أنا بحب مصر ونصر الله

كان عنوان البوست اللى فات مصر ونصر الله
وصحابى سألونى ازاى بتحطيهم فى عنوان واحد
طيب ايه المشكلة؟
مصر وبحبها
بس بحب تميم البرغوثى
لما قال

سألونى بتحب مصر قلت مش عارف؟
يا قلعة السجن يا قلعة صلاح الدين أنا بقولك وأهلى على الكلام شاهدين
لوكنت حرة ماكناش نبقى محتلين
ولما قال
أصل المحبة بسيطة ومصر تركيبة
ومصر حلوة ومرة وشرحة وكئيبة
داأنا أختصر منصب الشمس وأقول شمعة
ولا اختصر مصر وانده مصر ياحبيبة
أما السيد حسن
فانا بحترمه جدا لاسباب شخصية وموضوعية
لانه بجد رجل فى زمن قليل فيه معنى الرجولة
وأنا الحمد لله مش بعانى من مراهقة متأخرة ولاحاجة
بس هو رمز لتحمل المسئولية
للكلام القليل والفعل الكتير
للمصداقية
يعنى اتعودت منه انى أصدقه
وهو الله يكرمه دايما بيقول الحقيقة طيب بحترمه ليه تانى؟
نقول أمثلة بس
ابنه مات شهيد مين من زعمائنا قدم ابنه للشهادة ؟
وجاله الخبر وهو بيخطب
وازاى تماسك
وقال انه سعيد انه ربنا شرفه بكده
فى مصر
ابن الريس بيتصعد كل يوم والتانى
و بقاله سنين بيقعد حاطط رجل على رجل فى وش دكاترة الجامعة والوزراء
وخلاص نجحوا يخلوه بالالحاح أمر مسلم بيه
لا وكمان عيل قتم ومكشر مش عارفة ليه؟
مع انه مولود ابن عز
وفى سوريا
الاسد بسرعة بعت لبشار يرجع يورث الحكم
مع ان باسل كان لسه ميت
المهم مين يورث العرش
حتى لبنان
العيل البايخ ابن الحريرى
ماشفتش أرخم من دمه حقيقى الا جمال مبارك
يبقى نصر الله تفوق عليهم فى دى كمان نعد سوامع بعض
المصداقية
وقدم إبنه للشهادة
وربنا شرف عيلته بيها
نيجى بقى للشرف الكبير
المقاومة
روسائنا انتخوا من كتر العز والسلطة
وده عايش حياته كلها تنقل وشغل مخابرات وعدم استقرار
هما هيدخلوا مسابقات مع بعض فى حجم الترهل والكروش
وهو بيبقى مش عارف هيبات فين النهارده هو ياجماعة الوحيد اللى صحى هو وأهل بلده الصبح
لقوا اليهود سابوا البلد وهربوا على جحورهم هو اللى خلى حيزبونات اسرائيل تعيط ليل نهار
ويطلبوا من حكوماتهم ينقذوا ولادهم من ايديه
وينسحبوا من لبنان باقصى سرعة
حد ياجماعة شافه وهو بيتكلم
زعيم بجد والله
احنا للاسف عشنا فى زمن مفيهوش زعيم ليه كاريزما ممكن حد يقول لى ده شيعى لانصره الله هقو ل انى مقتنعة تماما من دراستى للتاريخ
ان التشيع فى بدايته كان فكرة سياسية
نتيجة لظروف معينة مر بيها سيدنا على بن ابى طالب وعائلته طيب الشيعة كتيار سياسى أنا معاهم؟ لااااااااااااااااا طبعا لان زى مااستاذى ابراهيم عيسى قال
أنامش ممكن أوافق ابدا مع إحترامى الشديد لسيدنا على ونسله ان هما بس اللى يتولوا خلافة المسلمين طيب والشيعة كمذهب دينى ؟ استحالة أوافق عليه طبعا لانى الحمد لله وباقتناع
على المذهب السنى
ومبحبش مغالاة الشيعة
سواء فى رفضهم لمذاهب أهل السنة
أو مغالاتهم فى البعد والانعزال والتقية والكلام ده
مع انى برده كمدرسة تاريخ أقدر أفهم بسرعة هما ليه بيكرهونا كده؟
ليه بعاد عننا كده؟
للامانة هما اتظلموا كتير جدا فى تاريخهم
واحنا فى البداية لصراعات سياسية قلبت بعد كده لخلافات عقائدية
شاركنا فى الظلم ده سواء بقصد أو بدون قصد
بس للامانة برده هما عندهم ثقافة الاستشهاد عالية قوى فى دمهم
احنا لو عندنا ذرة فهم نتعاون معاهم
ونستفيد من روح المقاومة والشهادة اللى عندهم دى ونتحد ضد اعدائنا الحقيقين ولا أنا بحلم؟ الظاهر فعلا انا بحلم نرجع تانى
لنصر الله
عميل ايران
طيب سؤال
