نهارنا نادى ونهار الندل مش باين

ماكونتش فاهم حاجة لحد ما شفت بيانات الداخلية و المجلس العسكري 
بيسهلوا عليك الاختيار بشكل جميل :)
من تويتر 
----------------------------
لما لقيت الجملة دى على تويتر ابتسمت قوى مع انى معرفش صاحبها
آه هو كده ..كان نفسى قبل ماأموت أصدق أى بيان حكومى أو بيان للداخلية
بس تقريبا الأخوة اللى بيكتبوا البيانات دى
والاخوة اللى كانوا بيكتبوا الجوابات اياها علشان المخلوع 
ادارة واحدة وايد واحدة
وغالبا محدش منهم سمع حديث الرسول عليه الصلاة والسلام 
(مازال الرجل يكذب ويتحرى الكذب حتى يكتب عند الله كذابا)
-------------------
أنا معرفش مين كان عند البالون ولا مين ضرب مين الاول
لكن أنا عارفة ان فيه ملايين عاهدوا ربنا يوم 11 فبراير
ان البلد هتكون أحسن بلد فى الدنيا 
وان الفرصة لو كانت فى ايديهم كانوا عملوها 
--------------
عارفة ان مبارك لازم لازم يتحاكم 
ويتحاكم محاكمة ترضى ربنا 
مش الهبل والهطل الرسمى والاستهبال اللى عايشين فيه 
مين مبارك ده ويساوى ايه وعمل ايه
وماسك ايه فى ايديه علشان يتحافظ عليه كده 
اساسا محاكمته دى مبدأ 
وقلنا كل عيل صغير فى البلد دى لازم يعرف 
ان الريس أى ريس لازم يتحاسب 
فمابالنا لومبارك 
-----------------------
عارفة ان العادلى لو اتحاكم من ساعتها محاكمة ترضى ربنا 
كانت البلد نضفت كتير 
والقناصة اللى قتلوا المتظاهرين والاخوة فى السيارة الدبلوماسية 
والبهوات فى العربيات المدرعة اللى دهسوا المتظاهرين 
مش فى الاخر مالاقيش غير أمين شرطة وهربان
وفرحانين قوى بالعدالة العرجاء بتاعتكم 
وعلى فكرة بقى وفريد الديب 
ماهو مينفعش الناس محروق دم أهاليها ليل نهار
ده غير اللى ليهم دم عند مبارك
ويطلع هو يكمل علينا ويقولنا اصل مبارك زعلان كتير 
------------------
لو انا مش بحس وعايشة بس فى بلد عملت ثورة 
ولا الريس اتحاكم ولا وزير داخليته ولا داخليته نفسهااتحاسبت
مطلوب منى تبقى نفسيتى عاملة ازاى
ماانا هانفجر من اقل حاجة 
ماهى العالم مخنوقة 
ماهى الناس خايفة الثورة تضيع من ايديها 
مااحنا مش حاسين بتغيير 
مش قلنا الشعب يريد اسقاط النظام 
وخليت بالى والله 
وقلت لنفسى مليون مرة خلى بالك 
اوعى وانتى بتسقطى النظام تسقطى الدولة وانتى مش واخدة بالك 
بس فين ؟؟؟ 
