فى القلب غزة

مكسوفة من نفسى
ومش قادرة أعمل نفسى مش واخدة بالى
الاكتئاب زاد
ذكرى العدوان
والجدار العازل
أحداث
بتوجع لدرجة الخرس
فى أقسى كوابيسى
مكنتش أصدق
اننا يوصل بينا الحال
لدرجة اننا نبنى جدار
فكرة الجدار العازل
كانت مرتبطة معايا
بحاجات وحشة
زى
اسرائيل
وكنت شايفة انها بتناسبهم جدا
لان ده كلام ربنا عنهم فى القران
الجبن سكن قلوبهم
ومش ممكن يحاربوا
من غير جدار
يدارى ضعفهم
بيأجوج ومأجوج
المحبوسين وراه
واحنا بنحبس أنفاسنا
خايفين يخرجوا
واحنا عايشين
لكن نبنى جدار بينا وبين فلسطين !!!
ده فرعون العبيط
عمره ماعملها
استعبطنا
واستخفنا
وصدق نفسه
وأمر هامان يبنى له صرح
واستكبر
وقال أليس لى ملك مصر
أيام ماكانت مصر بجد
ومفكرش لحظة يبنى جدار
طيب ليه فرعون
ماسابش بنى اسرائيل
يروحوا فلسطين وبعدين يبنى جدار
هه ؟
ليه !!؟
للأسف
لان العبيط فرعون
طلع بيفهم
وكان خارج وراهم يقتلهم
ويأمن حكمه
ويحفظ سلطاته
لانه عارف
ان وجود أعداء ليه فى فلسطين
مش من مصلحته أبدا
أنا بتكلم عن بنى اسرائيل مش حماس
المهم
أنا أقصد فى القلب غزة
اللى هى حاجة بتوجع
لما ضميرنا يشتغل علينا
ويفكرنا
اننا هنقف قدام ربنا
مش عارفين نقوله ايه
ذنوبنا
اللى محدش يعرفها غيره
عندنا
أمل ورجاء فى عفوه
وذنوبنا
اللى بينا وبين العباد
فهمونا
واحنا صغيرين
ان العباد
لازم يسامحونا
علشان نستحق وقتها
عفو ورحمة ربنا
تفتكروا أهل غزة هيسامحونا
أنا خيالى عاجز عن انه يتصور حالى
لو بيتى اتهد على دماغى
أو حد من الغاليين على قلبى
راح فى غارة
أو برصاصة
أو بصاروخ
أو انى أعيش من غير مدرسة
ومن غير كهربا
ومن غير أكل
والاهم من غير أمان
وفى وسط ده كله الاقى كل الابواب بتتقفل فى وشى
مش عارفة ممكن أعمل ايه وقتها
بس أكيد لو أنا فلسطينية
مش هبطل أقول حسبى الله فى كل واحد
ممدش ايده لى
وأنا محتاجاها
وهقول
حسبى الله ونعم الوكيل في المصريين
وعلشان أنا مش فلسطينية
هتوجعنى أوى الكلمة دى لما أسمعها
وهزعل أوى
لما الاقى علم بلدى
بيتحرق
وبيداس بالجزم
وهتاخدنى العزة بالاثم
وهقول الصغار نسيوا أفضالى
لكن الحقيقة احنا المفروض نحزن
اننا شفنا بلدنا
فى الوضع المهين ده
مش من فلسطين طبعا

37 التعليقات:



اقصوصه يقول...

تعجر الكلمات عن التعبير :(

محمد عبد الوهاب mhmdwahab يقول...

انا سمعت انهم قصرو التاريخ فقط على الطلعة الجوية صحيح؟
ممكن اضع صورتى فى المدونة دى هو انا اقل من الناس دى؟

بدراوى يقول...

عندك حق فى كلامك
بس انا شايف بلاش نقول بقى
نبرة ان سبب عدم نهضتنا و تقدمنا
و تقدم مصر كبلد
حجم تضحياتنا كشقيقة كبرى
لان الواقع بيقول اننا لا نجحنا فى حل مشاكل العرب و لا تفرغنا لحل مشاكل مصر
و عمالين يرفعوا شعار مصر اولاً
اللى انا موافق عليه
بس بدون ما نكون سبب فى نكبة العرب اكثر

الكلمتين دووول حقولهم لثالث او رابع مرة
نقلاً عن مقال لعزت القمحاوى فى المصرى اليوم

لا يصح أن يعتب الأخوة الصغار على كبيرهم، فيرد عليهم، وأنتم ماذا فعلتم؟! لأن تفرق الأشقاء وعجزهم هو مسؤولية مباشرة للكبير الذى انفرط العقد من يده. لماذا انفرط؟ وكيف تنازلت مصر عن مكانتها كتاج للعلا فى مفرق الشرق، لترتدى طاقية الإخفاء، وتضع رأسها بين الرؤوس، ويقف دورها عند حدود النصح والإرشاد للفصائل الفلسطينية وإسرائيل، من موقع المراقب المحايد!

http://www.almasry-alyoum.com/article2.aspx?ArticleID=193529

مهندس مصري يقول...

