أنيس منصور
يعنى أنا فى اعدادى وثانوى والقراءة النهمة لكتبه
وحلم الصحافة بسببه
وكتب المدرسة اللى عليها اسمى واسمه بصفته أستاذى
والاعتقاد الغريب انى لما هاقابله..
هيوافق يشغلنى معاه فى أخبار اليوم
يعنى كتاب تحطيم الالهة
اللى كان تقريبا بعشرين جنيه
وأنا مكانش معايا فى معرض الكتاب غير العشرين جنيه
واشتريته علشان اسم أنيس منصور عليه
فاهمة ومتابعة كل الانتقادات الموجهة لافكاره وعلاقاته السياسية
بس أنا النهاردة مش فاكرة غير أنيس منصور
اللى سمعت منه أول مرة عن سارتر والوجودية
ومفهمتهاش لغاية دلوقت
مش فاكرة غير كتاب حول العالم فى 200 يوم
واصرارى من جماله انى اخلصه فى نفس اليوم وعملتها
مذكرات شاب وشابة غاضبة والسيدة الاولى
وأرواح وأشباح ولعنة الفراعنة
فاكرة متعتى بقراءة كل كتبه بأفكارها ومواضيعها الغريبة
مقاله فى الاهرام والعداء المصطنع للمرأة
عمرى ماصدقت انه عدو المرأة مش عارفة ليه
أنيس منصور
من البشر اللى شكلوا وجدانى
وكان ليهم تأثير فى حياتى
ولما بيموتوا باحس انى كبرت
وأنا مش باحب الاحساس ده
الله يرحمه ويحسن إليه ويدخله فسيح جناته
___________
القذافى
وهو عايش كنت باتمنى له الموت اكتر من مرة
وكنت متوقعة انه لازم يموت بالطريقة دى
يمكن ده يشفى جزء من غليلى
بحق البشر اللى قتلهم والبلد اللى خربت
لكن لما شفته لقتنى متأكدة
ان لو القذافى وقع فى ايدى
عمرى ماكنت هاقتله ولا هامثل بجثته
ولا هانشر فيديوهات قتله وسحله واتفرج عليها
أنا كرهت القذافى وحكمه وجنونه اللى ضيع ليبيا
وكرهت كمان طريقة موته
ومكانش فى بالى حقيقى انى هضايق كده
أنا باكره القتل حتى فى حق القتلة
____________
يامجلس العسكر
ضهرنا بقى للحيط وده أكبر غلط
___________
معمر القذافى
لازم نفهم وندرس ونتعلم ونعلم غيرنا
ليه الشباب الثورى المبشر بكل الأمل
بيتحول لطاغية أبشع من اللى ثار ضده
_____________
عبد الرحمن يوسف
مع عظيم احترامى ..اعتذر بالنيابة عن نفسه
أنا قلت نعم فى الاستفتاء
ولغاية اللحظة دى مش لاقية سبب يدعونى للاعتذار
_____________
أنا قلقانة جدا على ليبيا
وحاسة ان فرحتها بالخلاص من القذافى هتتأخر كتير
كمان أنا مش حاسة برغم حالنا دلوقت
ان ليبيا سبقتنا فى طريق الثورة
وان الطريق مفروش قدامها للبناء من أول وجديد
العكس هو الصحيح ..فى نظرى على الأقل
اللعنة على الناتو والمصالح وأمريكا
والثروة لما تكون مش فى ايد أهلها
_____________
فلولية الهوى أحيانا
وأحيانا أفتخر بذلك
________________
.....................
وبعد ماكتبت الكلام مسحته
ولقيته وهو مش مكتوب أجمل وأصدق
2 التعليقات:
رغم ان انيس منصور عدو للمراه
وكان حاططت نقره من نقرها
الا اني قريت اغلب كتبه
وطبعا 200 يوم حول العالم اهمها
له طريقة لطيفة محببه في الكتابة
يمكن علشان دارس للفلسفة وكده
الله يرحمه
شمس هانم
أنا كان عندى احساس قوى انه مش عدو للمرأة ولا حاجة
وان العداء ده مصطنع وشبه العداء اللى كان عند أستاذه الحكيم
عموما
أنيس منصور الله يرحمه كان ليه فضل كبير عليا فى القراءة
الله يرحمه
نورتينى ياشمس هانم
إرسال تعليق