محصلش ياناس 
----------------
الراجل التونسى المحترم 
قال هرمنا ..هرمنا من أجل هذه اللحظة 
مش قادرين تفهموها 
والله ماقادرين تفهموها 
يمكن اللى عملوا الثورة مش واخدين بالهم منها 
علشان معظمهم شباب 
لكن انتم فعلا مش بتفهموا 
مش فاهمين انى قربت على الاربعين 
وحلمت بيها طول عمرى 
واتمنيت بس انى اشوف ولو حاجة تقربنى منها 
ولما تحصل واشوفها 
والاقينى مش عارفة اشكر ربنا عليها ازاى 
عايزينى افكر مجرد تفكير انها ممكن تضيع تانى 
انتم مش واخدين بالكم مش كده 
ماهو لو واخدين بالكم مش هتحكوا كتير 
وطول الليل تقولوا شغب وعنف وكلام ميهمنيش فى حاجة 
---------------------
وبعدين ماالدنيا سهلة وبسيطة خالص 
اللى فى التحرير بلطجية ..جميل 
حضرتك ياداخلية بتعملى ايه طول عمرك مع جيش البلطجية ده ؟
لما فى كل مصيبة بتحصل بنسمع منك الكلمة دى 
وانت الداخلية والحكومة وعارفة كل حاجة 
ممكن تعرفينى مين هو البلطجى ؟
أين يقطن ومم يقتات وماعدد البلطجية فى جمهورية مصر العربية 
وهل صحيح مايثار من أقاويل مغرضة 
عن ان البلطجية صناعة الداخلية حاشا لله ؟؟؟
انا باقول حاشا لله 
---------------------
انا عارفة ان الاعلام عندنا بيمارس دور
وآسفة جدا مش عارفة اوصفه غير بالقذارة 
فى فترة قلت لنفسى ايه الجديد مااحنا خدنا على كده 
لكن لأ..
مش المفروض انى اتعود على الغلط 
مش المفروض انى كل يوم والتانى 
ومع كل حادثة اسمع تامر من غمرة واخواته 
زهقت بقى من النفاق والتضليل 
المفروض ان بلدى فيها اعلام محترم
من غير التوجيه و قلة الادب اللى بتحصل 
--------------
انا عارفة انى مش عايزة حد يضربنى مهما عملت 
حتى لو أنا بلطجى حتى لو سرقت أو قتلت 
ولما اقتل يبقوا ياخدونى النيابة وبعدين المحكمة 
لكن محدش يضربنى يابشر ياللى تعرفوا ربنا 
ومحدش يشتمنى 
والالفاظ القذرة اللى بقت لبانة فى لسان الداخلية
يايتعلموا بالادب ينضفوا لسانهم منها 
بدل ماينضفوه غصب عنهم
------------------
أنا عارفة انى عايزة أعيش رافعة راسى 
رافعة راسى محتاجة وصف كتير 
مش عارفة أقوله كله دلوقت 
--------------
أنا كنت زعلانة قوى النهارده
وقلقانة قوى 
وبعد شوية افتكرت الايام اياها 
وكانت أحلى أيام والله 
ولو كانت حققت كل هدفها مكناش وصلنا لليوم ده 
---------------
وعلى هذا...

