هنا قامت ثورة


بمنتهى الأمانة أنا معرفش 6 ابريل عميلة لأمريكا ولا لأ 
لكن الاختيار كان سهل بالنسبة لى لاسباب بسيطة قوى 

مين اتهم 6 ابريل ؟؟

المجلس العسكرى 
مبدئيا عيب قوى لما سلطة فى حجم المجلس العسكرى
 تتهم أفراد وحركات فى بيانات 
اللى أنا أفهمه ان لو 6 ابريل عميلة والمجلس واثق من عمالتها 
فاحنا عندنا نائب عام صوت الناس راح وهى بتطالب باقالته 
والمجلس حسسنا ان اقالته حاجة عيب لاسمح الله 
المجلس العسكرى أعلى سلطة فى البلد 
و بيمتلك سلطات رئيس الجمهورية والبرلمان كمان 
ممكن ياخد الادلة ويوديها للنائب العام 
والنائب العام يحول 6 ابريل للجنايات
 حتى ولو بتهمة الخيانة العظمى ويتحاكموا محاكمة عادلة
 ولو ده حصل والمحكمة حكمت على 6 ابريل واشباههم بالاعدام 
أنا مش هانطق تانى ولاهاجيب سيرتهم ..محدش فينا بيحب الخونة 
لكن القصة مخلصتش كده ..لسه فيه كلام كتير يتقال 

أولا 

أنا لما باسمع كلام المجلس العسكرى 
لا ارادى باقول سمعنا وعصينا 
المجلس عودنى انه بيكدب 
وأنا معقدة نفسيا من مبارك وأيامه ونظامه ورجاله 
وحياتنا معاه اللى كانت كلها كدب فى كدب 
فلما المجلس وباسلوب ميفرقش ابدا عن اساليب مبارك 
يخون 6 ابريل 
يبقى انا لا ارادى ضد المجلس 
ماهو مينفعش 
مينفعش أصدقك يافندم 
9 مارس 
المتحف 
9ابريل
يعنى دى مجرد أمثلة بس للمجلس
 قال ساعتها مفيش عنف ...مفيش ضرب 
وأنا كنت قاعدة فى بيتنا وصوت الرصاص فى الفيديو عاملى رعب 
ماعلينا 
مصداقية المجلس العسكرى فى الحضيض بالنسبة لى 
وهو المسئول عن المشكلة دى مش أنا 
وهو المطالب بجهد كبير لكسب ثقة فئات كتير من الشعب 
لو هو عايز يكسب ثقتهم 
لو ...

ثانيا 

ليه الكلام دلوقت عن 6 ابريل ؟
رأيى الشخصى 
ان 6 ابريل هى زعيمة هتافات التحرير القوية 
اللى طالبت باسقاط المشير الاسابيع اللى فاتت 
يبقى المجلس فى نظرى بيخون 6 ابريل لمصلحته وأمنه 
مش لأمن الوطن 
المجلس وصل لى احساس قوى جدا انه خايف من الهتاف ده 
مع انه المفروض يبقى أقوى وثابت عن كده كتير 
المجلس كلامه كان ورا بعضه واشاراته مرعبة بصراحة 
يعنى 6 ابريل خونة 
2 من مرشحى الرئاسة عملاء لأمريكا 
يبقى الثورة دى فى النهاية هتخلص 
على انها مؤامرة من سكان بلوتو لغزو مجرة الدرب اللبنى 
عن طريق احتلال كوكب الارض 
مش تهريج والله 
لو تصريحات لواءات المجلس استمرت بنفس الوتيرة 
فى خلال اسبوع هتبقى الثورة كلها عمل تخريبى 
ونرجع تانى لأيام الغير مغفور له منى على الأقل 
الاستاذ تامر من غمرة 