حسبنا الله و نعم الوكيل في حاكم خائن و عميل و مرغ البلد في الوحل سواء على مستوى السمعة أو الإقتصاد أو السياسة و فعلاً جاب لنا صفر في كل مجال

م/محمود فوزى يقول...

جزاكم الله خيرا
فعلا امر محزن ومخجل ان نعمل اقصى جهدنا لحمايه الصهاينه
أى امن قومى يتحدثوا عنه
هل الامن القومى هو حصار غزه لانها تحارب الاحتلال الصهيوني الذى احتل سيناء مرتين من قبل ويضع مصر ضمن مشروعه الوهمى من النيل للفرات
انه امن الصهاينه
حسبنا الله ونعم الوكيل
عندما كان الصهاينه يحتلون غزه كان المعبر مفتوحا بشكل طبيعي والصهاينه هم الذين يغلقوه من الجهه الاخرى
والان حكومه هنيه وحماس هناك والصهاينه عاجزون عن احتلال غزه نقوم نحن بالجدار

ولكن فعلا الشعب المصري لا يرضى عن مثل هذا الامر
ويتضامن مع اخوته فى فلسطين
ربنا يرحمنا ويصلح الاحوال
جزاكم الله خيرا
ربنا يوفقك ويكرمك

للاستاذ فهمي هويدي كلام رائع فى هذا الموضوع
الجدار حماية لأمن إسرائيل – فهمي هويدي
http://fahmyhoweidy.blogspot.com/2009/12/blog-post_28.html

ولى موضوع عن حرب غزه
حرب غزة - م/ محمود فوزى
http://egyptandworld.blogspot.com/2009/12/blog-post_26.html

الشجرة الأم يقول...

اللهم أعز الإسلام والمسلمين وأذل وأمحق الشرك والمشركين والمنافقين .. آمين.

لك مني كل الود والتقدير غاليتي وبارك الله فيك ونفع الله بك الأمة الإسلامية العربية وجعلك رمزا من رموز الحق فيها.. آمين

osama44 اسامه 44 يقول...

مش عارف اقول بجد انا مخنوق من ساعة ما عرفت الخبر فى التليفزيون
كنت الاول بقول على افعال حكومتنا بقلة الادب دلوقتى اقدر اقول ده قلة دين
بجد سكت اللسان ونطق الحجر
بس الخوف ان الحجر ده يشهد علينا يوم القيامه على عدم نصرتنا ليه بل بالعكس بنحاول نفتت هذا الحجر بشتى الطرق
نسال الله ان يعفو عنا تقصيرنا نحو اخواننا
اللهم انتقم من الظالمين
ارزقنا الشهاده على عتبات الاقصى

الزنارى يقول...

السلام عليكم و رحمة الله و بركاتة
تحية طيبة و بعد
لقد أخطأت حماس كثيرا
انها تحاول السيطرة على حكم دولة فلسطين مع أن فلسطين ليست دولة مستقلة .
حماس تعمل على التهريب .
الحكومة ترغب فى حماية أمننا القومى لا أكثر .
هل سررت عندما قتل جنود مصريين من قبل حماس فى وقت حرب غزة الأخيرة .
هل نرضى بتهريب الأسياء عبر الأنفاق .
و على فكرة خط التدوينة عايز يتظبط عشان الكلام داخل فى بعضة و صعب القراية .
و للأسف لم أستطع متابعة مدونتك فى الفترة السابقة بسبب انشغالى فى المذاكرة و ها انذا اعود لمتابعة اخر مواضيعك بعد وجود بعض الوقت الفارغ لدى .
مع خالص الاحترام و التقدير
أحمد الزنارى

لقد خلقنا الله احرارا يقول...

اقصوصه
أهلا وسهلا بحضرتك
عندك حق
العجز
هو الشعور الغالب
عجز
عن الكلام والفعل
حسبى الله ونعم الوكيل
تحياتى لك

لقد خلقنا الله احرارا يقول...

