد بيكتب ف السياسة اوقات


فيه ناس اختارت سكتها
و تحملت المسئولية
زى شباب 6 ابريل و كفاية و غيرهم
و فيه ناس ملهمة
زى الاربع اسامى الرائعة اللى جبتى سيرتهم دول ..
و احييكى بشدة
كل واحدة فيهم تستاهل لقب
سيدة مصر بأمتياز .. بجدارة
مش فخرياً


خوفك له مبرراته
و انا معاكى فيها
لأنى ببساطة زيك يا حبيبتى

عزائنا
ان هناك زى ما قال
وائل قنديل
ف الشروق امبارح
هناك فتية و فتيات امنوا ببلدهم
و ربنا يكتر منهم


هييجى يوم
و تلاقى الناس كلها خرجت ضد الظلم
و وقفوا سوا و اتحاموا ببعض
من اى بطش
بدل محنا كل واحد ف الطل
لوحده كدا و خايف


ربنا يكرمنا بشوفة اليوم دا


انا كمان زيك فى حكاية المغامرات
و الرغبة ف البطولة
و الثورية و الحاجات دى
ويبدو انها احلام يقظة
كل حد خياله واسع
و قراءاته كتيرة


انا كمان بتخنق بالدموع لما بشوف شباب زى الفل بتقف ف وش الظلم
وبقول دول شموع بتتحرق
و تنور عشاننا ..
لأنهم ناس بمنتهى الصدق
الواحد بيبكى عليهم بمنتهى الصدق


البوست بتاعك حلو قوى


و يا حفيدة عرابى
ربنا يلحقك بيه ف الجنه
بعد عمر طوييييل
عشان تسمعى منه كل شىء
لأ
تعيشى معاه اللحظة كمان
بكل ما فيها من شرف و كرامة


وزى الولاد
و عم محمد عبدالقدوس
و كل الناس الحلوة
ما اتبهدلت ف عابدين
هوه كمان خد نصيبه م البهدلة
و النفى و الغربة عن اروع مكان
ف الدنيا و احبه لقلبه
...لكن المحصلة النهائية
ان رغم موته
..... عاش
و اتردله حقه
و خصومه ف مزبلة التاريخ
غير مأسوف عليهم



متقسيش على نفسك كدا
فيه ناس كتير زيك
و جبنهم اجبارى
مش اختيارى
و المجبر .. له عذره


بوسات و حضونات
و خالص الإحترامات
يا حفيدة عرابى
و حرة الاحرار


سلامى لبيطرية يا ريت

د. ياسر عمر عبد الفتاح يقول...

لو حضرتك مطلعتيش في مظاهرات في الشوارع
فكل كلمة بتقوليها هنا مظاهرة

كل (لا)
مظاهرة

وذلك أضعف الإعلان عن الرفض

norahaty يقول...

حمدلله على السلامة
حمدلله على الكتابة
الجميلة هنا الف مرة

norahaty يقول...

من سبقونى
كفونى الكلام
مستر بريزدنت
وأندروميدا وفاطيما
والدكتور ياسر عبد الفتاح
فعلا كل كلمة هى لوحدها ثورة

norahaty يقول...

ولكن هل بلدنا
حيتغير نظامها بالكلام؟
وبنفس الوقت هل انا عندى
القدرة لأتحمل قسوة النظام مع
معارضيه؟ولا أتكلم عن نظامنا فقط
ولكن عن أى نظام(ظالم)؟اعترف ان لى
ليس لى القدرة البدنية على هذا.

norahaty يقول...

الأستاذ صلاح عيسى
حكى عن بعض ذكرياته
فى المعتقل جزئية واحدة
او اثنين لا أنساهما:
الضرب ايوة
الضرب بالعصا!
وربط يد واحدة طوال
ساعات وساعات اعلى مستوى
الجسم حتى يخيل اليكِ انها أنفصلت
عنكِ؟

norahaty يقول...

وجعتى قلبى
ياابلة وفكرتينى
بما أحاول نسيانه:-
حااااااااااااالنا
اللى صعبان على

حفيدة عرابى يقول...

رئيسنا المبجل
الله يبارك فى حضرتك
كلام حضرتك جميل بس أحيانا لازم تثور علشان تحقق عدم الخضوع
فكرة الاصلاح ممتازة طبعا بس النتجة بتظهر بعد وقت طويل جداوبتكون النتيجة أفضل أنا معترفة
بس انا نفسى أشوف حاجة قبل مااموت

على فكرة احنا أصدقاء فى الفيس بوك بس مش عارفة حضرتك عارف ولا لأ

حفيدة عرابى يقول...