هى ايران دى مجوس لسه بيعبدوا النار؟ ولا أسلموا ؟ بلاش أسلموا دى علشان هتضايق ناس كتير سؤال تانى ايران دى ضايقتنا فى حاجة؟ داست لنا على طرف؟ والا هى غيرة وخلاص انها دولة كبيرة وقوية عايزة يكون ليها دور فى المنطقة
وايه يعنى؟ مش مشكلتها اننا اتنازلنا عن مكانتنا
مااحنا كتير جدا اتنافسنا على الريادة على رأى موافى مع دول كتير
اشمعنى الغل ده مع ايران ؟ أقول ليه ؟ وأنا واثقة ان كل الناس عارفة علشان مامتنا الحلوة امريكا مش بيتحب الكخة ايران عارفين ده بيفكرنى بايه؟ بموقف بيستفزنى جدا لما المصريين كلهم كان روحهم فى عرابى
ولما السلطان العثمانى أصدر فرمان بعصيان عرابى
كلنا تخلينا عنه
وعلى قد ما زعلت من المصريين وقتها
بس على الاقل ده السلطان خليفة النبى صلى الله عليه وسلم
وطاعته واجبة
ده من وجهة نظرهم طبعا
لكن احنا لما نمشى ورا امريكا
يبقى لسبب واحد ان المتنبى ما ظلمناش لما قال يا أمة ضحكت من أجلها الامم
لان لو المحروقة بجاز
أمريكا
ظبطت أمورها مع ايران هنلاقى النظام بتاعنا
هيموت علشان يصالح ايران
وهنعيش أيام العلاقات التاريخية الوطيدة مع الشعب الايرانى
والاميرة اللى اتجوزت الشاه والشاه المدفون فى أرضنا
ومش هنخلص من الهبل ده نصر الله عميل ايران
بتديله فلوس وسلاح علشان يضعف لها اسرائيل والله وربنا يحاسبنى على كلامى
العمالة لايران أشرف من العمالة لاسرائيل اشرف من اننا نمسك ايد ليفينى
وريسنا يقول عليها جامدة
ويقول على اليهود انهم بينفذوا كلامهم
وكان هيتعزم فى مزرعة شارون لولا الاقدار نيجى بقى لاهم نقطة نصر الله كان هيأذينا؟ استحالة البنى ادم النضيف ده ميعرفش الاذى وجهازنا الامنى بجلالة قدره مش هيقدر يثبت عليه انه كان بيدبر لعمليات ارهابية
لان الكلام مش حقيقى
كل اللى هيقدر يثبته انه كان معاه سلاح ودعم هيوصله لغزة
لان ده اللى السيد حسن اعترف بيه طيب ليه ماوصلش الدعم ده من لبنان ؟ لان الجغرافيا فرضت عليه كده لان غزة مالهاش حدود مع أى دولة عربية غير مصر هو انتهك السيادة؟ ماشى غلطان بس بدون تعصب احنا ظلمة واشتركنا فى حصار الفلسطنينين
وقلنا أكتر من مرة اننامش عايزين حماس ولا عايزين إمارة اسلامية على حدونا
على أساس ان كل واحد فينا يعنى ماشى بشوية عجوة يعمل منهم تمثال ويسجدله
استغفر الله كنتم عايزين يستأذن ولا أيه ؟ أنا شايقة انه فعلا غلطان
بس لانه أتكشف ولانه عارف احنا بنكرهه اد ايه؟ ولو ماغلطتش
كده كده لازم نلبسه اى تهمة
وحقيقى أنا مقتنعة جدا اننا مش فى الجنة ومش ملايكة
وبكلام نوارة اننا كده نبقى غلطانين لما استغلينا الاردن زمان فى ايلات
ولما استغلينا كمان افريفبيا فى الحفار السيد حسن
انت رجل فى زمن عز فيه الرجال
ونعلك زى مانوارة قالت على رأسى من فوق
يامصرأنا عارفة انى بحبك بس بحب تميم لما قال
قالولى بتحب مصر فقلت مش عارف
ما يجيش في بالي هرم ما يجيش في بالي نيل
ما يجيش في بالي غيطان خضرا وشمس أصيل
ولا جزوع فلاحين لو يعدلوها تميل
حكم الليالي ياخدهم في الحصاد محاصيل
ويلبّسوهم فراعنة ساعة التمثيل
وساعة الجد فيه سخرة وإسماعيل
ما يجيش في بالي عرابي ونظرته في الخيل
وسعد باشا وفريد وبقيّة التماثيل
ولا ام كلثوم في خِمسانها ولا المنديل
الصبح في التاكسي صوتها مبوظُّه التسجيل
ما يجيش في بالي العبور وسفارة اسرائيل
ولا الحضارة اللي واجعة دماغنا جيل ورا جيل
قالولي بتحب مصر أخدني صمت طويل
وجت في بالي ابتسامة وانتهت بعويل
قالولي بتحب مصر فقلت مش عارف

