الدجال

طول مدة الخطاب وأنا ِبقول فينك يابونابرت

يا من بدعت الضحك على الشعوب بأسم الدين فى تاريخنا الحديث أى عيل فى اعدادى هيسمع كلامك

هيلاقى نفسه بيسمع الكلام اللى حفظه من منشورك فى الاسكندرية

لما قلت

اننى لم أجىء اليكم إلا لاخلص حقكم من أيدى الظالمين

واننى أكثر من المماليك أعبد الله سبحانه وتعالى وأحترم نبيه والقران العظيم

أولا

أنا بقلق من البدايات الناعمة السياسية دى لان دايما بعدها أفعال مخزية

الدجال اتكلم عن العلاقة بين المسلمين وامريكا والغرب عموما وعن التوترات بين الطرفين وإصراره على توضيح الصورة الحسنة للاسلام

وأنا بتخنق من المسلمين اللى بيفرحوا لما الخواجات يتكلموا عن سماحة الاسلام

بندى للناس احساس اننا أقل منهم وان اعترافهم بسماحة ديننا جميل كبير اوى منهم مع ان الاسلام لا محتاج شهادتهم ولا شهادتنا

ثانيا

أفغانستان

هو مش شايف ان سبع سنين قتل فى الناس العزل

كفايه انه يمحو أثر احداث سبتمبر ده على أساس اننا مصدقين حدوتة سبتمبر اللى اخترعها الغير مأسوف على أيامه بوش وطالع للمسلمين بكل بجاحة

يقول أنا مضطر استمر فى القتل

لسه مفيش أمن

لكن العيب مش عليه

العيب على المسلمين اللى ساعدوه وساندوا بلده فى وحشيتها

ثالثا

نيجى للهم الكبير العراق

اللى الدجال اعترف انها حرب مااتفرضتش عليه

بلده هى اللى اختارتها

من غير ما يوضح للطراطير اللى بيصقفوا ورا كل جملة راح ليه ؟

وهل حقق اهدافه هناك ؟

ولا لسه؟

وكمان بيكدب ويقول انه هيسحب قواته من العراق وهيسيب بتاع 90 الف جندى هناك

بس لازم يسيب عراق عنده سياده

أنا سمعت الكلمتين دول حسيت انى قاعده فى كتاب تاريخ

وعماله أقول لنفسى بريطانيا اعترفت ان مصر دولة مستقلة ذات سيادة سنة 1922

ومرة كمان فى سنة 1936 ومرات كتير تانية

لكن الجيش ماخرجش فعلا

الا لما الظروف اتغيرت واضطر لكده

وكمان المفترى هيدرب القوات العراقية

طيب والنبى استقلال ايه ده ؟

رابعا

جوانتامو

هيتقفل لان الدجال الحساس مش هيسمح باستمرار التعذيب والافعال القذرة دى تانى

لكن ده مايمنعش انه يسند المهمة دى

لحكومات قذرة هى كمان تقوم بالمهام دى بالنيابه عن بلده

خامسا

التنمية

بيتعمد يستفز مشاعر الناس

لما يتكلم عن المليارات اللى بتضخها بلاده السخية

علشان تنمى افغانستان وباكستان

يعنى يا ظالم تقتل الناس وتقول ده أنا بحاول أنمى بلادهم

فعلا اذا لم تستحى فافعل وقل ما تشاء

سادسا

الغالية

مفيش راجل رشيد كان يقوم يديله بالجزمه

لما اتكلم عن العلاقة الوطيدة بين شعبه وبين اسرائيل

وعن حتمية ان أرض فلسطين وطن قومى للاوباش

وعن المحرقة واللى بيشكك فيها

ياحرام مات منهم 6 مليون اللى هما تعداد اسرائيل دلوقت

وعانوا من الا ضطهاد طول عمرهم

طيب احنا مالنا بيرموا بلاهم علينا ليه؟

ما يسكنوا فى المانيا ولا يغوروا فى داهية ايه ذنبنا ؟

هو بعد السنين دى كلها لسه هنتكلم فى بديهيات زى دى

وبتقول لنا احنا الكلام ده ليه ؟

أدب لينا يعنى....!

