محكمة

محاكمة صورية 
جلسة اجراءات 
مش هيحضر أصلا 
مجلس العسكر يقدم أقوى عروض الاستعباط 
بص العصفورة

-------

كل ده كلام جميل وصح ومقتنعة بيه 
وأصلا عقلى مش مستوعب أبدا ان المحاكمة حقيقية 
لكن 3 أغسطس 2011 يوم تاريخى 
ومصر كعادتها كان ليها السبق وعلمت جيرانها 
يعنى ايه تعمل ثورة وتحاكم رئيسها بعد ماتخلعه 
الثورة ماكملتش والمحاكمة مش حقيقية 
مش مشكلة 
اللى بدأ الثورة يكملها 
واللى فرض المحاكمة قادر يخليها حقيقية 

------

مبارك صعبان عليا ؟؟؟ أبدا 
لكن ده ميمنعش ان الوقت ده وقت العظة ووقت الاعتبار 
ولو مااتعلمناش حاجة من اللحظة دى هنتعلم امتى 
امتى ممكن نتعلم منديش الامان للدنيا 
امتى ممكن نتعلم ان النعيم زائل 
امتى ممكن نعرف ان مكر ربنا لا يقارن بمكرنا 
وان ابننا مش هيورث الحكم ولو جهزنا للموضوع عشر سنين 
ولو سخرنا مقدرات دولة لكده 
ولو شغلنا معانا صفوت وسرور وزكريا وغيرهم 
ولو سمعنا كلام أمريكا ولو ركعنا لاسرائيل 
امتى هنعرف انه فى يوم عادى جدا شبه كل الايام 
هيخرج شوية شباب فى مظاهرة عادية خالص
توصل فى الاخر لاننا نبقى بره الحكم والسلطان 

-----------

عبد الحميد شتا
كان راح من بالى بصراحة 
لكن صديق على فيس بوك كتب اسمه من دقايق 
خلانى قلت آآآآآه 
ده لوحده لازم يتحاكم علشانه مبارك 

اللى صعبان عليهم مبارك 
فكروا كده فى الولد اللى رمى نفسه فى النيل بنفس مكسورة 
بعد مااتقفلت كل الابواب فى وشه 
ومش ممكن بعدها هتتعاطفوا مع بليد الحس 

--------


محاكمة مبارك مش تشفى ولا شماتة
 ولا غل ولا فراغ ولا بتعطلنا عن انتاج 
محاكمته قصاص والمفروض متكونش لقتل الشهداء بس 
محاكمة مبارك أساس لحياة جديدة
 الرئيس فيها موظف والموظف لازم يتحاسب 
مبارك وترزية القوانين وكل نواب البرلمان طول تاريخه
 سبب فى اليوم التاريخى ده 
لو مبارك كان رئيس من اللى بيتحاسبوا دول
 مكانش وقف قدام قاضى 
ده لو وقف

--------

العبارة 
قطر الصعيد 
الكرامة المهدرة 
القمح اللى بيتزرع مكانه فراولة وكنتالوب 
التعليم الفاشل 
المستشفى اللى المصرى بفطرته سماها مشتشفى 
السفارة اللى مش ممكن مصرى يقرب منها وهو فى الغربة 
السرطان اللى نهش فينا بعلمه 
اسرائيل اللى بقت أقرب لينا من اخواتنا 
العراق اللى ضاعت 
السودان اللى اتقسمت 
افريقيا اللى كرهتنا 
الخنقة والتكشيرة اللى على وشنا 
الرشوة اللى بقت الاصل 
رجال الاعمال والوزرا اللى ميعرفوش ربنا 
العيل الرخم 
اللى تخيل انه ورث الارض عن الاباء والاجداد 
الشريف اللى بيسرق فنعينه فى لجنة سياسات 
الشباب اللى ميعرفش يعنى ايه مصر 
ولا عنده انتماء 
العرب اللى كرهونا لما خذلناهم 
أو احتقرونا لما فهموا ان ملناش كرامة فى بلدنا 
هتتحاكم على ايه ولا ايه بس

--------

3 أغسطس 2010 
كان يوم عادى جدا 
أكيد بدأت يومى بعادتى الذميمة 
قراءةالجرايد 
واكيد كانت الاخبار مستفزة 
وتصريحات صفوت وسرور وأشباههم 
أكيد قفلت يومى من أوله 
ويمكن حسن نافعة كان كاتب يوميها مقال فى المصرى اليوم 
ويمكن بلال فضل كان هون عليا شوية بسخريته المعتادة
واكيد اتناقشت فى الاخبار 
وشيرت خبر او اتنين 
لكن اللى واثقة منه اكتر 
انه مخطرش على بالى أبدا 
ان بعد سنة هيقف مبارك قدام محكمة 
ده لو وقف 
يتحاكم على جزء بسيط جدا من جرايمه 
أنا لما بفتكر اللى حصل 
والاقى قدامى حاجة صعبة 
باقول لنفسى 
ده احنا خلعنا مبارك 
يارب 
أنا عارفة ان المحاكمة المرة دى أى كلام 
بس أنا عايزة اقولها بقلب جامد 
ده احنا حاكمنا مبارك 
أنا عايزة الريس الجديد ييجى متربى جاهز 
عايزة العيال الصغيرة تتنفس هوا اتحاكم فيه مبارك 
وتكبر وهى عارفة ان الروساء مش آباء 