اندروميدا
أهلا بحضرتك
كلام حضرتك مميز جدا وانا متفقة مع أغلبه ومعنديش أى تعليق عليه غير فى نقط صغيرة هى توضيح لوجهة نظرى اللى ممكن تكون مش واضحة فى البوست

انا كنت بتكلم عن احساسى ورأيى فى نفسى طول مراحل حياتى
انا كنت فاكرة ان العائق بينى وبين العمل السياسى والثورى انى اكبر بس واعمل كل اللى نفسى فيه
وطبعا ده كان تفكير ساذج لانى لما اكبر هفهم ان فى حسابات تانية لازم افكر فيها واغلب جانب العقل والتروى شوية

ممكن يكون البوست فيه خلط بين الثورة وبين أشكال مختلفة من العمل السياسى
لان الفترة دى فى حياتى مكنتش مدركة قوى للفروق دى
ويمكن لان الوصول لابسط حقوقنا السياسية دلوقت مش محتاج عمل سياسى عادى
ده فى احيان كتير محتاج مواجهة مع نظام أفسدته عوامل كتير
يعنى العنف المبالغ فيه فى التعامل مع أشكال ديموقراطية وسلمية من العمل السياسى أكيد بيوصلنا احساس ان التغيير للاسف صعب يكون بالطريقة دى

طول عمرى كنت شايفة ان تجربة غاندى ملهمة
وشايفاها ثورية كمان بس ثورة بأسلوب تانى

أمانى حضرتك الجميلة فى نهاية التعليق اتمنى انها تتحقق

الوطن فعلا ممكن نخدمه بطرق وصور كتيرة
بس احنا فى فترة انتقالية وعندى احساس اننا لازم نتفق على ضرورة التغيير دلوقت والا هنبقى ضيعنا على نفسنا سنين طويلة

شكرا جزيلا لحضرتك على اهتمامك وتعليقك المتميز

حفيدة عرابى يقول...

فاتيما
شوفى ياطمطم انا قرأت تعليقك كتير وكل مرة يوصلى نفس المعنى
فهمتينى تمام ياطمطم
وفهمت مخاوفى واحلامى
وايه اللى مانعنى اعمل اللى نفسى فيه
الحكاية فيها خوف من البهدلة على نفسى
وخوف كبير على اهلى وخصوصا ماما اللى مش هتستحمل ابدا اى نوع من انواع الاذى ممكن اقابله

عجبنى قوى قوى لما قلت انك مكنتيش خايفة على يوسف
هو ده نفس رأيى
لما نغير ياريت نشوف نتيجة التغيير فى حياتنا
ماحصلش وشفناه مش مشكلة ابدا اهو نبقى بنبى لولادنا مستقبل احسن ى مابندخلهم مدرسة كويسة وبنربيهم كويس
وبنحاول نحقق لهم مستقبل مادى آمن نوعا ما
من حقهم يعيشوا فى بلد بس بتحترم انسانيتهم ورأيهم

فرحانة قوى لما افتكرتينى ساعة الوقفة
انا من ساعتها بفتح صفحة الرسائل فى المدونة واقول هكتب واتكسف من نفسى واقفلها تانى

انا اتكلمت عن السيدات لحبى واحترامى ليهم اولا
ولانهم سيدات فانا شايفاهم مش خايفين من مخاوفى انا
لكن محمد عبد القدوس كمثال
بيعجبنى فيه ماشاء الله اصراره وممكن مايلاقيش حد واقف معاه فى دفاعه عن اى شكل من اشكال الحرية المفقودة
بس ابتسامته بتحفزنى كتير ماافقدش الامل
ايام سلم النقابة كان ملهم بالنسبة لى

فاكرة يمكن اول تدخلى هنا كان بوست عن المستشار الخضيرى
فى ناس بتبقى بتكوينها كده قادية وملهمة لغيرها
ربنا يحميهم ويصرف عنهم الاذى ويفرحهم بنتيجة جهدهم فى الدنيا

البوست بتاعتك مش محتاج منك شكر لى انى جبت سيرته
هو عبقرى فعلا اطمطم
ولمس قلبى بسرعة واعتقد ان تأثيره هيبقى كبير على الطيور المهاجرة سواء لمواقع تانية او بره العالم الافتراضى اللى مابقاش افتراضى ده

