عفوا استاذى ابراهيم عيسى

لقد اتخذت قرارا وأرجو منكم أن تساعدونى عليه
ده أنا
مش عبد الناصر
بس مش عارفة اتصرف غير كده
اول ماعملت المدونة
كنت جاهلة جدا فى الكتابة والوورد وكل الحاجات المرتبطة بيها
مشوها كنت جاهلة
لانى متأكدة انى مازلت
وكانت النتيجة انى كتبت تدوينات عفويه كده
بس بحبها جدا
وكمان كانت مليانه اخطاء بسبب السرعة
ومش عارفة افصل الكلام عن بعضه
قوم ايه
على اساس ان دى مدونتى يعنى
وفى مقام بنتى الكبيرة
قررت انى اعيد نشر التدوينات دى تانى
المهم
التدوينه دى
اتنشرت يوم 21-12-2008
ردا على مقال كان كاتبه ابراهيم عيسى
بيعارض فيه
حادثة منتظر الزيدى
عفوا استاذى ومثلى الاعلى
صدمت جدا بمقالك المنشور بالدستور
وكررت قراءة المقال عدة مرات لعل فهمى الاول يكون خاطئا
ولكنى اقنعت نفسى بان العبرة بكاتب المقال حتى لو اختلفت مع رأى كاتبه
ومع الاحترام الشديد لخبرتك ومهنيتك الصحفية التى لاغبار عليها
فان لى عدة ملاحظات
اولا
تكلمت فى المقال عن مهنية الصحفى الذى يمتلك وسائل يعبر بها عن ارائه
وعن مقتضى وظيفته
وعهدى بك سيدى صحفيا جريئا
استخدمت وسائل عديدة للتعبير عن رايك
فماذا كانت النتيجة؟
وهل المطلوب منا نحن فقط ودائما
الالتزام بالمهنية والقواعد الاخلاقية فى تعاملنا مع اعدائنا
ام اننا بدون ان نشعر تغلغل الاحساس بقوة اعدائنا فى انفسنا
لدرجة جلدنا لانفسنا بقسوة ورغبتنا الدائمة فى اثبات حسن نيتنا واخلاقنا لحثالة البشر
اذا كان المعنى الذى سيصل للغرب من حادثة الحذاء
هو عدم مهنيتنا وسوء اخلاقنا
فمعنى ذلك اننا مطالبون دائما
بتحسس موقف الغرب منا
قبل ان نخطو اى خطوة
وهذا دليل دامغ
على انسحاقنا النفسى
قبل السياسى والاقتصادى والعسكرى امام الغرب
ثانيا
لاشك ياسيدى ان قذف الناس بالاحذية
عمل غير مقبول اطلاقا
ولكن لى سؤال وانا اعلم اجابته عندك
هل هناك اى وجه للمقارنة بين قذف الاعداء بالاحذية وبين قذف هؤلاء الاعداء لنا بالقنابل العنقودية
وتخريبهم لبلادنا واحتلالهم لاراضينا واثارتهم للطائفية والمذهبية والفتن لعن الله من ايقظها
بالبلدى
المطلوب منى انا بس اكون مؤدبة واستقبل ضيوفى باحترام
حتى لو ضيفى ده دنس الارض والعرض
ثالثا
مين قال ان بوش ضيفنا
ده ضيف الزعماء العرب المنبطحين
ضيف المالكى الخاين
ضيف اى حد غيرنا
هل نملك ياسيدى طلب رفض زيارة بوش
لو حدث هذا فى المستقبل اعدك اننا لن نقذفه وامثاله بالاحذية
رابعا
على اى اساس وجود بوش لد ينا يمنحه الامان
الامان
يمنحه لبوش من دعوه لاحتلال المنطقة
الامان
يمنحه لبوش من سمحوا لقواته بعبور قناة السويس
وبناء قواعد له فى الخليج
الامان
يمنحه لبوش المارينز العرب وأيتام الديموقراطية الامريكية
لقد قا لها نزار قبانى على اعتقد (من بدأ المأساة ينهيها )
