لما كلمها فى التليفون فى اليوم ده 

المكالمة كانت قصيرة قوى 
باباه ومامته كانوا عندها فى اليوم ده 
وضيوف ودوشة وعزومة 

المكالمة عادية جدا
وصوته حنين قوى 


طبيعى يعنى 

عنيها دمعت وهى بتتكلم 
وأول ماالمكالمة انتهت 
راحت استخبت فى مكان 
عشان تسمح لدموعها تنطلق براحتها 
كل ماتبص للمراية 
عشان تشوف الدموع عملت ايه فى شكل عنيها 
ترجع الدموع من تانى اكتر من الأول 
غسلت وشها كويس 
 استعملت جرجنز
 لذيذ قوى


هى بتحب تأثيره

 بس للأسف بعيد عن العيون 
وخرجت ...

والدته ... لاحظت وسكتت 
والدتها ... ..لاحظت وسكتت 
واستنت لما الناس مشيت 
وسألتها ...
ايه اللى حصل ؟؟
مفيش ...
لأ بجد ..هو قالك حاجة زعلتك ؟
لأ مفيش ...
واختفيتى ليه وعنيكى عاملة كده ليه ؟
مفيش حاجة ...ارهاق بس 




سبب البكاء 
انها جالها شعور خفى وقوى جدا 
وهى بتسمع صوته 
ان خطوبتهم دى  مش هتكمل 
ليه ؟
 هى مش عارفة بالظبط 
بس الحنان اللى فى صوته قالها كده 
هتحصل حاجة منه أو منها أو منهم 
المهم انهم مش لبعض 

وقد كان 

بعد فترة فهمت .....
ان ربنا سبحانه وتعالى 
بعت لها الهاجس ده وغيره كتير 
من باب التمهيد للأيام الجاية 

من اللقطات المهمة دى 
لكن مش أهمها 

10 التعليقات:



شمس النهار يقول...

كتير بتبقا الحنية

بتخبي حاجات تؤلم

حفيدة عرابى يقول...

شمس هانم
وساعات بيبقى الحنان زائف
نورتينى ياشمس هانم
وجودك بيشجعنى على الرجوع لبلوجر الحبيب الأول :)
تسلمى يارب

richardCatheart يقول...

انا اول مرة اقرالك حاجه كدا !!!!!!!!!!!!!!!!!!!!!!!!!!!!!!!!!!!!!!!!!!!!!!!! عايزة اقولك وصف حالتى انا شوفتك وانتى بتتكلمى اؤدامى بطرتك المعهودة اه الكلام يوجع بس شيفاكى بتقوليه وعلى وشك ابتسامه والوجع فى عنيكى :) انت فقلتينى نصين يا ابله دا وصف حالتى

موناليزا يقول...

هى دى الحاسة السادسة على فكرة

حفيدة عرابى يقول...

مارو
يعنى انتى شوفتينى ياقطة وأنا مبتسمة وفيه وجع فى عنيا
هو انتى منهم ياقطة ..اللى بيشوفوا الحاجات دى:)

أنا بجد والله مفيش وجع فى عنيا ...أنا دمعت على خفيف بس لما افتكرتها كانت حاسة بايه يومها وكانت بتعيط ازاى
ماتقلقيش عليها ...هى كويسة ومبتسمة وزى الفل والكلام ده قديم قوى قوى

بالعكس بقى هى فرحانة لانها من فترة اكتشفت انها رغاية جدا فى كل حاجة الا اللى يخصها وانها ساعات تحاول تنطق زى الناس فمتعرفش تقول ولا كلمة
هو انتى معانا فى الجروب اياه ؟؛)
هى كانت فقدت رغبتها فى الحكى واكتشفت انها كمان فقدت القدرة على الحكى
ولما فتحت الباب اللى مركونة وراه الحكايات ..لقت نفسها هتاخد وقت فى الترتيب والتوضيب والتنفيض ..بس الدنيا هتبقى حلوة

بعد الشر عليكى ياقطة
دى حفيدة عرابى بتجرب نفسها فى كتابة المسرحيات والروايات الطويلة والقصص القصيرة ...وش بيكدب طبعا :)

حفيدة عرابى يقول...

موناليزا
الحاسة السادسة شغالة ماشاء الله ..ماشاء الله مع السيدات اكتر ولا أنا غلطانة ؟؟
شرفتينى يامونى :)

رئيس جمهوريه نفسى يقول...

عجبني قوي اسلوب كتابتك ما فكرتيش تكتبي قصص قصيرة التقاطك للتفاصيل رائع يا رشا هانم

رئيس جمهوريه نفسى يقول...

والحمد لله عشت وشفت مس رشا هانم عرابي في دماغها حاجة بعيد عن السياسة

حفيدة عرابى يقول...

محمود باشا عندنا؟ ...يامرحبا ..يامرحبا
الهى ربنا يكرمك
بس أنا عارفانى ماليش فى سكة القصص والحاجات دى خالص

وقلت ابعد شوية صغيرين عن رذيلة السياسة يمكن ربنا يفكها علينا من عنده

شرفتنى يامحمود باشا :)

عاشقه الرومانسيه يقول...

سبب البكاء انها جالها شعور خفى وقوى جدا وهى بتسمع صوته ان خطوبتهم دى مش هتكمل ليه ؟ هى مش عارفة بالظبط بس الحنان اللى فى صوته قالها كده هتحصل حاجة منه أو منها أو منهم المهم انهم مش لبعض
وقد كان
التعليق من قلب القصه :(