أنا بلاغيك فى السليم

طالبة من الله ولا يكتر على الله يلهمنى الصبر والصحة والبال الطويل لغاية يوم الخميس
سمعت حد بيسألنى اشمعنى الخميس
لانه نهاية امتحان الاعدادية الدور التانى
وانا مع كل السنين اللى عشتها بفضل الله فى التربية والتعليم
دى اول مرة اراقب على بنين فى الدور التانى
وما ادراكم ما البنين فى الدور التانى
معنى انهم دور تانى من الاول بعد كم الرفع الرهيب اللى بيحصل انهم فاشلين بامتياز
الاجمل انى فى ال3ايام اللى فاتت لاحظت تطور كبير فى سيكولوجية الغشاشيين
بترحم انا على طلبة زمان اللى كنت بقف عينى فى وسط راسى طول اللجنة
علشان مااتخمش اوى ومايعرفوش يغشوا
والولد كان يتنرفز اوى ويقول انا مش بغش وهو كداب ونصاب دولى
الاسبوع ده الولاد حقيقى ماكانوش بيغشوا
بس ووالله ده حصل
بيمثل انه بيغش وانه معاه برشام علشان يغيظنى بس
الولد دلوقت داخل اللجنة لهدف واحد بس انى اترجاه انه يغش
وبما ان العرق الصعيدى بيلعب فى دماغى مع انى مش صعيدية
فااكيد مش بيعرف يغش
بس بعد ايه
بحس بعد الساعتين مدة اللجنة باجهاد ذهنى كبير
اكنى بحارب
وياسلام لو المراقب اللى معايا زى العادة مكبر دماغه او نايم فى اللجنة او ركبه بتخبط على الجيران
ويقولى انت مش عارفة دول ممكن يعملوا ايه؟
يبهدلوكى
ممكن يسرقوكى
ممكن يقولوا كلمة تجرحك
اشغل انا غدة الغباوة واقوله ابدا
ولا بيهمنى واظبط اللجنة
اول يوم المرة دى كان امتحان عربى
اللجنة فيها 5  طلاب بس لكن استحالة حد منهم ينجح
مفيش طالب كتب حاجة اصلا
وطبعا الدور البايخ اللى لازم اقوم بيه
انى احثهم بكل الطرق يكتبوا حتى الاسئلة فى ورق الاجابة
ولما اقول وانا مالى عنهم ما كتبوا
المهم ان اللجنة كانت هادية ومعملتهمش توتر ولا حاجة
اعرف ان التربية والتعليم بتعمل تحقيق وخصم لو ورقة الاجابة فاضية
مش عارفة انا مش لاقية وزارة بايعة موظفينها زينا
مفيش اى نوع من انواع الحماية
تانى يوم
علوم
اللجنة فيها 15 طالب السيطرة عليهم كانت اصعب
دايما اللجنة فيها ولد زعيم وفيها المساعد بتاعه
والباقى مشجعين حسب شخصية المراقب
الزعيم المرة دى عيل رخم حاطط غويشة فى ايديه
رحت اتفرج عليها
لقيتها شوكة
اه والله شوكة اللى بناكل بيها 
والولد كلبوظة كده وتانيها على اد ايده
خدتها واديتها لمراقب الدور
الولد مابطلش زن
عارفين محمد هنيدى لما كان بيقول باشا ياباشا
هو ده بالظبط
ساعتين
أبلة  أبلة   يااأبلة
جربت كل الطرق
الذوق
والتهديد
والرخامة
والتطنيش
والضرب
والتهديد بمحضر غش
والجديد التهديد بمحضر شغب
ونزلت ولد فعلا يتعمله محضر غش صورى كده علشان يتأدبوا
فين على ماربنا كرمنى واللجنة خلصت الحمد لله من غير ماحد يغش
الملاحظة اللى كانت معايا فى اللجنة كانت ست جدعة بجد
علشان كده عدت الحكاية
اجمل حاجة حصلت ان ادارية فى اللجنة فى عز القرف اللى انا فيه ده الاخبار وصلت اننا شدينا اللجنة
سابت مكانها وجت تقولى اديهم سؤالين بس دول غلابة علشان ينجحوا