ولقد تعلمنا منك يا سيدى
أن هؤلاء الروساء باستبدادهم فاقدى الشرعية
فضيوفهم منطقيا ليسوا ضيوفنا
خامسا
تتحدث ياسيدى عن ان ضرب بوش بالحذاء يهبط بمستوى خلافنا مع اعدائنا
ومن قال لك اننا نريد لمستوى اختلافنا معهم ان يرتقى
هل المطلوب منا دائما التمسك بقواعد الاتيكيت والتحضر حتى مع قاتلى اباءنا
فى اى شرع وفى اى دين جاء ذلك؟
سادسا
لماذانغمة المعايرة هذه يا سيدى
انت ترى اننا تشطرنا على راجل واقف فى مؤتمر صحفى ومش واخد باله
لا ياسيدى
احنا اتشطرنا على رئيس اكبر دولة فى العالم
حتى ولو كان فى ايام ولايته الاخيرة
حتى لو كانوا يسمونه البطة العرجاء
احنا اتشطرنا على اجهزة الامن والاستخبارات العراقية والامريكية
التى لم تستطع ان تمنع عن الرئيس قدرا كان لابد ليصيبه
احنا اتشطرنا على رئيس فاشل وقاتل لابائنا واولادنا
صحيح فعلنا معه كان بسيطا وعفويا
ولكن مين قال ان العفوية لاتكسب احيانا
الم تكن كلمة عرابى الخالدة امام الخديو فعلا عفويا
الم يكن اشتعال ثورة 1919 فعلا عفويا
اطلق فيه المصريين نيران سخطهم المكبوت على الانجليز
ولكنه ياسيدى ليس فعلا طفوليا ولا عاجزا ولا ساذجا
ونحن ندرك تماما ان هذا الفعل لن يحرر بلادنا
ولن يطفى نار الفتنة التى اشعلها المحتل المضروب بالحذاء
ولكنه بدون ان تعايرنا ياسيدى اقصى ماامتلكته ايدينامن افعال
سابعا
ماالغرض من الحديث الدائم عن ان هذا الفعل لم يكن ليحدث فى عهد صدام
او لايمكن ان يحدث مع اى زعيم عربى حاليا لان العواقب معروفة تماما للجميع
هل تلمح ياسيدى
حاشاك
كما قال غيرك
ان ذلك الحدث كان بسبب الديموقراطية التى نشرها بوش فى العراق
انا استعبد ان يكون هذا تفكير استاذى ومثلى الاعلى
ثامنا
هل رمى الحذاء على بوش تعبيرا عن سياسة الغضب العربى ضد سياسات بوش
هذا سؤالك
اما اجابتى
رمى الحذاء تعبير سريع وعفوى وصادق وشجاع
ضد اجرام بوش وليس منتظر
ولسنا معه بمسئولين عن تدنى اعمال المقاومة ضد القوات الامريكية
ولا عن العمليات الارهابية
وليس مجرد عدم حدوث هذه الفعلة سابقا دليلا على سؤء اخلاق من صنعوها
لعلها تكون سابقة حسنة
تاسعا
حتى انت ياسيدى !
لماذا لاتدعونا نفرح
لماذا تسحبوننا من نشوة الفرحة
الى النقاش والتنظير والتحليل
بوش وانضرب بالجزمة
واحنا فرحنا وحسينا برمزية الحدث
وانها رسالة من ربنا لينا
ان الضربة ممكن تصيب من حيث لاندرى ولا نحتسب
وانه لابد عن يوم محتوم تترد فبه المظالم
ايوه انا انا عارفه الجزمة اللى لبست فى العلم الامريكى ماردتش المظالم
ولكن مين عارف
يمكن فرحتنا بالاهانة اللى لحقت امريكا فى شخص بوش
تشجعنا
اوتكون خطوة فى طريق طويل جدا لاسترداد حقوقنا وحريتنا
بجد مش قادرة امنع نفسى
دايما باغنى
المجد ده ابننا
والفارس الكرار
راكب على مهرنا
والكدابين عارفين

