عيد ميلاد

النهاره عيد ميلاد مدونتى
قبلها كان فى محاولات كتير فاشلة وحياتى كانت بعيدة تماما عن النت
وطبيعى فى الدستورلما كنت اقرأعن المدونات كنت فاكراها حاجة كده بتاعة الشباب الفاضى فطبيعى أنا ماليش فيها
بالصدفة
اتعرفت على مدونة عايزة أتجوز وعجبتنى جدا ومش قرأتها تقريبا أنا أ كلتها فى وقت قليل
وشوية وقرأت مقال بيتكلم عن نوارة نجم وانها عاملة مدونة اسمها جبهة التهييس الشعبية
شدنى اسم المدونةوشدنى اسم نوارة اللى كنت ارتبطت بيها جدا بعد حلقة ليها فى العاشرة مساء مع والدتها وحكت نوارة بكل صدق وعفوية لما السادات فى سبتمبر 81اعتقل والدتها ومتهيألى كان والدها أصلا معتقل وازاى ان والدتها فهمتها انها ماتعيطش لان ولاد المسلمين مايظهروش ضعفهم أمام اعدائهم وطبعا عيطت كتيرلما نوارة بطلت شقاوة فى المدرسة
وبقت بتسمع الكلام وبتعمل الواجب علشان السادات يرجع لها باباها ومامتها واستغربت جدا ازاى الانسان ممكن يظلم كده
من غير مايحس
اكيد السادات مكانش فى دماغه نوارة ولاغيرها وهو بيسجن والديها
ما علينا
كان محل اقامتى وقتها عند نوارة أقرأ البوستات القديمة والجديدة ويصعب على أقفل الصفحة وعايشة حياتى مع ال refresh وعرفت يعنى ايه الاكل يتحرق ومفيش أكلة تطلع مظبوطة على أساس انى كنت محصلتش قبل ماأعرف النت
فوتوها معلش عيد ميلاد وكده
المهم
فى ليلة ليست ليلاء
قررت أضغط على الكلمة الغريبة اللى فى أول مدونة نوارة واسمها انشاء مدونة اليكترونية
وبدأ السحر
وعملت اكتر من مدونة
واستغربت جدا انى مش بلاقى المدونة على جوجل ووصيت قرايبى يدوروا معايا
لكن محدش لاقينى غيرى طبعا لانى حافظة المدونة على الجهاز
كانت فترة بايخة أوى ووصل أول تعليق وكان من سبهللة
وتوالت التعليقات
من استاذ طارق مؤمن
ومن استاذ احمد زوج مخنوق
او من العائلة الكريمة اللى الجيل الصاعد فيها فرح جدا بالفكرة أو الكباراللى كانوا شايفين ان المدونات دى حاجة خطيرة
وحسسونى فعلا ان أنا عرابى وماشية أقول لقد خلقنا الله أحرارا
وبعد صعوبات البداية واجهتنى مشكلة عويصة
اكتب ايه ....؟
عارفين
بعد الشر عليكم الخواء الفكرى عارفين
الدماغ الفاضية لما نفسك تقول حاجات كتيرولسانك وايديك عاجزة عن الكتابة
لما الناس بتقول كلام جميل جدا وبتعبر عن أفكارك أحسن منك وانت معندكش غير
الله
ايه الجمال ده يعنى ياربى مش كفاية مش عارفة أكتب
لا كمان مش عارفة أعبر عن نفسى وعن رأيى فى تعليق الحالة دى لسه موجودة بس أنا بقنع نفسى ان حدتها قلت شوية وان السنين اللى ضاعت وأنا مشغولة بمشاكل
مالهاش أى معنى اكيد أثرت على قدراتى الذهنية والتعبيرية
لا وكمان المهنة أجاركم الله مش هيحس بكلامى غير المدرسين بعد فترة من التدريس شئت أم أبيت
بتحس بحاجات كده لا مش هتكلم عنها بعدين وخصوصاانى كنت بعتبر نفسى لغاية مااتخرجت مشروع قارئة جيدة جدا ماعلينا نطلع من البوست ده بأيه على رأى خيخة ان النهارده عيد ميلاد مدونتى
ان أنا بحب مدونتى
ان أنا متأكدة انها مش مؤثرة ومش لذيذة بس بحبها يابشر
انى لاول مرة احس انى بحب وبحترم ناس من غير مااشوفهم
وكتير منهم مش يعرفوا مدونتى أصلا
وانى أتمنى أحضر لقاء تدوينى بس أكون غير مرئية
لانى غير اجتماعية بالمرة ومش عايزة أخنق الناس بصمتى وابتساماتى المتكلفة اللى بتلازمنى لما اتعرف على ناس فى أول مرة انا طولت عليكم اوى معلش
ياحبيبتى
كل سنة وأنت و أنا وأحبابى والدنيا بخير