ربنا يديم عليك ياطمطم قلبك الكبير وقدرتك على جمع أحبابك حواليك
ربنا مايحرمك ولو مؤقتا من أى من أحبابك ويفرحك بيهم دايما
البوست ده صانع للفرح
ربنا يفرح قلبك

السلام وصل لبيطرية وياما صدقت ياستى
وبتقولك لازم تقولى ليوسف عليها فى أقرب فرصة لانها ناوية على خطوبة بس دلوقت لغاية ماتخلص وتكون نفسها وهتجيب العفش

نورت صفحة تعليقاتى ياطمطم
انتى ياحبيبتى اللى بوسات وحضونات ونجمات وكل حاجة حلوة

حفيدة عرابى يقول...

دكتور ياسر
أهلا بحضرتك يافندم
حمدلله على السلامة

شكرا جزيلا على دعمك وتشجيعك
يبقى انا كده مش هبطل كلام هنا ولا هبطل اقول لا
تحياتى لحضرتك

حفيدة عرابى يقول...

الدكتورة العسولة
الله يسلمك يادكتورة
بس افهم من كده انك معترضة على عمو الفيس بوك
كده انا ممكن اقوله :))

أصحاب التعليقات رفعوا فعلا روحى المعنوية وهنكتفى مؤقتا بالكلام والاعتراض والنهى عن المنكر هنا حتى يقضى الله أمرا كان مفعولا

انا كمان معنديش القدرة البدنية ولا النفسية لتحمل القسوة وبهدلة النظام
وهى دى المعادلة اللى حيرتنى
هتكلم ماشى
بس اخيرا قلت كفاية انى اعرف قدراتى واتكيف معاهاواتصرف على اساسها ولو مؤقتا لغاية ماربنا يصلح ويغير الاحوال

سلامة قلبك يادكتورة
وعنوان مدونتك فعلا معبر لان حالنا صعبان علينا

يارب يصلح الاحوال ونشوف شوية أيام حلوة لبلدنا

غير معرف يقول...

العرابيه الاصيله ..بصى بقى انتى كتبتى البوست بتاعك يوم 23 الخميس يعنى وانا كنت فى مأمورية عمل فى القاهره وطبعا الجمعه والسبت فى البيت وأنا ماعنديش حاليا كمبيوتر لان اللى كان موجود عجوز فى السن (بدايته معايا من 1996)وتم احالته الى المعاش اما الجديد طبعا مع اولادى فى الصعيد عشان كده بدخل من الشغل ...المهم بعد ما شوفت تعليقات كل اصدقائك المحترمين وردك عليهم فعلا مش لاقى اى حاجه أأقولها غير على نقطه واحده بس .... تعرفى انى رغم عمرى اللى هو فى 28 اكتوبر القادم اتم 55 سنه لم افكر فى يوم من الايام انى اترك هذه البلد واعمل خارجهاأبداااا ورغم انه جاءت اكثر من فرصه لكن رفضت انى أسيبها لأنى فعلا بحب مصر بطريقه لا تتخيليها وكنت دايما أقول الحمد لله مدام هيه مستوره يبقى كويس حتى بعد خصخصة الشركة التى كنت اعمل بها وخروجى معاش مبكر 14/12/2000 وبصراحة كان برغبتى وبعد حوالى 11 صلاة استخارهوخرجت معاش مبكر و جاءت فرصة وبرضو رفضت وكانت خبرتى فى مجال التدريب بتساعدنى أنى اجد فرصة عمل.. صحيح انى قعدت حوالى سنتين كنت هتجنن فيهم وماعندكش فكره يعنى ايه راجل ويقعد فى البيت حتى اكرمنى الله بالعمل الحالى صحيح بعيد عن اولادى 600 كم لكن اسمى فى بلدى مصر وبصى يا عرابيه عاوز اقولك على حاجه يمكن ماحدش منكم يعرفها قوى وغير اللى بتشوفوه فى الافلام والمسلسلت انا بعد خروجى معاش مبكر عملت فى محافظات من اسوان ولاقصر وسوهاج واسيوط والمنيا واخيرا فى الاسكندريه عاوز أقولك على حاجه صدقينى الشعب المصرى بجميع طباعه ومشاكله فى و كل الاخلقيات اللى بتشوفيها متشابه بنسبه تصل الى 85% يمكن فقط اختلاف اللهجه فقط غير كده صعب جداا تلاقى اختلافات كبيره وإن كان فيه حاجة تانيه ممكن أأقولها هو حبك للبلد دى ومن غير ماتقولى اى حاجه أى فرد هيقرأ كلامك ده هيعرف كده على طول ياعرابيه يا أصيله ياريت كلنا نحبها زيك كده وده كل اللى عندى وربنا يحميكم كلكم وتحيه خاصة جداا لصاحبة هذا البوست الرائع صحيح أتاخرتى علينا شهر لكن لو كل بوست منك هيكون بهذه الروعه هنستناكى الشهر وأمرنا لله .
عمك مدحت

