إنذار وأشياء أخرى

انذار شديد اللهجة الى السيد بلوجر أنت تعلم ماذا فعلت ولكنك لا تدرى سيدى ما هى حدود صبرى عليك وما هى الاجراءات التى يمكن أن أقوم بها اذا استمرت تلك المعاملة الغير كريمة منك
-------------------------
حملة مفيدة جدا من مجموعة من المدونين المتميزين كانت بدايتها اقتراح من مدون متميز صاحب رحلة البحث مع استعداد عالى جدا عند كتير من أسرة التدوين نتيجة لجهود خيخة المتواصلة من سنتين تقريبا لإنجاح حملة التبرع بالدم http://bloggersbloodbank.blogspot.com فى انتظار مشاركتكم واقتراحاتكم لكن ده خلانى أفكر شوية اننا لينا حقوق كتير فى البلد دى مهضومة وان الحكومات الموقرة واجبها الاساسى انها توفرلنا الظروف المناسبة للعمل والرعاية الصحية وقت المرض فى سنة اولى اعدادى درس عن نظام الحكم بيوضح ان من أهم واجبات فرعون اللى هو فرعون انه يوفر وسائل الحياة الكريمة لشعبه يعنى بالبلدى يخلق بيئة مناسبة للناس تعمل قدر طاقتها ورزقها على ربنا فى الاول والاخر لكن احنا من زمان قوى والدولة بتنسحب من كل ما يخصنا بعد اذنكم لو حد ممكن يقولى تعريف بسيط للدولة حديثا وايه واجباتها يمكن أنا بظلمها
------------------------
أليس غايبة عن المدونة من كام يوم وأنا عايزة أشكرها على حاجات كتير اخرها انها علمتنى انزل اليوتيوب على المدونة وبهذه المناسبة عايزاكم تشاركونى الاستمتاع بقصيدة تميم ( الى جداتنا ) تقريبا انا عندى الايام دى ادمان ممتع جدا لشعر تميم كنت ناوية أفضفض لكن خليها لوقت تانى لما نشوف حكاية السيد بلوجر ايه

30 التعليقات:



مهندس مصري يقول...

ههههههههه
إنذار

خير ان شاء الله

خواطر شابة يقول...

كنت اظن ان المشكلة عندي وحدي اذن الامر عام وبلوجر اعلنها حربا على الجميع ههه
تحياتي وودي

MR.PRESIDENT يقول...

المشكلة فعلا عند الكل فيه حاجة غريبة في البلوجر
ومش عارف جوجل مش بتهتم ازاي
مع ان المدونات عملها لها شغل برضوا

فاتيما يقول...

مش لوحدك يا فيدوووو
البلوجر مخطرف معانا كلنا
دنا افتكرت ان حد لطيف ماشى ورايا يمسح تعليقاتى عند الناس
اتارى الحالة عامة
و ربنا يستر على مدوناتنا


ميرسى على مشاركتك فى الحملة
طول عمرك اخلاق يا فدفودتى
دا دلع فيدو
اللى هيوه دلع حفيدة
شوفتى ازااااى ؟؟


ابتسمى بقى

أليس في بلاد العجائب يقول...

السلام عليكم ورحمة الله وبركاته

سألت عليكي العافية يارب :)

تسلمي علي السؤال :) بس كنت بتثقف تكنولوجيا في جهاز الPSP علشان عيون سليم ابن اخي الحبيب .. العلم نور والتكنولوجيا دي تخلي الواحد ينهج وهو بيتعلمها :) بس كم رهيب من المعلومات و التطبيقات .. ربنا يخليلنا الانترنت و فوائده .. بس تمت المهمة بنجاح و ملكت سر كبير من اسرار الجهاز :) وختمت تعب اليومين بابتسامة كبيرة وقبلة وحضن :) حاجة كده احلي من احلي حاجة في الدنيا :)

علي فكرة دي تالت مرة اكتب التعليق و كل شوية يحصل حاجة بس من عندي انا.. الصفحة تهنج وتقفل .. :):) واضح ان جوجل موصي عليكي :)