11 التعليقات:



well يقول...

بوست رائع ...
بس يا ترى احنا مع الشيعة ولا لأ ..انا عاوز اقول كلمتين..
زمان فى عهد رسول الله محمد صلى الله عليه وسلم
المسلمين فرحوا لما الرومان غلبوا الفرس
لان الرومان كانوا اهل كتاب بيعبدوا الله
والفرس كانوا بيعبدوا النار
طب دلوقتى الفرس اللى هى ايران وحسن نصرالله شيعة بس هما مسلمين وبيعبدوا الله
...وحسن نصرالله بيحارب اسرئيل ..نقف مع مين
على فكرة لو مثلا ايطاليا جات تحارب اسرائيل ...انا عن نفسى هقف مع ايطاليا
رغم ان انا مش ايطالى ..ومبفكرش اخد الجنسية الايطالية ..او حتى اتعلم ايطالى
وانا برضوا مش شيعى .. بس بشجع حسن نصرالله لانه بيحارب اسرائيل
نخلص من اسرائيل بعد كدة نبقى نشوف موضوع الشيعة
انا عارف ان كلامى لافف شوية بس ان شاء الله هتفهم

لقد خلقنا الله احرارا يقول...

لا أنت كلامك مش لافف ولا حاجة انت كلامك واعى وبتلخص حاجات كتير اوى لانه بيجاوب على سؤال مهم ليه دلوقت الهجمة الشرسة على الشيعة لاننا جاتلنا أوامر عليا أمريكية مهلبية أننا نتمسك بمذهبنا السنى

لورنس العرب يقول...

السلام عليكم
أحب اقول لك شيء بسيط
هو ان ايران هذه ساعدت امريكا في احتلال العراق
وتعتبر البحرين المحافظه رقم 14 في ايران
وتساعد الامريكان في ضرب افغانستان
وقاطع احمدي نجاد أمير قطر عن قوله الخليج العربي فصحح له المقوله بقوله الخليج الفارسي"
هذا غير احتلالها لجزر الامارات
واليمن ومصر والمغرب تتهمها بنشر الفكر الشيعي حتى يكون الناس تابعين لصاحب العمامه السوداء خامنئي الايراني
كل هذا يثبت انها غير حسنة النيه
فالنكن على ذر عند التحدث عنهم
فهم ليسوا كما يتصور الكثيرين
ولنتذكر ان عدوك هو عدو دينك
ولا يوجد شيء في الدنيا اسمه الشيعي والسني سواء
وهذا لأن السني لا يمكن ان يقبل لقب شيعي والعكس صحيح
وشارون في مذكراته قال حرفيا انه قدم النصيحه بتسليح الشيعه في لبنان حتى يخربها وقد فعل
ونصر الله كان له الفضل الاول في تدمير لبنان وانشاء دوله داخل الدوله
ومعلومه لا يعرفها الكثيرين
ان الجنوب اللبناني -الذي يتصور الناس انه محرر- اليهود يعيشون فيه اجمل ايام عمرهم حتى هذه اللحظه
لا تنخدعوا بالخطب الرنانه والكلام الكبير ارجوكم