غير معرف يقول...

العرابيه الاصيله ..بصى بقى انتى كتبتى البوست بتاعك يوم 23 الخميس يعنى وانا كنت فى مأمورية عمل فى القاهره وطبعا الجمعه والسبت فى البيت وأنا ماعنديش حاليا كمبيوتر لان اللى كان موجود عجوز فى السن (بدايته معايا من 1996)وتم احالته الى المعاش اما الجديد طبعا مع اولادى فى الصعيد عشان كده بدخل من الشغل ...المهم بعد ما شوفت تعليقات كل اصدقائك المحترمين وردك عليهم فعلا مش لاقى اى حاجه أأقولها غير على نقطه واحده بس .... تعرفى انى رغم عمرى اللى هو فى 28 اكتوبر القادم اتم 55 سنه لم افكر فى يوم من الايام انى اترك هذه البلد واعمل خارجهاأبداااا ورغم انه جاءت اكثر من فرصه لكن رفضت انى أسيبها لأنى فعلا بحب مصر بطريقه لا تتخيليها وكنت دايما أقول الحمد لله مدام هيه مستوره يبقى كويس حتى بعد خصخصة الشركة التى كنت اعمل بها وخروجى معاش مبكر 14/12/2000 وبصراحة كان برغبتى وبعد حوالى 11 صلاة استخارهوخرجت معاش مبكر و جاءت فرصة وبرضو رفضت وكانت خبرتى فى مجال التدريب بتساعدنى أنى اجد فرصة عمل.. صحيح انى قعدت حوالى سنتين كنت هتجنن فيهم وماعندكش فكره يعنى ايه راجل ويقعد فى البيت حتى اكرمنى الله بالعمل الحالى صحيح بعيد عن اولادى 600 كم لكن اسمى فى بلدى مصر وبصى يا عرابيه عاوز اقولك على حاجه يمكن ماحدش منكم يعرفها قوى وغير اللى بتشوفوه فى الافلام والمسلسلت انا بعد خروجى معاش مبكر عملت فى محافظات من اسوان ولاقصر وسوهاج واسيوط والمنيا واخيرا فى الاسكندريه عاوز أقولك على حاجه صدقينى الشعب المصرى بجميع طباعه ومشاكله فى و كل الاخلقيات اللى بتشوفيها متشابه بنسبه تصل الى 85% يمكن فقط اختلاف اللهجه فقط غير كده صعب جداا تلاقى اختلافات كبيره وإن كان فيه حاجة تانيه ممكن أأقولها هو حبك للبلد دى ومن غير ماتقولى اى حاجه أى فرد هيقرأ كلامك ده هيعرف كده على طول ياعرابيه يا أصيله ياريت كلنا نحبها زيك كده وده كل اللى عندى وربنا يحميكم كلكم وتحيه خاصة جداا لصاحبة هذا البوست الرائع صحيح أتاخرتى علينا شهر لكن لو كل بوست منك هيكون بهذه الروعه هنستناكى الشهر وأمرنا لله .
عمك مدحت

غير معرف يقول...