طبعا رفضت
قالت لى ليه هما ضايقوكى فى حاجةاخليهم يعتذروا
صعبت عليا نفسىوقلت لها انا بعمل شغلى
انا جايبنى هنا وراكبة تاكسى كل يوم ب4 جنيه والاعدادية كلها بتاع اقل من 60 جنيه
 علشان اخليهم مايغشوش
دى وظيفتى
خلصت لجنة العلوم الحمد للهونزلت تحت
استلمتنى نصايح من عينة علشان خاطراهاليهم غلابة
كنت متنرفزة جدا شغلت وغدةا لغباوة تانى
وقلت لهاانا بعمل شغلى
اهاليهم بقى يعملوا شغلهم ويربوا عيالهم
لان ربنا هيحاسب كل واحد فينا لوحده
واحنا بنتكلم كانوا الولاد ماشيين فى الحوش بالسجاير عادى خالص و مفيش حد فتح بقه
دى فسحة لا ولا الشتايم بتكسف منها والله
اه افتكرت حاجة
مرة فى تصحيح الاعدادية كان فى ورقة فاشلة جدا
ولاحظت ان فى ييجى نص صفحة كده متشخبط على الاجابة
عدوة نفسى انا
الفضول خلانى اشوف الولد كان كاتب ايه وشطبه
لقيت كلام لايتشاف ولا يتقال ولا يتسمع
تنحت وبرقت واحمريت واسوديت وزمايلى سألونى مالك
قلت مفيش حاجة
زمايلى البنات بعد ما خلصنا سألونى شكلك اتغير ليه
قلتلهم الولد كاتب كلام فى حق الملاحظة اللى كانت بتراقب عليه يعاقب عليه القانون
قالوللى طيب ما قلتيش ليه
كان ردى
انى مقدرتش اقول لان كل واحد هيمسك الورقة وهيحاول يقرا الكلام زى ماانا عملت
وانا مش قادرة اتخيل مجرد تخيل ان زمايلى يعرفوا ان عينى وقعت على كلام بالشكل ده
المهم
سمعت من زمايلى ان فى عندنا لجنة منازل فى المدرسة
وان مدرسين عتاولة كانوا بيقسموا بالله ليهم انهم مش لاقيين مدرس علوم يغششهم
لان طلبة المنازل فتحوا الكتب والمذكرات وماعرفوش يغشوا ومحتاجين مدرس
والباشا الملاحظ بيقسم بالله علشان مايغضبوش عليه انه مش لاقى
المهم انى رحت اللجنة النهارده لقيتنى فى لجنة المنازل
قلت لهم معلش بدلولى اللجنة
الادارية بتاعة امبارح معاها اللجان
قلت لها انت عارفة انا مش هاغششهم وهتحصل مصيبة النهارده
الاجراء اللى بيتاخد فى اوقات زى دى
ان راجل عتويل كده هو اللى يروح اللجنة دى وانا اروح لجنة تانية
الادارية عملت موقف فطسنى من الضحك
اصرت انى ارتاح واقعد احتياطى وهى عندها عجز فى الملاحظين
الناس كان مستغربة جدا
لكن انا قلت لها انت بتدورى على مصلحة العيال مش بتجاملينى انا
انت بتعملى ثواب فيهم وبتنقذيهم منى
لسه ماحكيتش على لجنة الرسم
لا انتم زهقتوا من الرغى بتاعى
اكمل بعدين
اخر الاسبوع
اذا كان فى العمر بقية
لا لازم اقولكم دى
الولد النهارده فى الرسم عمل لى فيلم رعب
وان عمر مامدرس اتجرأ يزعقله
وان الكلاب البوليسية لازم تسيطر على المدرسة اخر يوم فى الامتحانات
وان انا احسن لى اغيب فى اليوم ده
وانا من كتركلامه عاملة نفسى مش سامعة
لغاية ما قالى
انا بلاغيك فى السليم
رحت ضربته على كتفه
حسيت بحرقان فظيع فى صوابعى وبعدين سكت
ومن ساعتها وانا صباعى فى لون ازرق عمال يزيد
هى الضربة ماكانتش جامدة
ومش حاسة بالم دلوقت بس اللون الازرق المتزايد ده مضايقنى
مفيش دكتور يقولى ايه ده
وينوبه فى ثواب