--------

الطريق طويل 
وواضح ان اللى جاى فى الثورة أصعب 
بس اللى فات منها جميل ومبهج 
وبالمناسبة 
على بالى النهارده 
جمال بدوى وعبد الحليم قنديل 
ابراهيم عيسى ونهى الزينى 
هشام البسطويسى وزكريا عبد العزيز 
يحيى حسين عبد الهادى وحمدى قنديل 
كفاية والوطنية للتغيير 
مجدى أحمد حسين وسليمان خاطر 
خالد سعيد ومحمد البوعزيزى
وكل واحد بكلمة ..بحرف ..بنقطة دم 
كان ليه دور انى أشوف اليوم ده 
يارب لك الحمد كما ينبغى لجلال وجهك وعظيم سلطانك 
المجد للشهداء 

6 التعليقات:



ابراهيم رزق يقول...

بسم الله الرحمن الرحيم

فاليوم ننجيك ببدنك لتكون لمن خلقك اية وان كثير من الناس عن اياتنا لغافلون

صدق الله العظيم

يا سبحان الله كان من الممكن ان يتوفى فى اى لحظة قبل الثورة او بعدها و لكن الله اراده مثل فرعون ان ينجيه ببدنه ليكون اية لكل ظالم و كل مفترى و ماذال غافلا لقد حضر و هو بكامل هيئته و صبغة شعره حضر بكوافيره بسلاطته ببابا غنوجه
و الله العظيم اول مرة احس ان مجهود الثورة لم يذهب هدرا يكفينا وقوفه خلف القضبان
بوستك جميل و لو اعطيته حقه فى التعليق ساتجاوز مساحته
تحياتى
صحيح متشكر على تعليقك على بوست انا مريض على فكرة انا مش زعلان من الطرف اللى تقصديه بالبوست بل مازلت اكن له كل محبة و معزة و تقدير
انا زعلان من موضوع معين مسيرك تعرفيه او ممكن تكونى عارفاه شخص يتمسح بالدين و يقول قال الله و قال الرسول و الله و الرسول منه براء شخص ذبح انسان اكن لها كل معزة بسكين القهر و انا اعرف ان اكثر ما يضايقه و يؤلمه هو القهر
مش عاوز اطول تانى بس فعلا متشكر لتعليقك و محاولة فهم الموضوع

شمس النهار يقول...

بوست اكتر من رائع

تسلم ايدك بجد

حفيدة عرابى يقول...

أستاذ ابراهيم رزق
أهلا بحضرتك
أنا شفت تعليق حضرتك امبارح وبجد أنا مش عارفة اتكلم فى موضوع المحاكمة ده
بحاول أجمع كلام مش عارفة
لانى فعلا حاسة بامتنان شديد جدا لربنا سبحانه وتعالى ثم للشهداء والاحياء اللى تعبوا علشان نشوف اليوم ده
اللى ينادى فيه عليه بصفته المتهم الاول ويرد افندم أنا موجود
ده دى قصة لوحدها
ده بالاضافة ان لسه ورانا هم كبير
نخلص من مجايبه وتبقى بلدنا بتاعنا
ربنا يقدرنا


المواضيع التانية
كويس جدا ان حضرتك مش زعلان من الحكاية اللى أنا اتكلمت فيها وأنا كنت متوقعة كده بصراحة ومش غريب على حضرتك
لكن الحكاية التانية محتاجة منى تركيز
أحاول كده وربنا يسهل على مااعرف اوصل
وربنا يبعد عنا جميعا كل مسببات القهر
تحياتى لحضرتك

حفيدة عرابى يقول...

شمس هانم
أهلا بك
ده من ذوقك والله
بس البوست كان يوم 3 أغسطس قبل المحاكمة مش بعدها
بعدها انا لسه مش عارفة اتكلم
تحياتى لحضرتك :)

norahaty يقول...

لكن اللى واثقة
منه اكترانه مخطرش
على بالى أبدا ان بعد
سنة هيقف مبارك قدام
محكــمةده لو وقف
يتحاكم على جزء
بسيط جدا من
جرايمه
========
ربك لما يريد
سبحانه وتعــالى
قادر وغيره لا يقدر

حفيدة عرابى يقول...

دكتور نور
أنا اسفة يادكتور
عدم التركيز هو اللى خلانى مش رديت على تعليقك واتأخرت
قادر ربنا على كل شىء يادكتور يخلصنا منه ومن تربيته اللى بلانا بيها
يارب