72 التعليقات:



الشجرة الأم يقول...

كل سنة وانت ومدنتك بخير ..

يارب يحفظك ويخلك يارب وإن شاء الله ديما مدونتك منور بنور الإيمان .. آمين

بارك الله فيك ونفع الله بك الأمة الإسلامية العربية.

لقد خلقنا الله احرارا يقول...

الشجرة الام
اللهم امين
الله يكرمك
على الدعوات الجميلة دى
ربنا يبارك فيك
ويكتب لك الخير دايما

مهندس مصري يقول...

كل سنة و انتي طيبة انتي و مدونتك
:)
و مدونتك مؤثرة أكيد على الاقل فيا
أنا فاكر إني إستفدت معلومات تاريخية من هنا ما كنتش أعرفها قبل كده
دا غير المعلومات المتعلقة بالتدريس و المدرسين و الكادر

لذيذة دي بقى اللي ما اعرفش نظامها إيه
:))

بس انتي إنسانة بجد إتشرفت بمعرفتك تدوينياً جداً

و أنا برضه عملت مدونتي بعد قراءة المقال بتاع مدونة نوارة نجم في الدستور

لقد خلقنا الله احرارا يقول...

مهندس مصرى
الله يكرمك ياباشمهندس
ويبارك لك فى كل حياتك
رفعت معنوياتى
وخليت ابتسامة كبيرة
تترسم على وشى
لا
بص
انا اللى اتشرفت بمعرفتك تدوينيا
وناس كتير للامانة
وبفرح جدا بوجودكم وافكاركم
وبحاول
يبقى لى مكان وسطكم

يعنى نوارة هى السبب
فى ارتفاع نسبة مستخدمى البلوجر
ماشى :)

ربنا يوفقك

غير معرف يقول...

كل سنه والقمر بخير
ربنا يباركلك فى مدونتك وفى حياتك ويخليلك كل حد بتحبيه ويسرك دايما لكل شئ يقربك من الجنه احنا وانتى يارب

happy birthday to ur blog
جيجي والعالم

لقد خلقنا الله احرارا يقول...

جيجى
الله يخليك ياحبيبتى
ايه الدعوات الجميلة اللى بتنهال على الليلة دى
ياريت عندى عشرين مدونة
متشكرة اوى ياحبيبتى
تحياتى لك

لورا ساهر يقول...

مدونه جميله جداوعقبال ماتحتفلى بالعيد
العشرين للمدونه ..واحلى مافيها المناقشات اللى فى التعليقات ..بين المعلقين .والمواضيع اللى بتتناوليها ..
وهى من المدونات الىلى من ستة اشهر بحاول اتابعها.وفعلا استفدت كثيرا منها..

لورنس العرب يقول...

كل سنه والمدونه وصاحبتها بألف خير

الزنارى يقول...

كل عام و مدونتك فى تقدم أكثر .
لم أتشرف بمعرفة مدونتك الا مننذ وقت قصير
الا أننى سعيد باطلاعى عليها و حزين على عدم قراءة موضوعاتها كل هذا الوقت السابق

لقد خلقنا الله احرارا يقول...

لورا ساهر
اهلا بك
نورتينى
شكرا جزيلا على المجاملة الرقيقة
بس حضرتك حضرتى المناقشات الحلوة بين المعلقين
مشفتيش ايام ماكنت ببخرها
علشان التعليقات
تحياتى لك

لقد خلقنا الله احرارا يقول...

لورنس العرب
وحضرتك
والاسرة والدنيا كلها بخير

لقد خلقنا الله احرارا يقول...

