عن يناير ..1

شِوف يامحمد ياخويا هاعيش عمرى اقول يارب ارحمه واغفر له وارزقه الجنة 
يارب زرع فى قلوبنا الأمل بألم الاحتراق 
يارب اغفر لحظة اليأس بحق الألم اللى طهرته بيه 
يقولوا الثورة راحت ..أو اتسرقت أو ماتت يامحمد ..وتلاقينى ساعات من همى أقول معاهم ..بس افتكرك وأقول لأ 
والله يامحمد كان نفسى أشوفك واحكى لك على اللى جرى 
عن الأمل 
عن صفوت لما قال مصر ليست تونس 
عن الأمل تانى وتالت وعاشر يامحمد 
عن فهمتكم ..وعن الحرية للتوانسة 
عن هرمنا يامحمد من أجل هذه اللحظة  ..وأنت يا حبيبى مشيت صغير 
عن الشعب يريد اسقاط النظام ..ونبض القلب اللى فرح ورقص واتخض وطار فى السما لما العيال قالوها فى التحرير 
هو أنا قلت لك انى كنت ممنوعة من النزول ؟
وانى كنت حاسة ان (الشعب يريد اسقاط النظام) فيها سحر 
وانى لو كررتها كتير هتتفتح أبواب السما زى مااتفتحت المغارة 
وربنا هيساعدنا ونسقط النظام 
النهاردة سيطرت على دماغى نوارة وزغاريدها ودموعها ومفيش ظلم تانى ومفيش خوف تانى 
أنا باعيط يامحمد كل ماافتكر نوارة فى الموقف ده 
أنا باعيط يامحمد كل ماافتكر ابن ال...اللى ضحك علينا لما وجه التحية للشهداء 
تعرف انى مهما زعلت من نوارة ومهما بعدت عنها مش هنسى لها انها كانت معانا فى اليوم ده 
رجعوا تانى يامحمد ...
بمنتهى البجاحة رجعوا تانى 
عارف علاء ؟ علاء رياضة ؟ بيقولى النهاردة انه عيط لما شاف فتحى سرور بيتكلم فى التليفزيون وعن الدستور ..وأنا كالعادة اتخنقت ودمعت ومنعت دموعى بالعافية 
بس مايرضيش ربنا يامحمد ...والله مايرضى ربنا 
يعنى أنت تزهق وتحرق نفسك ياحبيبى من الظلم 
وربنا يمكن من نيتك الطيبة يخليك أيقونة الثورة 
وبعد ده كله ممكن نصدق ان الثورة الحلوة  دى تضيع ؟! 
لأ يامحمد ...بحق ربنا العدل اللى ميرضاش بالظلم 
يناير حلو يامحمد ..صحيح بقاله سنتين مش بيفرحنى
بس هو حلو وربنا مش هيضيع مننا الحلم ده والأمل
الله يرحمك ويحسن إليك ويغفر لك ويرزقك جنته ويبعدك عن ناره 

4 التعليقات:



بيطرية ومش بايدى يقول...

تميمة الحرية !
-
الله غالب

Gamal Abu El-ezz يقول...

الحق سينتصر مهما طال الزمن
ولا بد ان ياتى اليوم الذى يحكم فيه العادل ويؤمن الأمين مرة أخرى

norahaty يقول...

الله يرحمه هو وكل
شهداءنا أجمعيـــــــن
الحق سينتصر ولو بعد حيــن

حفيدة عرابى يقول...

بيطرية
أستاذ جمال
دكتور نور حبيبتى
------------
تسلموا يارب
وتقبل الله منكم