لك تحياتي على طرح الموضوع

well يقول...

لورنس العرب كلامك ليه كل الاحترام والتقدير ...

مهندس مصري يقول...

انا بأحب مصر و بأشجع نصر الله

يعني انا عارف إن الشيعة عقيدتهم ضدنا كسنة و عارف إن إيران لا يؤمن جانبها بس إسرائيل هي العدو الواضح الصريح
و طول ما نصر الله ضد إسرائيل ليه ما أحترموش و ما أتعاونش معاه
للأسف الشيعة اصحاب العقيدة المغلوطة مواقف زعاماؤهم و حكامهم السياسية أشرف و أنظف ألف مرة من مواقف حكام السنة و التي تصب كلها في خانة العمالة لأمريكا و المهادنة الذليلة مع إسرائيل

لذا فأنا و لو إختلفت مع حسن نصر الله عقائدياً فأنا أتفق معه سياسياً و أدعو كل من يعيب على إيران و حزب الله بأنهم شيعة رغم مواقفهم المشرفة في مواطن كثيرة

أدعوه لإتخاذ موقف مشرف مثلهم و أن يقوم بالمساعدة في البناء بدلاً من ان يكون معول هدم و بدلاً من أن يتخذ صف أمريكا و إسرائيل

العجوز والبحر يقول...

سيدتى الجميله
كلماتك البسيطه التى بدون فذلكه وبدون تقعير حللت الموقف سياسيا" وتاريخيا". واصدق للقارىء من الف مقال للساده رؤساء التحرير لصحافتنا الحره.
موضوع الشيعه والسنه الذى مر عليه اكثر من الف وربعمائة عام ويزيد وتأججه الحالى بمعرفة الامريكان بعد غزو العراق. موضوع مستحدث ولكن بساطة حديثك وصلت الى لب الموضوع ولمسك لموضوع التوريث لمسا" ذكيا"
سيدتى احييكى الف مره..

soaad fakoory يقول...

موضوع جميل ومكتوب بدق وانا معرفشى عن
السنه والشيعه الا الايام دى!
ولكن باحب حسن نصر الله اوى.
غلشان بيساعد الفلسطينييه.

e.ayman13 يقول...

انا بهديك التحيه والموضوع محتاج تركيز وللاسف انا لسه مركزتش وعايزة اقول ان المدونه شكلها الجديد ده حلو اوي
واستنيني اكيد هقرا وهبعتلك تعليقي لا تقلقي

تامر علي يقول...

نقاط الإتفاق كثيرة في كل الأمور لكل هناك نقطة واحدة أحب أوضحها
- لا مشكلة أبداً في أي علاقات (سياسية) مع الشيعة ولكن في (إطار)

هذا الإطار هو إطار (المصالح المشتركة) وهي كثيرة بيننا.... لكن على جانب (التداخل) في العلاقات فيوجد خلط ولغط كبير جداً في (المفاهيم) الأساسية في العلاقات مع الفرق الإسلامية ومن أكبر (العكاكين) للأسف في هذه المفاهيم ابراهيم عيسى الذي تبدو الأمور في كتاباته مختلطة لحد كبير ... هذا مع إتفاقي الشديد معه في كتاباته السياسية التي لاتحمل طابع ديني ... فقد قرأت له عن العلاقات مع الشيعة ما ينم عن أن معلوماته الدينية تحتاج مراجعات (كثيرة جداً)

أما باقي النقاط فمتفق مع سيادتك فيها تماماً
تحياتي وتقديري :)

لقد خلقنا الله احرارا يقول...