استاذ محمد عبد الوهاب
أهلا بحضرتك فى اول زيارة
اه ربنا يسهل
المرحلة الجاية هيكون التاريخ
الضربة الجوية بس

تحياتى لحضرتك

لقد خلقنا الله احرارا يقول...

بدراوى
أهلا بحضرتك
بصراحة
انا مش فاهمة تعليقك
يعنى انت مع الجدار ولا ضده
موافق على سياسات الحكومة فى الجزئية دى ولا رافضها
الجزئية اللى انت استشهدت بيهامن المقال
انا فهمتها
لكن وجهة نظرك انت
مش وصلت كويس لى

حتى لو قلنا مصر اولا
مع انى مش بحب النبرة دى

بس والله مصر أولا
يعنى نهتم بفلسطين
لان دى أمننا وضهرنا
احنا لما بهتم بمشكلة زى فلسطين
بيكون لاهتمامنا بمصلحتنا احنا

الظاهر انا تهت
عموما انا راجعة من الشغل مخنوقة
كل شوية
يقولوا قدامى
الحكومة عاقلة
الحكومة بتحمينا
الفلسطينيين وحشين

اتخنقت بصراحة

يمكن ده بيأثر على
فمش فاهمة تقصد ايه

تحياتى لك

لقد خلقنا الله احرارا يقول...

مهندس مصرى
اللهم امين
قول كمان ياباشمهندس
احنا الحكومة بتوصلنا كل شوية لمرحلة من التخاذل
فوق توقعاتنا بصراحة
انا نفسى المقالات اللى عندك نبسطها
انا قرأت واحدة بس سريعا
وننشرها كلنا على مدوناتنا
ونختصرها شوية
يمكن حد يفهم
لان الناس المحترمة
اللى فى منهم أمل
موافقين تماما على الجدار
انا زملائى فى المدرسة
ماشاء الله الملتزمين
اللى عندهم حس وطنى عالى جدا
موافقين تماما
مش عارفةاقنعهم ازاى بصراحة
تامر امين بوظلهم دماغهم
ربنا يسامحه

لورنس العرب يقول...

هناك أمورا في المطبخ السياسي لا نعلمها ومخفيه، وانا اتعجب من أناس حزانى على شيء موجود تحت الأرض بينما عندهم ما هو فوق الأرض ولا يريدوه!
ستقولي ان ما هو فوق الارض مغلق - اقول لك اقسم بالله انه مفتوح
لكن هناك من يريد اللعب في الخفاء
دوله يوجد على الحدود بينها وبين دوله أخرى ألف نفق - أين هذه الدوله؟
لا يوجد غيرنا ممن هو بهذا الوضع
وعلى الرغم من ان هذه الانفاق بعلمنا إلا انه لم يشكرنا احدا عليها
فيه حاجه حصلت من كام اسبوع
كانت مصر قد اعترضت على تفتيش ايران نوويا إذا لم تخضع منشآت اسرائيل هي الاخرى للتفتيش
من قام بالتعليق على هذا الخبر؟
لا احد
ولن يذكره احد لأنه في حقنا
هم يبحثون عن الفضائح فقط
أما الحكومه المصريه وإن كنت مختلف معها داخليا فأنا معها قلبا وقالبا
هي تفعل ما تراه صحيحا
ليس بالضروري ان تكون أرضنا مستباحه من كلاب حزب الله لكي يعملوا بطولات امام العرب على حسابنا
وليس بالضروري أن يتحكم فينا آخرين
الآن من عجب العجاب أناس يحزنون على ما هو تحت الأرض - أما ما هو فوق الارض فلا أحد يتحدث عنه
لاحظي معي
العرب ينفذون مخطط اسرائيل بعنايه فائقه
الآن العرب يتحدثون عن مصر أكثر من المحتل اليهودي
تركوا الاصول ومسكوا في الفروع
تركوا اسرائيل ويتحدثون عن مصر
تركوا الخلاف المهين بين فتح وحماس ويتحدثون عن معبر رفح
تركوا انقسام فلسطين إلى بلدين واحده لفتح والأخرى لحماس ومسكوا في مصر
فالتمضي مصر فيما هي ماضيه فيه
وأنا على ثقه تامه بأن الحكومه والمسؤولين يفعلوا الصواب
لا وقت الآن للتفكير في العواطف
في حرب 67 بعد ان هزمنا خرج الاخوه الفلسطينيون في مظاهرات فرح بالشركه التي كان يعمل بها والدي وقالوا بقينا زي بعض ومفيش حد احسن من حد
فما كان على عبد الناصر إلا أن قام بطردهم
لا داعي لجلد النفس أكثر من هذا
علينا ان نعمل للصالح العام ولكن قبله علينا ان نعمل لصالح انفسنا
وكوني على ثقه انه لا قضيه فلسطينيه بدون مصر
ولا حل بدون مصر
وعلى الرغم من هذا لم نسلم من الاهانات

لقد خلقنا الله احرارا يقول...