فنهارنا نادى ونهار الندل مش باين 
ويامصر قومى وشدى الحيل كل اللى تتمنيه عندى 

وعادى يعنى مفيهاش حاجة لما يناير يبقى مرتين فى السنة 



14 التعليقات:



tarek momen يقول...

يسلم قلمك..... قصدي يسلم كيبوردك
كلام موزون علي ميزان الجواهرجي

لورنس العرب يقول...

1- يا ميس، هو مبارك والعادلي فين دلوقت؟ بلاش مبارك- العادلي فين؟ في السيما؟ مهو في السجن وبيتحاكم على قتل المتظاهرين، وملف قضيته به 9 ىلاف ورقه- ممكن ايه يحصل تاني؟ وطالما انك تطالبي بمحاكمه ترضي ربنا يبقى نترك الدفاع والقضاء يعملون في هدوء
2- يا ترى من الذي يلقي الحجاره -الآن والساعه 2 صباحا- على مبنى وزارة الداخليه؟
هل هو متظاهر ام بلطجي؟
طيب لو هو متظاهر من قال له "عيب"؟؟؟

هي دي المشكله يا ميس

حفيدة عرابى يقول...

أستاذ طارق
شكرا جزيلا
ده من ذوق حضرتك
تحياتى لحضرتك

---------------
لورنس العرب
أهلا بحضرتك
1- مبارك فى مستشفى شرم الشيخ والعادلى فى السجن
ده الكلام الرسمى اللى أنا بحاول اقنع نفسى طول النهار انه صح مع انى قلقانة جدا ومش مرتاحة وعندى شعور قوى انى مضحوك عليا ومبعرفش اتكيف ابدا مع الشعور ده حتى لو ضحكت على نفسى

واحساسى بيقولى ان مبارك مش هيشوف محاكمة وان اللى بيحصل تضييع وقت يمكن يموت لوحده
أنا فاهمة ان واحد فى سنه لازم يكون تعبان
لكن المرض ده مكانوش بيتكلموا عنه ليه وهو فى الحكم
وابراهيم عيسى كان هيترمى فى السجن ليه لما كتب مقال عنوانه (انك ميت )
والناس فرحت قوى وعيطت لما قالهم لم أكن انتوى ان ارشح نفسى لمدة رئاسية اخرى
مع انه خنقنا تلاتين سنة وعيان زى مابيقولوا ولا كان ناوى يحمنا وهو فى التسعين
اشمعنى دلوقت عيان ومينفعش ينقلوه
مكان بيطلع ينكد علينا وهيموتنا
ده انا كان هيجى لى جلطة من خطابة التالت
والله العظيم اللى حسيت بيه فى دماغى بعد خطابه ماحصلى فى عمرى وبقيت اقول اروح فين يارب
ارحمنا بقى من الظلم ده يارب

وشويى اصل عنده ارتجاف اذينى
لأ أصله مكتئب
اصله زعلان مننا
وصوره من يوم الثورة مش ظاهر منها غير وهو مسكين ونظراته كلها لوم وعتاب وشعره أبيض وأنا عمرى ماشفت له صورة بشعر أبيض
واشمعنى مستشفى شرم الشيخ ؟؟
هو مش احسن من أى بنى ادم فينا بحاجة
أى تجهيزات طبية محتاجها تروح طره ويروح هو معاها
لكن احنا مانتبهدلش طول عمرنا وتضيع كرامتنا فى بلدنا وبره بلدنا بسببه
وفى الاخر الاقيه قاعد فى شرم زى ماهو قاعد طول عمره

والعادلى لو بيتحاكم محاكمة ترضى ربنا كانت الداخلية احترمت نفسها يافندم وعرفت ان الله حق
وان اللى يقل أدبه فى محكمة مستنياه
لكن ضباط الشرطة بنفس وقاحتهم يافندم
عارفة ان كتير منهم مش عارفين يشتغلوا لان البعض فعلا بيبلطج عليهم
وده بيحصل أحيانا
بس هيبة الداخلية ماضاعتش لانهم انضربوا فى 28 يناير بس
لكن لانهم كانوا مرتشين ولسانهم طويل وبيعاملوا الناس بوضاعة والناس فرحت فيهم

كلام حضرتك أنا شايفة فيه جزئية صح انى اسيب القضاء يشتغل بهدوء
بس الازمة اللى هتجننى يافندم انى مش مصدقة
التسويف والتأجيل بيزود قلقى وعدم تصديقى
لو انا اتطمنت هارتاح واسكت

حفيدة عرابى يقول...

لورنس العرب

2 - معرفش والله يافندم مين اللى بيرمى طوب على الداخلية
ولو أنا هناك مش عارفة بصراحة هاقوله ايه
دلوقت هاقوله اعقل الله يكرمك دى بلدنا وعايزين نحافظ عليها
ولو انا كنت بايته هناك مع اللى باتوا وشميت غاز واترمى عليا قنابل مسيلة للدموع ولى قريب شهيد
اكيد كنت هاقول حاجة غير كده
ده لو متظاهر
لو هو بلطجى
فالبلطجية تربية الداخلية يافندم وهى عارفاهم تمام وشغلتهم ضدنا كتير
وحالا قبل مااجى المدونة شايفة واحد مع الامن المركزى بيرقص بسيوف وسنج وبيستفز المتظاهرين

حضرتك لو تلاحظ انى ماناقتش الاحداث لانى بجد معرفش ايه اللى حصل
ومش فاهمة بالظبط ايه اللى وراه
بس انا طول عمرى مش بصدق الحكومة
ولو الحكومة عايزانى اصدقها مطلوب منها تاخد خطوات كتير لغاية مااوصل للمرحلة دى