طبعا هتلاقو الدنيا لسه مليانه اخطاء

وفصحى على عاميه
ومفيش همزات
بس ولا يهمنى
المرة الجايه
أغير عن كده
انا مغيرتش حاجة من الكلام
لانى كنت بكتبه من قلبى اوى
التدوينه الاولى لسه فى مكانها
بالتعليقات اللى وصلت عليها
مش بقول لكم فى مقام بنتى الكبيرة
السلام عليكم

16 التعليقات:



A.SAMIR يقول...

انا برضة ساعات كتير بحب اقرأ تدويناتي القديمة
التدوينات القديمة عاملة زي البرفان المعتق
قيمته تزداد بمرور الزمن

سهيل ولى الدين علام يقول...

لقد خلقنا الله احرارا
اول مره اعلق عندك .رغم زيارتى لها اكتر من مره ..لم تعجبنى كلمة استاذى على ابراهيم عيسى ..يا اختى دول كلهم ارزقيه شوفيه لما كان جاى من قويسنا بالبدله الالزامى .. دول كلهم بياعين كلام واستخدم فى قضيته بمعرفة اجهزة الامن لتحسين الصوره للنظام وشوفى كلامه
قبل القضيه وبعدها ..
من قرآاتىلمدونتك وتعليقاتك لدى مدونات الغير ..اشعر انك مصريه جداا
وطيبه جداا..
ماتزعليش منى ممكن اكون غلطان!! لكن
ده اللى بشعر به ..
انا خايف اكون زعلتك .. لكن انا معرفشى أخبى!!
اخيرا تقبلى تحياتى واعتذارى!!

لقد خلقنا الله احرارا يقول...

استاذ احمد سمير
اهلا بحضرتك
فعلا هى قيمتها بتزداد بمرور الزمن
بس بصراحة
اخطائى الكتير فى الكتابة
اللى مازالت مستمرة
كانت بتضايقنى من البرفان
فقلت اعدل فيها شوية
تحياتى لك

لقد خلقنا الله احرارا يقول...

استاذ سهيل ولى الدين
اهلا بيك يافندم دايما
سواء شرفتنى بتعليقك او لا

انا مع حضرتك
ابراهيم عيسى قبل القضية
غير ابراهيم عيسى بعدها
مبارك
كان ذكى جدا فى حركة العفو دى
سحب كتير من رصيد ابراهيم

ده بيفكرنى بالانجليز لما اصدروا الحكم بالاعدام على عرابى
وبعدين خففوه للنفى
لان اعدامه كان هيخلى منه بطل
لكن نفيه هيدى الفرصة
لتشويه صورته واعماله زى ما حصل

بس احياناابراهيم عيسى بتطلع منه حاجات حلوة برده

اصل انا عندى مشكلة

صعب اوى بالنسبة لى اكره حد او حاجه
حبيتها وانا صغيرة
فتلاقينى بالتمس الاعذار
لان لغاية فترة قريبة جدا
ابراهيم عيسى
كانت ارائه حاجة مهمة جدا بالنسبة لى


شكرا على وصف حضرتك ليا انى مصرية جدا
انا الظاهر هصدق
لانى سمعت الوصف ده اكتر من مرة الايام اللى فاتت
ربنا يكرمك
دى شهادة أعتز بيها





بس بجد
انا زعلانة

كلمة طيبة جدا
مع الاعتذارات الكتير اللى بعدهادى
بتدى معايا معانى كتير غير طيبة

سهيل ولى الدين علام يقول...

نا آسف جدامن فهمك لكلمة طيبه!!وانا
بعتذر مره اخرى ولكن قلتلك من قرآاتى لمونتك وتعليقاتك استقر فى ذهنى هذا الشعور !اوبالعربى عاطفيه جدا !!
وسهل جدا تأثرها وانفعاليتك واصحه فى كلامك.. ولانى لااعرف صورتك اللى كان من الممكن تلغى هذا الشعور عندى لاكنى لااقصد اى معنى سىء وانا معرفشى سنك كنت اقول انتى زى اختى الكبيره!! الظاهر انى حلخبط واصل فلاح معرفشى النص نص ولااعرف اجمل كلماتى !!
اعتذر اخيرواخرمره ولو مش عايزه ادخل هنا تانى انا تحت امرك !!

norahaty يقول...

السلام عليكم
بصراحة مختلفة معك
من ساعة الحادثة كتبت
(لكنى لا أجد اللنك) ان
ما فعله منتظر ليس اكثر
من (فش غلنا)شجاعة وجسارة
وكل اللى ممكن يتقال انا عارفاه
لكن قصاد هذا اظهر العرب امام
العالم التانى :البشر العاديين
اللى بتعاملو بالاسس مش
بالانفعالات تفتكرى
صورتنا امام طفل
هولندى اوامريكى
حتكون ايه؟
لا اعتقدها جيدة ابداً:(

لقد خلقنا الله احرارا يقول...

استاذ سهيل
يانهار ابيض
ده الظاهر انى انا اللى زعلتك
لا يافندم
انت تشرف وتنور المدونة فى اى وقت
حصل خير
انا فعلا زى اختك الكبيرة
ومش زعلانة خلاص

فعلا انا عاطفية جدا
وانفعالية
وسهلة التأثر
ويمكن استفزازى بسهولة
بحاول اغير من نفسى
بس واضح انى مش عارفة
بحاول اغير بالقدر اللى مايضرش صحتى النفسية


وعموما انا كمان فلاحة
وكتير مبعرفش النص نص
ولا يهمك
بس خليها عاطفية
وبلاش طيبة
اصل دى شتيمة الايام دى


انا مستنية تعليقك
وتعليقاتك بعد كده علشان اعرف
ان سوء التفاهم انتهى خلاص
انت دبست نفسك
اعمل انا ايه؟

