محدش يسكن فى العمارة اللى فى الشارع اللى ورانا 

العمارة اللى فى الشارع اللى ورانا فيها حاجة غلط
مش فضول ولا تطفل اللى خلانى اعرف ده وأقوله
لكن الصوت عالى
أنا ساكنة فى بيتنا ده من 34سنة والعمارة دى غريبة بجد 


أولا : السكان فيها بيتغيروا بسرعة
الكلام ده من أيام الايجار القديم اللى السكان فيه بيعمروا فى الشقق زينا كده 

مش الايجار الجديد هو السبب خالص

ثانيا : مش ممكن على كم الدموع والصراخ والتهديدات والخناقات والطلاق اللى تم فى شقق العمارة دى
تقريبا مفيش شقة فيها كانت مستقرة فى حياتها الزوجية
لو فيه زوجين مااتخانقوش مع بعض خناقة رهيبة فيها ضرب وبوليس ومأساة يعنى
يبقى الجيران مع بعض يحسوا ان فيه حاجة غريبة فيقرروا يتخانقوا مع بعض خناقة من اياهم 


ثالثا: رجالة العمارة دى أوالرجال سكان  الأدوار اللى بتكشف أوضتنا فى منتهى الصفاقة
متهيألى يتعدوا على الصوابع اللى ماحصلش فى مرة وظبطت حد فيهم بيتلصص علينا 

جدير بالذكر انى مخلية بالى قوى والشباك لو مفتوح بتبقى الاوضة زى البلكونة أو الصالون اللى فيه ضيوف بالظبط
يعنى مفيش حاجة تشجع حد على التلصص البغيض ده 


دلوقتى أنا عايزة أنام واطفى التليفزيون بس الخناقة الرهيبة الجديدة
اللى فيها طفل بيصرخ برعب على بكاء وعويل والدته خلانى حذفت البوست اللى كنت بكتبه عن أحوالنا السياسية الجميلة الرائعة
وخليت التليفزيون زى ماهو بصوته العالى  عشان مبقاش تلصصت عليهم بطريق غير مباشر لو قفلته ..

حتى لو التليفزيون كان فيه أحمد موسى وبعده رولا خرسا

الخلاصة ..محدش يسكن فى العمارة اللى فى الشارع اللى ورانا 

8 التعليقات:



sameh gameal. يقول...

اكثر من ثلاث سنوات لم نتحدث.. انا صاحب مدونةالعجوز والبحر مصر بلدنا..مدرس تاريخ
وكنت معجبا جدا بمدونتك وكنتى تعلقى بمدونتى ..اتمنى ان تتذكريها..
المههمم سعيد ببقاء مدونتك حية حتى الان ..
وتحياتى لكى ولصمودك..!!
العجوز والبحر..

sameh gameal. يقول...

وصفحتى فى الفيس بوك
sameh gameal.

حفيدة عرابى يقول...

أهلا وسهلا بحضرتك
طبعا فاكرة ودى حاجة تتنسى
نورت بلوجر من تانى ويارب ترجع تانى للكتابة فيه
وتشرفنى حضرتك على فيس بوك طبعا

norahaty mo يقول...

عنوانها ايه
العمارة دى؟

حفيدة عرابى يقول...

الشارع اللى ورانا يادكتورتى ياحبيبتى :)

tarek momen يقول...

:)

norahaty mo يقول...

أما آن لهذا
الغيـــــاب
(عن التدويــن)
ان ينتهــــــى؟

حفيدة عرابى يقول...

دكتورتى حبيبتى
كتير قوى بفتح الصفحة واكتب فعلا وتمنعني حاجات مش عارفة اوصفها