طالع خلاص بكره براءة


الناس دى صدقت انها بتتحاكم بجد مش كده ؟
وان احنا قاعدين بقى فى منتهى القلق 
ياترى براءة ؟ ..ياترى مذنبين ؟

لأ ياحضرات 
محاكمة حضراتكم ودخولكم السجن
 كانت اختبار لولاة الأمر الجدد
 ياترى النية جادة لتطيهر البلد من مبارك وعصابته ولا ....
لكن احنا شعب مفترى وحكمنا عليكم من زمان وخلاص 
أصلها مسألة متعلقة بالسمعة حضراتكم 
ماهو لازم حد يطلع حرامى ..احنا أو حضراتكم 
واحنا شعب شريف مكناش بنشتغل وزرا مع مبارك 
هاسمع كلام عن احترام أحكام القضاء ...جميل 
بس السادة اخدوا وقت كبير قوى يفرموا ويحرقوا مستندات
 ولما ظبطوا الدنيا
 ماهو الورق ورقهم والدفاتر دفاترهم 
قالوا نروح نتفسح فى طرة شوية مادام كده كده خارجين 
السؤال اللى شاغلنى دلوقت ياترى كان عندهم دى فى دى فى الزنزانة ؟

الثورة دى فيها حاجة لله 
الكلام ده حقيقى ...كل مااكتئب وأقول هتضيع مننا 
 الاقى حاجة حصلت قلبت الدنيا من تانى 
احنا مش عايزين الدنيا مقلوبة اقسم بالله 
وطول الوقت بقول لنفسى حاسبى ...بالراحة خالص على مصر 
دى خارجة من غيبوبة مبارك ...خديها واحدة واحدة
 علشان مش تضيع من ايدينا بعد الشر 
لكن ايه ده ؟ ازاى يعنى ؟
طب ابويا هو اللى كان بيحكم مصر وسارقها وخربها 
وحسنى مبارك ورجالته مظلومين فى القصة دى ؟
أنا مش عارفة أبطل ضحك حرام عليكم 
أيها السادة 
نشكركم على حسن تعاونكم معنا 
لقد كان الغباء ومازال من أسباب نجاح هذه الثورة بإذن الله 
ولا يسعنى هنا الا أن استمتع معكم بسماع واحدة من روائع الأغنية العربية 

6 التعليقات:



لورنس العرب يقول...

يا ستي هناك 100 قضيه اخرى للمتهمين
هم خرجوا براءه في قضيه واحده
وليست كل القضايا هم مدانين فيها
يعني مثلا هناك قضيه مرفوعه على مبارك انه قتل السادات وقتل رفعت المجحوب
او اخد براءه فيها -وهذا اكيد- هل سيكون رد الفعل ان المحكمه اعطته البراءه عندا في الناس؟
العيب كل العيب على من قام برفع قضيه (أي كلام) وتقدم ببلاغات متخلفه مثل التي قام بتوزيعها مصطفى بكري يمين ويسار على الجميع

tarek momen يقول...

الشعب يريد نقل المحاكمات تليفزيونيا

كريمة سندي يقول...

الأفضل أن تكون المحاكمات على المأ حتى تكون ذات شفافية

حفيدة عرابى يقول...

لورنس العرب
القضية يافندم شعور طاغى ان كل المحاكمات صورية
واحنا مش هنستنى لما يخرجوا براءة
وخصوصا انهم اخدوا وقت كبير قوى لتظبيط ملفاتهم وورقهم
تحياتى لحضرتك

-------
أستاذ طارق
الشعب عايز يصدق ان المحاكمات حقيقية

تحياتى لحضرتك

--------
كريمة سندى
شفافية دى بقت كلمة سيئة السمعة عند الحكام
هنخليهم يقتنعوا بيها غصب عنهم
تحياتى لحضرتك

sony2000 يقول...

والله ديمن بستغرب
كل لما
يخلوا الدنيا تهدي
وهيخرجوا

تحصل حاجه
يقوموا تاني يرجعوا للسجن
سبحان الله
ربنا هوا العدل

العدل
العدل

مش هيضيع حق الشهدا ابدا بأذن الله

حفيدة عرابى يقول...

سونى
بلد كاملة ياحبيبتى كانوا بيخربوها بنظام وبمنهجية
مش ممكن ربنا ينصرهم
قولى يارب :)