ابقي اعملي backup لاي حاجة بتكتبيها في مكان تاني علشان لو ضاعت هنا تعرفي تلاقيها .. كمان ممكن تعملي مدونة شقيقة علي wordpress وتعملي تصدير لكل اللي هنا فيها وتبقي تحدثيه دايما علشان لو وقعت هنا لا قدر الله تلاقي طريقه لارجاعها .. :) ولو اني طبعا مش عارفة مزعلك في ايه جوجل بس حاجة افتكرتها وقلت اقولك عليها عموما :)

كنت عايزة اسألك .. اول حاجة ليها علاقة بالجغرافيا والتاريخ ايه بتتدرس في ابتدائي؟ لو تعرفي .. عايزة اجيب حاجة كده لسليم .. حاجة تشده لمصر بدل مهو منجذب انجذاب رهيب لألمانيا علشان مدرسته .. لو تعرفي ياريت تفيديني :) ويبقي كتر خيرك :)

كفاية دوشة كده باه.. إلا انتي امتحنتي اصلا ولا لسه؟

ماما بخير ان شاء الله ؟

في انتظار الفضفضة :)

حفيدة عرابى يقول...

مهندس مصرى
----------
مش مصدقنى:)
طيب هو بعد الانذار رجع التعليقات المتسربة:)
تحياتى لحضرتك





خواطر شابة
----------
انا قلت بلوجر متفق مع حكومتنا الرشيدة
علشان يمنع المد الثورى من عندنا
طلع الموضوع تبع الجامعة العربية

شرفتينى ياحبيبتى



mr.president
---------------
جوجل ده راجل....
ولا بلاش
اشمعنى هو اللى هيتعامل معانا كويس
:)
تحياتى لحضرتك



فاتيما
-------
خلاص ياعمو بلوجر انا سحبت الانذار
وبستسمح سيادتك كمان
حتة تهديد
تبقى فاتيما عندنا
يامراحب
مين ده اللى يقدر يمشى وراكى ويمسح التعليقات
امال احنا روحنا فين

ربنا يخليك يامدلعانى فى البلوجر:)

ابتسمنا يافندم:)

حفيدة عرابى يقول...

اليس
وعليكم السلام ورحمة الله وبركاته
يعنى لازم أعمل نداء بلوجرى:)
حمدلله على السلامة
خلاص ياستى سماح علشان خاطر سليم
ربنا يخليه ويبارك فيه ويفرحكم بيه دايما
ومبروك على الابتسامة والقبلة والحضن
ربنا يديمهم عليك ويرزقنا جميعا من فضله:)

نصائحك قيد التنفيذ يافندم
ومدونة الوورد برس
معمولة فعلا
ربنا يستر انا مش بحب اغير مكانى كتير

هشوف لك ياحبيبتى حاجةعلى موضوع ابتدائى
مع انها محيرة:)
لانك عايزاه يتشد لبلده

ممكن تخليه يقرأ جرايد حكومية
ويتفرج على جلسات مجلس الشعب

ولا بلاش
ده طفل برىء
حرام:)

تسلمى على سؤالك ياحبيبتى
ماما الحمد لله كويسه
والامتحانات ادعى لى لسه فاضل اسبوع

لا انا رغاية
هفضفض وربنا يكون فى عونكم:)

أليس في بلاد العجائب يقول...

تسلمي يارب من كل سوء :)

انا بس عايزة اعرف اول الحاجات اللي بياخدوها عن ايه واكيد ان شاء الله هلاقي حاجة ليها علاقة بيها كارتون او قصة او حاجة كده
بصراحة معرفش في المدرسة بتاعته دي ممكن يعلموه ايه .. هي لحد دلوقتي تربويا كويسة جدا ما شاء الله .. وبياخد عربي حلو بس علشان مدرساته المان حساه منجرف اوي في حب المانيا ولغتها و عاداتها .. ساعات اقول دا لسه 6 سنين لسه صغير وساعات اقول لو معرفش قيمتها من وهو صغير هيطلع من الشباب اللي محبش اشوفه منهم لا ليهم لا طعم ولا لون .. ربنا يحفظه ويعافيه :)