م/ محمود فوزى
اهلا بحضرتك
ايوه قول كمان الله يكرمك
علشان انا من اعراض الاكتئاب عندى
مبعرفش اتكلم
ومبحبش اتكلم من أصله
النهارده ف المدرسة
خدت حصص احتياطى
علشان ابعد الصداع الناتج من المناقشات العقيمة
مفيش فايدة

الاعلام ناجح جدا
مرتين لغاية دلوقت
الناس كلها كرهت حزب الله
وكلهم مش طايقين حماس
مش عارفة
لما احنا مش عارفين نحدد اعداءنا
هنحاربهم ازاى
طيب نرتب اعدائنا من حيث الاهمية حتى
عمر حماس والفلسطينيين ماهيكونوا اعدائنا اكتر من اسرائيل


معلش انا حاسة ان ردودى مش مرتبة
بس مخنوقة جدا
انا عديت سريعا على موضوع حضرتك
هرجع تانى أقرأه بالتفصيل

تحياتى لحضرتك

لقد خلقنا الله احرارا يقول...

الشجرة الام
اللهم امين
الله يكرمك ياحبيبتى ويزيدك من فضله
ويرحمنا من همنا
ومن غباء حكامنا
تحياتى لك

لقد خلقنا الله احرارا يقول...

اسامة
الاقصى بس
والعراق
والسودان قريب ربنا يسهل
وافغانستان
مابعتولها الناس زمان وبعدين حكموا عليهم بالاعدام
لا هى الحكاية بتبوظ اكتر ماهى
انا مش قادرة استوعب فكرة الجدار من اساسها
ومش قادرة استوعب اكتر
ازاى الناس موافقة كده عليه

تحياتى لك

لقد خلقنا الله احرارا يقول...

الزنارى
اهلا بحضرتك
ربنا يوفقك فى المذاكرة
وتنفع بلدك ودينك

لكن عايزة اقولك حاجة
حماس مش عايزة تسيطر على الحكم
حماس رشحت نفسها فى انتخابات نزيهة وكسبت
يبقى الحكم من حقها
والسيطرة على الحكم فى الحالة دى مش عيب ولا حرام
لكن المشكلة ان حماس شرعيتها اكتسبتها من المقاومة
وفى خطة منهجية ناجح فيها الاستعمار جدا
وهى انه يكرهنا فى اى مقاوم
وفى الفكرة نفسها
الله يرحمه عرابى
بنسمى ثورته لغاية النهارده
هوجة عرابى
والكلمة دى بسبب الانجليز
علشان نحس انه عرابى ده اى كلام
راجل اهوج عمل هوجة كده وخلصت
للأسف الاستعمار اذكى مننا
مئات المرات
وبيحط استراتيجيات لسنين كتير اوى وبينفذها بدقة
واحنا مش بنتعلم ابدا
طيب ايه لازمتها دراسة التاريخ
لما الخطوط العامة اللى بينفذها الاستعمار واضحة كده وبيكررها ونقع احنا كل مرة فى نفس المصيدة


هى حماس بتهرب سلاح
انا معاها بصراحة
ومن حقها تستخدم كل الطرق لتقوية نفسها
مش ربنا سبحانه وتعالى أمرنا نعد لهم ما استطعنا من قوة

المفروض نساعدهم سرا
علشان نحفظ ماء وجهنا قدام ربنا يوم القيامة
وعلشان حبيبة قلبنا اسرائيل
ماتزعلش مننا
لكن نبنى جدار
صعبة اوى دى

لا طبعا مش ممكن اوافق على قتل مصريين
بس ما طوب الارض بيهين ويقتل فينا
احنا مستباحين من الحكومة ومن اسرائيل ومن كل جيرانا
كرامتنا وجعتنا اوى على حماس
اللى بتعتبرنا الد اعدائها
ماهانى سرور اهوه لسه هربان وممدوح اسماعيل
ويوسف والى
والجبلى الله يكرمه هيطعم العيال
وربنا يستر وعايز يخلص عليهم
واسرائيل كل شوية تتسلى تموت لها كام واحد



بقولك ايه
انا صدعتك
كمل مذاكرة
ربنا يوفقك
تحياتى لك

لورنس العرب يقول...

