يارب

أنا فرحانة
 
من ساعة أحكام البراءة اياها
 وأنا فرحانة قوى 
ومتأكدة ان دى تدابير ربنا 
اللى بتجمعنا كل مانتفرق 

أنا فرحانة

 الفرحة اللى بتنسى أى حاجة تانية بتزعل 
فرحانة الفرحة اللى بتخلى عنيا تدمع 
وقلبى يبقى جوه الضلوع
 بيعمل حاجات مش عارفة أوصفها
 
أنا فرحانة

 الفرحة اللى بتكسف دى 
آه أنا مكسوفة قوى من ربنا 
انى فى لحظة كده قلت لنفسى
يااااه 
بتحبنا قوى يارب كده 
طب نشكرك على فضلك علينا ازاى 

أنافرحانة

 الفرحة اللى مخليانى بستغرب على حال مبارك 
المكروه من الرب والعبد 
عملت كتير قوى 
علشان خذلانك يبقى تدبير الهى كده 
وكل شىء فى الكون تدبيرك يارب

يارب 

وعدتنا ووعدك الحق بإجابة الدعاء 
لو من غير اثم وقطيعة رحم 

يارب 

انت العالم بحالنا 
بلدنا وبنحبها 
وانت اللى رزقتنا بيها 
وانت اللى انعمت علينا بحبها 
عايزين الفرصة علشان نفرح بيها 
وحد قلوبنا وجمع صفوفنا 
وانزع الغل والخلاف والمصالح
 والفرقة من صدورنا
 
يارب
 
نبيك المصطفى بكى لما أهله أخرجوه من بلده 
ووعدته بالرجوع والنصر 
واحنا بنبكى طالبين نصرك 
عدونا لسه قريب وايدينا مش طايلاه 
أذنابه كتير وأملهم كبير 
وانت أملنا يارب 

يارب

من أول جمعة بعد الغضب 
وأنا كنت عارفة ان نصرك قريب قوى
أصلهم خدوا بالاسباب 
نزلوا وثبتوا وصابروا ورابطوا 
وعددهم كان بيزيد كل مابيقتل فيهم 
لمادعوا بالنصر فى أول خطبة بعد الغضب 
كنت واثقة ان نصرك قريب قوى 
كنت حاسة انه هينزل من السما حالا 
عيطت قوى وقلت يارب خلاص 
كل حاجة خلاص اهى 
وقد كان 

يارب

بيتكلموا عن أمريكا وفوضى خلاقة 
واسرائيل ومؤامرات 
وسودان ضايع وليبيا بتضيع 
وسوريا بتنزف وجولان بتبعد
وعراق عزيز وأسير 
والصورة ضلمة قوى 
وكلامهم فيه كتير صح 
لكن أنت موجود يارب 
ووعدك حق ونصرك حق 
واحنا نازلين ناخده بايدينا
 
يارب 

اغفر لنا ذنوبنا
 اللى بتحرمنا نشارك فى الخير 

يارب 

عايزين حياتنا تتملى أيام فخر 
نحكيها لولادنا 
مش عايزين نعيش فى أيام عار 
وتيجى أجيال تحملنا مسئولية ثورة 
لاقدر الله مكناش نستحقها
 وضيعناها من ايدينا 

يارب 

ظالم ووقفنا ضده 
كمل نصرنا 
ثبتنا 
اهدينا 
ارزقهم اكتر واكتر من الغباء والرعب 
اللى يخليهم يخربوا بيوتهم بايديهم
 
يارب 

خايفين عليها
من متآمر
واضح أو خفى  
من متهور ..من متعصب 
من حد مغرض أو ساذج 
وهو بيخلصها من سرطان مبارك 
يشيل  منها خلايا سليمة ونضيفة 
وكانت الأمل فى حياتها 
يارب 
احفظهالنا 
وارزقنا الفهم اللى نميز بيه الحق ونتبعه 

يارب 

أنا فرحانة 
وعايزة فرحتى تكمل 
وأنت الأمل والسند 
والصمد  
 
يارب 

4 التعليقات:



لـــولا وزهـــراء يقول...

يارب

نبيك المصطفى بكى لما أهله أخرجوه من بلده
ووعدته بالرجوع والنصر
واحنا بنبكى طالبين نصرك
عدونا لسه قريب وايدينا مش طايلاه
أذنابه كتير وأملهم كبير
وانت أملنا يارب
.....................
ربنا يحمي مصر ويصونها ويكمل النصر على خير
ياااااااااااااارب

لولا

ابراهيم رزق يقول...

بالروح دى اعتقد ان الفرج قرب

يارب امين يارب العالمين

شمس النهار يقول...

ابشري

فرج ربنا قريب
صحيح المجلس والحكومة منفضين لنا
بس خير
في ناس نفضت قبل كده
وماعرفتش تنفض كويس

حفيدة عرابى يقول...

لولا
اللهم آمين

استاذ ابراهيم
اللهم آمين

شمس هانم
اللهم آمين

:)