كنت بضحك على نفسى ان السن والخبرة هيخلونى اتعامل مع الموضوع ده بطريقة ناضجة عن كده .....لكن لا سن ولا تكرار وقوع الحدث ده بيغير منى ومن تصرفاتى ومن اللى بيعمله عقلى الباطن وقتها
الموت ...
لما حد بيموت أنا مش بعرف استوعب اللى حصل
فى الوقت الصعب اللى بعد الوفاة مباشرة أنا كنت قوية وبخلص حاجات مهمة لازم تتعمل
والناس ايه بقى ..رشا شاطرة ..عرفت تتحرك وتتصرف ..
أنا عارفة انى لا شاطرة ولا عرفت اتصرف
أنا ببقى مذهولة وعقلى بيقولى كلام وحكايات غريبة
مثلا ..
بيقولى انى فى كرب وموقف صعب ..بس مؤقت
كل ده مؤقت يارشا ..مشكلة وهيعدى وقت وهتتحل ان شاء الله
ده البيه عقلى وكلامه
المأساة ان نفس العقل ده عارف ان المشكلة مستمرة...وان اللى مات مش راجع تانى
وان كلنا هنفضل نعانى من الفراق لغاية ماربنا يكرمنا بصحبتهم من تانى
يارب ...يااااارب
لكن وقتها ...أنا باكون فى دنيا تانية
لدرجة إنى فى مرة لقيت عقلى الباطن بيعاتب اللى ماتت فجأة وشابة
ليه بقى مارجعتش ...فات وقت كتير ..وباباها ومامتها زعلانين وهى اكيد عارفة
ليه مش بترجعى بقى ...مش كفاية كده!!
لما اكتشفت ان عقلى بيقولها كفاية كده... قلقت على نفسى
وحاولت مع نفسى تعقل كده وتفهم وتتعامل مع الموت بخبرة سنها
واقتنع انى عقلت واتغيرت ...
 ومع أول حالة وفاة بعدها
 يرجع عقلى يتعامل معاها بنفس الطريقة المعتادة

عبد العزيز مات امبارح
عبد العزيز ابن خالتى
كنت عارفة انه هيموت من فترة
من يوم مالقيت شكله متغير لما زرته
مش ده شكل التعب اللى بيخف
مش دى أعراض الكبد اللى كتير حواليا شفت معاناتهم منه
هو عنده حاجة تانية ..مااتكلمتش ..والكل كان عارف وفاهم ومااتكلمش
لغاية ماأخته قالت لى بصراحة من كام شهر
 ان الدكتور فهمهم ان الموضوع منتهى
وخلاص المرض انتشر فى اكتر من مكان والكبد كده منتهى
المفروض انى اخدت الصدمة خلاص وزعلت وعيطت واكتئبت وخبيت عن ماما
وبعدين قولتلها بالتدريج ...
لكن خبر الوفاة برضه صدمنى
واستدعى كل التعامل العقلى اللى بيعذبنى معاه كل مرة
كل اللى بيموتوا بيفضلوا شهور قدام عينى بالظبط
أنام واصحى واشتغل واضحك واتخانق وهم قدامى ومعايا
الشكل والضحكة وطريقة الكلام وتفاصيل يمكن مكنتش اعرف انى واخدة بالى منها وهم لسه معانا
وعقلى ماشى نفس الطريق بقى ..ده وضع مؤقت ..مشكلة وهتتحل ...هيرجع تانى
وازهق من نفسى
يابنتى مش راجع ...يابنتى هو خلاص كده انتهى بالنسبة للدنيا
هتروحى بيتهم مش هتلاقيه ..لو اتصلتى بيه ياعبيطة مش هيرد عليكى
يابنتى خلاص الموضوع انتهى ....
لكن مفيش فايدة منى

حاجة تانية كمان 
هدى قالت لى يوم وفاة منى ...دى أول الأحزان مش آخرها
وكلامها كان صح قوى
عايزة اتكلم عن عبد العزيز الله يرحمه ويثبته عند السؤال ويهون عليه وحشة القبر ويرزقه الجنة .....عايزة احكى عنه
بس عشان اركز ..واكتب ..لازم اعيط شوية على جملة هدى 


6 التعليقات:



Gamal Abu El-ezz يقول...

ربنا يرحمه ويسكنه فسيح جناته
ومن درجات الشهاده المبطون (مرض فى البطن) وربنا يكتبهاله ويجعله مع النبين والصدقين والشهداء.....

الازهرى يقول...

:(

moataz farouk يقول...

البقاء لله

حفيدة عرابى يقول...

أستاذ جمال
أستاذ أسامة
أستاذ معتز

عظم الله أجركم ولا أراكم مكروها فى عزيز لديكم

norahaty يقول...

الله يرحمه
هو وأمى وأبى وأموات
المسلمين أجمعيــــــــــن
اليوم أستمعت تفسير لجزء من حديث لرسول الله صلى الله عليه وســـــلم بأنــه
من مات مبطونــــاً فهو شهيد.وأكمل الشيخ شرحه بأنه يقصد من المبطون
كل من مات بداء فى البطن أو الصدر
وكان السبب فى موته.فأحسب والله أعلم أن عبد العزيز أبن خالتك من الشهداء بأذن الله ولا أزكى على الله أحداً.

حفيدة عرابى يقول...

آمين يارب العالمين
تسلمى يادكتورتى ياحبيبتى