ولا البعيد بيحرق دمنا فى بيتنا ؟

فلسطين وأهلها عانوا علشان عابزين وطن

لا ياباشا

الوطن موجود

وانتم ساعدتم على اغتصابه

اتكلم عن الاهانة التى لحقت بالفلسطينيين اللاجئين

على رأى نوارة نجم من غير ما يتكلم عن حق العودة

وأجمل مافى الخطاب

لما دعا حماس تتخلى عن العنف

طيب أعمل ايه فى نفسى أنا دلوقت ؟

مين يرد على الفاجر ده يقوله

ان المقاومه المسلحة حق مشروع ومش عنف

وان شرف حماس فى مقاومتها

وانها يوم ماتتخلى عن السلاح وتعترف بالاوباش

هيكون ده نهايتها

سابعا

بيكلمنا عن السود فى أمريكا اللى ما وصلوش لهدفهم بالعنف

أنا مش هعلق على الجزئية دى

لانى حاسة انى هغلط فيه وفى السود وفى اليوم الاسود اللى شفناه فيه

ثامنا

ايران الكخة المسلمة اللى عندها سلاح نووى

هى عبيطة ولا ايه ؟ا

لنووى ده لينا احنا وحبايبنا بس

واى كلب هيفكر يمد ايده ويسلح نفسه بيه هنحط السيخ المحمى فى صرصور ودنه

العيب مش عليه

العيب على الحكومات اللى بتحرضنا على ايران ليل نهار

لسبب واحد بس

ان ايران مش على مزاج امريكا

لكن يوم ماتغنى ايران

بالسلام احنا بدينا بالسلام

هنعرف غلاوتها اد ايه فى قلوبنا

تاسعا

الديموقراطية

أنا فهمى على ادى وكل اللى وصلنى من كلامه عنها

ان امريكا باعتنا

على افتراض انها كانت اشترتنا قبل كده

بس فهمت ان من هنا ورايح مش هنعمل الحركات

بتاعة بنضغط على الحكومات الديكتاتورية

لا زمن اللللللللللللللللللللللل خلص خلاص

وأجمل حاجة فى الدنيا الحكومات المستقرة

مستقرة ازاى مش مشكلة

احنا مش فاضيين لكم ياغجر

صرفوا اموركم معاهم براحتكم

وابقوا قابلونى لو نجحتم

عاشرا

بيتكلم عن الحجاب ليه؟

هو ماله ؟

هو الحجاب ده مش دين؟

بيتكلم فى حاجة مالوش فيها ليه؟

طلعنا بايه من الخطاب ده ؟

ولا حاجة

أمريكا هى أمريكا والعرب هما العرب

لا أنا طلعت بحاجة تصوروا

ماكنتش أصدق انى أترحم على أيام بوش

لكن أوباما ده بيفكرنى بالمعتمد البريطانى جورست

اللى كانوا بيقولوا عليه يد من حديد فى قفاز من حرير

لكن قفاز أوباما واضح اوى معرفش يسبكها علينا

مستر اوباما

اسمح لى

أنت جنس ملة أهلك ايه؟

اه امريكانى

مش تقول كده ياراجل

يعنى اللى د بحتوا الهنود الحمر علشان تاخدوا أرضهم

طب ماتقول ياأخينا

عموما

حصل خير

nice to meet you

36 التعليقات:



مهندس مصري يقول...

الله ينور عليكي
قلتي اللي أنا كنت عايز أقوله بالضبط بس أنا مكنتش عارف أرص الكلام كده
و كنت عايز أشتمه و مسكت نفسي

الله ينور عليكي

لقد خلقنا الله احرارا يقول...