اولا انا اسفة على تأخير الرد على التعليقات لانى كنت مشغولة جدا كان عندنا فى المدرسة لجنة تقييم الجودة ودى هخلى ليها بوست لوحده ان شاء الله




لورنس العرب
شرفتنى يافندم بالزيارة لكن انا مختلفة كتير اوى مع كلام حضرتك عن ايران مش حبا فيها بس رفض انى اصدق الهوجة الاعلامية بتاعتنا ضدها لانى ادعى انى فهمت اهدافها وانها مش لوجه الله
ده لتحقيق مصالح ضيقة جدا ومش ليناومتهيألى انا صدعت حضرتك بالكلام ده فى مدونتك كمان
تحياتى لحضرتك وشكرا على الزيارة واتمنى تتكرر










مهندس مصرى
مصر نورت يافندم بابنائها اللى بيحبوها وبيشرفوها فى كل مكان
ربنا يوفقك ويحقق لك احلامك
دايما بتعجبنى اراء حضرتك والدقة فى اختيار الكلام
هندسة بقى
كان نفسى تعليق حضرتك ده مايكونش رد للزيارة وبس لكن هنعمل ايه







العجوز والبحر
حمدا لله على عودتك للتدوين
نورت المدونة يافندم
وشكرا على الاطراء الرقيق
كده انا ممكن اصدق
تحياتى لحضرتك







سعاد
اهلا بحضرتك نورتينى يافندم
وأنا كمان بحب نصر الله جدا لانه يستاهل التقدير لاسباب كتير جدا من اهمها مساعدته للفلسطينيين حتى لو بينفذ أجندة ايرانية




ايمان حبيبتى
وحشتينى ووحشتنى بنوتاتك وتعليقاتك
انا مستنية رأيك









استاذ تامر
انا سعيدة جدا بتعليق حضرتك هنا
وانامتابعة حضرتك والمدام من فترة لكن الظروف ماسمحتش بالتعليق
لكن فى نقطة نفسى اناقش حضرتك فيها الخاصة بابراهيم عيسى لانها مش واضحة بجد بالنسبة لى
ولك جزيل الشكر

مهندس مصري يقول...

الله يخليكي
مصر منورة بالشرفاء من ابناؤها و بناتها دوماً

مش حكاية رد للزيارة والله
:)
بس انا إكتشفت إن مدونتك كانت إختفت من الجوجل ريدر بتاعي في ظروف غامضة
يمكن إتمسحت بالغلط و لا حاجة
فضفتها عندي تاني و متابع دايماً إن شاء الله

بس أنا حالياً ما بقتش أعلق زي الاول لإني متابع في الريدر حوالي 240 مدونة فبقيت بأقرأ بوستات كتير قوي و بأعلق على بوستات قليلة جداً

:)

بالنسبة لإيران أنا متأكد من أنها تتآمر لتحقيق مصالحها في المنطقة
و تقوم بمد شيعي في الدول العربية
و يبدو واضحاً للغاية في سوريا
و قد تعاونت مع أمريكا لإسقاط النظامين الحاكمين المعاديين لها في افغانستان و العراق - طالبان و صدام - و ذلك بإعتراف نائب الرئيس الإيراني نفسه

و هي من دعم المليشيات الطائفية الشيعية في العراق
و هي من تتدخل في شؤون الإمارات و البحرين
و لها تأثير معنوي على شيعة الخليج العربي كله

لكن كل هذا لا يمنع من التعاون معها ضد إسرائيل و أمريكا طبقاً لمبدأ أنا و أخويا على إبن عمي و أنا و إبن عمي على الغريب
:)
نتعاون معها و نتخذ حذرنا منها في الوقت نفسه

لكن ما يحدث منا الآن هو خيانة فاضحة و تواطؤ علني مع أمريكا و إسرائيل ضد المقاومة و إيران
و هذا ما لا يقبل به أي عاقل مخلص