زهقاااااااااااااانه

لا أنا مش نايمة
أنا زهقانه وطهقانه ومضايقه
بس مش زى ريكو
انا زهقانه من الشغل والناس
مطحونه ايام الامتحانات
ونفسى فى اجازة ارتاح واخلص مشاويرى واشوف اللى ورايا فى البيت مش عارفه
لا وكمان تلاقى كل واحد والتانى مش بيرحمك
انت بتشتغل
طيب
خد على دماغك واشتغل كمان
لكن فلان
لا ده رايق
ده ممكن مايعرفش يشتغل والدنيا تبوظ
يقعد من غير شغل احسن
واللى مزهقنى اكتر
انى مضايقة من نفسى مش عارفه الاقى طريقة بعد العمر ده اتعامل بيها مع الناس
ارتاح ويريحونى
لو اخدت كل حاجة على اعصابى زى عادتى
الكل يزعل حتى ولو كان بيدلع فى الشغل
لو جيت على نفسى وتماسكت وحاولت اكون هاديه واطنش وافوت واستحمل
الناس زى ما يكون بيصعب عليها يعدى يوم واتنين عليا فى المرحلة الجديدة يقوموا يجيبوا اخرى
واقعد مع نفسى تانى واقنعها زى المدمنين انى هاتغير
لكن
مش عارفة اتغير يابشر
انا باخد كل حاجة على اعصابى ودمى بيتحرق بسرعة
وده طبعا بيشل تفكيرى وبيخلينى اتعصب
طبعا انا مش بغلط فى الناس
بس العصبية بتديهم مبرر للزعل واكون انا فى النهاية الغلطانة
طيب اسكت مكلمش حد ؟
مش عارفة
بيصعب عليا نفسى وبحس انى هيجيلى اكتئاب
وبعدين ده امتع حاجة فى الشغل هى كلامنا مع بعض
لو رحت الشغل ومكلمتش مع الناس دى متبقاش عيشه
جربت من كتر خنقتى
انى اقلل كلامى شويه ومبقاش عبيطة واتكلم كتير لكن طبعا الطبع غلب التطبع وبرجع لعادتى تانى
كنت كتبت فى بوست قبل كده عن الاشراف العام فى المدرسة وخدت قرار ان السنة الجاية ان شاء الله اذا عشت هكون اشراف دور وبس
وده طبعا بعد مااعترفت لنفسى انى فشلت فيه
ياترى اسيب الكنترول كمان
ما هو ده سبب تعب اعصابى دلوقت
خنقة بجد كل واحد عايز مصلحته وبس والباقى يولع
كنت مهديه اعصابى على الاخر
وصدقت الابتسامة المرسومة على وشى
لغاية ما حصل اكتر من موقف النهارده خلانى جبت القديم والجديد
المهم
نختصر الكلام
انا بسأل دلوقت
افتح الشبك ولا اقفله
الشباك اللى هو قلبى
افتحه للناس واتعامل معاهم بقلب صافى
واستحمل المقالب والرخامة
ولا اصدر الوش الجبس
ولا اخد بعضى واطلع على احمد عكاشة
بس هو الكشف بتاعه 250 جنيه
ده انا ممكن يجيلى استبحس من تمن الكشف بس
الا من ناصح ؟

27 التعليقات:



مهندس مصري يقول...

يا ستي ما هو المفروض إنتي من كتر التعامل تكوني عرفتي زمايلك و صنفتيهم
مين الكويس اللي يتفتح له القلب
و مين الرخم اللي عايز الوش الجبس
و مين المؤذي اللي مش عايز تعامل معاه خالص

مش كله زي بعضه
و لكل مقام مقال
و لا إيه ؟

تامر علي يقول...

والله من واقع خبرتي معظم الناس تقفلي الشباك :)))

لاوم يكون عند حضرتك تصنيف وقدرة على الحكم على الناس .... يعني في بداية العلاقة لازم يكون في تحفظ مع الوقت الناس بييضح معادنها ويبان اللي ممكن نفتحله الشباك من اللي نرميه من البلكونه ..لكن عادة في ناس اسلوبها بيعجبني جداً وهم "حبايب الكل " يعني مالهمش أعداء أبداً ولا حتى أصدقاء مقربين لأن كل الناس أصدقاء في حدود معينة ...هي صعبة لكن عاوزة بس شوية "كونترول" وتيجي :)

وبعدين بلاش أحمد عكاشة علشان غالي قوي وبرضه مفيهوش فايدة ... خليكي مع ربنا أحسن :)

تحياتي :)

Appy يقول...