ثالثا 
معرفش والله العظيم 6ابريل عميلة ولا لأ 
ومعرفش اخدت فلوس من امريكا ولا محصلش 
ولو خدت كان فى اطار ايه 
وفى قلبى كده ان فلوس امريكا حرام 
بس برضه أنا اسمع ان امريكا بتدينا معونة
واننا بيوصلنا منها معونة عسكرية 
هل يصح يعنى اننا بصفتنا فى بلد حر وديموقراطى 
نسأل يعنى بدون اساءة الأدب 
ايه ظروف المعونة دى 
كام المبلغ ؟ بتتصرف فى ايه ؟
يامجلس بلاش تتصرف كده معانا 
ده احنا شعب واحد ..احنا مش أعداء 
اقسم بالله العظيم يامجلس 
انى ماعايزة حد يتطاول عليك 
سألتنى ليه ؟؟
لانك بمزاجى أو غصب عنى قائد جيشى 
جيشى اللى عايزة اخوف وارعب بيه اسرائيل
لما بيطلع حد من اللواءات يتكلم كلام غير مقبول 
بيبقى نفسى اسد ودان اسرائيل 
واخليها ماتسمعش الكلام اللى احنا بنسمعه 
حسيت بالمثل الشهير 
الصيت ولا الغنى 

ماعلينا تانى

رابعا 

يامجلسنا العسكرى الموقر 
انت بتتهمنا بالخيانة والعمالة 
زى الفل 
مبارك ...
ايوه هو 
محمد حسنى مبارك 
اللى بقى اسمه المخلوع 
ايه وضعه فى الحكاية دى ؟
خاين يعنى ولا ابن بلد وكده ؟
أصل حضرتك عامل امتحانات على فيس بوك 
وعندك أمل يعنى تعمل  له جنازة عسكرية 
وأنا مش عارفة السؤال ده يتقال ازاى من أصله 
مبارك عندى هو التعريف الرسمى للعمالة 
ممكن يامجلس وانت بتودى الأدلة ضد6 ابريل للنائب العام 
تبقى تاخد مننا الادلة على عمالة مبارك كمان 
وياريت يتحاكموا نفس المحاكمة 
قدام نفس القاضى 
لو عملتها يامجلس 
هاصدق ان شهر ابريل كله عملاء 
مش 6 ابريل بس
يامجلس
مينفعش حضرتك تبقى أسد علينا احنا بس 

خامسا 
أصدقاء أعزاء سألوا سؤال استنكارى 
وحبيت أجاوب عليه هنا 
ليه بقى الثوار راحوا وزارة الدفاع ؟؟
والله هو أنا كنت مشغولة ومش متابعة الموقف من أوله 
ولما سألت 
عرفت انه نوع من أنواع الضغط على المجلس 
لانه حقيقى مش بيتحرك الا بالضغط 
ولاننا معندناش أى سلطة فى ايدينا 
غير شوية العيال اللى حيلتنا اللى قاعدين مرابطين فى التحرير 
وعيال دى علشان فاتيما خلتنى اخدت بالى النهارده 
مش مقصود بيها تقليل من شأنهم 
لكن هى حب ليهم بس مش عارفة أوصفه 
لانه قريب من مشاعر الحنان اللى عايزاها توصلهم 
ماعلينا 
احنا مالناش غير التحرير ينصفنا فى البلد دى 
لغاية ماالمجلس يرحل
 ويبقى عندنا برلمان ابن ناس وريس 
بس فيه كتير من الثوار شايفين
 ان الخطوة دى كانت تصعيد متهور 
وجهة نظر تحترم 
لكنها متنفيش ان من حق أى فرد يخرج فى مظاهرة سلمية 
حتى لو غيره مش موافق على أهدافها 
وحق المجتمع بس هو ضمان سلمية المظاهرة
عرابى باشا جدى حبيبى 
خرج هو كمان فى مظاهرة سلمية 
والخديوى توفيق اللى طلع غلبان على فكرة 
حاول يجهض المظاهرة معرفش 
جرب سلاح الكبر التركى مع عرابى مقدرش 
طلع غلبان خالص وسمع الكلام مؤقتا
ليه باقول على توفيق غلبان ؟
دى بقى تبقى  رقم 6 

