العسكر والثورة

واضح ان الأيام اياها اللى كنا بنحاول نتحاشاها 
بقت أقرب مما نتخيل 
وجاية تجرى علينا بمنتهى الغباء 
واننا حتى مش هنلحق نفرح بأى انجاز لثورتنا دى 
ايه اللى الجيش بيعمله ده !!
تانى
 ايه اللى الجيش بيعمله ده !!
هو ميدان التحرير بقى من الأماكن المحرمة علينا ؟؟
طب ازاى 
الجنازة ونكد على الناس فيها 
الفطار وجرى وراهم
 وضرب واعتقال وتصرفات مباركية أصيلة 
مش التظاهر حق مشروع 
والاعتصام كمان من حقوقنا 
ده حتى الناس ماكنتش بتمارس حقوقها 
دى كانت بتفطر فى رمضان 
ايه يعنى 
هى البلد دى مش قامت فيها ثورة 
احنا مش قلنا عايزين حرية 
هو اللى ضرب الناس قبل كده ده مش مرمى فى السجن 
ولا احنا بيتهيألنا 
ازاى لوا يطلع يزعق لنا
 والتانى يحرض الشعب ضد الثوار 
وتحريضه يوصل لدرجة القتل 
والتالت بتاع الشرطة العسكرية
فرحان قوى بالبلطجية
وبيبص لهم بمنتهى الاعجاب
و بيتهم الثوار بالعمالة وانهم قابضين 
وبيروح يسلم على العادلى بحرارة 
وفى الاخر احنا اللى ننضرب 
هى البلد دى بتاعتنا ولا احنا لسه ضيوف ؟؟
ايه يامجلس العسكر 
هو أنت أقوى من مبارك 
ولا أشجع منه 
ده انت كنت جزء من سلاحه مش كله 
ايه اللى مقويك علينا؟
 وقلبك بقى جامد علينا كده 
ولا علشان خطتك فى التفرقة شكلها بتنجح 
ماتنخدعش باللى انت شايفه يافندم 
احنا نفسنا مكناش نعرف اننا هنعمل ثورة على مبارك 
طب اتعظوا شوية ...اتعلموا شوية 
اللى بعتوا لكم الف تحية من التحرير
 مش شطار قوى للدرجة دى 
ده الثورة لسه فى القلب والبال والخاطر 
ايه مبارك بيترمى لنا مقابل حكم العسكر ؟؟
لأ ياسادة 
صفقة غير مقبولة 
محاكمة مبارك حقنا وحكمكم مرفوض 
مش مقايضة ومش مبادلة 
ومش بنلعب 
ومش هننضرب
ومش هنتعامل تانى بمعاملة مبارك 
واللى هيعاملنا بمعاملته 
هيلاقى مصير أفظع من مصيره  
وهنفرح ببلدنا 
وهنبنيها زى مااحنا عايزين 
ومش هيحكمها عسكر 
ياسادة ..افهموا 
تذوقنا طعم الحرية 
ومن ذاق عرف 
واستمسك ..وأصر 
وعض عليها بالنواجذ 

--------

كنت فى منتهى الحقد على اللى فطروا النهارده هناك 
لغاية ماعرفت اللى حصل 
مبقاش حقد 
بقى فخر بالرجالة اللى بيثيروا اعجابى دايما 
بس زعلانة اننا بنرجع زى زمان 
عدد قليل وقوات كتير 
تستفرد بيهم 

---------
يامجلس العسكر 
شرطة مبارك 
وأمنه المركزى كانوا بالنسبة لى قوة احتلال 
وانتم دلوقت زيهم بالظبط 
يامجلس العسكر 
طب والله أنا مكسوفة من اسرائيل 
وهى عارفة ان شرطتى وجيشى بيضربونى 
وانى بكرههم هما الاتنين 
يامجلس العسكر....حتى النبضة محتلة 
------
كنت عايزة اكتب كتير عن اللحظة اياها 
اللى مبارك قال فيها 
أفندم ..أنا موجود 
بس واضح يامصر ان لسه كتير 
وان على رأى تميم 
الدولة مفضلش منها الا حبة شوم 
وياحبيبتى معلش 
هانت وبانت وكلها كام يوم 

8 التعليقات:



فاتيما يقول...