20 التعليقات:



مصعب صلاح يقول...

السلام عليكم
البنين دول يطلعوا العين ف الامتحانات
احنا بنخترع وسائل حديثة جدا للغش
وخصوصا بتوع الادوار التانية
ربنا معاكي

THE illusionist يقول...

هههههههههههههه

معلش معلش
بس يا رب بس تستحملىيهم
انا عندى فى المدونه موضوع اسمه الثانويه العامه
وحاطط فيه احدث انواع الغش
انه فى تطور
واكبى العصر واشترى مجله ما تزوقينى يا ماما بقرش ساغ

EMAN يقول...

ههههههههههههههههههه
صباحه فل
انت لسه فاكره يابنتي
انت متاخره اوي
فكرتيني بالذي مضى يااختي
طيب دول دور تاني
فما بالك بالدور الاول
خرجو علي بالطوب والبنادق وانا في بلد ارياف والمدرسه في حته مقطوعه وجنب الترب يااختى وانا كنت لسه توت متعينه جديد والمدرسه كانت سفر بالسوبر جت
تخيلي المنظر بقى كل اللي انت بتقوليه ده عااااااااادي جدا
اتجبلني على ذلك كل المدارس بقت كده دلوقت
وخاصة البنين
امال تقولي ايه في المدارس المهنيه والتمريض
كل ده عادي جدا
المهم تعملي ديليت لكل الداتا دي اللي دخلت مخك واعملي اب ديت لنشاطك
وانسي انسي خاااااالص زي ماكنت بتنسي المذاكرة
غلوش غلوش واضحكي الضحك دلوقت ببلاش

بنجاواتى يقول...

السلام عليكم

ما شاء الله ربنا يحفظك
انتى اللى زيك مش كتير اليومين دول

واضح ان العيال مستواهم بقى عالى اوى

وايه حكاية الشوكة دى ما فهمتهاش؟؟

تحياتى

Appy يقول...

هههههههههه بالرغم من انك قويه فعلا واتحكمتى فى اعصابك الا انا عجبنى اكتر التحكم فى الغدد
بجد انتى بتعملى الصح يعنى دى تربيه وتعليم انا افتكر زمان شويه كانت اللجان صعبه حتى اسمع الدور التانى نفس القصه صعبه جدا مش سهله
دلوقتى بقت سلاطه

لورنس العرب يقول...

طيب احمدي ربنا
انا اختي كانت بتدرس زمان لثانوي تجاري بنات
طبعا مش هاحكيلك على اللي كان بيحصل هناك
يكفي اني اقولك انها كانت بيتم تهديدها وكانت هناك محاولات للإعتداء عليها من البنات بعد الامتحانات
وكانت بتسمع الشتائم باستمرار بعد كل امتحان من البنات من نوعيه "ربنا ياخدك ويريحنا منك، منك لله يا ظالمه، حسبنا الله ونعم الوكيل فيكي يا بنت ...." وحاجات زي كده كتير
وسط زباله بكل ما تعنيه الكلمه

د. ياسر عمر عبد الفتاح يقول...

أنا سمعت عن حاجات أقوي من كده
وكان معايا ناس في اللجنة بتفتح الكتب
ومش بتعرف تغش ..!!
فكانوا بيضطروا يستعينوا بواحد من العيال الرخمة الدحاحين
احم .. زيي كده
لكن الحمد لله مكنش ليا أوي في الغش

وعندنا في ضواحي بني سويف المدرسين بينضربوا لأنهم بيرفضوا يغششوا العيال

بالنسبة للزرقان
خدي هيموكلار أو ألفا كادول
دول دهانات لمكان الزرقان

osama44 يقول...

احمدك يارب انى ما وقعتش تحت ايدك
اسالى وليد ليه كنت انا اللى بمل البراشم بتاع الدفعه كلها
استاذتنا
انا معاكى قلبا وقالبا التعليم لن ينصلح حاله الا اذا وقفنا وقفه بجد ضد الغش
استاذتنا ربنا معاكى لانه وبصراحه انا بعترف انى انا و وليد اخر الاجيال المحترمه فى الغش
ربنا يستر على الاجيال الصاعده اللى كلها حيويه ونشاط فى الغش
دمتى كما نراك دائمامثال يحتذى به

لقد خلقنا الله احرارا يقول...

