ومن غير عنوان

الداخلية لازم يكون ليها هيبة 
مينفعش بلد تعيش من غير أمن 
اللى حصل يوم 28 يونيو فوضى
وتأثيرها هيظهر فى المدى البعيد 
 ومش هينفع الداخلية تسكت
 وشوية عيال بيحدفوها بالطوب 
البلد بالطريقة دى ماشية فى سكة الفوضى والخراب 
قلنا اسقاط النظام مش اسقاط الدولة 

---

كل الكلام ده جميل جدا وصح ومقتنعة بيه 

لكن امبارح سمعت صوت ورايا
 و لقيت ست بتعيط بحرقة قوى 
وضياء  بيقولى قومى بوسيها 
طبعا فى اللحظات دى ببقى متأكدة تماما من كم الغباء اللى عندى 
غباء ..غباء من الأصلى 
طبيعى يعنى الست لابسة اسود وماسكة صورة ومفطورة كده من العياط 
وفى التحرير ويوم جمعة ...هتكون ايه مثلا
ليه بقى وش الغباوة وعدم الفهم
 اللى بيحصلى كتير ده 
بعد جملة ضياء ماتحركتش نهائى من مكانى 
ليه ؟
لانى مش هاقدر اقوم ابوسها
 ومش هاقدر اهديها شوية زى ماكان متوقع منى  
كل اللى بقدر عليه فى المواقف دى
 انى هاقعد جنبها اعيط معاها 
ويمكن اخلى الست تنكد على نفسها بزيادة 
الست دى بسيطة جدا واحتمال كبير  قوى انها مابتعرفش تقرأ 
وانا معرفش ابنها مات فين وازاى 
ومعنديش البجاحة الكافية انى اسألها هو ابنك مات فى التحرير ولاعند قسم
والست على فكرة مش عند المنصة ولا واقفة قدام كاميرا 
احنا كنا قاعدين على الرصيف 
المهم يعنى انى روحت البيت وأنا بحايل فى ضميرى مايوجعنيش 
لانى ماقدرتش اسمع كلام ضياء 
وقلت لنفسى لا يكلف الله نفسا الا وسعها 
وهو لو كان كرر الطلب ده تانى
 أنا كنت عيطت رسمى وبهدلتهم هناك 
لكن أنا مضايقة من نفسى 
مش لانى مش بعرف اواسى 
أو لانى ضيعت الفرصة دى من ايديا 
انى اهون عليهاولو لثانية  
لكن لانى كمان انانية   
واتمنيت انى لما اروح تانى الاقيها
 أو الاقى زيها 
واكون مستعدة وقوية 
وأقدر اخدها فى حضنى واطبطب عليها 
واصبرها واطمنها
 ان حاله أحسن مننا كلنا بإذن الله 
يعنى أنا  بمنتهى قلة الاحساس 
عايزاها موجودة كل مرة قصادى
محروق قلبها كده
 لغاية ماأقدر أقوم أقولها كلمتين  
ولا هيعملوا حاجة فى قلبها المحروق 
---------
وعلى هذا 
أنا عايزة أعرف أبوس الست دى 
وفى المدى القريب ده مش هيحصل 
ايه الحل ؟؟
مش عارفة 

أنا عندى حل بسيط قوى 

مبارك والعادلى

بالظبط كده 
الاتنين دول مبدئيا ضمان استقرار البلد دى 
للى عايزها مستقرة

فولاة الأمر اللى بيكلمونا عن خطر الفوضى 
على البلد اللى طلعنا بيها من الدنيا 
وربنا العالم بنحبها وخايفين عليها ازاى 
الحل سهل قدام حضراتكم

أنا مش هارفع مطالب كتير 
ولا هانطق كلمةعن دستور
 واستفتاء وانتخابات وبرلمان 

الدنيا بسيطة خالص 
مبارك والعادلى 
محدش يقولى محاكمة مدنية وعادلة 
علشان كررتها لنفسى كتير 
و طعمهابقى مر ومش عارفة ابلعه
 واحنا بنتحاكم عسكرى و بيتحرض ضدنا 
زى مايكون مبارك موجود واكتر 

------------

محدش فى البلد دى عايز فوضى ولا يتمناها 
وبكتب الكلمتين دول
 وانابقول الستر من عندك يارب 
وواثقة ان كل يوم والتانى
 هتحصل حاجة تمشينا فى طريق الفوضى 
ونطفيها ويرجع يطلع غيرها
لان جحور التعابين لسه زى ماهى

مبارك والعادلى 
مش لاقية حل غير كده 
يولعوا بقى أنا زهقت 
مبارك مين ده اللى لسه بنحكى عمل ايه فى البلد 
مبارك مين اللى بمنهجية خرب البلد
 وبقى الفساد فيها هو الاصل 
ده غبى 
بنتكلم على القذافى ؟؟؟؟
هو القذافى لو عنده بس نيل زى بتاعنا 
كان هيسيبه يضيع زي ماعمل مبارك 
لأ لأ 
أنا قلت انى مش هاحكى كتير 