أنا كمان ياباشمهندس شتمت براحتى بينى وبين نفسى ودخلت عندك النهارده لقيتك حاطط لنكات لنوارة وجو وكنت هعمل كده بالضبط
لكن حاولت اقلد نوارة لما بتمسك الكلام وتعلق عليه
شكرا على اطرائك وزيارتك

العجوز والبحر يقول...

سيدتى
انه لأصدق وصف لهذا الدعى "الدجال" و
خطابه الذى القاه بالجامعه أمس لم يأتى
غيه بجديد غير مغازلة المسلمين بآيتين ومبادىء عامه،وأكد العلاقه الخاصه بين الولايات المتحده وأسرائيل وودد الاكاذيب الاسرائيليه بشأن المحرقه وان من يشكك فى رقم السته مليون يهودى هو جاهل او متعصب.
ولااعلم من اين اتوا بهذه الارقام فاليهود بأوربا قبيل الحرب العالميه الثانيه لم يزيد عن الثلاثة مليون منهم اقل من نصف مليون فى المانيا
ومائه وخمسين بالنمساومائتين وخمسين الف
فى بولنداوباقى انحاء اوروبا اقل من نصف مليون ووردت تصريحات لبن جوريون
فى عام 1949 بأن ضحايا الحرب فى اوربا
حوالى 2 مليون يهودى.
كما لم يتحدث الجال عن الانظمه الاستبداديه بالمنطقه.وطالب العرب
بالتعاون ضد التطرف فى افغانستان.
رغم ان الامريكان هم الذين زرعوه فى
نهاية السبعينات من القرن الماضى .وهاجم ايران لمحاولتها امتلاك السلاح النووى ولم يتحدث عن النووى اليهودى .
ومما سبق يتضح ان الرهان على الرئيس الامريكى خاسر.
والرهان يجب ان ان يكون على وحدة واتحاد العرب وبناء قوتهم.
وقد قال زعيم سابق ان ما اخذ بالقوه
لايسترد بغير القوه..

osama44 يقول...

السلام عليكم
الله ينور عليكى انت قلتى اللى كنت عايز اقول

بصى العيب مش فى الناس ديه العيب فينا احنا عندنا كل حاكم عربى كل همه ازاى ينهب ويسرق من عزبة ابوه اللى سابه اهم حاجه بالنسبلو ازاى يورث ابنو الحكم وعلشانه يحصل ده لازم يطاطو شويه
اماالناس دول عندهم استرتيجيه وبرامج ماشين عليها وده اللى بيميزهم عننا اشكرك بوست الكثر من رائع

تامر علي يقول...

أنا باستغرب على الناس اللي مبسوطة ومتفائلة ومستبشرة من خطاب اوباما حقيقي ...هل هما غير واعيين للبديهيات اللي حضرتك ذكرتيها ؟؟؟؟ أم أنهم مغيبين ؟؟؟؟ أم أنهم (يستهبلون):)))

والله ساعات بحس ان الناس جالها مرض جماعي من كتر مابشوف ردود أفعال عجيبة زي دي

تحياتي على التحليل الرائع
:)

د. ياسر عمر عبد الفتاح يقول...

حضرتك مفقوعة منه أوي
المشكلة فعلاً إننا مش بنقري التاريخ صح .. ده لو قريناه من الأصل

كل الكلام ده حصل قبل كده من بريطانيا وفرنسا وإيطاليا في مصر والجزائر وليبيا .. ويمكن أكثر كمان
زلسه مفهمناش العقلية الإستعمارية لحد دلوقت

اصلاً أنا بدأت فعلاً أوقن إننا مبنفهمش
حتة راجل أسمراني لا راح ولا جه .. يجي يثبت أمة بحالها في ساعة إلا ربع ويمشي
يا جدعان الراجل ده ثبتنا تثبيتة عبيطة أوي ...!!

khaled يقول...

السلام عليكم
فعلا كلام وقعى ولن يحدث تغير فى السياسة الخارجية الامريكية
وارق الامنيات

GiGi worled يقول...

