موقعة ماسبيرو


الولد اللى نزل على الأرض 
وباس رجل قائد الشرطة العسكرية 
عشان يبطل ضرب 
قتلنى 


------------------


ضابط الأمن المركزى 
فى يناير 
  اللى كان مخبى وشه وماسك بندقية غريبة 
أنا مكنتش مصدقة أبدا انه مصرى 
بس أنا خلاص صدقت 
أنا شفت منه تانى ..
طلع فيه منه  كتير 
المرة اللى فاتت كان داخلية والمرة دى جيش 

------------------


اللى عمله فينا المجلس العسكرى 
من 11 فبراير للنهاردة كوم 
وانه يطلب عن طريق التليفزيون من المسلمين 
ينزلوا يواجهوا المسيحيين ويدافعوا عن الجيش
 كوم تانى خالص 
أنا كنت فاكرة ان الظلم والكفر ليهم حد 
واللى حصل كان خبرة جديدة 
لا أفخر انى حصلت عليها 


-----------------


يوم 5 اكتوبر 
حاولت مع نفسى بكل الطرق 
تنسى المشير والفريق 
و الفنجرى وصباعه 
والروينى ودم محمد محسن 
وبدين والشائعات مصدر فخره
والشرطة العسكرية وازاى ضربت معتصم ماسبيرو
والمتحف وفض الاعتصامات  
والمحاكمات العسكرية 
وحقوقنا اللى مش بتوصل الا بطلوع الروح 
والبلد اللى كل يوم مع سبق الاصرار والترصد 
بتمشى خطوات فى طريق نسيان الثورة وردمها بالتراب 
كل ده حاولت انساه....
علشان يوم 6 اكتوبر 
يبقى ذهنى صافى 
ويعرف يفتكر بس يعنى ايه جيش 
ربنا كرمنى وحصل ده يومها 
لكن....
 لغاية ماأموت مش هانسى
 ان مدرعات الجيش عملت زى مدرعات الشرطة 
ودهستنا 


---------


كنت فاكرة 
انى كرهت حسنى مبارك بما يكفى 
أو ان كل طاقة الكراهية اللى عندى 
خلاص اخدها كما يستحق مبارك 
برضه طلعت غلطانة 
بلاقينى ساعات بجد مش عارفة 
هو الراجل ده المفروض يتحاسب ازاى 
لأ أنا عاقلة 
ولو مؤقتا 
ومش هاتكلم عن الانتقام 
أنا عايزة محاكمة وحساب 
تيجى ازاى ؟
ايه القانون الارضى اللى ممكن يحكم عليه بما يستحق ؟
ايه العقوبة اللى ممكن تخلينى أحس بالعدل ؟
مفيش 
آه والله ...مفيش 
وفى قول اخر ...أى عقوبة متكفيش 
خلينى الايام دى بالمناسبة  أحاسبك على تلاتين سنة 
كان فيهم الخطاب الدينى بائس من الجانبين 
وشوف دى لوحدها يكفيها ايه 


-----------


طبعا مينفعش أكلم أم مينا 
ولو شفتها ولا لسانى هيعرف ينطق كلمة واحدة معاها 
بس أنت يامينا عارف اكيد 
ان مش مصر اللى ضربتك بالرصاص 


-----------------
حتى النبضة محتلة 
---------------
عندى شعور غبى جدا جدا 
بلاش أقوله 
---------------


مش باحب أفلام الرعب 
وخصوصا اللى فيها كائنات خرافية 
بتحارب البشر وتقتلهم 
كوابيسى بقت كلها منهم دلوقت 


