ضل راجل وضل حيطه


من أول مرة قابلته وأنا عارفة انهم مش هيكملوا سوا 
باركت لها وفضلت اسمع الناس بيقولوا انطباعاتهم عنه وأنا مستغربة 
ازاى بيقولوا عليه كده ! .. طيب ايه وكلام فاضى ايه !
غالبا مش هيكملوا سوا 
ولو كملو هتبقى اللى هى جوازة والسلام 
 واضح قوى انه مش شبهها ومش زيها
 ومش هيبقى فيه بينهم مودة ولارحمة ولا سكن 
عرفتى ازاى ؟؟ هو كده 
هى رجولة .....هى مش مسترجلة أبدا 
هى جدعة وتتحمل المسئولية قوى 
واللى زيها بيبقى قلبها مليان حنان مالوش حد 
ولو هتتجوز واحد من اياهم ...زيه يعنى
هيبقى السبب ان الحنان ده هترجع تقفل قلبها عليه للأبد
هو  مش هيبقى كبير فى عنيها ...
ليه يابنتى ؟..... برضه هو كده 
لما يكون مكانش كبير فى عينى أنا وأنا ماليش علاقة بيه 
شكله وطريقة كلامه بتقول انه مش هيتحمل مسئولية حاجة 
وانها فى البيت هتبقى الست والراجل فى نفس الوقت 
ودى أصعب حاجة ممكن تمر بيها ....صعبة قوى 
هى هتحترمه وهو قدامها وهتحترمه قدام الناس 
بس بينها وبين نفسها لأ 
لما كانوا بيقولوا زمان ضل راجل ولا ضل حيطة 
كنا بنضحك ومش عاجبنا الكلام 
مع ان الدنيا اثبتت انه كلام حكيم 
فعلا ضل راجل ولا ضل حيطة 
بس ممكن نكرركلمة راجل دى كتير قوى 
ضل راجل ..ضل راجل ..ضل راجل
لو كملت معاه كانت هتتأكد
 ان ضل الحيطه هيبقى افضل بالنسبة لها كتير 

الخلاصة بقى ....
المنحة فى المحنة  ....يبان الموقف سىء وصعب 
مع انه فى الحقيقة رحمة من ربنا بيها
عزيزتى ....
اسمحى لدموعك تنطلق
افتكرى المواقف الحلوة والوحشة
بس عدى الوقت ده بسرعة
وقولى لنفسك زى النهاردة الشهر الجاى هاكون احسن
زى النهاردة السنة الجاية هاكون خلاص قابلت حبيب عمرى
زى النهاردة فى أى وقت جاى أنا هاكون احسن واقوى
ياعزيزتى ..هتنسى صدقينى
عارفة امتى هتتأكدى انك نسيتى
لما تجيبى سيرته بعد كده وتحكى عنه بصفته ماضى بعيد
وتفتكرى المواقف الحلوة من غير ماتزعلى انها انتهت
وتفتكرى الحاجات اللى بعدتكم عن بعض
من غير ماتحسى بالسكينة اياها مغروسة جواكى
من غير ماتحسى انى عايزة تعاتبيه
هتفتكريه من غير ماتفتكرى هو انتى كنتى زعلانة منه ليه
خلاص بقى دى أيام وراحت ...هتقولى لنفسك كده
ربنا يرزقك بنصك التانى ويرزقه بيكى ...يارب

7 التعليقات:



لورنس العرب يقول...
أزال المؤلف هذا التعليق.
لورنس العرب يقول...

مساء الخير

حفيدة عرابى يقول...

لورنس العرب

صباح الخير يافندم
ههههههههههههههههههه
حضرتك عامل ايه ؟
وقفلت حسابك على فيس بوك ليه ؟

شمس النهار يقول...

بجد مش عارفة اقولها حاجة غير
ربنا رزقنا نعمة النسيان
وهي من خير النعم علينا

شهووووده يقول...

موضوع قيم وفيه الكثير من الصحة..صح لسانك

عاشقه الرومانسيه يقول...

البوست ده مؤلم قووووى

عاشقه الرومانسيه يقول...

البوست ده مبقاش مؤلم يامس :)