الجودة

شرفنا يوم الاحد 26\4 لجنة متابعة من الهيئة القومية لضمان جودة التعليم والاعتماد
وطبعا احنا كنا عارفين ميعاد اللجنة
بس احنا مستنينها من اول التيرم التانىوحقيقى كان عندنا رعب من اللجنة دى من كتر الضغط علينا
لغاية ما فوقنا نفسنا وقلنا ان اللجنة دى مش ربنا
امال هنعمل ايه يوم القيامة لما تتطاير الصحف ونذهب للعرض على الجبار
بجد اتضايقت من نفسى جدا انى كنت خايفة كده
بس من ضمن اسباب خوفى انى فاشلة جدا فى تظبيط التواريخ والغياب والكلام ده
وان لجان المتابعة اللى شفناها قبل كده كانت بايخة جدا
وهدفها بدون تعصب تصيد الاخطاءوممارسة السيطرة البايخة علينا
المهم يوم السبت عيد تحرير سيناء كنا كلنا فى المدرسة
اتغسلت المدرسة من اول وجديد وشكلها حقيقى كان جميل جدا وقبل ميعاد المدرسة بساعة كاملة كنا فى اماكننا
واجمل حاجة اننا خدنا بادجات عليها اسامينا ومسمانا الوظيفى كنت مكسوفة البسها فى الاول لكن عجبتنى جدا بعد كده
ووصلت اللجنة فى ميعادها
وجه وقت الاذاعة
وووووووووووووووووووووووووووووووووالميكرفون مش ممكن يشتغل ابدا
مدرسة التربية الرياضية هرت البنات تمارين لغاية ما المدرسين يصلحوا المايك
لكن مين
راسه وميت بتاعة قديمة ما يشتغلش
حقيقى الطابور كان جميل جدا اول مرة بجد اشوفه حلو كده
والبنات كانت فى منتهى الانتباه للطابور والاذاعة من غير مايك
ودى كانت اول سلبية سجلتها اللجنة اننا معندناش مايك استبن ومعندناش خطة لوحصلت ازمة زى دى
كانوا مفهمينا انهم ليهم خطة وان مرورهم على الفصول هيكون فى اليوم الثالث
لكن طبعا الكلام ده ماحصلش والمرور كان من اول يوم
كل واحد فينا كان خايف اللجنة تشوف غلط عنده ويكون هو السبب فى حرمان المدرسة من الجودة ده غير التجريس من زملائه طبعا
وانا كانت حصصى كتير اول يومين ففوضت امرى لله وقلت ربى استرنى ولا تفضحنى
وعدى اول يوم على خير اخرج من فصل يدخلوه اسيب مبنى ينتشروا فيه
فرحت اوى وقلت لنفسى الاول
تانى يوم استعنا باحد ابناء الحى جاب لنا اجهزة للصوت وده تبع فريق المشاركة المجتمعية من فرق الجوده فى المدرسة
وعدى الطابور على خير
وكان عندى اربع حصص ورا بعض
فى الحصة التانيةلقيت زميلنا حلقة الوصل بين المدرسة واللجنة بيقولى انهم اختاروا اسمى عشوائى من المعلمين اللى هيعملوا مقابلة معاهم
طبعا
نسيت كل الكلام اللى كنت مذاكراه عن الجودة والتعلم النشط والتقويم الشامل والهم ده
وقلت لا اله الا انت سبحانك انى كنت من الظالمين ------ربنا افتح بيننا وبين قومنا بالحق
ورحت على اللجنة
لقيت ناس فى منتهى النشاط والذكاء والظرف
صحيح خرجت من عندهم بعد اكتر من ساعة ونصف مش شايفة تقريبا وعندى صداع فظيع بس كنت سعيدة جدا بيهم
اكتر واحد استجوبنا لانه كان استجواب بجد كان تبان عليه كده سمات التدين وكان عسل بجد وكلامه وروحه مريحة لاعصابنا وده مايمنعش انه عصرنا بس بأدب
كان فى واحد تانى بجد بجد مشفتش حد لئيم زيه فى حياتى يسأل السؤال بكذا طريقة ويوقعنا فى بعض ويدينا معلومات غلط علشان نتراجع عن اقوالنا
هو مااستجوبناش كتير
بس تعبنا جدا ولا لما كان بيسأل البنات ماكانوش بيأخدوا فى ايديه غلوة ويعترفوا علطول لما نكون احنا مستحملناش
لكن احنا الحمد لله ما قلناش غير الموجود فعلا فى مدرستنا
والغير موجود ماكدبناش فيه
لاننا فاهمين ان كل كلمة من كلامنا لازم يكون عليها دليل
ولما بتكون حاجة مش عندنا كنا حتى بنستغرب من كلامهم معانا فيها
لكن اكتر حاجة عجبتنى فى تقييمهم لينا
تركيزهم على علاقتنا كمدرسين مع بعض ومع الادارة وادلتنا على علاقتنا الحسنة دى
واسئلتهم الذكية
بس الاجمل اننا كنا بنحقد عليهم من مرتباتهم اللى غيرنا خالص لكن هما وصلونا لمرحلة اننا حاسين هما بيتعبوا اد ايه
طبعا مدرستنا فيها حاجات كتير غلط
بس احنا فهمناهم اننا كنا تحت الصفرو اننا طورنا من نفسنا ودى اهم اهداف الجودة
وان اللى هما شايفينه دلوقت بكل سلبياته حاجة جميلة جدا واننا نفسنا اتفتحت للتطوير
طبعا هما كانوا معانا 4ايام وحاولنا نفهم منهم نجحنا ولا ايه؟
كانت اجمل كلمة قالوها انهم قضاة بيسجلوا حالنا لكن الحكم مش منهم
طبعا انا لسه ماحكتش كل حاجة عن تجربتنا معاهم
دى هتاخد اكترمن بوست
بس المهم دلوقت دعواتكم لينا
بالنجااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااح

9 التعليقات:



مهندس مصري يقول...

ربنا يكرمكم و يسترها معاكم
و ييسر لكم ما فيه الخير

لقد خلقنا الله احرارا يقول...

مهندس مصرى

الله يكرمك يا باشمهندس والف مبروك مرة تانية



استاذ تامرعلى

انا اسفة جدا على مسح التعليق بس هو خطأفنى منى اضطرنى لكده
كلام حضرتك صح
الاهتمام بالقشور فقط وبالمظاهر
حتى الكلمة اللى بنقولها دايما ان المتابعات كترت اوى علينا لكن ولا واحد فيهم زى زمان بيسأل على المنهج ومستوى الطالبات
احنا مطلوب مننا نكون موظفين نجهز الحاجات اللى هما عايزينها مننا ونرتب ورق وبس
لكن اللى لفت نظرى المرة دى ان اللجنة دى اعلى مستوى من المتابعة ومع ذلك ناس ذوق جدا فى التعامل
بصراحة محصلتش معانا قبل كده
شكرا لمرورك
وأسفة مرة تانية على مسح التعليق

well يقول...

اتمنى ان التعليم يكون على جودة عالية
..اما بالنسبة لحكاية المايك فده درس
علشان يكون فيه حاجة اسمها الخطة ب
وعلى فكرة انا واثق ان التجربة دى بتاعت المقابلة هتأثر فيكى وهتستفادى منها كتير
هما كانو معاكوا 4 ايام ..تخيلى كدة لو بقوا معاكوا 4 ايام كل شهر ..مصر هتبقى عاملة ازاى
مهندس مصرى قال ربنا يكرمكم ويسترها معاكم وييسر لكم ما فيه الخير ...وانا بقول امين
وربنا يوفقك ويوفق الطلاب والمدرسة كلها

د. ياسر عمر عبد الفتاح يقول...

الحمد لله إن ربنا وفقكم
بس ياربي يكون التطوير ده حقيقي فعلاً
مش بس علشان اللجنة

لقد خلقنا الله احرارا يقول...

well
الله يكرمك ويحقق امانيك وامانينا
احنا محتاجين متابعين
بس محتاجين نصحى ضميرنا اكتر
تخيل لو ضميرنا معانا دايما كانت الدنيا كلها تبقى عاملة ازاى
عارف كلامك عن اللجنة وتأثيرهم فينا مظبوط جدا
أنا واحشنى الانضباط الجميل والطابور اللى يجنن حتى من غير ميكرفون
وحشنى كمان البادج
بس ماوحشنيش القلق والتوتر وشغلنا الاساسى اللى اتعطل فى وجودهم
شكرا لمرورك

لقد خلقنا الله احرارا يقول...

د/ياسر
هو كلامك خير ان شاء الله لان النتيجة لسه ماظهرتش
وانا ماحكتش كل اللى
حصل ايام اللجنة
بس فعلا فى حاجات كتير اتغيرت فينا وناويين لان تقريبا السنةخلصت والامتحانات على الابواب يكون فى تغييرات كتير السنة الجاية ان شاء الله
نورتنا يافندم

e.ayman13 يقول...

بجد بجد انا حسيت اني معاك في المدرسه .......يااااااااااه نسيت الكلام ده
لااعتقد اني ممكن ارجع للتوتر ده بعد العمر ده ربنا معاك ويعينك ويعدي اليومين دول على خير وبعدين ماتخافيش ايه اللي هيحصل يعني هيرجعوك مدرسه ولا هيعملو فيك ايه سيبيها على الله وربنا معاك ياجميل

لقد خلقنا الله احرارا يقول...

ايمان حبيبتى وحشتينى والله
ارجعى انت بس بالسلامة وان شاء الله مايكونش فى توتر
بس بجد انا شفت بهدلة السنة دى ما حصلتش فى حياتى ادعى ربنا يعدى السنة دى على خير

محمد سلام يقول...

الاستاذه الفضله الاجاء الاتصال بناءلقد اعجبتنا مدونتك ونتمنا الاشتراك معنا فى جريدة اخبار الوادى الرجاء مرسلتنا على الاميل
valleynews1@gmail.com