إذا كانت غزه في القلب فأين مصر من جسم الإنسان؟
ما هو موقعها؟
هل هي في العقل أم هي الجسد كله؟لو ان هناك واحدا من الذين يتفاوضون من الخوه في فلسطين -عنده دم- لوقعوا على اتفاقيه المصالحه انقاذا لأهلهم في غزه
لكن على ما يبدو انهم ادمنوا اتخاذ قرارات وهم يجلسون في قطر وسوريا وعلى الفضائيات ولا يتحملون نتيجتها
هل جرب خالد مشعل النوم في العراء؟
هل جرب فوزي برهوم الكل مرة واحده في اليوم؟
هل جرب أبو زهري قضاء حاجته في الشارع؟
بالتأكيد لا
لكن من يتحمل القرارات؟
هم يقولون سنناضل - يلعبون بالشعب المسكين بقرارات عنتريه لا يتحملوها لا هم ولا عائلاتهم
......
هؤلاء مليون ونصف المليون
عندنا حي دار السلام وحدائق المعادي يعيش فيهم ما يقرب من 5 مليون
يعني 3 اضعاف الذين يعيشون في غزه
وعندنا حي شبرا يعيش به اضعاف عدد أهل غزه
نفسي في نظرة من أحد المعارضين لهؤلاء

لقد خلقنا الله احرارا يقول...

لورنس العرب
أهلا بحضرتك
يا استاذ معتز
نفس الفكرة بناقشها كل مرة
حضرتك مصر تقارن بين تصرفات مصر والعرب
يافندم
الموضوع من وجهة نظرى بسيط اوى

مين عدونا الرئيسى ؟
اسرائيل وامريكا

وبس

اى حد تانى مهما اختلفنا معاه
عمره مايوصل لمستوى امريكا واسرائيل فى العداوة لينا


حماس غلطت
حزب الله غلط
الفلسطينيين فيهم العبر
العرب مالهمش لازمة
وظاهرة صوتية وعلى مصر بس

كل الكلام ده انا عارفاه
وموافقه عليه
لكن
انا مصرية
حكومتى
باعت مصلحتنا وخانتنا داخليا وخارجيا
حضرتك متصور
ان الحكومة غبية ومبهدلانا داخليا
وربنا هينزل عليها الذكاء وتتقى ربنا فينا خارجيا

لورنس العرب يقول...

داخليا أنا أعلم ما بي وأعلم الحلول وإن لم يقوموا بتنفيذها
لكن خارجيا الصورة مختلفه وهناك أمورا مخفيه هم ادرى بها
لا يمكن لأحد ان يتخذ قرارا من شأنه ان يقول عليه الناس أنه خائن وعميل
ولهذا فالقرارات تدرس بعنايه فائقه
وإلا- لم يكن المجاهدين في سبيل الله في حماس على صله بمصر إلى الآن
لا تقولي لي أن مصر هي التي امامهم ولا مفر إلا من خلال التعامل معها
هذا ارفضه تماما
لنه كما ذهب إلى ايران كان يمكن له الذهاب إليها مرة أخرى لعقد المصالحه
اسرائيل تحاول تصدير الازمه الفلسطينيه إلى مصر
ونحن نفشل مخططها في كل مرة
كانت تحاول الضغط على غزه لنفتح المعبر ويمنعوا عودتهم، وكانوا متصورين أننا سنفتح سيناء لأهل غزه تحت الضغط من شعب مصر لكننا لم نفعل وافشلنا مخططهم
أنا أكثر الناس انتقادا للحكومه على المستوى الداخلي
لكن عندما يتعلق الأمر ببلد آخر غير مصر فلا يمكن ان أقف معه ضد أي قرار تتخذه مصر مهما كان هذا القرار
ولنا من حرب اليمن عام 60 ونكسة 67 عبره

لقد خلقنا الله احرارا يقول...

لورنس العرب
نكمل التعليق
الظاهر حضرتك م


الموضوع برضه بسيط
بلدنا مسروقة ومديونة
ونظام حسنى مبارك فاسد
وامريكا عارفة
وهى اساسا
ماتعرفش ربنا
الاتنين اتفقوا سوا
مبارك ينفذ طلبات امريكا فيما يخص اسرائيل
وهى تسيبه يعمل اللى عايزه فينا
ويجيب ابنه
ويبيع ويشترى فينا
ده كل الموضوع

تصدق بالله
انا واثقة تماما
لو حماس وحزب الله وايران
اعترفوا باسرائيل وحسنوا علاقتهم معاها
هتتغير نغمة اعلامنا عنهم180 درجة



الحكاية يافندم
مش حكاية معبر ولا سيادة
ولا امن قومى
ولا حماس وحشة
ولا فلسطينيين بيكرهونا