الزنارى
أهلا بك شرفتنى
متشكرة جدا على المجاملة
انا اللى اتشرفت بمعرفة مدونة حضرتك
تحياتى لحضرتك

قلم رصاص يقول...


السلام عليكم ورحمة الله وبركاته

كل سنة وحضرتك والمدونة طيبين
وعقبال 100 سنة تدوين يارب

مين قال لك انك مش بتعرفي تعبري عن اللي نفسك تقوليه ؟!

دا كفاية البوست ده أثبت انك طالمه نفسك.. أيوا فعلا لأنك اتكلمتي بكل اسهاب وموضوعية ومحدش اكيد حس باحساسك ده ..!

المسألة بس شوية ثقة مع الاقدام على اقتحام عالم زي الانترنت كفضاء اعلامي مفتوح على مصراعيه ..

اتمنى لك الاستمراريه على نفس النهج

وبالتوفيق ان شاء الله

وكلنا اخوات في الله والله محتاج حاجة يقول للتاني وان شاء الله يلاقي يد العون بتوفيق من ربنا اولا ثم نوايا الاخوه تجاه بعض

في امان الله

لقد خلقنا الله احرارا يقول...

قلم رصاص
وعليكم السلام ورحمة الله وبركاته
جزاك الله خيرا
على ذوقك ومجاملتك
وعرضك الكريم بالمساعدة
السنة دى اثبت لى
فعلا
ان لى اخوات كتير جدا
وان طاقة الخير والود
عالية جدا عند ناس كتير
جزاك الله خيرا
تحياتى لحضرتك

العجوز والبحر يقول...

كل عام وانتى بخير..
ومدونتك ناجحه ومن المدونات القليله التى اجدها فى قائمة المدونات المختاره..
لدى اغلب المدونين..ومن دراسة عوامل نجاحها تنوع الموضوعات وصدقها..وتناولها بدون فذلكه..ولغتها السهله..وضوحها..
اما ان كان لى ان اعطى ملحوظه فهى بعض الانفعال الظاهر..خاصة فى التعليقات مع
مخالفينك فىالرأى..ولكننا سعداء بهذه المدونه..
وكل سنه وانتى طيبه..

أليس في بلاد العجائب يقول...

يا ستي كل سنة وانتي وهي طيبتين :)

ويجعلها دايما خير ليكي وللي يعرفوكي ويجمعكم وايانا دايما علي خير ومعروف

تعيشي وتدوني يا استاذة :)

هتعمليلها ايه باه بمناسبة عيد ميلادها؟؟ الامر ميسلمش من فيونكة وردة :)

أحمد كمال يقول...

كل سنة و انت طيبة ، و مفيدة ، و مؤثرة ، و أهلا بكل صادق ، و نافع ، و حقيقي ..

عقبى لميت سنة :)

لقد خلقنا الله احرارا يقول...

العجوز والبحر

أهلا بحضرتك

شرفتنى بعد غياب طويل

جزاك الله خيرا
على التهنئة والكلام الجميل
وعلى النصيحة المفيدة
بس الانفعال
مش مقصود بيه المعلقين
هو طبع شخصى
وصعب على أتخلص منه


سعيدة جدا
بزيارة حضرتك

لقد خلقنا الله احرارا يقول...

اليس
أهلا بك ياجميل
اللهم امين
انا مجبتش ليها حاجة
لان اكتر عذاب فى نشر بوست كان ده
انا كنت كاتبة واحد طويل جدا
وعماله اشرح استفدت ايه
واتصدمت من ايه
فما كان من البلوجر
الا ان أصر على عدم النشر
وجربت حوالى 10 مرات بدون مبالغة
علشان كده
انا سحبت الهدية
لكن ده
مايمنعش
انها حبيبتى
وعرفتنى على ناس كتير أعتز بمعرفتهم
وبدأت تغير منى
وتخلينى أخرج بره جو تخليص المنهج
والامتحانات
والعقل اللى بيقف عن التفكير
وبيحفظ مناهج وبس
لكن هدية
ولا اعرفها
شرفتينى ياحبيبتى

لقد خلقنا الله احرارا يقول...

استاذ احمد كمال
سعيدة جدا
بزيارة حضرتك
وذوقك
ومجاملتك
بجد
انا حاسة فعلا
انى بحتفل النهاردة
تحياتى لحضرتك

tarek momen يقول...