كنت هناك لحد اللساعة اتنين
وبعدين مشيت
كتبت بوست عن اللى حصل
بس مش طالع ف الريدر ابقى اقريه
لما تروقى

كنت بحسدهم زيك
وقت الفطار
وبقول ربنا يحرسهم
وسمعت بودنى
وانا ف بيتى
صوت طلقات الرصاص
بسمعها لأنى قريبة م التحرير
زى منتى عارفة
ودعيت ربنا ينتقم منهم
ويورينا آياته

الديب هيفضل طول عمره ديب
وأنيابه بتغرس فينا اهو
فماذا نحن فاعلون ؟

دعواتك يا فيدو
وربنا ينتقم منهم داخلية وجيش وفلول
أجمعين
اللهم آمييييييين


سلامى لماما

ومش قادرة أقولك روقى ..
كنت قولتلها لنفسى
بس كلام احمد كله بيتحقق
و ربنا يساعدنا زى ما قضينا على مبارك نقضى على كلابه كلهم ..

يا رب

حفيدة عرابى يقول...

أنا مخنوقة ياطمطم بطريقة أكيد انتى متخيلاها
قرأت تعليقك من بدرى وقرأت البوست بتاعك واخدته فيس بوك ومش عارفة اطلع كل طاقة الغضب اللى جوايا
كلام أحمد كله بيتحقق بغباء
بيتحقق بطريقة هتجننى
بيتحقق بطريقة بتحسسنى انى شفت الفيلم قبل كده
وأنا اللى كنت مختلفة معاه ولأ ياأحمد علشان البلد واسقاط الدولة غير اسقاط النظام وخلينا نضغط ..نضغط لغاية مانوصل للى احنا عاوزينه ونحافظ على البلد ويمشوا بسلام
أنا غلطانة
الديب مش هيسيب الفريسة بالساهل أبدا
تربية مبارك هتطلع ايه يعنى
ربنا كبير
يارب

شمس النهار يقول...

اللي حصل النهارده غريب جدا
خلاص كده يخرسوا الناس تاني
الغريب ان في ناس في الشعب بتقول احسن
بعد كل اللي حصل لسه في ناس بتقول احسن
انا خايفة علي الثورة من الشعب

Ramy يقول...

الايام اللى جايه
هتكون سوده عليهم بأذن الله

مش مننا


هما هيبتدوا ياكلو ف بعض

بعد ما ابتداها حسنى و قال ان الطنطاوى صاحب فكرة قطع الأتصالات

و يامسهل يظبطوا بعض و ياكلوا ف بعض

ابراهيم رزق يقول...

الجيش و الشرطة اعتصمت فى ميدان التحرير

تحياتى

حفيدة عرابى يقول...

شمس هانم
أهلا بيكى
أنا امبارح كنت فى منتهى الاحباط بس النهارده انا حاسة ان كل الحركات دى ان شاء الله ولا هتجيب نتيجة
الحق هو اللى لازم ينتصر
يحاولوا يشوفوا لهم صرفة على الاقل فى حكاية الشهادة فى المحكمة قبل مايتشطروا علينا
هنبقى كويسين ان شاء الله
احنا بس محتاجين نحاول نكسب الناس على اد مانقدر ..يارب
تحياتى لحضرتك


-----------


أستاذ رامى
صح كلامك وده ان شاء الله اللى هيحصل
أصل الحق هو اللى لازم ينتصر مش الباطل
ربنا كبير
تحياتى لك


---------

أستاذ ابراهيم

عقبال ماالاهالى تروح كده تفض اعتصامهم قادر ياكريم :)
تحياتى لحضرتك

لورنس العرب يقول...

ازيك يا ميس
انا غيرت حسابي على الفس بوك- لغيت القديم لأن كان فيه شخصيات بتوجعلي بطني، فبدل ما احذفهم حذفت نفسي أفضل، وعملت واحد جديد لكني فشلت في إضافة أي احد إلا القليل لأن عليا حظر وفيه مشكله في الحساب، مش بعرف أضيف حد إلا لما يضيفني هو الاول
ما علينا
انا
moataz_farouk@yahoo.com

حفيدة عرابى يقول...

لورنس العرب

أهلا بحضرتك
تم يافندم