مصعب صلاح
ربنا معانا كلنا
طيب قولى يامصعب على الوسائل الجديدة دى منكم نستفيد

لقد خلقنا الله احرارا يقول...

the illusionist
اهلا بيك فى اول زيارة ويارب ماتكونش الاخيرة
بتضحك ؟
ماشى
لك يوم
عارف هى المشكلة مش تطور الغش
انما البلطجة
الغش دلوقت لايستلزم اى مجهود من الطلبة
المدرس بيقوم بالعبء كله
شرفتنى يافندم
وجارى البحث عن المجلة
بس على ايامى كانت اغنية
مش عارفة الدنيا حصل فيها ايه؟

لقد خلقنا الله احرارا يقول...

ايمان
سلمت ياجميل انى عايشة فى نعمة
واول ماالدراسة تبدأ ان شاء الله
هطرقع صوابع البنات عندنا فى المدرسة
مهما عملوا ارحم من البنين بكتير
ربنا يصبرنى

لقد خلقنا الله احرارا يقول...

بنجاواتى
اهلا بيك يافندم
الله يكرمك على الكلام الجميل
خايفة اصدق
بالنسبة للشوكة
حضرتك عارف انهم بيلبسوا دبلة وحظاظة وحاجات غريبة كده
المرة دى لقيت ولد لابس غويشة معدن لفتت نظرى
لما دققت فيها لقيتها شوكة اكل
والولد كلبوظة كده مش عارفة قدر يتنيها ازاى حوالين ايده
وطبعا بيخوف بيها زمايله

لقد خلقنا الله احرارا يقول...

ابى
انت عسل والله
لفت نظرك موضوع الغدد
هههههههههههههه
الاغدة الغباوة دى عاملة معايا شغل جامد اوى
قربت اطلع بر اءة اختراع
عارفة زمايلى لما يحبوا يضايقوا حد
يستحضروا
حلوة يستحضروا صورتى لما اشغل الغباوة ويتكلوا على الله فى الخناقة
وربنا يستر
لا هى الحقيقة الغدة مرتبطة بالخنقة اللى مش بقدر اداريها
نورتينى بجد

لقد خلقنا الله احرارا يقول...

لورنس العرب
ثانوى تجارى بنات
لا ربنا يكون فى عونها
منتهى قلة الادب بجد
بس ده مايمنعش ان الولد قالى النهارده
حسبى الله ونعم الوكيل
انا لما اطلع مدرس هفرم عيالك
هو مفيش رحمة؟
ولما حاولت افهمه ان ده شغلى وان ده الصح
رد ولد تانى قالى
يعنى حبكت 000الضمير فى البلد دى النهارده
زبالة دى كلمة مهذبة جدا للوصف

لقد خلقنا الله احرارا يقول...

دكتور ياسر شكرا على النصيحة الطبية
هو اللون الازرق بيقل بالتدريج الحمد لله
بس انا كنت مستغربة منه لان الضربة مش جامدة
اما بالنسبة لموضوع البوست
انا عارفة ان فى وسائل للغش كتير جدا
ودكتورة ستيتة كان عندها بوست جميل جدا عن الموضوع ده
لكن انا اللى لفت نظرى
البلطجة
والخوف الرهيب اللى عند المدرسين وان الطالب مش بيبذل مجهود وبيعمل حتى برشام
لا هو رايح اللجنة وكله ثقة ان المدرس ايا كان هيقوم بالواجب
عارف انا فى التصحيح النهارده
كن هيجيلى جلطة
بجد مش مبالغة
من المدرسين اللى مرعوبين من الطلبة ومستغربين لما اقولهم ان دى معركة مش ممكن اخسرها وان الطالب مش ممكن تكون شخصيته اقوى منى
حسسونى ان انا وزمايلى كتير جايين من كوكب تانى
قلت انيس منصور مش غلطان
احنا اللذين هبطوا من السماء

لقد خلقنا الله احرارا يقول...

اسامة
اهلا بيك
ايوه كده اعترف
كنت بتعمل ايه
لا يااسامة ماتقارنش نفسك ابدا بالاجيال دى
انا كل ماادخل لجنة اقولهم
مش مشكلة ابدا انك تكون دور تانى
او مستهتر فى المذاكرة
او فاشل مش معاك شهادة
كل دى حاجات ممكن تتعوض
لكن قلة الادب
وسب الدين للاسف
والالفاظ اللى ماينفعش تتسمع
وعدم الاحترام لاى حد كبير مهما كان
هو ده اللى مالوش حل
لكن انت ووليد
اكيد كنتم ملائكة فاضلكم جناحين وتطيروا

well يقول...