انا اخدت اجازة يومين هديت وارتحت وبعدت عن النت تماما واى اخبار واى مكالمات

لقد خلقنا الله احرارا يقول...

مهندس مصرى
شرفتنى يافندم
لكن هو مش بتبقى فى ناس بتتخم فيها برده ولا ايه
مفيش ناس فتحت لها قلبك ولقيتها ما تستاهلش
ولا انا بس اللى حصل معايا الموقف ده

لقد خلقنا الله احرارا يقول...

استاذ تامر
شرفتنى يافندم
ورأيك مقنع جدا
فعلا المفروض فى البداية يكون فى تحفظ
لغاية مايعدى وقت وتحصل مواقف تخلى الواحد يقدر يصنف نوعا ما
وشكرا على النصيحة بتاعة اخلينى مع ربنا
لانى بعد ماكتبت البوست ده حسيت انى غلطانه وانى لما اكون مخنوقة مفيش غير ربنا سبحانه وتعالى يفك كربى ويرشدنى للصح
شكرا ليك يافندم

لقد خلقنا الله احرارا يقول...

ابى العسولة
حمدالله على سلامتك ياقمر
شرفتنى ونورتينى
كلامك صح ياابى
انا فعلا كنت مضغوطة جدا السنه دى ومحتاجة اجازة بجد وهى هانت فعلا
واكيد لما ارجع من الاجازة ان شاء الله هيكونوا وحشونى جدا ومش هكون مخنوقة وزعلانة منهم زى دلوقت

osama44 يقول...

حاجه تخنق حاجه تغيظ
مش كل صوابعك زى بعضها
لعلاج هذه المشكله حاجه من اتنيين
( البرود ) او ( الغتاته) فكلا الحالتين نجاحتين عن تجربه

well يقول...

بصى يا استاذتنا ..اعملى اللى المفروض يتعمل ..واللى يزعل منك قوليله انا كدة ..عاوز تتعرف عليا كدة اهلا وسهلا مش عاوز براحتك
اعملى الصح واللى يزعل يزعل
خليكى على طبيعتك
وعلى فكرة صعب انك ترضى كل الناس
وبخصوص التعامل مع الناس انا ليا نصيحة ليكى اقرئى كتاب كيف تكسب الاصدقاء وتؤثر فى الناس ..على فكرة ده من الكتب اللى بحبها اعملى عليه بحث فى جوجل
تانى نصيحة ..اسمعى برامج ابراهيم الفقى ..الراجل ده انا بحبه قوى ..اعملى عليه بحث على http://www.youtube.com/
وتقبلى تحياتى

د. ياسر عمر عبد الفتاح يقول...

هوه علي حسب الناس
والله التعامل مع الناس ده مشكلة كبيرة
لو لقيتي حد يقلك الحل تبقي قوليل عليه

لقد خلقنا الله احرارا يقول...

اسامة ---شرفتنى يافندم
حلوة برده فكرة البرود والغتاته
بس اللى يقدر على نفسه
هو الحل الوحيد -الله المستعان

لقد خلقنا الله احرارا يقول...

شكرا ياويل على النصيحة وانا فعلا مستنية اخلص امتحانات بس واعمل بحث عن الكتب دى
شكرا ياويل
انا فعلا كنت محتاجة حد يقولى خليك على طبيعتك

لقد خلقنا الله احرارا يقول...

استاذ ياسر
اهلا بيك يافندم
اخبار الامتحانات ايه ؟
ربنا يوفقك

محمد صلاح يقول...

بصي با ابله هو التعامل مع الناس زي ماقال - مش فاكر كدة - المهم واحد حكيم (( تعملي مع الناس شعره ان شدوها ارخيتها )) وبالمبدا دا اباداي تعالمك مع الناس
ويارب يحببلك كل اللي بتحبيهم وغفرلك ويوفقك

العجوز والبحر يقول...

الاصدقاء وتغيير المكان والاندماج ولو
لفتره قصيره هم روشتة العلاج..
وعندها لن نحتاج عكاشة او عادل صادق..