لقد خلقنا الله احرارا يقول...

norahaty
وعليكم السلام
شرفتينى يافندم
واختلفى معايا براحتك
انا قرأت وقتها اراء كتير حكيمة جدا
بتخالف رأيى
بس انا شايفة انه فيها ايه
لما الراجل يفش غلنا
مااحنا مغلولين وضعفاء ومتغاظين ومش عارفين نعمل حاجة
اما بالنسبة للشجاعة
فهى شجاعة
على الاقل بالنسبة لى
لانى لما حطيت نفسى مكانه
اكيد كنت هخاف اعمل حاجة زى كده

اما الاطفال الاجانب
فمعلش
انا مش مطالبة طول الوقت
انى افكر فى صورتى شكلها ايه ادام الناس
لما الاطفال دول يكبروا ويكون عندهم عقل وبصيرة
هيعرفوا
انى دى اقل حاجة تتعمل
فى ايه كريمة زى العادة انا خايفة اكون ناسية نصها
بس معناها
ان الله لا يحب الجهر بالسوء من القول الا من ظلم

انا بعتبر حادثة الحذاء
زى الجهر بالسوء من القول

انا رغاية معلش
المهنة بتحكم
تحياتى لك
واتمنى الزيارة تتكرر

osama44 يقول...

ادا ايه شئ جميل انى الواحد بعبد نشر كلامه القدبم وممكن ساعنها بضحك على نفسه بسبب بدايته المضحكه وادايه الحاجات القديمه زى ماقلتى فى مقام بنتك الكبيره لانها ليها مقدار كبير فى قلب كل واحد

بيطرية ومش بايدى يقول...

يارب عقبالى كده اما توحشنى اول عك عملته ف المدونة بتاعتى بس انا عايزاكى ودلوقتى حالا تدخلى ع المدونة بتاعتى وياريت يا جماعة اى حد يشوف التعليق ده يدخل على مدونتى ضرورى مسالة حياة او موت بجد حاجة هتمكم جدا الامر خطييييييييييييير لا يستدعى الانتظار مستنايكم هناك مش مهم تعلقوا بس مجرد انكم تشوفها ده كفاية عندى

تامر علي يقول...

إعادةصياغة جميلة ومتأنقة :)

حقيقة أني قلما أختلف مع ابراهيم عيسى حول عموم السياسة (مع اختلافي الكامل معه عندما يتحدث في الدين لأنه بيعجن الحقيقة:) كن فما يتعلق بهذا الموقف اوافقك تماماً

تحياتي

لقد خلقنا الله احرارا يقول...

القلم الثائر المظلوم
شرفتنى
كل سنة وانت طيب
انامش بضحك على تدويناتى انا بتكسف من منظرها
وكمان لما بغير شكل القالب للمدونة
حتى الحاجات اللى كان شكلها معقول شوية بتيقى تكسف
بس يالله هنعمل ايه
زى بنتى
وفى وشى برده
ربنا يعينا عليها
تحياتى لك

لقد خلقنا الله احرارا يقول...

بيطرية حبيبتى
شكرا على عيد الميلاد الجميل
كان مفاجى وجميل
بجد معنديش كلام اقوله لك من كتر ماانا سعيدة
وكمان الانسة ميرو
كانت اول واحدة تقول لى كل سنة وانت طيبة

لقد خلقنا الله احرارا يقول...

استاذ تامر
شكرا على الزيارة
والمجاملة
جميلة ايه ومتأنقة ايه بس
انا مفيش فايدة فى تسرعى
برده لازم الاقى اخطاء

اما ابراهيم عيسى
مع احساسى بتغيره شوية بعد القضية
بس حقيقى
ارائه ليها عندى مكانه كبيرة
حتى لو احيانا ابقى فرحانه انى اختلفت معاها
يعنى انا بختلف مع الدماغ دى شخصيا
كل سنه وحضرتك طيب

مصعب صلاح يقول...

السلام عليكم
أولا أنا مع الاستاذ ابراهيم عيسى في هذا الأمر فنحن لسنا همج

لقد خلقنا الله احرارا يقول...

مصعب صلاح
عليكم السلام
الاختلاف فى الرأى لايفسد للود قضية
خصوصا وانا واثقة اننا مش مختلفين اوى ولا حاجة
مش انا وانت وناس كتير بنكره بوش
ونفسنا نضربه بالقنابل العنقودية
خلاص
يبقى متفقين
ده حتى كره بوش
قربى الى الله
ربنا يجعله فى ميزان حسناتنا