كل سنة و مدونتك تنور شمعة كمان و تزيح الضلمة و تنشر المعرفة و الراي الحر الشجاع
تحياتي

soaad fakoory يقول...

كل عام وانتى ومدونتك بخير
واتمنى لكى ومدونتك طول البقاءونتمنى انك تكتبى تجربتك فى مدونه رائعه كمدونتك
تحياتى

أليس في بلاد العجائب يقول...

تعيشي وتفرحي بيها وفيها ومعاها :)

salwaa يقول...

مبروك لمرور سنه على مدونتك ..وفعلا هى مدونه هايله ومتنوعه ومواضيع التدريس والكادر دمها خفيف والموضوعات التاريخيه قيمه ..واتمنى لكى دوام الصحه

حامد متولى يقول...

مدونه جميله يا ابنتى وبا اتابعها..
وفيها مواضيع عظيمه وانتسابك لعرابى
شرف كبير لهذا الرجل الذى مات مكتبئا
حزينا..مقيما فى منزله بالمنيره ..يغادره للصلاه فقط..وتوفى فى 21 سبتمبر 1911 ..وكان شوقى بك قد فاجأه بقصيده مطلعها:
صغار فى الذهاب وفى الاياب
اهذا كل شأنك يا عرابى
كل سنه وانت طيبه..

samer alsriany يقول...

كل عام وانتى بخير ومدونه رائعه..

بدراوى يقول...
أزال المؤلف هذا التعليق.
لقد خلقنا الله احرارا يقول...

الرقيقة سعاد
اهلا بك ياجميل
وانت ومدونتك طيبين وبخير
شرفتينى
سعيدة
بزيارتك وتهنئتك
تحياتى لك

لقد خلقنا الله احرارا يقول...

اليس
الله يكرمك
انا حاسة ان انت حاسة
ان انا حاسة انى فرحانة
بليغة انا:)
اللهم امين
تحياتى لك

لقد خلقنا الله احرارا يقول...

سلوى
الله يكرمك
سعيدة بزيارتك
ومجاملتك الرقيقة
انتم بترفعوا معنوياتى والله
شرفتينى

لقد خلقنا الله احرارا يقول...

استاذ حامد متولى
ربنا يبارك فى عمر حضرتك
ويرزقك الصحة والعمر الطويل
وتعلمنا
ونستفيد من خبرتك
اما عرابى
فانا بجد
بحبه جدا كأنسان
وطنى وعفوى ومظلوم
قام بثورته
بدون تخطيط ولا حسابات مسبقة
وفرح بحماس الناس ليه
واتكسر
بتخليهم عنه
فى أحلك الظروف
وكمان بعضهم حمله مسئولية الاحتلال
مع ان المنصف يعرف
ان انجلترا اتخذت قرارها
بالتدخل فى شئون مصر والسيطرة عليها
بعد مجىء الحملة الفرنسية
والحكاية كانت انتظار للظرف المناسب بس للتدخل
انا قرأت
ان شوقى باشا
قال الشعر ده تأثرا بعلاقته
مع عباس حلمى الثانى
وانه ندم على هذا الشعر
وقرأت
اللى وجع قلبى
ان المصريين
كانوا
بيذهبوا لعرابى
وبيبصقوا عليه
احتقارا لشأنه
بزعل انا اوى
على البنى ادم
اللى مش بيلاقى حقه فى الدنيا
والحمد لله
اننا مؤمنين
بالاخرة والجزاء عند ربنا سبحانه وتعالى
علشان ماتكونش
حياتنا هباء


انا اسفة طولت على حضرتك
بس حضرتك
اللى جبت سيرة عرابى

انا سعيدة جدا بزيارة حضرتك
ومتابعتك لمدونتى
تحياتى لحضرتك

لقد خلقنا الله احرارا يقول...

استاذ سامر
أهلا بحضرتك
شرفتنى
انا سعيدة جدا
ان الاحتفال بمدونتى عرفنى على القراء الصامتين
ربنا يبارك فى عمر حضرتك
ونتعلم الوفاء
للاعزاء الراحلين
تحياتى لحضرتك

لقد خلقنا الله احرارا يقول...