اله عليكي
تحليل سليم
اجمل حاجه انى حسيت ان معظم المدونين دول رائعين وفهموا اللعبه دي صح
تحياتى

المهاجر يقول...

المشكلة أن من ياكلمن فاسهلا بد ان قراره من راسه والدل العربية عايشه على المعونات يبقى لازم يصفقوا تلك هى المصالح العيا لحكومات العربية وكل العالم يعلم انه قدم ولائه لاسرائيل منذ فترة وأعتقد ان هذا الخطاب كان مخطط له مع اسرائيل قبل الإنتخاب ليحس العرب ان الفرقه باتت بين الأمريكان واليهود وذا غير صحيح

well يقول...

شوفى يا استاذتنا
الموضوع ده كله علشان حرب افغانستان
بيعطى مبرر للحرب
عندك فى مسلمين بيخرجوا من دول اسلامية علشان يساعدوا افغانستان هو مش عاوز ده عاوز يغير تفكيرهم
وهو نفسه ان العرب يسعدوه فى الحرب على الارهاب او افغانستان وايران

لورنس العرب يقول...

الكلام مش بفلوس
اي حد يقدر يتكلم
لكن المهم هايعمل ايه
هو قرأنا كويس جدا
ضحك على الناس بقوله "السلام عليكم" وقوله بعض آيات القرآن الكريم والناس بعدها افتكرته اشهر اسلامه!
لا وكمان ايه
كان فيه ناس كتير بيقولوا لي ده حافظ آيات من القرآن
محدش كان واخد خوانه ان امامه شاشه بيقرأ منها الخطاب وان اللي كتبهوله في امريكا كانت صياغته للخطاب جباره عشان اللي كتبه مش اهبل لكنه قرأ العرب ونفسيتهم وعرف ازاي احنا بنفكر وايه المدخل اللي ممكن ينضحك به علينا بسهوله

Appy يقول...

يا حبيبتى انا شايفه كله واخد الموضوع على اعصابه
انا متوقعتش اكتر بكتير من اللى قاله علشان كده صدمتى فيه عاديه او مش صدمه حسيته حفله جديده بتفرج عليها بس

سبهللة يقول...

ارفع لك القعبة على اللى قلتيه

لقد خلقنا الله احرارا يقول...

اولا أنا اسفة جدا على تأخير الرد على التعليقات لظروف خارجة عن ارادتى

لقد خلقنا الله احرارا يقول...

العجوز والبحر
اهلا بيك يافندم نورت المدونة
انا متفقة مع كلام حضرتك تماما وخصوصا مقولة عبد الناصر اللى أنا مؤمنة بيها تماما

لقد خلقنا الله احرارا يقول...

استاذ اسامة
اهلا بيك يافندم
كلامك صح طبعا وهو ده السبب فى حالنا الخكام اللى بيظبطوا امورهم مع امريكا على حساب مصالحنا الاستراتيجية
زمان ايام النكسة نزار قبانى قال
لم يدخال اليهود من حدودنا وانما تسربوا كالنمل من عيوبنا

لقد خلقنا الله احرارا يقول...

استاذ تامر
اهلا بيك يافندم
لا ماتستغربش الناس الفرحانة كتير جدا
انا النهارده فى المدرسة لقيت عدد كبير جدا بيدافع عنه ومعجب بيخ اوى وبيقولوا مامعناه الراجل عمل اللى عليه
فى ناس تانية كبروا دماغهم منه من البداية ودول احييهم الحقيقة

لقد خلقنا الله احرارا يقول...

دكتور ياسر
اهلا بيك يافندم
كلامك صح جدا الراجل ده ثبتنا تثبيتة جامدة اوى
وفعلا وانا بسمعه كنت حاسه انى قاعدة فى كتاب تاريخ
الامتحانات اخبارها ايه يافندم
ربنا يوفقك

لقد خلقنا الله احرارا يقول...