-----------------


المجلس العسكرى بينفى ان جنوده 
كان معاهم ذخيرة حية 
أو انهم اطلقوا النار على المتظاهرين 
وأنا مااقدرش اكدب المجلس العسكرى 
ويبقى أبويا هو اللى ضرب عليهم نار ودهسهم بالمدرعات 
وبالمناسبة دى 
أحب افكر أبويا 
ان مبارك مشى من مصر 
مش لما الظلم زاد وبس 
لأ 
لما الظالم وصل  لمرحلة متقدمة قوى
من الكدب ..
اصله كان بيحاول يظبط الكدب فى الاول
وبعدين حس انه مالوش لازمة 
مبارك مشى 
لما وصل لمرحلة متقدمة قوى 
 من الاستهزاء بضحاياه 
لما ضحك وقال عبارة من اللى بيغرقوا 
لما استظرف وقال خليهم يتسلوا 
لما طلع يقول عايزيموت هنا 
ورجالته كانوا بيدفعوا تمن الموت 
وبيجهزوا الركايب والبغال والحمير 
مبارك قعد تلاتين سنة 
وللأمانة والتاريخ 
هو قعد لاسباب كتير 
منها 
انه كان أذكى من داخليته وجيشه 


---------------
حالة من الغباء الشديد 
بتنتابنى فى لحظات الموت 


لما منى ماتت 
كنت باكلمها فى سرى فى الايام الاولى للوفاة 
واقولها 
مش كفاية كده بقى وتيجى 
انتى مش شايفة باباك ومامتك زعلانين ازاى !
ولما اختها اتصلت بيا من موبايلها 
عقلى وقف لما شفت اسمها على الشاشة 
لأ وفرحت كمان عشان هاسمع صوتها


ولما أستاذ مجدى مات 
فضلت 3 شهور مااروحش من أصله كانتين المدرسة 
ولا أبص هناك ..اروح ازاى وهو كان هناك طول الوقت 


لما ليلى بقى ماتت 
وكان بقالى سنة مشفتهاش
 لانها أصرت محدش يشوفها فى مرضها
أنا لغاية دلوقت بامسك لسانى بالعافية 
علشان ماينطقش ويقول لبنتها سلم لى على ماما
 ومش دايما كمان باقول الله يرحمها بلسانى 
ودايما بلاقيها بتتحرك قدامى 
بكل النشاط والحيوية والرقة والجمال 
اللى كانوا جزء من صفاتها


متزعليش منى يافيفيان 
انتى وكل اللى زيك 
لو دعيت لكم 
 انكم مش تصدقوا ان الاعزاء ماتوا 
زى ماعقلى بيعمل معايا 
مش عارفة ده صح ولا غلط 
ومش عارفة فى كل الحالات
 عقلى هيقدر يضحك عليا كده ولا لأ 
بس يمكن ده يهون عليكم شوية 
ربنا كبير



4 التعليقات:



candy يقول...

أنا كمان أكتر حاجة مررتنى مش اللى ماتوا
لكن منظر الراجل اللى بيبوس رجلين الظابط لدرجة أنه تقريباً "سجدله" على الأرض !!!
الذل للانسان دا حاجة رهييييييييييييبة
لما حدي وصل لكدة مع شخص ، والشخص دا يعمل نفسه مش واخد باله ويتجاهله يبقى إيه !
دا أحنا لما بنسجد لربنا مش بيتجاهلنا !!!!!
ربنا موجود

tarek momen يقول...

مبارك مشى من مصر
مش لما الظلم زاد وبس
لأ
لما الظالم وصل لمرحلة متقدمة قوى
من الكدب ..
اصله كان بيحاول يظبط الكدب فى الاول
وبعدين حس انه مالوش لازمة
مبارك مشى
لما وصل لمرحلة متقدمة قوى
من الاستهزاء بضحاياه
.....................
عجبني التعبير جدا بتبقي الفكرة داخل راسي و فجأة الاقيها قدامي بيعبر عنها يصورة عبقرية احد اصدقائي
علي الاقل انا عبقري في اختيار اصدقائي
تحياتي

حفيدة عرابى يقول...

candy
أهلا بحضرتك
أنا المنظر فعلا قتلنى
ليه ؟ وازاى ؟ وايه كم الخراب اللى انت كنت سبب فيه علشان يوصل هو للمرحلة دى من الظلم
ونعم بالله يخرجنا من اللى احنا فيه ده
تحياتى لحضرتك

حفيدة عرابى يقول...

أستاذ طارق
أهلا بحضرتك
طبعا حضرتك عبقرى وعلشان كده الاصدقاء بيتعلموا من حضرتك
وحضرتك مااخدتش بالك انهم اتعلموا منك فاتهمتهم بالعبقرية
حضرتك شرفتنى :)