العرابيه الاصيله ..بصى بقى انتى كتبتى البوست بتاعك يوم 23 الخميس يعنى وانا كنت فى مأمورية عمل فى القاهره وطبعا الجمعه والسبت فى البيت وأنا ماعنديش حاليا كمبيوتر لان اللى كان موجود عجوز فى السن (بدايته معايا من 1996)وتم احالته الى المعاش اما الجديد طبعا مع اولادى فى الصعيد عشان كده بدخل من الشغل ...المهم بعد ما شوفت تعليقات كل اصدقائك المحترمين وردك عليهم فعلا مش لاقى اى حاجه أأقولها غير على نقطه واحده بس .... تعرفى انى رغم عمرى اللى هو فى 28 اكتوبر القادم اتم 55 سنه لم افكر فى يوم من الايام انى اترك هذه البلد واعمل خارجهاأبداااا ورغم انه جاءت اكثر من فرصه لكن رفضت انى أسيبها لأنى فعلا بحب مصر بطريقه لا تتخيليها وكنت دايما أقول الحمد لله مدام هيه مستوره يبقى كويس حتى بعد خصخصة الشركة التى كنت اعمل بها وخروجى معاش مبكر 14/12/2000 وبصراحة كان برغبتى وبعد حوالى 11 صلاة استخارهوخرجت معاش مبكر و جاءت فرصة وبرضو رفضت وكانت خبرتى فى مجال التدريب بتساعدنى أنى اجد فرصة عمل.. صحيح انى قعدت حوالى سنتين كنت هتجنن فيهم وماعندكش فكره يعنى ايه راجل ويقعد فى البيت حتى اكرمنى الله بالعمل الحالى صحيح بعيد عن اولادى 600 كم لكن اسمى فى بلدى مصر وبصى يا عرابيه عاوز اقولك على حاجه يمكن ماحدش منكم يعرفها قوى وغير اللى بتشوفوه فى الافلام والمسلسلت انا بعد خروجى معاش مبكر عملت فى محافظات من اسوان ولاقصر وسوهاج واسيوط والمنيا واخيرا فى الاسكندريه عاوز أقولك على حاجه صدقينى الشعب المصرى بجميع طباعه ومشاكله فى و كل الاخلقيات اللى بتشوفيها متشابه بنسبه تصل الى 85% يمكن فقط اختلاف اللهجه فقط غير كده صعب جداا تلاقى اختلافات كبيره وإن كان فيه حاجة تانيه ممكن أأقولها هو حبك للبلد دى ومن غير ماتقولى اى حاجه أى فرد هيقرأ كلامك ده هيعرف كده على طول ياعرابيه يا أصيله ياريت كلنا نحبها زيك كده وده كل اللى عندى وربنا يحميكم كلكم وتحيه خاصة جداا لصاحبة هذا البوست الرائع صحيح أتاخرتى علينا شهر لكن لو كل بوست منك هيكون بهذه الروعه هنستناكى الشهر وأمرنا لله .
عمك مدحت

غير معرف يقول...

انا شايف ان التعليق بتاعى اتبعت لحضرتك 3 مرات معقوله مش فاهم ازاى والله .

احمد سعيد يقول...

هو تعليق مالوش علاقه بالبوست

الصورة اللى انتى كاتبه فوقيها النيل رواة

دى مش صورة طومان باى
دى صورة السلطان سليم
:)

---------

جبتى الكتاب اللى قولتلك عليه ولا لا؟

well يقول...

حمدالله على السلامة ..وبلاش غياب

كلامك فيه طعم مصر .. مصر اللى كانت حنينة .. مصر اللى قالوا فيها احلى اشعار ..بشاركك حلم المكتبة ..اصلى حلمته برضوا قبل كدة ..ولو المظاهرة اخرها القسم وبس يبقى كدة رضا ومش عاوز اكتر من كدة ..
على فكرة بحب نشيد اسلمى يا مصر اننى الفدا ذى يدى ان مدت الدنيا يدا
كلامك اكبر دليل على تضامنك مع المظاهرة ..
حمدالله على السلامة ومستنى بقيت الحصص
تحياتى

حفيدة عرابى يقول...

استاذ مدحت
أهلا بحضرتك
ربنا يقوى حضرتك ويرزقك الصحة والبركة فى العمر
ونتعلم من حضرتك دايما:)
شكرا جزيلا على رأى حضرتك اللى هو اكبر من قدراتى
بس على الاقل بيشجعنى
شكراجزيلا يافندم
-------------------


استاذ أحمد سعيد
نورتنا يافندم
انا جبت الصورة من جوجل ولما رجعت تانى اتأكد بعد كلام حضرتك لقيتها موجودة مع الاسمين
طومان باى وسليم الاول
لو فى خلط وحضرتك متأكد انها فعلا صورة سليم نشيلها فورا :))
بس انا فعلا مش متأكدة

لسه ماجبتش الكتاب يافندم
--------------------

الباشمهندس المختفى وليد
انت اللى حمدلله على السلامة
فينك؟
المكتبة والمظاهرة اللى اخرها القسم واسلمى يامصر
عوامل قوية للاتفاق:)
حصص ايه يافندم بس
ده احنا بنذاكر من كشكول حضرتك

osama44 اسامه 44 يقول...