لقد خلقنا الله احرارا يقول...

محمد صلاح
فينك ياراجل من زمان
نورت المدونة
انا كنت قلقت عليك بجد
شكرا على النصيحة
بس ده معاوية بن ابى سفيان يامحمد
اكون انا ايه في مرونته ودبلوماسيته

لقد خلقنا الله احرارا يقول...

العجوز والبحر
اهلا بيك يافندم
انا فعلا اخدت اجازة وبدايتها النهارده
وحسيت ان اعصابى هديت كتير لمجرد احساسى انى هخلص من كم الضغوط اللى عليا
وحسيت انى كنت مكبرة الموضوع شوية وانى بعد الاجازة ان شاء الله هرجع المدرسة وصحابى هيكونوا وحشونى وهكون نسيت كل حاجة ضايقتنى
بس ده ميمنعش انى قررت اخد دروس تواصل جيد
شكرا على الزيارة والنصيحة

العجوز والبحر يقول...

سيدتى العزيزه
فاتنى شكرك على نزول اسم مدونتى على
الريدر عندك .وتمنياتى باجازه سعيده..

لقد خلقنا الله احرارا يقول...

العجوز والبحر
لاشكر على واجب يافندم

مصعب صلاح يقول...

السلام عليكم
انتم زهقانين عشان الشغل
طب دا حتى الشغل نعمة بس للرجالة
واخدة بالك للرجالة

تقبلي موروري

現在建築式™ يقول...

My Blog
http://www.wretch.cc/blog/markacey
Nice to meet you
Hsinchu, Taiwan

現在建築式™ يقول...

My Blog
http://www.wretch.cc/blog/markacey
Nice to meet you
Hsinchu, Taiwan

لقد خلقنا الله احرارا يقول...

مصعب صلاح
نورت المدونة يافندم وشكرا على الزيارة
بس معلش وضح لى --تقصد ايه بأن الشغل نعمة للرجالة
لانى دورتها فى دماغى وادت معايا معانى كتير مش عارفة انت تقصد اى منها
تقبل تحياتى واتمنى زيارتك ماتكونش الاخيرة

لقد خلقنا الله احرارا يقول...

يا اهلا بتايوان والتايوانيين
اكتب ياتاريخ --سجل يازمان
اتحاد مدونى افريقيا وجنوب شرق اسيا
انا سعيدة جدا بزيارتك ومش قادرة اقولك غير الكلمة الانجليزى اللى انا فاكراها من اعدادى welcome

مصعب صلاح يقول...

السلام عليكم

الشغل للرجاااااااالة فقط
ليه عشان بهدلة ووجع قلب وطلعان عيونهم

أما الانسات والسيدات فياريت يريحوا نفسهم من الشغل

ودا لمصلحتهم والله

دي وجهة نظري

طبعا متخلفة ومش متحضرة خالص

بس عادي أنا منوفي يعني من نبت الارض الخضرا

تقبلي مروري

لقد خلقنا الله احرارا يقول...

مصعب صلاح
لا يافندم وجهة مظر محترمة جدا وهى الاساس والصح بس هو تعود واختلاف شخصيات يعنى انا مثلا رغم شكوتى المريرة من متاعب الشغل لكن مقدرش اقعد فى البيت
اهلا بيك دايما

غير معرف يقول...

والله بجد انا زعلانة منك بقى تبقى مخنوقة وزعلانة وماتكلميش معايا اينعم كنت اخنقك اكتر بس خنقة الحبيب زى..... ولا ايه؟؟؟؟وبعدين انا بتحضر ف الاجازة عشان نسافر سواتيكا ف البلد نقضى اسبوع لذيذ تدوقى فيه الغتاتة اللى على اصولها وبعدين المفاجاة الكبرى ان ابو الرخامة هيكون معانا يعنى انتى هتتظبتى على الاخر بس المهم دلوقتى وبالامر ان كل اللى على المدونة بتوعك وانتى اولهم تدعولى يحسن انا عايشة ف الفيزياء اخر حاجة

غير معرف يقول...

اقولك حاجة يا ابلة رشا احسن حاجة تسكى الناس بانك تجيبى ليهم بتزا من المحل وخلاص وهم ولا هايعصبوك ولا هاينرفزوك هههه حبيبك ابو الرخامة