اولا..اسامة انت ما تسترش ابدا
ثانيا لقد خلقنا الله احرار
من غشنا فليس منا
ومن لم يغش فى هذه البلد فلن ينجح
وعلى فكرة انا فى سنة تالتة معهد كنت حالل بالغش طبعا بس عشان كل الطلبة كانت بتغش كانوا كلهم بينجحوا والمعهد لازم يكون فى نسبة سقوط وعشان كدة اختارونى انا وكام واحد علشان نشيل مواد ونعيد السنة ما باليد حيلة بس هما اتفضحوا فى مجلس الشعب وعلى اليوتيوب ادخلى على اليوتيوب واكتبى معهد القطامية ..بس الحمد لله اتفضحوا بعد ما خلصت امتحنات

لقد خلقنا الله احرارا يقول...

وليد
اهلابيك بعد طول غياب
اولا
اسامة ماقالش حاجة هو لمح بس وانت ماشاء الله حكيت بالتفاصيل
ثانيا
انا الحمد لله لم اغش ونجحت
صحيح مش دكتورة
بس سعيدة بنفسى جدا وفرحانه بنجاحى اوى اللى الفضل الوحيد فيه لربنا
لو فاضى هاحكيلك قصة حياتى


1- الكادر
ماغشتش حرف مع انه كان فوضى لايمكن تخيلها وصداع ماشفتوش فى حياتى وامتحان مش عارفة فى ايه اساسا
وصرخت بعصبية شديدة فى مدرس ملتحى مقضيها غش بفظاعة لانى مش عارفة اركز منه فكان رده انه عرض عليا يغششنى

سيادتك انا اخدت دبلومة خاصة طرق تدريس ومع ذلك اصعب حاجة فى امتحان الكادر كانت التربوى لانه مش امتحان اصلا وخرجت من اللجنة عيطت لانى صعبت عليا نفسى
لانى وده مش غرور بعتبر نفسى مدرسه كويسة
لكن مش قادرة اقول لك لما نجحت فرحتى كانت اد ايه وكمان انى ماغشتش

وكل مايحكوا عن مغامراتهم فى الغش فى الكادرقلبى يتملى فرحة مش ممكن يحس بيها غشاش


2-الثانوية العامة
غشيت نقطة واحدة فى امتحان الجغرافياعليها درجة واحدة وطلعت غلط


3-الكلية
استحالة يكون فى غش حتى لو انا عايزة
لاننا قسم تاريخ
ال3ساعات اللجنة مش بنبطل كتابة متصلة ونعيط برده لما اللجنة تخلص لاننا ماكتبناش كل اللى عايزينه


فى دكتوره واحده فى سنه تالته جابت امتحان بايخ لان ناس كتير ضايقوها الامتحان كان فى سؤال عمرى ماانساه عن احوال العرب اثناء الحرب العالمية الاولى وكان اجابته من المحاضرات بس

لما جمعناه طلع والله بدون مبالغة 20 صفحة فلوسكاب وش وضهر
ومغشناش ونجحنا
صحيح جبت جيد فى المادة دى وانا كنت متعودة ان مواد التاريخ جيد جدا اوامتياز بس نجحت




ويل انت نمت مش كده؟

خلاص معلش هكمل بعدين

الخلاصة احنا حظنا احسن منكم
جيلنا اتعود ينجح من غير مايغش

GiGi world يقول...

ياالله ربنا يسهل هانت ربنا معاكى بجد
قين الاباء والامهات راحو قين وبلدنا كده رايحه على فين
ااااااااااااااااااااااااااااااه

لقد خلقنا الله احرارا يقول...

جيجى
شرفتينى ياحبيبتى
الاباء والامهات مشغولين بلقمة العيش
ومعندهمش وقت ولا نفس يربوا
وبصراحة مش هما بس
المدرسين كمان ليهم دور كبير فى انتشار الغش والبلطجة
ولو اعترضت يبقى انت معقدة وخنقة ومحبكاها اوى واحتمال تكونى واخدة علقة على الصبح وجايه تطلعيه فى العيال

وكمان هيقعدلك منع الغش ده فى عيالك لانه كله بثوابه وكما تدين تدان