ازيك يا ابله
ازيك بجد انا سعيد بكلامك واحساسك اللى اكلمتى بيه احساس صادق وبجد يكفيك الاحساس ده عشان تعبر لمصر عن حبك ليها

وبجد انا سعيد انى ربنا يسر لى الحال لرجوعى عشان اشوف مدونتك وكلامك الجميل لانى بعتبرك انسانه صادقه فى حبك لبلدك
دومتى حفيده لاعظم ثائر

فاتيما يقول...

فدافيدووووووو

التفاصيل بتاعة مجموعة القاهرة اتحددت عند خالد همس الاحباب خلاويص

اهى


http://hams07.blogspot.com/2010/09/blog-post_29.html

يا رب يا حبيبتى تقدرى تيجى
و اشوفك يومها و اتونس بصحبتك اليوم كله من اول لحظة لحد آخر دقيقة ف المرواح

انا مبسوطة قوى بجد

اشوفك يومها على ألف خير انشالله

راجل صعيدى يقول...

العرابية الاصيلة .. متشكر جدااا على مجاملاتك الرقيقه اللى بتدينى دفعة معنويه جامدة على الاستمرار فى التعليق ويارب ما تزهقى .. وعلى فكرة بما انى من عشاق التاريخ كنت مستنى اشوف منك تنويه معين عن يوم 28 سبتبمبر فى تاريخ مصر لكن إظهار مش بيفتكره غير العواجيز وبس وان كنتى بتفتكرى كل احداث ثورة 1919 ما علينا .. المهم من خلال خلال مدونتك الرائعة دى تعرفت على (مدونتين )للرقيقه المحترمه فاتيماو أصبحت متابع جيد لها و كان نفسى يوم الاحتفال هيه وأصدقائها أروح وأيص عليهم من بعيد بما انى تخصصى معلق ولست مدون وفارق السن كبير جداا بينى وبينهم ولكن لسؤ حظى هسافر شغل غداا الجمعهبعد صلاة الظهر مباشرة ان شاء الله الى السويس لمدة 10 ايام ومن السويس الى اسيوط لمدة اسبوع تقريبا يعنى مش هرجع اسكندريه قبل يوم 17 اكتوبر ده لو مطلعش فى مخهم يقولوا لى سافر السويس وانته راجع من اسيوط .. المهم ان شاء الله يوم 10 او 11 اكتوبر هبقى اتابعك انتى وفاتيما واعرف اخبار احتفالهم اللى ات شاء الله يكون يوم رائع وربنا يحميكم ويفرح قلبكم جميعا وهبقى اعرف انتى جيتى اسكندريه ولا صعب المشاور عليكى مع خالص تحياتى وامنياتى لكم جميعا ونفسى تقرى تعليقى عند فاتيما بجد عاوز رائيك فيه بس من غير مجاملة و ازاى هتعرفى منه انا اتعرفت على العرابية الاصيله دى من فين ولا لا .
عمك مدحت

فاتيما يقول...

فيدوووو

انا قلقانة عليكى
انتى كويسة يا حبيبتى ؟
طمنينى عليكى بتعليق طيب
يا رب تكونى تمام و بتلتقطى انفاسك من المشوار بس و ماما مش زعلانة و كله تمام

ان شاء الله

والله وحشتينى
و متتصورييش صحبتك كانت ممتعة ازاى
انا عاوزاكى معايا كل سفرية و نبقى تؤامة بقى ..ماشى ؟

ربنا يطمنا عليكى يا حبيبتى
متغبيش و تخضينى بقى
هه

مستنياكى

حفيدة عرابى يقول...