القصة ومافيها
مصالح متبادلة
بين نظام حكم فاسد
ودولة كبيرة عارفة مصلحتها فين


مالها حماس
وماله حزب الله
وليه الهجمة الشرسة على الشيعة دلوقت
مع انى بريئة من افكارهم عقائديا ليوم الدين
ومش موافقة عليها ابدا


لكن برضه القصة واحدة
فكرة المقاومة
أى حد
بيمتلك شرف المقاومة واحنا قاعدين فى بيوتنا
لازم نحقر من شأنه
ويبقى ابطالنا الريس
وعمر سليمان
وابو الغيط
وابو مازن
والواد الرخم ابن الحريرى
وكل حاكم عربى
ظروفنا السيئة خلته يتسلط على رقابينا




انا عن نفسى
مش بثق فى اى حاجة تعملها الحكومة


لا انا اسفة

انا واثقة ان الحكومة دى
مش ممكن تكون ابدا بتدور على أمننا ومصلحتنا
تاريخها الاسود معانا هو اللى بيقول كده



فكرة الجدار مش مريحانى خالص
ومش فاهمة بصراحة فكرة حضرتك
عن اللى فوق الارض
وتحت الارض



نوارة
كانت قالت كلام حلو اوى ايام حرب غزة


لما احنا زعلانيين اوى
ان حماس بتستغل اراضيناهى
وكلاب حزب الله اللى انا بحبه

ليه استغلينا اراضى الاردن
فى عملية ايلات
وليه استغلينا اراضى دول افريقية فى
عملية الحفار



انا اسفة جدا جدا
على الاطالة
وعلى الانفعال
اللى مش مقصود بيه شخص حضرتك

تحياتى لحضرتكوصى البلوجر ضدى :)

المهاجر يقول...

لو فكرنا فى السياسة التى يتبعها اليهود فهم دائما لا يواجهون إلا ككتله واحده ويستخدمون أمريكا كدرع واقى لتقى الضربات عنهم والعرب كالعصا يفرقون بينهم فينقسمون على بعضم ويضربوهم ببعضم يعنى يقول مؤتمر للسلام وإسرائيل تفرض شروط ونوافق مقابل تحرير فلسطين وتنتهى الجلسه بتنفيذ الشروط وزياة مستوطنات لإسرائيل
فهل سنرى العرب يوما يحملون العصا لليهود .....أتمنى ذلك

لقد خلقنا الله احرارا يقول...

لورنس العرب
معلش هتلاقى التعليقات ملخبطة
انا انقذتها بالعافية
البلوجر
بيعند معايا جدا
الظاهر حضرتك موصيه على
يعنى ماتاخدش فى بالك
لو لقيت جملة فى اول التعليق
ونهايتها فى اخره




هو انا لما اقول فى القلب غزة
يبقى مصر مالهاش مكان
لا كده
انا هزعل والله

فى 4 فبراير 1942 دبابات بريطانيا حاصرت قصر عابدين
واجبرت فاروق يولى وزارة وفدية برئاسة النحاس
والمصريين كلهم بلا استثناء
وقفوا مع الملك مع كراهيتهم ليه
لانه رمز البلاد
واهانته اهانة لمصر كلها
انا واثقة ان حضرتك تعرف القصة دى
بس انا بأكد بيها
اننا مش مع حد ضد بلدنا
لكن مبارك وحكومته وسياسته مش بلدنا
وسياسته الداخلية اللى حضرتك مش معاها
بتعرفنى انه اكيد هيتعامل خارجيا من منطلق مصلحته هو الشخصية وبس
حضرتك معترض على مشعل وغيره
طيب المطلوب منهم ايه
يسلموا بكل حاجة لابو مازن
اللى الخيانة ظاهرة فى كلامه وتصرفاته
والا يكونوا مش عايزين مصالحة

هو احمد ياسين والرنتيسى ماكانوش من حماس
والا علشان شهداء من حماس بننساهم
ونصر الله مش ابنه مات شهيد برضه
ومبارك
ولاده اخبارهم ايه


انا شايفة ان محدش فينا معاه كل الحقيقة
ومحدش ملاك
لا حماس ولا مبارك ولا نصر الله

لكن المقاوم مهما غلط
وانا معترفة باخطاء ليهم
يكفيهم شرف المقاومة



اليمن عبد الناصر كان عايز يساعد الثورة ضد حكم الائمة الرجعى
لكن معملش حسابه
ان كتير من اليمنيين مش فاهمين كده
والسعوديم ساعدتهم من قلبها
ووقفوا ضدنا
وكانت معركة وخسائر مش مستعدين ليها

لقد خلقنا الله احرارا يقول...