بدراوى
ازى حضرتك
وانت طيب وبخير وسعادة
انا كتبت تعليق عندك
ونشره اجبارى على فكرة
وتحسبا لأى ظروف
نقول تانى



أنت ابن ناس ومحترم
مش علشان نوارة بالذات
علشان
البنى ادم المحترم
هو اللى يعتذر لما يحس انه زعل حد
هو اللى يزعل
زى ماانت زعلت وتخيلت
ان نوارة زعلانة وعندها اكتئاب من كلامك
انا سعيدة جدا
ان حظى الطيب
عرفنى بك تدوينيا
ربنا يبارك فى البلوج سبوت
اللى مفرحنى
ومعرفنى بناس
فخورة بيهم كده

تحياتى لك

ňįĝŗő يقول...

واضح يا " لقد خلقنا الله أحراراً " هانم إن البداية في دخول العالم الفريد المذهل ده متشابهة
و الرموز التدوينية من الرعيل الثاني - و هو الأكثر شهرة و غالباً تميّز - هي نفسها اللي قابلت أغلب الحالات التدوينية من الرعيل الثالث - و هو الأكثر كثافة
بصي أنا مش هاكذب و أقول إني كنت بآجي هنا كتير و مش بأعلق و كده
لأن فعلا عدد مرات وجودي هنا كانت قليلة
بس الواحد قابل عشرات و عشرات المدونات
و حضرتك بمدونتك من الناس اللي فرضوا على الواحد إنه يحترمهم و يُجلّهم و خصوصاً بعد ما عرفت بكونك مُدرسة تاريخ
بس أنا معترض على موضوع غير مؤثرة دي
لأن صفة التأثير دي ممكن تتحقق بحالة واحدة على الأقل
و موضوع غير لذيذة دي .. مش لازم يعني تقلبي بوستاتك كلها مراجيح علشان تبقى مدونة وااااو و دمها خفيف موت
كل واحد يا هانم له شخصية بنكهة معينة مميزة
و مدونتك هي - لو انت عاوزة -و لو جزئياً مراية لشخصيتك
و اللذاذة بتتحقق بكونك انت بكل ايجابياتك و سلبياتك .. بنكهتك الخاصة

أنا متأكد تمام التأكد إني أصغر - و لو على الأقل في السن - من إني أوجهلك الكلام ده
بس ممكن تعتبريه مجرد رأي شخصي و لقيت المجال لسرده هنا

شكراً إنك وصلتي بالقراءة للسطر ده
:)

كل سنة و حضرتك طيبة و مدونتك مستمرة يا أفندم



يلا سلام

سبهللة يقول...

كل سنة وانتى طيبة يا حبيبتى
تصدقى بالله
ان حكايتك مع التدوين زيى بالظبط
وخصوصا موضوع نوارة دة لما شفتها فى العاشرة مساء
بس اعتقد قبل ما تطلع مع مامتها
كانت طلعت مرة بعد رمضان اللى كان من اربع سنين تقريبا وكانت هى والناقد طارق الشناوى بيعلقوا على مسلسلات رمضان
وفجأة نوارة هانم اعلنت ان فى حالات تحرش جنسى جماعى فى العيد ودى كانت اول مرة نسمع عن الموضوع دة
وساعتها منى الشاذلى ما عرفتش ترد تقول ايه غير انها تقول ان الكلام على مسؤلية الضيفة واحنا هنحاول نتأكد منه ونعرض الوضع بالتفصيل
وتانى يوم اذاعت الخبر
من ساعتها وانا معجبة بنوارة جدا
وماكنتش اعرف عنا اى حاجة ولا حتى انها بنت نجم او صافيناز كاظم
وفى يوم 6ابريل من سنتين ايام الاضراب الاولانى
دخلت على الياهو وعملت سيرش عن الموضوع طلعت لى مدونة نوارة وعجبنى جدا تعليقها على اللى حصل يوميها من عاصفة ترابية ساعدت الاضراب انه ينجح
وبرضه لاقيت فوق فى المدونة الباب السحرى وفتحته ودخلت منه عالم التدوين وانا اصلا مش فاهمة يعنى ايه مدونة
واول بوست فى المدونة دى
انى اخدت اللى كتبته نوارة عن الاضراب بست وكوبى وقلت للناس روحوا اقروه