مبارك والعادلى 
محاكمة مدنية ..عسكرية ..ثورية 
موضوع ميخصنيش 
أنا شايفة بلد كل يوم فى أزمة 
واحنا مش ورانا غير الكلام 
عايزينها تبقى هادية
سهلة قوى 
مبارك والعادلى 

------
المجلس العسكرى
 حزين من محاولات الوقيعة بينه وبين الشعب 
وأناكمان حزينة 
ونفسى يرجع شغله الاساسى على خير 
فاهمة تخوف المجلس العسكرى 
ومعنديش غير حل واحد  
مبارك والعادلى يافندم 
صح كده 
رقم واحد 
مبارك والعادلى 
ومحدش هيقدر يتكلم فى تشكيك تانى 

التاريخ من أوسع ابوابه 
وبعدل مش بظلم والله 
محاكمة مبارك والعادلى 
مفتاحك للمجد مش العكس 
ده البلد كلها عيطت من تحية عسكرية للشهداء
ودلوقت بنكلمك عن محاكمة لقتلة الشهداء!!
مينفعش 
بسيطة خالص اهى  
ده أنت شفت احنا شعب عاطفى ازاى 
ولما بنحب بنحب ازاى 
المخلوع كان بيقتل فينا وعيطوا عليه 
لما قال بس انه عايز يموت هنا
اكسبنا يامجلس 
اكسبنا فى صفك والله ومش هتندم 
مبارك والعادلى اولا يامجلس

---------------
الداخلية 
فى المستقبل حضرتك 
لما تغيرى من نفسك 
ولما تعاملينا معاملة نستحقها 
ولما يخلص اللى بينا وبين رئيسك السابق 
لو حد لا سمح الله قل أدبه عليكى 
فحضرتك مأمورة بضبط النفس 
لغاية ماننسى قلة الأدب اللى عودتينا عليها 
لغاية مااشوف بعينى
 الضباط الشرفا قاعدة مش استثناء 
لازم تعرفى اننا اتغيرنا 
ومش هنرجع ولا هترجعى للى كان أبدا

----------

الاخوان والليبراليين والسلفيين 
وكل حد بيشتغل سياسة 
أنا زهقت 
وانتم بتتخانقوا كتير 
ولو الثورة دى ضاعت بسبب خناقتكم سوا 
أنا مش عارفة ممكن يحصلنا ايه 
وممكن نتعامل معاكم ازاى بعدها 

نحترم نفسنا بقى 
نحترم نفسنا 

ونركز فى المهم وبلاش الخناقات 
والضرب تحت الحزام 
وعاملين زى العيال الخايبة 
اللى بيفتنوا على بعض عند المدرس 
اللى هو أصلا مطلع عينيهم ومبهدلهم 

نحترم نفسنا

ونعرف مين عدونا 
ونشوف البلد دى تنضف منه ازاى 
وبعدها ابقوامارسوا هوايتكم فى الرغى براحتكم

أنا مش هاعرف ابوس الست دى 
الا لو مبارك والعادلى اتحاكموا
الاتنين راس الحية 
والباقى هيقع بمنتهى البساطة

11 التعليقات:



Ramy يقول...

عندك حق

و كلامك صح

وم قدرش ازود عليه حاجة

...................

عارفه عندى شبه هذه المشكله

بأذن الله تلاقى الست دى تانى و تبوسيها و تواسيها و متعيطيش

tarek momen يقول...

هيبة الشرطة تاتي من احترامها للناس و ليس من فرض الخوف و الرعب و هذه هي الاشكالية فيما تعودت عليه الشرطة علي مدي 30 سنة

مهندس مصري يقول...

المجلس العسكري وكر أفاعي و عايزاه يقطع راس أفاعي إخواته :)

حفيدة عرابى يقول...

أستاذ رامى
شكرا جزيلا على الدعم المعنوى يامدرس :)

-------

أستاذ طارق
مااحنا مش عايزينهم الا بنظامنا الجديد بقى
القديم راح وراحت أيامه
تحياتى لحضرتك

------

باشمهندس محمد

عارفة والله
بس يعنى هو بيقرأ المدونة وهيسمع كلامى لما اقوله خليك فى صفنا
ادينى ببقى عملت أضعف الايمان ويادوب اتكلمت وفضفت فى مدونتى
ولا هيحرم علينا الكلام كمان :)
تحياتى لحضرتك

مهندس مصري يقول...

ما أقصدش والله
أنا قصدي نوعي الناس بحقيقة المجلس و ندحض فكرة إن المجلس بابا و ماما و انور وجدي و هو اللي حما الثورة و ليفها و شطفها و نشفها بالفوطة كمان
:))

حفيدة عرابى يقول...