معلش انا عارفة اني كل مرة بدبسك في حاجة بعيدة عن شغلك :) بس اذا عرفتي او معرفتيش فجزاكي الله خيرا علي النية الطيبة في المساعدة :)

إلا متعرفيش لعبة طيبة كده مفيهاش ضرب وقتل وتخبيط .. نفسي في لعبة للأطفال تعلمهم يعملوا الخير و يبقوا مستمتعين وهما بيلعبوها نفس استمتاعهم و هما بيلعبوا بن تن و سبيدرمان و هاري بوتر .. مفيش حد ابن حلال كده يخترعلنا لعبة نتفاخر بيها اننا نعمل حاجة كويسة لولادنا؟ الله المستعان :) مين عارف!!

حفيدة عرابى يقول...

أليس
الله يخليك
حاضر ياجميل اسألك
بس على يوم الاحد ان شاء الله لان كده النهارده خلاص

اللعب
ماليش فيها خالص نهائيا البتة:)
انا مش فاكرة ان الكارتون على ايامنا كان عنيف كده
ده المزدوج
فاكراه
كان اقصى شر ممكن نشوفه:)

ايوه كده ارجعى نورى صفحة التعليقات تانى:)

أليس في بلاد العجائب يقول...

ربنا يباركلك يارب

براحتك خالص في موضوع الدراسة .. دا لسه مخلص المدرسة من يومين .. تانية حضانة و شغال لحد اول يوليو !!

ربنا يديم المعروف ان شاء الله :)

خدي بالك من نفسك واجازة سعيدة بإذن الله

Wanda يقول...

اخص عليه الى يزعلك
نشيله على طول :-)
المهم انا معنديش مشاكل علشان مدياه اجازة منى :-)))) و انا اجازة منه

المهم مستنين الفضفضة ياعرابية

موجة يقول...

انا ماحسيتش بالمشكلةدي
مدونتك رائعة
اسنمري
خالص تحياتي
موجة

غير معرف يقول...

طبعا أنا ماكنتش فاهم حاجه من البوست بتاعك لانى ماليش فى الكمبيوتر واسراره .. لكن الحمد لله بنتى قامت معاكى بالواجب ربنا يكرمها وانتى شدى حيلك مع التاريخ كده اتعلى السيره الذاتيه لمستر جوجل عشان ما نتعبش اليس معانا وان كنت بينى وبينك ما بفهمش كتير فى اللى بتشرحه صحيح ( العلم نور ) .. لكن ان ماخبش ظنى المدرسه الالمانى او الجامعه الالمانيه معرفش حاجه منهم بشوفها وانا فى طريقى لاحدى مدن القناه اسبوعيا( يعنى مشوار طويل اووى على سليم ) ماهو كل الفضا بتاع السنين اللى فاتت بيطلع عليه ربنا يكرمكم ويارب كده يحميكم من كل سؤ مع خالص تحياتى لك حفيدة عرابى وانا كان عمك من عشاق جمال عبد الناصر ومش هتصدقى لوقلت لك رغم السن ده لما بشوفه او اسمع خطاب له دموعى بتنزل رحم الله الجميع .

غير معرف يقول...

صباح الخير و قبل ما أنزل الشغل بثوانى هو سؤال واحد وعاوز أجابه صريحه لوسمحتوا ... أنتى واليس تعرفوا بعض من زمان ولا لسه قريب ؟؟؟ ياريت كنتوا عرفتوا بعض من سنين أعتقد كان فيه حاجات كتير ممكن تتغير بيكم يارب حبكم لبعض فى الله يستمر وتزايد اواصره أحسن اصبح نادر جداااا هذه الايام أن لم يكن معدوم ربنا يوفقكم .

حفيدة عرابى يقول...