ماكنتش فاهمة حاجة خالص
رغيت كتير وصدعتك .. معلش
بس انا بيحصلى نفس حالتك بالظبط
انى اقرا فى المدونات اللى انا عايزة اكتبه
تعرفى انا مبسوطة اوى ان كنت اول تعليق عندك
اول مرة اطلع الاولى فى حاجة
ههههههههههههه
طولت عليكى معلش
بس لاول مرة احس بتشابه كبير وبينى وبينك
كل سنة وانتى طيبة يا شيمو
وان شاء الله السنى الجاية هاكون اول تعليق يقولك
كل سنة وانتنى طيب

لقد خلقنا الله احرارا يقول...

نيجرو باشا
أهلا بك
فى مدونة لقد خلقنا الله أحرارا هانم
عارف
كلمة هانم دى عسولة أوى
لا
عجبتنى جدا
هى فرصة أقول لحضرتك
انى احترمتك كتير
حتى من غير ماأدخل مدونتك
من كلام خيخة وفاتيما عنك فى مدوناتهم
الا لما خيخة
بتقولك ياصغنونى
بحس انك أخويا الصغير فعلا
ولما دخلت المدونة
عجبى جدا
الايجاز البليغ
وبعدين ييجى اليوم
اللى نيجرو باشا
يزور مدونتى
ايه الهنا اللى انا فيه ده
انا سعيدة ياباشا
بزيارتك
وبالحكم
اللى نزلت على المدونة من أول مادخلتها
يمكن انا حسيت
انها مش مؤثرة
ومش لذيذة
لانى كنت بقارن نفسى
بالرعيل الثانى
الاكثر شهرة وتميزا
بس بكرة
ان شاء الله
يبقى لينا تلاميذ
فى البلوجر
ويحكوا عن تأثرهم بينا

موضوع أصغر سنا
ده انا متأكدة منه
لكن أنت كبير
يانيجرو باشا فى حاجات كتير
سعيدة جدا جدا
بمرورك
شرفتنى

م/محمود فوزى يقول...

السلام عليكم
كل سنه وانتم بخير والمدونه فى تقدم
بصراحه المدونه محترمه وكويسه
وباتشرف انها فى قائمه المدونات اللى باتابعها
ربنا يكرمك دايما

لقد خلقنا الله احرارا يقول...

سبهللة
تصدقى كده
نوارة نجم مامتنا التدوينية
هى شخصية جميلة جدا
لا تملكى حتى لو ماعجبكيش أى رأى ليهاغير انك
تستمرى فى حبها
لو تعرفى تأثير تعليقك فى
كنت قعدت هنا على طول
اصل انا يااختى
كنت قاعدة فى الفضاء التخيلى لوحدى
وياما صدقت بصراحة

لا انت الاولى دايما
ربنا يكرمك
ويبارك لك فى صحتك وأولادك
نورتينى وشرفتينى
ياوش الخير
واصطباحة المدونة
تحياتى لك

لقد خلقنا الله احرارا يقول...

ممحمود فوزى
الله يكرمك
جزاك الله خيرا
على المجاملة الجميلة
تحياتى لحضرتك

بدراوى يقول...

كلامك ده انا مستحقوش خالص
مش تواضع
بس عشان جدت ظروف
تانية
فياريت تسبيلى وسيلة اتصال اخرى بحضرتك عشان مش حينفع كل شوية تعملى اشراف على التعليقات

لقد خلقنا الله احرارا يقول...

استاذ طارق مؤمن
انا اسفة جدا
المدونة بعافية شوية
انا لسه ناشرة تعليق حضرتك حالا
وفوجئت ان ترتيبه فى التعليقات بدرى شويه
مع انى لسه مرجعه اشراف التعليقات حالا

ماعلينا
متشكرة جدا
على زيارتك
وأمانيك الجميلة

norahaty يقول...

بسم الله ماشاء الله
أقول الأول كل لحظة
وأنتِ طيبة وأرجع
أكمل قراءة:)

norahaty يقول...