عارفة انك متقصدش معنى سلبى ياباشمهندس
ماتقلقش:)
ووجهة نظرك صح
ولما راجعت اللى انا كتبته عن المجلس العسكرى لقيت ان كلامى فعلا معاه عن اكسبنا فى صفك ممكن قوى يدى معنى انت انور وجدى
لكن انا مش اقصد وكان قدام عينيا ساعتها نوارة وهى بتقوله هننسى اللى فات وخليك معانا فى حكاية مبارك

المجلس معملش ثورة علشان يحميها

الثورة بتاعتنا احنا
هو اللى عمله انقاذ البلد فى ليلة الرحيل من حاجات كانت ممكن تبقى خطر
سواء بقى عملها مجبر أو مخير
لكن ليلتها هو عملها وخلاص
اللى بعد كده بقى النكد اللى عايشين فيه من 12 فبراير للنهارده

تحياتى لحضرتك

فاتيما يقول...

مقولتليش ليه يا فيدو
كنت عملت اى منظر
لازم مكنتش واقفة ساعتها
مكنش لازم تبوسيها
كفاية بس تساليها مالك
الناس بتيجى التحرير تفضفض
وتشتكى
و بيبقى كل المطلوب منك
لو معندكيش حلى فورى ليها
غير انك تسمعيها
تسمعيها بإهتمام
وبعدين تردى عليها
بأن حق ابنها
او ظلمها .زمش هيروح
واننا كل جمعة
وكل مرة هنيجى ونمسك يافطة
ونقف نطالب برد الحقوق
وعمرنا ما هنزهق
ويا احنا يا هما
كنتى تسأليها عن اسمه
وف آخر الكلام تقوليها
ان .... مش هيروح وان شاء الله تيجى الميدان يوم ما الكلاب دى تتحاكم بما يرضى الله ..و ساعتها هيا اللى تطبطب علينا لما نعيط من كتر الفرحة

يا رب اشوفك الجمعة الجاية
على ألف خير

بوسيلى منار وسلميلى عليها قوى
:)

ابراهيم رزق يقول...

عندما يعرف الجميع ما له و ما عليه وان له حقوق مثل ما له من واجبات
و عندما يختفى كشف الهيئة من كليات الشرطة و الكليات العسكرية و وزارة الخارجية و وكلاء النيابة و عندما يتم قبول الافضل كفاءة و ليس الافضل واسطة عندها سيشعر الجميع بالمساواة و سينصلح حال البلد
بالنسبة لتلك السيدة الشعب يريد ان يعرف من هو الشهيد و لكنه بالنسبة لتلك السيدة لا يهم لانها فى الاول و الاخر سيدة مكلومة
تحياتى

حفيدة عرابى يقول...

طمطم
:)
مجاتش فى بالى فكرة انى اقولك الا بعد ماروحت
ماهو الكلام ده بيبقى جوه مبيرضاش يطلع
ربنا يصبر قلوبهم
ان شاء الله ياحبيبتى جاية الجمعة الجاية
ومنار بتسلم عليكى جدا :)
وأنا انتى عارفة بقى بوسات وحضونات

-------
استاذ ابراهيم

جملة الشعب يريد ان يعرف من هو الشهيد
بليغة قوى وجت فى بالى ومهمة فعلا بالنسبة لنا وكان ممكن تتحل لو فى تحقيق وشغل جاد من 12 فبراير للنهارده
وبالنسبة لها فعلا الكلام ده مش مهم

الحقوق والواجبات فى الاماكن اللى حضرتك ذكرتها وغيرها محتاجة وقفتنا كلنا فى كل مكان واصرارانا على حقوقنا لغاية ماالناس تتعود على حكاية الحقوق والواجبات دى

تحياتى لحضرتك

لورنس العرب يقول...

أقسم بالله
لو اعدمنا مبارك والعادلي بكره الصبح لن يغادر الناس ميدان التحرير

حفيدة عرابى يقول...

لورنس العرب
أهلا بحضرتك
:)
مااحنا هنروح نحتفل يافندم ونتكلم فى باقى المطالب :))
طب بجد والله حضرتك زعلان ليه
احنا بنشتغل يافندم
ال18 يوم بتوع مبارك كتير جدا من الناس كانت بتروح شغلها وترجع على التحرير

الوضع الطبيعى يافندم ان البلد يكون فيها مؤسسات تقوم بالنيابة عننا فى مراقبة أعمال الحكومة وتحقيق مطالبنا
زى البرلمان
وطول ده مش موجود ومعنديش حد يحاسب الحكومة ولا يعرفه انا ايه مطالبى
انا شخصيا هيبقى التحرير ملاذى الوحيد

لسه كتير يافندم
مبارك والعادلى هيخلوا الناس تبقى أهدا كتير وهنعرف اننا ماشيين فى الطريق الصح والتعابين الصغيرة هتلم نفسها وتستخبى فى جحورها

وبعدين أنا شخصيا لو ربنا ادانى عمر لغاية ماالاقى اللى انا عايزاه كله اتحقق مع انى عارفة انه محتاج سنين
بس لازم هاروح التحرير
طب والله ده انا فى منتهى السعادة دلوقت وانا بتخيل نفسى بعد عشر سنين وانا بقابل صحابى هناك وبنحكى ذكرياتنا معاه :)

التحرير جميل يافندم
جميل بجد ومش شايفة فى ده حاجة غلط طول ماأنا شايفة شغلى :)

تحياتى لحضرتك