العار

هحاول التزم بأقصى درجات ضبط النفس 

بيان العسكر والاحزاب ولا يلزمنى ولا يهمنى 
أنا ماوكلتش حد ولا فوضت حد يتكلم باسمى 
ليهم مصالح مع العسكر وباعوا الثورة علشانها ؟؟
يتحرقوا بجاز موضوع ميخصنيش 
الانتخابات أهم عندهم من بلد كان نفسنا نفرح بيها ؟؟
مشكلتهم انهم باعوا لكن  مش مشكلتى 

أنا مش موافقة على ولا حرف فى بيان العار اللى مضوا عليه 
بتذلوا أنفاسنا بقالنا اد كده
 وفى الاخر رايحين توافقوا على بيان مايوافقش عليه عيل صغير ؟؟

أول مرة الاقى الخيانة اللى كنت بشوفها فى كتب التاريخ 
طالعة وبتتجسد قدامى 
ببساطة كده !!
يانهاركو اسود 
مجلس شعب ينعقد فى يناير 
ومجلس شورى فى مارس 
ولسه هنفكر نختار لجنة دستور فى ابريل 
وريس فى علم الغيب
 لما تبقى تظهر نتيجة استفتاءالدستور  
ولازمته ايه الريس بقى ..احنا هنبص لبره وابوبدلة جاهز ومستعد 
ايه ده 
انتم مش بتتكسفوا 
مفيش دم 
مفيش احساس ولا ضمير 
طب مش بتفهموا الله يخرب بيوتكم انكم اتفضحتوا 
طب مين هينتخبكم ؟؟
هتخرجوا تكلموا الناس تقولوا ايه بعد العار اللى وافقتوا عليه 

المادة الخامسة ؟؟؟؟
أقصى أمانيكم المادة الخامسة وتكسبوا الانتخابات 

الاخوان والسلفيين وخصوصا الاخوة فى حزب النور
مش كنتم خايفين على شرع ربنا ومصر اسلامية 
اسلامية دلوقت مش كده ؟؟
اسلامية لما الناس ماتت علشان بلد أحسن 
وأنا أبيع البلد للعسكر علشان كرسى فى برلمان 
اسلامية آه 
اسلامية لما كنتم هتموتوا
 علشان بيفرضوا عليكم مبادىء فوق دستورية 
وانتو حالفين يمين مغلظ ماتخالفوا الشرعية 
اسلامية فعلا 
اسلامية لما استهبل واستعبط 
واعمل نفسى مش واخد بالى 
واحط ايدى فى ايد العسكر أكبر خطر على الثورة علشان برلمان 
اسلامية لما انزل التحرير بعد سبع شهور من الثورة 
علشان أهتف للشريعة وارفض الالتفاف على الشرعية 
وفى قعدة واحدة ولا بقى فيه شريعة ولا شرعية 
فيه انتخابات ..
حلوة الانتخابات 
كان فاهمكم مبارك والله 
وعارف حجمكم وأولكم واخركم
كان فاهمكم مبارك واحنا عايشين معاكم مش فاهمين 

أنا بس مش عايزة ايديا ولسانى يطاوعونى 
انى أقول كلام اتكسف لما أشوفه مكتوب بعد كده 

طب مجلس العسكر وفاهمينه ومش جديدة علينا تصرفاته 
لكن ياعالم 
هيبقى يدرس الغاء الطوارىء 
وهيبقى يدرس قانون العزل 

يانهار مش فايت 
هى الليلة دى هتعدى علينا كده 

أنا حاسة انى بسمع مبارك تانى بيقول سأظل 




11 التعليقات:



ابراهيم رزق يقول...

عندما يبحث الجميع عن مصالحهم
تظهر السياسة بوجهها القبيح

المشكلة انهم لا يعلمون انهم دمى فى ايدى النظام
يلعبون بهم عندما يريدون و يربتون على اكتافهم عندما يريدون و يتخلصون منهم عندما يريدون
الكل يبحث عن مصالحهم منتهى التفكير البرجماتى
لكن ارجع و اقول
لسه الطيور بتفن
و النحليات بتطن
و الطفل ضحكه يرن
مع ان مش كل البشر
فرحانين

و من عندى اضيف
مش كل البشر
فاهمين

تحياتى

sony2000 يقول...

ربنا يستر

بس لسا عندي امل

شمس النهار يقول...