أليس
هو انا وصلت لشوية مواضيع بس بكره ان شاء الله الخبر الاكيد
وحشتينى:)
-----------------------------

واندتى
ماتاخديش اجازة تانى ياواندتى
ونشيل بلوجر ازاى
هو خلاص انا حاسة انه هيسمع الكلام

--------------------------

موجة
أهلا بك فى اول زيارة
يارب ماتكونش الاخيرة
شكرا جزيلا على ذوقك:)


--------------------------

استاذ مدحت
انا مش قادرة اوصف لحضرتك تعليقاتك بتسعدنى ازاى
ربنا يخلى حضرتك لينا ياوالدنا التدوينى
لا اليس انا اعرفها صامتة من اكتر من سنة
لفت نظرى تعليقاتها فى مدونات كتير
العقل ماشاء الله
والاجمل رغبة كبيرة قوى فى النصح
ربنا يجازيها خير
وبعدين كنت بتسحب كتير واروح مدونتها
وبعدين مش فاكرة بجد اول تعليق كان منى ولا منها
لكن انا كل يوم بحمد ربنا بالناس الحلوة اللى كرمنى بيها
يعنى كنت ومازلت اسمع عن حاجات وشخصيات وحواديت بتضايق جدا من النت
لكن الحمد لله
طريقى دايما فيه ناس فى منتهى الاحترام والتميز



عبد الناصر كده انا هاحبه من حب حضرتك ليه:)

محدش ينكر انه شخصية كاريزمية
وان بساطته والتقاليد اللى كان بيحافظ عليها قربته من ناس كتير
كمان التغيير اللى حصل فى نواحى كتير ومس ناس مكانش عندها أمل من التغيير
مؤثر جدا
لكن الهدف السادس للثورة يافندم
الحياة الديموقراطية السليمة اللى نفسنا فيها
ماشفنهاش
وكمان نظرية أهل الثقة مش اهل الخبرة
وفيلم الكرنك
مش هانكر انى لما بسمعه بتأثر بكلامه
بس يمكن علشان ماعشتش عصره والاحلام الوردية
والانكسارات فمش حاسة بيه قوى زى حضرتك
عموما عمنا نجم قال
عمل حاجات معجزة وحاجات كتير خابت
جرح قلوبنا صحيح لكن كل الجروح طابت


عموما انا كمان كام يوم كده هاعيد نشر حاجة كنت كاتباها علشان ثورة يوليو
انا بحبها قوى
يارب تعجب حضرتك

ترجع بالف سلامة ان شاء الله

غير معرف يقول...

سلام عليكم ورجمة الله وبركاته
الابنه المحترمه حفيدة عرابى .. انا هتكلم عن موضوعين الاول (اليس )وعاوز ااقولك بأختصار انى دايما كنت ومازلت اتمنى ان ابنتى تكون فى خلقها العالى .
الحاجه التانيه بعد شويه هسافر لاولادى فى الصعيد يومين والاسيوع القادم كله متابعة شغل فى احدى مدن القناة وبعدين هرجع اسكندريه ويوم 28 يوليو ان شاء الله مسافر عمرة ... حاجه اخيره انا فعلا مبسوط انى اتعرفت بيكى وربنا يا بنتى يكرمك وهحاول ابقى ابص عليكى وعلى اليس وايجى ( وانا فى اسيوط ) مش عارف مش باينين ليه فى مدوناتهم ابتديت اقلق فعلا عليهم ربنا يحفظكم جميعا .

أم الخــلـود يقول...

اصحى يا نايم ووحد الدايم

(حملة الجسد الواحد)

أرجوا من المدونين الموقرين أن يضعوا شعار الحملة واسمها فقط فوقها (حملة الجسد الواحد) في الشريط الجانبي لمدوناتهم كدلالة على وحدة صف أمة محمد، ومن أجل قيام الولايات المتحدة الإسلامية

لمزيد من المعلومات

http://dndanh111.blogspot.com/2010/06/blog-post_14.html

جعله الله في ميزان حسناتكم .. آمين

norahaty يقول...