لأمدونتك لذيذة
ومحسوسة ومعروفة
كمان(الله!مش انا بجى هنا:)
تبقى معروفة وعلى مستوى
العالمية كمان :)عارفة
لما صديق تدوينى كتب لى
مفاجأة انه لقى
اسمى على جوجل
ما تتصورش
فرحتى كانت
شكلها اية
لو لقيت اللنك
بتاع التدوينة دى
حأبقى أكتبه لكِ
ماشي ياحضرة المدرسة
مررررررررة تانية كل سنة
والمدونة وأنتِ وبلدنا كلها فى خير:)

norahaty يقول...

هـــذا هــــو
حادثيين سعيدين أوى

لقد خلقنا الله احرارا يقول...

الدكتورة الجميلة
ربنا يخليك ياحبيبتى
لا بصى
انت
كل لحظة وانت طيبة
اقنعتينى
ان مدونتى مشهورة
البوست بتاعك لذيذ جدا
يعنى مش انا لوحدى
اللى بفرح كده
ده انا ساعة اول تعليق
قلبى كان بيدق
ولما عم جوجل عرفنى
كانت ساعة هنا
وكن عايزة ازغرد زى ماقلت
هو احنا مالنا
ده عادى يعنى
ولا ايه الحكاية
حالا
كنت بعمل جولة فى مدونتك
فى حاجات كتير كانت غايبة عنى
مدوناتك
لذيذة جدا
بجد والله
بدون مجاملة
شرفتينى ياقمر

متجرى يقول...

يشرفنى زيارتك لمتجرى المتواضع

شكرا لك

تايه في وسط البلد يقول...

كل سنة وانت بالف خير وسعادة وهناء

ولا اتعجب من كلامك علي مدونتك فالمدونة كالنبتة الصغيرة سهرنا عليها وتعهدتيها واعطيتيها من روحك الي ان كبرت وازهرت

فكيف لا تحبيها؟!

دائما بالتوفيق والسداد

بيطرية ومش بايدى يقول...

خياااااااانة
ماشى يا تيموووووووووووو
بقى كده انا مش قولتلك قوليلى قبلها عشان احتفل معاكى واظبطك عندى فى المدونة نااااشى
نعنشى
لا مفيش نعنشى ولا غيره



ولا اقولك يلا المسامح كريييييييييييم
بس انا بيطري هه
المهم كل سنة وانت ومدونتك بالف خير
ويارب دايما من نجاح لنجاح ويارب يبعد عنك الخواء الفكرى ده وعن كل السامعين



تتربى فى عزك بااوختشى

يلا فوتك بعافية ورايا غسيل
اه غسيل الدماغ من اثار تشغيل غدة الغباوة لفترة ليست بقصيرة

واليكى التفاصيل بعدين

دمتى فى حفظ الله

الله يرضى عليك

بدراوى يقول...

حضرتك فينك؟!
يارب تكونى بخير

osama44 اسامه 44 يقول...

ابله
بجد عقبال مائة سنه على مدونتك العزيزه
وبجد انا سعيد بمعرفة حضرتك
دمتى ودامت مدونتك شعاع نور لينا

بدراوى يقول...

ربنا يطمنا عليكى
يارب تكونى بخير
عشان بجد ابتديت اقلق

لقد خلقنا الله احرارا يقول...

متجرى
اهلا بحضرتك
علم وينفذ
تحياتى لحضرتك

لقد خلقنا الله احرارا يقول...

مش تايه أبدا
اهلا بحضرتك
شرفتنى
سعيدة جدا بزيارتك ومجاملتك
كل سنة وحضرتك ومدونتك فى تقدم دائما

لقد خلقنا الله احرارا يقول...

بيطرية حبيبتى
معلش سامحينى
هشرح لك بينا وبين بعضينا
على موبايلات بقى هه
معلش ياحبيبتى
عقبال انت ومدونتك
تكونوا دايما بكل خير

لقد خلقنا الله احرارا يقول...