انا بس مبسوطة ان الناس دي انكشفت علي الاخر

وعرفوا انهم لما حرضوا الناس علي نعم كان شرك للثورة والشعب

بان انهم لايهمهم ثورة ولا مصر ولا بتنجان
المهم يوصلوا للكرسي وبعدها يعملوا العجب العجاب
بس كده ده بعيد عن شنبهم ودقنهم
اتصدمت اتصدمت واكتر ناس صدمتني وعماله تصدمني الاخوان

لورنس العرب يقول...

سيبك من كل الكلام ده

أظن انه من كان موجودا بهذاالاجتماع كان يقف في مظاهرة يوم الجمعه ويطالب بسرعة تسليم البلاد لسلطه مدنيه لن الفتره الانتقاليه طالت

وبعد الاجتماع رأيت أن الكلام تقريبا 90% منه قيل الاسبوع الماضي وكان الناس يعترضون عليه ووقفوا بسببه في المظاهرات- واليوم قالوا ان هذا كلام سليم 100%
يعني يوم الجمعه بيعترضوا على طول فترة الحكم العسكري وبيطالبوا بحكم مدني سريع واليوم بعد ان جلسوا مع المجلس العسكري (واكتشفنا ان الرئيس لن يظهر إلا في النصف الثاني من العام القادم) قالوا ان هذا كلام سليم!

واتباع كل فرد موجود في الاجتماع صدقوا على ما تم فيه وقالوا ان هذا هو الأصلح
ومنذ يومان فقط كانوا بيشتموا في نفس القرارات التي يصفقون لها اليوم

من الآخر كده عشان مش بحب التطويل

احنا عالم جهله ومنقادين ولاغيين دماغنا تماما

Ramy يقول...

مُعتقده محدش هنينتخبهم

صعب جداً

هينتخبوهم صدقينى

فاتيما يقول...

يا فيدو اعصابك وصحتك


يا بنتى دول زى قلتهم
والله قلتهم احسن

دول لا كان ليهم قيمة ولا لازمة قبل الثورة
وأثناءها
ولا هيبقالهم دلوقتى والله


منتيش فاكرة ايام التفاوض مع عمر زليمان ...
ساعتها برضو حرقوا دمنا
لكن ف الىخر جم على جنب
والميدان مشى كلامه
لأنهم اقزام وحجمهم معروف

متفقة معاكى جدااااا
ومن اول يوم والله
اننا بنتفرج على التاريخ مجسداً
محظوظين بيه
بس متعوسين بتفاصيله للأسف
لو نبص لقدام بتفاؤل
بناء على المعطيات
نقول ان البلد دى قامت ومش هتقعد تانى
ومش شوية الأراذل دول اللى هيركعوها
المجلس ماشى بنظام مبارك القديم
وادينا شوفنا
اللى أعتى منهم ومترستق 30 سنة راح فين ...
هما بقى اللى هيبلفونا بشوية ورق ممضى عليه من شوية ناس لو مشيوا ف الشارع محدش هيعرفهم ؟!!!


روقى روقى

احنا الشعب يا فيدو
مش هما

والشعب يا حبيبتى
لسه بيقول كلمته
وصوته منخرسش


اللى بيحصل دا غربلة
وفرز
و كله بفايدة للبلد
اكتر ما يضر


صباح الصبر
والنصر القريب بإذن الله

عمرو يسرى يقول...

ايه الجديد معروف من زمان ان مبارك كان بيجيد اللعب مع هؤلاء ومعروف ان اى حد هيرميلهم حته عضمه هيلهثوا وراءها
كمان يعنى هما اصلا بيلعبوا بالدين عشان مصلحتهم مش هيلعبوا بمصر
عادى
تحياتى

norahaty يقول...

ماعنديش امل:(

حفيدة عرابى يقول...

احم
هو أنا ينفع اعتذر وكده انى ماردتش على التعليقات طول الفترة دى
طب انتم طيبين أنا عارفة ومش هتزعلوا منى
صح كده؟ :)

norahaty يقول...

ينفع حبيبتى
أحنا مسامحينك
ولا أقولك خلينا
نتكلم ثوريا وأقولك
عن نفسى فقط :انا مسمحاكى

حفيدة عرابى يقول...

ربنا يخليكى ليا يادكتورتى ياحبيبتى
دايما كده رافعة معنوياتى ومسامحانى علطول :)