هو بلوجر دا
محدش مبــسوط منه
ابداً مزعل الناس كلها
حتى أنتى ياحضرة الحفـيدة
والحمد لله أدى أليس جت أهوة
ربنا يجازيكِ الخير على دعم حملة
التبرع للدم.

norahaty يقول...

هو بلوجر دا
محدش مبــسوط منه
ابداً مزعل الناس كلها
حتى أنتى ياحضرة الحفـيدة
والحمد لله أدى أليس جت أهوة
ربنا يجازيكِ الخير على دعم حملة
التبرع للدم

norahaty يقول...

أنا حطيت التعليق
مرتين عنداً فى بلوجر
لو ضيع واحد التانى يفضل:)

أليس في بلاد العجائب يقول...

فين كده؟ لعله خيرا ان شاء الله ..طمنينا

well يقول...

انا كنت صابر على السيد بلوجر علشان كانت المسألة بينى وبينه لكن ببما انه اتجنن فى عقله والشيطان ضحك عليه وعاوز يزعل الاستاذة ...خلاص فليسقط بلوجر بجوجل ومن النهاردة مفيش بلوجر
وجبات الحكومة ....الحكومة ملهاش واجب الحكومة ليها حصة ..
مش حصة بتاعت الفصل
لأ حصة من المال
تعريف الدولة حديثا .. والله ادينى بفكر ولو لقيت تعريف هبقى اكتبه واوعدك انى اشوف الفيدو بتاع تميم
ولو لقيت تعريف هرجعلك تانى
تحياتى

تايه في وسط البلد يقول...

احذر يا بلوجر..الصبر قد قارب النفاد بالفعل وابن عمك فيس بوك يتلمظ ليلتهمك التهاما..قد أعذر من أنذر!!

كل التحية يا استاذتي وارجو الا يضيع هذا التعليق ايضا

موناليزا يقول...

عمل معاكى ايه بلوجر؟

حفيدة عرابى يقول...

استاذ مدحت
ربنا يتقبل منك صالح الاعمال
ولا تنسانا فى الدعاء
أما أليس فلا تقلق :)

--------------

أم الخلود أهلا بحضرتك

----------------

الدكتورة العسولة
شرفتينى
بس بعد اذنك مش تجيبى لى سيرته
لانى ممكن أعيط منه:)
خلينى صابرة شوية
حلوة حكاية تكرار التعليق دى:)
-------------

أليس
عرفت المقر الجديد؟:)

-----------------
باشمهندس وليد
الهى ربنا يكرمك
ايوه كده أنا ورايا رالة فى البلوجر ده
هو فاكر ايه؟
مستنية رجوعك بتعريف الدولة وواجباتها


--------------------------
تايه فى وسط البلد
مبدئيا عايزة اتفق مع حضرتك اتفاق
كل مرة هتقولى فيها يااستاذتى
هتلاقينى أقولك حضرتك فعلا استاذى
لأن الاستاذية مش بالسن ومش بمين وصل الدنيا قبل التانى بسنوات

اتفقنا يااستاذى ؟:)
تحياتى لحضرتك
---------------------
موناليزا
أهلا بك
بلوجر؟
عمايله مايعلم بيها الا ربنا
ربنا يسامحه :)
شرفتينى فى اول زيارة

ولد تحت الصفر يقول...

لم يمنعني منع التعليقات في آخر إصدارات المدونة من كتابة تعليقي هنا

" أطالب بفتح التعليقات في البوست الجديد ... لأول مرة آخد بالي إن رابط حضرتك
boha elsabah
بوحة الصباح ... صبح صبح يا عم الحاج

حضرتك عاملة ايه ؟

بالنسبة للتدريب ... دي حاجة مش جديدة عليكم مش كده ؟ ... و بعدين يطلعوا عنيكم و لا يطلعوا عين الغريب ؟

حفيدة عرابى يقول...

