اعتراف

أنا عندى خوف مرضى على ماما 
لأ مرضى ايه.. ده خوف قاتل 
الدنيا بقت مرتبطة فى نظرى بصحتها 

صحتها كويسة...
 يبقى أنا كائن حى يؤدى أدوراه المطلوبة منه بشكل جيد 
لكن جواه خوف بيخلى مساحة الاستمتاع بالدنيا مش كافية
و صحته النفسية معقولة لكن مش فى الحدود الطبيعية 

تعبانة ماما شوية لاقدر الله 
لأ بجد أنا مش عايشة 
ومش عايشة دى محتاجة مجلدات لوصف تفاصيلها 
من أول التوتر والقلق والامراض الغريبة والعجيبة اللى بحس بيها 
وبتروح خالص لما ماما تبقى كويسة 
ممكن نقول انى وقتها لاأصلح ابدا للتعامل مع البشر 
وبحس انى بعمل أقل قدر من الحاجات المطلوبة منى 
وبوصل أحيانا لمرحلة انى مش قادرة اسمع أى أصوات جنبى 
لأ التفاصيل كتير ولو طولت فيها شوية 
هاجيب اكتئاب للبلوجر كله 

الست الغلبانة بقى بتعانى من الموضوع ده معايا 
وبتزعل لما تلاقينى كده وأنا مش قادرة اتغير

يعنى لو مثلا  تعبت أى تعب عادى 
مش الحاجات التانية الصعبة ربنا يعافينا منها 
ياااااااه ..
لازم تلاقينى واقفة باقولها حاسة بحاجة ياماما ؟؟
 يعنى انت كويسة ؟؟؟ طب والله كويسة ؟؟ 
قولى بس  لو حاسة بحاجة

الموضوع كمان بقى فيه عقد وكلاكيع نفسية 
يعنى مرة كانت تعبانة وكان فيه مشكلة فى القلب 
وأنا متعودة انى أقيس لها النبض 
ولقيت فيه نبضات بتفلت 
مش عارفة الوصف ده طبى ولا لأ 
بس حسيت فعلا كل كام نبضة كده فى واحدة بتفلت 
أنا من ساعتها مش قادرة اقيس لها النبض 
ولو يعنى قست النبض وأنا فى قمة الاضطرار  
لازم اعيده  اكتر من مرة 
لانى بقيس نبضى أنا 
اللى بتفلت منه نبضات برضه ساعتها

فكرت اروح لدكتور نفسى 
بس قلت الفلوس اللى الراجل هياخدها هتجيب لى اكتئاب لوحدها :)
وبعدين هاقوله ايه وهيعمل ايه يعنى ؟؟
هيخلى ماما صحتها كويسة ؟؟ هيدينى مثلا حبوب مضادة للقلق 
واحدة صاحبتى قالت لى دكتور ايه انت تطلعى على أقرب صيدلية 
تجيبى حاجات من اللى بنسمع عنها دى اللى بتعمل دماغ 
وتضربيهم وخلاص 
لأول مرة اتعاطف مع مستخدمى البرشام :)
ماهى الناس دى اكيد قلقانة أو زعلانة من حاجة يعنى 
ومش هيضربوا برشام منهم لنفسهم كده 

أنا قلبى تاعبنى قوى وعارفة ان الحل حاجة واحدة بس 
ان ربنا سبحانه وتعالى ينعم عليا بنفحة ربانية 
تلمس قلبى وتطبطب عليه وتهديه وتطمنه وتثبته 
وده مش كتير ابدا على ربنا 
اللى أنا بجد زعلانة من نفسى وانا بشتكى كده 
لانى ياما اشتكيت له وانقذنى من مواقف مريعة 
محدش كان يصدق اننا ممكن نخرج منها 
وكان سندى سبحانه فى كل مرة دعيته فيها 
لدرجة انى بقيت باتكسف من نفسى 
وأحس انى واخدة اكتر من حقى
 وانى فعليا مااستحقش الكرم ده كله 
وخصوصا لما ارجع اشتكى وأنا عارفة الحل فين 
بس أنا فعلا تعبانة 

امبارح كنت فى مشوار وعرفت من اخويا انها تعبانة شوية 
وقالت له مايقوليش علشان مااتخضش
طبعا مش هاعرف أوصف أنا روحت ازاى 
وكان حالى ايه فى المواصلات
 وازاى كان نفسى اخد السلالم جرى ومقدرتش ابدا
 وطلعت بمنتهى الهدوء لانى بجد مش عارفة اطلع 

هى النهارده الحمد لله كويسة
 وكان فيه تعب عارض كده مش خطر خالص الحمد لله 
وخلاص مش موجود ونامت 
بس تانى أنا تعبانة 
ومش عارفة أبدا أعيش بالقلق ده 
انتم بقى هتدعولى أنا عارفة ومتأكدة 
محتاجة أنا اللمسة الربانية دى على قلبى والطبطبة عليه 
محتاجاها قوى قوى فوق ماحد يتخيل 
انتم هتدعولى 
وأنا كمان هادعى 
وربنا هيستجيب وهابقى كويسة ان شاء الله 
اكيد فيه حالات كانت زيى كده وخفت :)


علشان بقى محدش يقلق 
وخصوصا الاقارب الاعزاء اللى بيشوفوا المدونة 
والله العظيم هى زى الفل دلوقت 
ونايمة وأنا كمان كويسة وهنام حالا 
محدش يقلق أنا باقول اهو :)


أنا هاقفل التعليقات بقى وانتم تدعولى فى سركم 
مش عايزة أصوات كتير فى مدونتى :)
أنا واخدة أجازة 24 ساعة بس 
وهارجع تانى افتح الشبابيك ان شاء الله 
ولو كلمتونى فى الموضوع هاعيط بجد 
المهم تكلموا كمان  المجلس العسكرى 
مايعملش حاجة تضايقنى فى الاجازة القصيرة 
لانى مش مستحملة لوحدى


اتفقنا ؟:)