استاذ خالد
اهلا بيك يافندم
فعلا مش هيحصل تغيير فى السياسة الامريكية لانهم ببساطة بيحققوا مصالحهم بدون اى معوقات مننا
لكن يوم ما يحسوا اننا اتغيرنا ومصالحهم فى خطر ومش هيحصلوا عليها الا بموافقتنا اكيد هيحصل تغيير
شكرا على زيارتك يافندم

لقد خلقنا الله احرارا يقول...

جى جى
اهلا بيك نورتينى
شكرا على الزيارة والاطراء الرقيق

لقد خلقنا الله احرارا يقول...

المهاجر
اهلا بيك يافندم
فعلا كلامك صح
الدكتور فى الكليه كان بيقولنا اسرائيل هى الابنة الشرعية لامريكا
اتخلقت واتحطت فى المكان ده لمصلحة الدول الاستعمارية زى بريطانيا اللى ورثتها امريكا
اكيد يعنى محدش بيسيب ضناه
الهى يولعوا الاتنين
اهلا بيك يافندم وشرفتنى بالزيارة

لقد خلقنا الله احرارا يقول...

ازيك ياويل
عارف موضوع افغانستان ده مضايقنى جدا لاننا الهبل وصل معانا لمرحلة كبيرة اوى
امريكا تقولنا روحوا افغانستان تتعلق منشورات فى الشوارع علشان الشباب يسافر
امريكا تحس ان المهمة انتهت يستنوا الشباب وهما راجعين يقبضوا عليهم
امريكا قررت تحتل افغانستان ريسنا الله يكرمه يقول لهم بلاش ضرب فى رمضان ---بدون تعليق---

لقد خلقنا الله احرارا يقول...

لورنس العرب
اهلا بيك يافندم
هو مش قرانا بس سيادتك هو خبزنا وعجنا
ومش هو بس على مر القرون دايما بيستغل اهمية الدين عندنا استغلال سى من قبل حكامنا
حاجة مش جديدة علينا من اول فرعون اللى استخف قومه فاطاعوه وقال لهم انا ربكم الاعلى

لقد خلقنا الله احرارا يقول...

ابى هانم بتنجانى
عسل والله الروقان ده
عندك حق احنا كلنا خدنا الموضوع على اعصابنا اوى وهو رئيس امريكا هيقول ايه يعنى ؟

لقد خلقنا الله احرارا يقول...

سبهلله
نورتينى بعد طول غياب
شكرا جزيلا على الاطراء الرقيق جدا اللى انا ما استحقهوش

محمود خاطر يقول...

جميل جدا استشهادك بالتاريخ بونابرت وجريت وكمان انتي أول حد ألاقيه يتناول الموضوع بالطريقة دي ومن الزاوية دي
حسيت بعد ما قريت مدونتكان مصر لسة بخير لسة فيها شباب مابيضحكش عليه

شكرا

tamer.sala7 يقول...

علي فكرة موضوع الدجال ده انا معاكي فيه لأن من ضمن صفات الدجال ان جنته نار.... وناره جنة وكمان ح يلف العالم كل بس مش ح يدخل ولا مكة ولا المدينة وده اللي حصل فعلا رح كل الدول ولسة شوية دول مراحهومش وحتي لما راح السعودية مدخلش ولا مكة ولا المدينة

بس بجد هو اشتغلنا كلنا

Tadwina يقول...

مرحباً
لقد قام أحد المعجبين بمدونتك بإضافتها إلى تدوينة دوت كوم، بيت المدونات العربية.

قام فريق المحررين بمراجعة مدونتك و تصنيفها و تحرير بياناتها، حتى يتمكن زوار الموقع و محركات البحث من إيجادها و متابعتها.
يمكنك متابعة مدونتك على الرابط التالى:
http://www.tadwina.com/feed/270

يمكنك متابعة باقى مدونات تدوينة دوت كوم على الرابط التالى:
http://www.tadwina.com

لعمل أى تغييرات فى بيانات مدونتك أو لإقتراح مدونات أخرى لا تتردد فى الإتصال بنا من خلال الموقع.