ولد تحت الصفر
ازيك يااستاذ محمد
أولا
كويس انك جبت سيرة بوحة الصباح
لانى محرجة منكم جدا وكنت عايزة اقولكم السبب
حضرتك انا مكانش لى اى علاقة بالنت ولا المدونات والكمبيوتر كبيرى افتحه واقفله
وقررت اعمل مدونة بعد مدة قصيرة قوى من تعرفى على المدونات
أخويا الله يسامحه أقترح على بوحة الصباح لانه اسم مبتكر ومش هلاقى حد ياخده
وانا مكنتش فاهمة ان الاسم ده هيبقى عنوان الurl وانى هفضل اكتب فيه لما تطلع عنيا وهيكون فى تناقض كبير بين لقد خلقنا الله احرارا وبوحة
ادى الحكاية

التعليقات
ادع لى ربنا يهدى بلوجر لان التهديد مش جايب نتيجة معاه
وانتم كمان حرام تستحملوا كل الكلام الخنيق ده والطويل والغير مرتب
وكمان تعلقوا
لا حرام بجد
ده انت محتاج جائزة على مجهودك

شكرا على المساندة المعنوية

غير معرف يقول...

لا أجد ما أناديكى به سوى الابنه المحترمة ( حفيدة عرابى باشا ) .. قد تستغربين لو قلت لك اننى كنت قد قررت أن امتنع تماما عن دخول اى مدونه او تعليق فيها وبصراحه لانى بقيت ما بعرفش اخبار اولادى اصحاب المدونات والذين لهم عندى احترام كبير جداااا لكن واضح ان الدنيا سحبتنى او سحبتهم بعيدااا عنى ...... لكن عند مالقيتك بتكتبى عن التدريب وجدت نفسى لا اراديا اكتب فهو مجالى من 30 سنه تصورى بقى 30 سنه اعداد خطط وتنفيذ برامج ومتابعتها وتقييم متدربين ياااااااااه عمر كامل يا بنتى ولا تعلمى كم كان حزنى على المستوى الذى تردى له التدريب فى بعض الاماكن اعانكم الله .
فى النهايه اقول لك هذا آخر تعليق اكتبه فى مدونه وآخر مره ادخل فيها الى مدونه كنت اود أن يظهر فى نفس البوست الخاص بالتدريب لكن بقى معرفتش ازاى يتكتب هناك كل ما ارجوه أن يوفقكم الله جميع المدونين الذين عرفتهم ويعلم الله وحده كم احترمهم اثنين وانتى ثالثتهم ربنا يوفقكم جميعا ان شاء الله الى ما يحب ويرضى .

حفيدة عرابى يقول...

استاذ مدحت
حضرتك لا تتخيل انا ممكن أزعل ازاى لو امتنعت عن دخول المدونات
ده انا كنت ناوية اقول لحضرتك تعمل مدونة ونستفيد من خبرة حضرتك
وقلت لنفسى لما يرجع ان شاء بالسلامة من العمرة
المدونة دى حبيبتى:)
بحس انها بيتى وانا براحتى فيه
كنت بعيدة عنها لان السيد بلوجر من شهور مضايقنى جدا
اما الكلام ورا بعضه زى التدوينة الاخيرة
او الخطوط تطلع حاجة تانية غير اللى انا شايفاها قدامى
أو يبتلع التعليقات ومش ينشرها
ده كان السبب الرئيسى للبعد

علشان خاطر حضرتك افتح حالا التعليقات فى البوست الجديد
وحضرتك تدينى نبذة سريعة عن التدريب اللى بيزهقونا فيه:)

ياريت حضرتك ماتحرمناش من سؤالك ومن طلتك علينا

وبعد ماتعمل مدونة ان شاء الله
نعمل لحضرتك حساب على الفيس بوك ونطمأن أسرع

تحياتى لحضرتك

ولد تحت الصفر يقول...

أنا مش قصدي و الله يا أستاذة .. و هل ده شئ يخليكي محرجة ؟ .. و بعدين تغيير العنوان أسهل شئ في الوجود

يعني مش لازم انتقال كامل و لا حاجة

عارفة إزاي و لا القرار له دعوة بالتعليقات و التنسيق و و و ؟

آسف ع التعليق اللي فات