اسامة
انا والله اللى فرحت جدا برجوعك وانك كويس الحمد لله وشخصية حقيقية :)
علشان الباشمهندس وليدصديقك لخبطنا على الاخر
وبعتذر لك جدا جدا على تأخيرى فى الرد
عدم تركيز بس
يارب تنورنى دايما يااسامة


-------------------
استاذ مدحت
الرجل الصعيدى المحترم
انا مش عارفة اعتذر لحضرتك على التأخير فى الرد
بس طبعا قرأت تعليق حضرتك عند فاتيما وبمنتهى الامانة ودود جدا
ونفسى فعلا حضرتك تعمل مدونة وفرق السن مش هيكون عائق ابدا فى التواصل

عبد الناصر فى اسباب كتير منعتنى اكتب عنه
اكتبها فى بوست ان شاء الله
لما حضرتك ترجع بالسلامة اكون كتبت بوست جديد عن اسكندرية ويمكن عبد الناصر كمان

يارب ماتحرمش من تعليقات حضرتك
واكيد طبعا المدونة اللى حضرتك تقصدها
أليس فى بلاد العجائب ومدونتها آه منك يادنيا
تعرفى عليها من الحاجات الجميلة اللى حصلت لى فى التدوين
ماتقلقش حضرتك :)

-------------------
طمطم
:)
وبوسات وحضونات كتير
بس خلاص :)

re7ab.sale7 يقول...

تعرفي ....انا جذب انتباهي الاسم ف الاول وكمان تعليقاتك وكام مرة اقول هشوف مين حفيدة عرابي دي ونقوم نتخانق انا واخواتي علي مين يقعد الاول وملحقش اشوفك ...المرة دي انتهزت ان شيرين لسة مجتش م المدرسة وحتي لو جات هتحضر الاول دروس بكر والحقائب وكدة يعني فيها ساعتين تلاتة واخويا راح مشوار يعني ادامي وقت كويس ....علي فكرة انا قريت البوست ده واللي قبله امبارح بس معرفتش اعلق يمكن عشان الوندوز كان بيودع ودلوقت خلاص غيرناه ...
تعرفي انك كتبتي كلام كتير انا كمان كنت بعمله زي قصص ادهم ونور والمكتبة ولسة لغاية دلوقتي برضه بحلم بيها مع اني قلب لبابا بما ان في عندنا محلات تحت البيت لية منفتحش مكتبة ...بص لي بشكل غريب وقالي وهو انت مش مكفيكي الكتب اللي عندك عشان تفتحي مكتبة؟ وبالنسبة للمظاهرات فأنا خرجت فعلا في مظاهرات وكتبت في صحف معارضة وقلت رأيي بالبونط العريط كمان بس النتيجة كانت اية ...؟ بابا وماما واخواتي قالولي منعرفكيش لو اتسجنتي في قضية سياسية ده غير اللي بابا قاله لي علي الل يبيتسجن بيعمله فيه اية , خالي بقي بما انه محامي قالي مش هدافع عنك , قلت له لي اصحاب كتير محامين ومش مشكلة عارفة انهم هيقفوا جنبي ....تعرفي بقي المشكلة كانت في اية ؟ اني اللي طلعت عشانه المظاهرة اتضح بعد كدة انه ميستاهلش , والمظاهرات التانية عادي جدا بتحصلا كتير وقلت لهم في البيت مش ممكن اني متابعش كل شيء بيحصل حواليا واني اتفاعل معاهم واقول راي وهو انا مش صحفية والا اية ...؟ المهم بجد استمتعت جدا بمدونتك وبجد سعيدة اني اتعرف بيكي وبتشرف بمعرفتك ويارب في يوم لقاء للمدونين اشوفك فيه ....يا حفيدة عرابي يا عسولة
تقبلي مروري وحبي وودي
رحاب صالح

كلمات من نور يقول...

انا أدعى انى ثورية الهوى

==========================

داه كفاية ثورية كلماتك تخليني أقول إنك فعلا ثورية يا فتاتي .حلو تعبيرك قوي : ثورية الهوى

حفيدة عرابى يقول...

رحاب
تعرفى ياعسولة انت انى دخلت مدونتك اكتر من مرة وقرأت لك كام تدوينة كده
وكمان عنوان مدونتك شدنى قوى
شوفى بقى مادام طلعت مناضلة قديمة ولك فى الحاجات دى
انا مش هتناقش معاك دلوقت انا هستنى لما نتقابل فى اللقاء الجاى ونخطط للثورات براحتنا
تعليقك أسعدنى جدا يارحاب:)



كلمات من نور
أهلا بك فى أول زيارة ويارب تتكرر
شكرا جزيلا
كويس ان حضرتك اقتنعت انى ثورية الهوى
وحلوة قوى كلمة يافتاتى
تحياتى لحضرتك
هو ينفع اقولك زى رحاب ان تعليقك أسعدنى جدا :)