تخاريف واحدة صايمة

أحمد الشحات 

مواطن مصرى ارتكب فعلا مبهجا 
رسم ابتسامة كبيرة فى قلبى أنا على الأقل 
مسح مرارة مسودة وجعت روحى وكرامتى

انت عملت اللى تقدر تعمله ياأحمد 
انت استغليت مواهبك وقدراتك
 فى حاجة لقيت نفسك بتعرف تعملها وبتحب تعملها 
انت اتصرفت من غير استعداد ولا أجندة مسبقة

فعلك رمزى ...صح أنا موافقة 
بس من امتى الرمز مش مهم 
العلم المصرى هينزل والاسرائيلى هيرجع مكانه 
للأسف هيحصل ..
بس ده مش غلطك ياأحمد 

كل المعترضين على فعل أحمد 
ممكن يشوفوا فكرة تانية
 نستغل بيها طاقات وقلوب
الورد اللى فتح فى جناين مصر زى أحمد 

عارف ياأحمد هى حاجة واحدة بس عايزاها منك 
ماتظهرش كتير فى الاعلام ....معلش
تافهين أصلهم ...
والحاجة الحلوة لما بيتكلموا فيها كتير 
حلاوتها بتقل وبتبقى ماسخة زيهم
خليك رمز زى ماأنت 
هتبقى أحلى كتير وهيعيش الرمز والأمل اكتر 

عارف طيب عجبنى ايه  تانى 
ان نفس السفارة دى
 اتبهدل الشباب عندها
 من البهوات فى الداخلية فى أول ظهور ليهم 
ويبقى الدرس المستفاد هنا 
انزل بعدد كبير ...السلطة ماتقدرش عليك 
وحتى الأخطاء عندك هتقل 

كتر خيرك ياأحمد
 انك فرحتنا وفهمتنا ان الأمل كبير
 واليوم الموعود قريب ان شاء الله 

الكلام الجاى لينا بقى 
نعرف ان المشوار طويل 
علشان نوصل لليوم اللى نرفع فيه العلم المصرى 
اللى مش هينزل تانى 
نفرح باللى عمله أحمد 
بس نتعب علشان الفرحة الكبيرة 
اللى لسه طريقها طويل 

--------------------

المجلس العسكرى وحكومة شرف 
يانهار أبيض على الكلام اللى كان فى بالى 
بس الطيب أحسن 
والدنيا صيام 

ينفع على الماشى كده أقولكم 

انى قبل حادثة المسودة اللى خنقتنى بجد 
ولما الاشاعات كانت مالية فيس بوك 
وحاسة ان الشياطين طالعة من تحت الارض تلعب فيه 
وقتها كان نفسى أصرخ 
(لا أسكت الله لكم حساً)

دلوقت بمنتهى الهدوء 
باقولكم 
أسكت الله حسكم أبدا
 ماانتم بتتكلموا بتفضحونا 

مسودة ايه حتى لو كانت جس نبض
مسودة !!
 مسودة!!
يعنى لما ربنا ينفخ فى صورتكم وتاخدوا رد فعل 
مجرد رد فعل رمزى وتسحبوا سفيرنا 
وكلنا عارفين انه هيرجع تانى 
ترجعوا فى كلامكم !
ده ايه العار ده 

عارفين المشكلة كانت فى ايه 
اننا بجد مكناش متوقعين منكم كتير 
ومكناش لاسمح الله طالبين حرب فى غير وقتها ولا حاجة 
بس مش كده 
ده اللواءات كانوا مصدعينا تليفونات 
وفجأة اختفوا 
استنى حد يطلع يقول حتى دى( مش حاشدة )
مفيش ....اتبخروا 
عموما 
لقد أسمعت لو ناديت حيا ..ولكن لا حياة لمن تنادى 
للأسف 

------------------

عمرو حمزاوى 

مقالك الشهير خلانى احترمتك 
وأول مالفت نظرى فى المعارضة الغير موضوعية 
هى كم القسوة الرهيب اللى عندنا 
وكان سؤالى الدائم 
ليه بنعمل فى بعض كده 

اتنين بالغين 
حبوا بعض 
ظروف ما تخصهم أجبرتهم ولو مؤقتا 
مايعلنوش علاقتهم دلوقت 
حصلت حادثة ...الله أعلم بأبعادها لانها مريبة 
مش عارفة بجد ازاى بنعتبر نفسنا مجتمع متدين 
لما مسكنا البنت دبحناها 