استاذ بدراوى
أهلا بحضرتك
انا اسفة جدا
على عدم الرد على تعليقاتك السابقة
بس ده لظروف خارجة عن ارادتى


لكن الحمد لله الاحوال احسن حاليا
انا حاولت النهارده الصبح
أسيب تعليق عندك
لكن للاسف لما بتعمل صفحة التعليقات الصغننة دى مش بعرف أعلق ابدا
مش عارفة ليه


انا متشكرة جدا
لزيارتك وتعليقاتك وقلقك
ربنا يكرمك
ويوفقك
ويجعله فى ميزان حسناتك
واسفة جدا والله على عدم الرد سابقا
بس والدتى كانت قلقتنا عليها شوية
بس الحمد لله بقت أحسن كتير

شكرا لى سؤالك

لقد خلقنا الله احرارا يقول...

اسامة
متشكرة جدا
لمرورك وزيارتك
وكل سنة وانت بخير دايما

هانى زينهم يقول...

كل سنة وانتى طيبة ولو انها جات متأخرة لانى اول مرة اشوف ان فى تعليقات فوق وكنت فاكرك شايلة التعليقات . كل سنة وانتى طيبة تانى وعقبال العيد ال100

أليس في بلاد العجائب يقول...

كل سنة وانتي طيبة واسرتك والمسلمين جميعا بخير وربنا يجعله عام سعيد علي المسلمين مليء بالسلام والود والرحمة :)

لقد خلقنا الله احرارا يقول...

استاذ هانى زينهم
وحضرتك طيب وبخير وسعادة
شكرا جزيلا
على المرور والتهنئة
تحياتى لحضرتك

لقد خلقنا الله احرارا يقول...

اليس
اللهم امين
وانت واسرتك والمسلمين بخير
تصدقى بالله
قبل ماتكتبى تعليقك ده
انا كنت عندك
وكتبت تعليق فعلا
بس مالحقتش انشره لان الكهرباء قطعت
كنت عايزة اطمن عليك
وبعدين لقيتك مخطوفة زى انا بالضبط
ربنا يرجعنا بالسلامة:)
تحياتى لك

أليس في بلاد العجائب يقول...

القلوب عند بعضها :)
ان شاء الله تكون خطفة خير يعني :)

ربنا يجعل السنة الجديدة دي سنة عزة للاسلام وللمسلمين ويعيد علينا الايام الطيبة بكل خير يا رب

محمد الجرايحى يقول...

السلام عليكم ورحمة الله وبركاته
وكل عام وأنت بخير ومدونتك بخير وفى تقدم وتألق...

لقد خلقنا الله احرارا يقول...

اليس
الحمد لله ياحبيبتى
خير الحمد لله
جزاك الله خيرا على السؤال
فعلا القلوب عند بعضها

لقد خلقنا الله احرارا يقول...

استاذ محمد الجرايحى
أهلا وسهلا بحضرتك
شكرا جزيلا على الزيارة والامنيات الطيبة
تحياتى لحضرتك

محمد بدر يقول...

كل سنة وانت طيب ويارب دايما مواضيع هادفة تفيد الناس

تقبل مروري
وادعوك لزارة مدنتي

أنسان296 يقول...

كلامك ومدونتك
جميلة جدا ياأستاذة

لقد خلقنا الله احرارا يقول...

استاذ محمد بدر
تشرفت بمرورك

لقد خلقنا الله احرارا يقول...

انسان 269
أهلا وسهلا بحضرتك
شكرا جزيلا على الاطراء الرقيق
كان نفسى أزور مدونة حضرتك
بس للاسف
لقيتها مفتوحة لاشخاص محددين
تحياتى لحضرتك

المهاجر يقول...

كل سنة وأنت ومندونتك بخير مع مزيد من التقدم والرقى والمدونة جميلة بمواضيعها الرائعة

well يقول...

كل سنة وانتى طيبة ومدونتك طيبة وديماً كدة منورة الشبكة العنكبوتية ....
كل سنة وانتى صوابعك على الكيبورد بتكتبى اللى جواكى ...كل سنة وانتى بخير

معلش جات متأخرة ..بس من القلب
تحياتى

لقد خلقنا الله احرارا يقول...

المهاجر
أهلا وسهلا بحضرتك
جزاك الله خيرا
على التهئنة والزيارة والمجاملة
تحياتى لحضرتك

لقد خلقنا الله احرارا يقول...

باشمهندس ويل
متشكرين ياباشمهندس
على التهنئة والامنيات اللى من القلب
ربنا يكرمك ويوفقك
وأفرح بيك
اللهم امين