و لكم جزيل الشكر،

فريق عمل تدوينة دوت كوم.
http://www.tadwina.com

لقد خلقنا الله احرارا يقول...

استاذ محمود خاطر
شرفت المدونة يافندم
شكرا على الاطراء-ارجو ان استحقه

لقد خلقنا الله احرارا يقول...

تامر صلاح

نورتنا يافندم بعد طول غياب
موضوع الدجال ده كان اول حاجة خطرت ببالى وهو بيتكلم وكتبت تعليق سريع بكده عند نواره وانت عارف هى عسل اد ايه فلما عيطت بعد شويه قالت كان فى واحده علقت عندى وقالت دجال
فخلاص الكلمة ارتبطت بيه

البوست بتاعك اكتر من رائع

لقد خلقنا الله احرارا يقول...

تدوينة دوت كوم
اهلا بيكم عندنا
موقعكم رائع جدا وانا فى منتهى السعادة انى لى مكان هناك
شرفتونى ونورتونى

مصعب صلاح يقول...

السلام عليكم

الحقيقة اسلوب أوباما أخطر من اسلوب بوش

مع ان الغاية واحدة

بس الاول سهن كده أما التاني فكون بيتكلم بطريقة واضحة

وف كل الاحوال احنا مش هنستورد النصر

النصر لازم يكون ذاتي

تقبلي مروري

وياريت حضرتك مش تزعلى لو كنت كتبت تعليق قبل كده زعلك

أنا آسف

جريدة الصباح العربي يقول...

شارك معنا باختيار القصيدة او الخاطرة الافضل


عادل فاروق
صورة في برواز
http://sabaharabi.blogspot.com/2009/06/blog-post_3522.html

عبد الله العباسي
ألم بلا أمل
http://sabaharabi.blogspot.com/2009/06/blog-post_9605.html

د/ ايمان مكاوي
ابحث عنك
http://sabaharabi.blogspot.com/2009/06/blog-post_158.html

ايهاب سيد
خائن
http://sabaharabi.blogspot.com/2009/06/blog-post_6557.html

حليس حورية نصيرة
ذكريني
http://sabaharabi.blogspot.com/2009/06/blog-post_5130.html

انتصار طايل
اتوكأ بعصا الحب
http://sabaharabi.blogspot.com/2009/06/blog-post_6044.html

اسلام محمود
بتنساني وبتسبني
http://sabaharabi.blogspot.com/2009/06/blog-post_5269.html

اسراء حامد
لخبطة
http://sabaharabi.blogspot.com/2009/06/blog-post_7682.html

مصطفى محمود
عرفتِ اليوم آياتي
http://sabaharabi.blogspot.com/2009/06/blog-post_9758.html

sky angle
اترك لي هذا المكان
http://sabaharabi.blogspot.com/2009/06/blog-post_13.html

..........................................................................................
ولو عاوز تشارك في مسابقتنا الادبية كل اللى عليك أنك تشترك في الجروب وتتفاعل معنا
جروب جريدة الصباح العربي على الفيس بوك
http://www.facebook.com/groups/edit.php?success=1&customize&gid=78080770039#/group.php?gid=78080770039

تحياتي وتمنياتي للجميع بالتوفيق

لقد خلقنا الله احرارا يقول...

مصعب صلاح
اهلا بيك ياباشا
لا طبعا انا مش زعلانه ولا حاجه لانك اصلا ماقلتش حاجه تزعل
نورت المدونة ياباشا
اسفه على تأخير الرد

لقد خلقنا الله احرارا يقول...

جريدة الصباخ العربى
شرفتونى وجارى التنفيذ

غير معرف يقول...

بسم الله الرحمن الرحيم
السلام عليكم هنا القاهرة
كلامك جميل
ولن تتغير الحكومة المصرية وسياتى الدور عليناوربنا يوفق فى المدونة وخافى على نفسك لحسن يخطفوكى ههههه وسلميلى على خالتى ميرو