لورنس العرب
بجد مش فاهمة ايه العبرة من نكسة 67 وارتباطها بكلامنا

معلش بعد أذنك وضح لى
انا اعرف ان من اسباب 67
ان اسرائيل
عندها رغبة قوية جدا فى تحطيم قوة مصر لان مصر زى ماعلمونا
الصخرة اللى بتتحطم عليها أحلام اسرائيل التوسعية
وخصوصا بعد فشل العدوان الثلاثى
وان حكاية حشود سوريا
كنت قرأت وانا فى الكلية
انها ممكن تكون متفبركة
وان الهزيمة مكانتش علشان احنا وقفنا جنب حد لا سمح الله
لكن لاننا كنا فنجرية كلام بس
وبنقول سنلقى باسرائيل فى البحر
واحنا معندناش جيش من اصله


حتى لما اتهزمنا بسرعة
مقدرناش نحط خطة محترمة للانسحاب وده سبب خسائر الارواح الكتير زى ماحضرتك عارف


اسرائيل مش بتحاربنا علشان بنقف بجوار دول عربية تانية
اسرائيل هدفها الرئيسى تقضى على قوتنا احنا فى الاول
علشان بعد كده زى ماحضرتك قلت
العرب عمرهم ماهيعملوا حاجة من غير مصر

لكن انا بيصعب على انهم بيكرهونا كده
واحنا لسه مش قادرين نحس
انهم مصدومين فينا
واننا كبار بكل حاجة
والكبير مطلوب منه كتير
والالم من تقصيره
بيكون اكبر
ارجو انى اكون وضحت نظرى




فين بوةست حضرتك اللى قلت عليه
يعنى تقولى فين تعليقك
وبعدين مفيش بوست جديد
انا فى الانتظار

لقد خلقنا الله احرارا يقول...

المهاجر
أهلا بحضرتك
عندك حق والله
مش عارفة ساعات بحس
اننا شبه الاعراب اللى اتكلم عنهم القران
وان مش هيقدر يوحدنا غير نبى
ومدام مفيش انبياء
يبقى عليه العوض فينا
ساعات الخنقة والاكتئاب بيوصلوا معايا
انى بحس
اننا زى ماربنا قال عنهم أشد كفرا ونفاقا
واننالو انفقنا ما فى الارض
علشان تأليف قلوبنا على بعض
مش هيجيب نتيجة


أقول لحضرتك على حاجة
ماتاخدش على كلامى وتهييسى النهارده
لانى بجد
مش فى حالتى الطبيعية

انا موافقة حضرتك
فعلا اليهود منظمين وعارفين اهدافهم عكسنا تماما


تحياتى لحضرتك

GiGi world يقول...

اولا القمر ده وحشنى جدا ويعنى ماتساليش كده علي على العموم هو عتاب الاحبه

ثانيا ياريت حضرتك تنزلى موضوعاتك فى مدونه مش هنسكت اللى كنت بعتيلهنا على الايميل والمهم بس هترقميها وهتبقى تبع توبيك معين يعنى الموضوع للى بينزل دلوقتى اسمه الفتوحات الاسلاميه حضرتك برده سميه زي ماتحبي ويبقى كلها موضوعات فى نفس السياق



بحبك

أم مالك يقول...

الحبيبة الغالية
كل سنة وانتى طيبة
وحشانى خالص وقلت اعدى اطمن عليكى
تقف الكلمات ونعجز عن القول
وحسبنا الله ونعم الوكيل فى قادة
جلبوا لنا الخزى والعار
تحياتى

لقد خلقنا الله احرارا يقول...

جيجى حبيبتى
ازيك ياجميل
انت كمان واحشانى اكتر
عندك حق
انا فعلا مقصرة ومش بسأل
معلش
ياحبيبتى
سماح المرة دى

بالنسبة للمدونة
هحاول استفهم منك اكتر

لقد خلقنا الله احرارا يقول...

أم مالك
أهلا وسهلا بحضرتك
نورتينى
يارب تكونى بخير
سامحينى على التقصير
ربنا يرزق حضرتك الصحة والعمر الطويل


حضرتك عندك حق
فعلا حسبنا الله ونعم الوكيل فى قادة باعوا بلادنا
وفى اعلام
شوه كل قضايانا
تحياتى لك

norahaty يقول...