سادسا 

أكبر غلطة عملها المجلس فى حق البلد دى 
وأكدت لى انه كداب 
انه حرض الشعب على الثوار 
هى دى النقطة الأهم فى الموضوع 
دى أسلحة غير شريفة يامجلس 
والشرفاء أنا اسفة لازم تكون اسلحتهم شريفة 
عموما 
التاريخ مش بينسى 
والايام لسه قريبة 
ومبارك اشتغل أنا اسفة يعنى فى النحنحة 
وقال انا عايز اموت هنا 
وعمل موقعة الجمل تانى يوم 
وكان فيها نهايته بإذن الله 
يامصر هانت وبانت كلها كام يوم 
لأ لأ البوست مخلصش 

يامجلس 
أنا مجنونة بحب البلد دى 
وقلت نعم فى الاستفتاء علشان اقلل مدتك 
وترحل بسلام لانى خايفة عليها 
من مشكلة بينا وبينك وجيشنا تحت ايديك 
واعرف ملايين غيرى مجانين بحبها اكتر منى 
منهم اللى قالوا نعم ومنهم اللى قالوا لا 
ومنهم اللى مانزلش من بيته يوم الاستفتاء 
ومنهم اللى بيلعن ابوها بعشق زى الداء 
متخليش ضهرنا للحيطة يامجلس 
بتكلم بجد والله 
ماتضغطش علينا وتخلى ضهرنا للحيطة 
انت عسكرى وعارف الكلام كده 
نفسى كده تنسى مبارك وأيامه وتهديداته 
وتحمى الثورة بجد 
وترجع بقى ترسم على القلب وجه الوطن 
لمصلحة الوطن ومصلحتك ومصلحتنا 
يامجلس 
هى حاجة واحدة بس 
لو استوعبتها كل حاجة هتبقى تمام 
وهتخلص كل مشاكلنا معاك 
لقد قامت هنا ثورة 
كان أهم شعاراتها 
ارفع راسك فوق انت مصرى 
ومش هتنزل يامجلس 
لا بتخوين منك ولا ببلطجية 
ولا بفض اعتصامات ولا بتشويه سمعة 
ولا بمحاكمات عسكرية 
ولا بمتحف يامجلس 
ولا بتحريض للشعب ضد الثوار 
أصل طعمها حلو قوى والله 
وصعب حد ينساها 
طب جرب كده تقولها وترفع راسك وجسمك لفوق 
جرب كده تفتح صدرك ياخد اكبر كمية اكسجين 
وبعدين تخلى قلبك قبل لسانك ينطقها 
دى بقت عاملة زى ماية النيل ..ادمان يامجلس
اللى يقولها لازم يفضل رافع راسه طول عمره 
يامجلس استوعب ..
هنا قامت ثورة 

13 التعليقات:



وجهة نظري يقول...

+1000 A

شمس النهار يقول...

الايام الجاية صعبة
وانا ضد تخوين بعضنا
ومش كل من سافر بره بقا بيقبض واجندة

norahaty يقول...

ليه مصدقتش الكلام
عن 6ابريل أو غيرها؟
لانها صادرة من جهة سلطة
عليا!وماأتعودتش وللأسف على
الصدق فى كلام من اى سلطة عليا
فى بلدنا ومن زمااااااااااان

حفيدة عرابى يقول...

وجهة نظرى
أخجلتم تواضعنا يافندم
حضرتك شرفتنى

شمس هانم
ان شاء الله ليس بيننا خائن :)
تحياتى لحضرتك


دكتورتى العسولة

اختصرتى كلام كتير قوى بتعليقك ده :)
السلطة فى بلدنا فاقدة للمصداقية للأسف
شرفتينى يادكتور

MR.PRESIDENT يقول...

الثورة ستكون كالسيل تضرب كل من يحاول أن يوقفها بساعديه شاء من شاء وابي من أبي

وعايز أقول لأي حد واخد مبارك مثل أعلي
إن عدتم عدنا

يا مراكبي يقول...