السياسى كتب مقال 
أنا شخصيا صحيت من النوم لقيته كاتب مقال 
بيقول فيه 
انه مش عايز يحرم نفسه ولا حبيبته 
من أمل فى القلب ولا بريق فى العين 
وبيوصف حبيبته انها سيدة قلبه
كفاية انه رسم على وشى وفى قلبى ابتسامة كبيرة 
مكانش بيقلل من مساحتها تدريجيا 
الا سخطى من موجة السخرية اللاذعة الغير مبررة 
والتجريح البشع اللى كان من نصيبهم هما الاتنين 
كان فيه نقد موضوعى للحالة والمقال ...جميل جدا 
بس الحكاية بسيطة 
وأقول تانى 
اتنين بالغين بيحبوا بعض 
مفيش موانع شرعية تمنعهم يتجوزوا 
ساعة مانسمع عنهم 
رد الفعل الطبيعى فى رأيى 
ربنا يتمم بخير ...يارب يسعدكم 
لما الاتنين يتجوزوا ويفرحوا 
ايه اللى حصل يعنى هيبوظ الدنيا 
نرحم بعض شوية ...لله 
ايوه .....لله 

8 التعليقات:



sony2000 يقول...

بجد ربنا يفرح كل اللي بيحاول يفرحنا ولو برمز بسيط كان ممكن يوديه فداهيه من اثر السقوط

ربنا يفرح الجميع ويفرح قلبك يارب

وبالنوسبه للي بيلعقوا علي المقال
دا كتير بحسو حقد مش اكتر

لان النصح بيكون بطرق احسن من كدا
ولا ايه..؟

شمس النهار يقول...

عارفة كلمة كنت هاقولها

:))))))

بجد قلتي كل اللي نفسي فيه

احمد الشحات عالج المصريين نفسيا
ربنا يحميه

اما حمزاوي
:))
ربنا يهنيهم ببعض ويتم لهم علي خير
وحاسة ان الموضوع متدبر لهم علي فضيحة
بس ربك ستار
وبصراحة حمزاوي طلع رااااااجل

حفيدة عرابى يقول...

سنسن
يارب ياسونى ...بس عايزين نركز بقى لليوم اللى نخلص فيه من اسرائيل بجد

مقال حمزاوى
هو كان فيه نوعين من النقد ...الموضوعى وده كان فيه انتقادات حلوة بج لان محدش معصوم من الخطأ
والتانى بقى مش حقد ولا حاجة بس احنا محتاجين نبقى بنى امين ونحسببعض شوية عن كده

شرفتينى ياسونى :)

حفيدة عرابى يقول...

شمس هانم
نورتينى :)
أصل لما يكون لاعننا مجلس عسكرى ولا حكومة
مينفعش يعنى كنا نقع ناكل فى نفسنا وخلاص
ربنا كبير بعت لنا سباير مان يينا ولو شوية أمل ان لسه الامل فينا فى ايدينا

حمزاوى وبسمة :)
ربنا فعلا يتم لهم على خير وبرضه عندى احساس المؤامرة ده

حضرتك شرفتينى

أ يقول...

كل سنة وانتي طيبة X اتنين (عيد ميلادك والعيد )

و دايما في احسن حال ان شاء الله :)

اندروميدا يقول...

كل سنه وحضرتك بخير ... عيد سعيد :)

يا مراكبي يقول...

كُنا أضحوكة العلم في مسألة المسودة، وهو ما يضع علامة استفهام هذه المرة دون غيرها، فالضغوط الدولية والداخلية هُنا لم يكن لها وضع من الإعراب، بل كان من الممكن أن نكسب أرضاً جديدة ه1ه المرة، لكن حكومتنا المؤقتة أضاعتها بغرابة شديدة

---

تهكم الكثيرين على قصة حمزاوي وبسمة أصابتني بالغثيان تماماً، وظهر الكثيرون في شكل قمئ وكأننا لم نتغير، فكم من مرة كنا نشكوا من قسوة المجتمع الظالم بأعرافه العجيبة الغير متوازنة، والتي تجعل من الكثيرين يعيشون في عذاب وتعاسة من أجل المظهر العام، لكن يبدوا أن مجتمع المتنورين من حولنا لم يتغير كثيرا بعد، مجرد كلام للكلام دون تطبيق، وكانت قصة حمزاوي وبسمة كاشفة لهذا التخلف

حفيدة عرابى يقول...

( أ)
وانتِ طيبة وبخير وفى أحسن حال ووحشتينى وكده :)
-----

اندروميدا
:)
وحضرتك طيب ودايما بخير

-----

باشمهندس أحمد
أهلا بحضرتك :)
ماهو أنا اللى مزعلنى اننا نبقى أضحوكة العالم بالطريقة دى بعد الثورة
حركة المسودة دى بوظت لى معنوياتى خالص

عمرو وبسمة كشفوا عيوب كتير جوانا وقسوة غير مبررة بنمارسها على بعض

تحياتى لحضرتك