لمّا حصلت الحرب على
غزة جه كذا تعليق
بأننا مالناش دعوة
واننا نسكت هو أحنا
مالنا ساعتها رديت
اننا لمّا بندافع عن غزة
وفلسطين وسوريا والسودان
بندافع عن نفسنا اولاً وده
اللى عملته اسرائيل قبلنا
كل الحروب اللى حصلت عليها
حصلت على حدودها وليست فى
قلبها (كاك وجع قلبها)

لقد خلقنا الله احرارا يقول...

norahaty
كلامك تمام
وبالنسبة ان اسرائيل كل الحروب مش فى قلبها
اللهم امين
ويتوجع قلبها
فده من ضمن أساسيات عقيدة الحرب الاسرائيلية
الحرب تكون قصيرة
الاعتماد على المشاة قليل
الطيران والمدرعات هم الاسلحة الرئيسية
خفة الحركة
والحرب بره الحدود
لانها متستحملهاش
دايما الحرب على ارض الغير
انا حاسة ان اسرائيل دى
محتاجة اننا نشف شوية بس
مش معجزة يعنى ولا حاجة
ربنا ياخدها
يمكن تحصل حاجة حلوة تنكد عليها فى 2010
قولى امين

well يقول...

لا تعليق

م/محمود فوزى يقول...

السلام عليكم
جزاكم الله خيرا على كلامك
بس فعلا مش انتى اللى مخنوقه بس
اى واحد عاقل متابع الموضوع هايتخنق
ازاى حد يصدق ان الصهاينه حبايبنا
وان حماس والمقاومة اللى بتحارب الصهاينه اعداء
طيب ازاى
يعنى اصلا حماس هى خط الدفاع الاول عن مصر
وبصراحه لو -لاقدر الله- حماس والمقاومه انهاروا هانلاقى الصهاينه بيفكروا فى مصر

حلمهم القديم من النيل للفرات
ودى مش اول مره تعملها
يانااااااااااااس
الصهاينه احتلوا سيناء مرتين
1956 و 1967
وخرجوا فى المره الاولى بعد تهديد سوفيتي وتخلى امريكا عنهم لانها لم تكن تعلم من البدايه
وخرجوا المره التانيه بالحرب

يعنى لا مفاوضات ولا وجع دماغ من الكلام بتاع عباس (اللى بتشجعه حكومتنا)
حتى المفاوضات اللى جات بعد حرب 1973 فهى كنا فى موقف قوه مش موقف ضعف

يبقى بالعقل كده المفروض اننا ندافع عن حماس مش نعتقل منهم ناس ويموت منهم واحد من التعذيب وهو شقيق سامى ابوزهري

كلام يغيظ ويحرق الدم

عامل زي اللى عايز يقنعنى بالعافيه ان الحرامي اللى سرقنى قبل كده يبقى صاحبي
وان ابن عمى اللى متربيين مع بعض يبقى عدوى لانه بيتخانق مع الحرامي
عايز واحد يتقبل الكلام ده
تخيلي فيه ناس بتتكلم بنفس المنطق ده
وبيتكلموا مقتنعين
ربنا يرحمنا
معلش طولت
ربنا يوفقك ويكرمك

لقد خلقنا الله احرارا يقول...

باشمهندس ويل
شرفتنى
مع انى نفسى تشرح البدون تعليق بتاعك
لكن فرصة تانية ان شاء الله

لقد خلقنا الله احرارا يقول...

م/ محمود فوزى
مش عارفة أقول لحضرتك ايه؟
جزاك الله خيرا
رفعت معنوياتى
كلام حضرتك مظبوط
احنا وصلنا لمرحلة من التشويش
اننا مش بنحدد اعدائنا
واسرائيل وامريكا
دلوقت اقرب لنا من أخواتنا
لانى مقتنعة ومؤمنة بالعروبة
حتى لو كفر بيها كل العرب
ده حتى لو حماس دى مش عرب ومش مسلمين
ومايخصوناش اطلاقا
ومفيش اى مصالح بينا وبينهم

نعمل حساب للانسانية اللى بتجمعنا
ده ربنا كرم بنى ادم
نسيبه احنا يموت كده من غير تمن
ونقف نساعد ونشجع على حصاره وقتله
حسبى الله ونعم الوكيل
تحياتى لحضرتك

أليس في بلاد العجائب يقول...

تسلميلي :)

وصلني الرد و معلش مسحت التعليق طالما قريتيه :)

وخدي وقتك انا بس كنت عايزة اعرف لو في حاجة تسهله بما انه ملوش كتب خارجية مساعدة .. لو تعرفي حد يعرف يبقي كتر الف خيرك :)

أليس في بلاد العجائب يقول...

3 ث :)