:-)

المجلس العسكري زيه زي أي حد - مهما كان - لما هيكون في سدة الحكم: هيواجه مليون حاجة مش بتيجي على بال أي حد أحادي النظر

- أمريكا
- اسرائيل
- ايران
- الدول العربية
- أوروبا
- تدبير احتياجات القمح والبترول والسولار والرواتب الشهرية
- الحفاظ على استمرارية الكهرباء والمياه
- جميع من كانوا بصلة ما بالنظام السابق لا يمكن اقصاؤهم هكذا من الحياه وكأنهم جمل أجرب لا نتعامل معهم حتى يموتوا هم وعائلاتهم

كل ذلك سيجعل أي حاكم يفكر مليون مرة قبل أن يتخذ أي اجراء قد يكون من شأنه زعزعة التوازن الحادث حالياً، والذي قد يحسبه الناس تواطؤاً

كل ما تم ذكره في هذا البوست ستجدين الإجابه عنه داخل القائمة الموجودة أعلاه هُنا، وهذا ما يفسر لماذا لم يحدث كذا وكذا حتى حينه، فالقيود كثيرة وعنيفة، والتصادم معها لابد أن يكون بحساب

حفيدة عرابى يقول...

ريسنا الغالى :)
وأنا كمان هاقوله :)
واللهم آمين
شرفتنى يافندم

حفيدة عرابى يقول...

باشمهندس أحمد
:)
أولا يادى النور وأنا اقول المدونة منورة ليه ..اتارى الباشمهندس موجود وتعليقاته منورة صفحات التعليقات
طب حضرتك كنت قلت .نجهز عشا ..سحور
فراخ محشية ..زبادى حتى
أهلا بحضرتك يافندم :)

:)
أفهم من تعليق حضرتك ان مفيش مؤامرة ولا حاجة لاجهاض الثورة اللى طلعت بيها من الدنيا :))
ياريت يافندم والله
اتمنى من كل قلبى ان كل القلق والتوتر اللى انا بحس بيه ده يطلع غلط

مش هتناقش مع حضرتك :)

أنا خلصت كتير من الطاقة النفسية اللى هى قليلة أصلا الايام اللى فاتت فى الموضوع ده
أنا عايزة اعمل لايك على التعليق مش عارفة :))

هو بس المجلس ده يبطل يعاملنا معاملة مبارك وانا ممكن أبقى هادية تدريجيا ربنا يسهل لغاية ماربنا يكرمه ويخلص مدته ويرحل بقى


معترفة ان الخبرة بتاعتى صفر فى ادارة البلاد بعد الثورات
اللى مضايقنى ان الاحلام كانت كبيرة قوى والمشاكل والخوف دلوقت كبير قوى
يارب يافندم كل حاجة تعدى على خير

بجد بجد حضرتك شرفتنى :)

الحــب الجميـــل يقول...

كل عام وانت طيبه وبخير يا رشا


۩ رمضان كريم ۩

حفيدة عرابى يقول...

الحب الجميل
الله أكرم
كل سنة وانت طيبة وبخير وربنا يفرحك بعلياء دايما
بوسيهالى وقوليلها مس رشا بتقولك احنا بينا وبين بعض عيش وطومان باى ولا عيش ونابليون ؟ :)
وحشتينى ياايمى قوى انت ومارو ودودو
سلمى عليهم قوى
كل سنة وانت طيبة :)

كيــــــــــــارا يقول...

احنا بنمر بحتتة منعطف يا يودينا كلنا لفوق يا ينزلنا لتحت

ربنا يلطف ويستر

د. ياسر عمر عبد الفتاح يقول...

كل عام وحضرتك بخير ,,
ربنا يتقبل منا صالح الأعمال
ويقوينا على الصيام

حفيدة عرابى يقول...

كيارا
ازيك ياجميل
هيودينا فوق ان شاء الله
قولى آمين :)


دكتور ياسر
عاش من شاف تعليقاتك يادكتور
كل عام وحضرتك طيب وبخير
رمضان كريم يافندم
تحياتى لحضرتك