أنا خايفة على الثورة تضيع يافندم
ومش مستعدة ده يحصل
وكل شوية هتحصل حادثة زى اللى حصلت وهافضل مش مرتاحة لغاية ماالاقى مبارك وعصابته فى السجن او على حبل مشنقة وده مش تشفى ولا انتقام
ده شرع ربنا
ولا شرع ربنا ان الغلبان اللى زينا لو سرق وقتل وافسد يتحاكم
واللى زى مبارك يتساب بالشهور فى السجن واحنا بنغلى

وحضرتك لو تلاحظ انى بتكلم عن الحاجات اللى انا عايزاها من أول ماالثورة قامت وماركزتش على الاحداث
وانى بمنع نفسى كتير تقول كل اللى نفسى فيه علشان خايفة قوى على البلد دى واحنا بنسقط النظام تضيع مننا

لكن احنا تعبانين قوى
وكان ممكن نرتاح كتير ونبقى اهدا كتير من 11 فبراير للنهارده لو مبارك والعادلى اتحركت محاكمتهم شوية
لكن الاتنين اخر هنا واحنا محاكم عسكرية ميصحش
هو مين اللى عمل ثورة يافندم احنا ولا مبارك ولا مبارك فعلا أول من ايد الثورة زى مافريد الديب قال علشان يحرق دمنا اكتر ماهو محروق


أنا اسفة جدا جدا على الاطالة
بس الواحد مشحون بطريقة رهيبة واللى حصل كان فرصة لكل الهواجس تخرج وتقلقنا من تانى


تحياتى لحضرتك

لورنس العرب يقول...

وهاينضحك عليكي ليه- العادلي فعلا في السجن، وبيروح المحكمه ومعه محامي من اللي بياخدوا ملايين، حتى الناس بتنتظره في المحاكمه من اجل ضربه بالطوب، هايحصل ايه تاني اكتر من كده؟
وبالنسبه لمبارك وطول المحاكمه، شوفي انتي خالد سعيد، إلى الآن المحاكمه في تأجيل مستمر وده لأن القضيه كبيره وهاينتدبوا اطباء شرعيين تاني وربما يخرجوا الجثه -زي ما قلت زمان- لأن لو المخبرين اخدوا اعدام يبقى لازم السباعي يتحط في السجن بتهمة التزوير
القضايا كبيره يا رشا
والناس مستعجلين بشكل غير مبرر بصراحه

لورنس العرب يقول...

انا مش مقتنع اصلا ان الناس تتكلم عن استقلال القضاء وفي الوقت نفسه يضغطوا عليه من اجل استعجال المحاكمه او صدور حكم بما يأتي على هوى الناس
اما بالنسبه لموضوع البلطجيه، أهم موجودين هناك يا رشا، انا عاوز حد يروح يمسكهم، شويه يقولوا بلطجيه وشويه يقووا انهم متظاهرين


انا كده يبقى قلت لك المحطه 50 كلها من غير ما تتفرجي عليها!

لورنس العرب يقول...

سيبك انتي
فيه شخصيه اعرفها بتقولي "الشريف هو اللي في الميدان"

تامر علي يقول...

أكيد وواضح للعيان أن هناك صفقة ، بل صفقات ابرمت في الخفاء وأن هناك آلاف المؤامرات قد حيكت وتنفذ الآن ضد هذا الشعب وثورته .. خذي على سبيل المثال ..أين ذهبت أموال (دعم الديمقراطية ) التي رصدتها أمريكا لمصر وهي بالمليارات ؟ وما المقصود بدعم الديمقراطية بالمفهوم الأمريكي ؟ وهل اختراق أمريكا لمصر وصولاً لميدان التحرير يدعم الثورة ؟

المعادلة الصعبة هي
الشعب اسقط مبارك
الجيش يحمي مبارك
الجيش والشعب إيد واحدة

إذاً الشعب لن يرى نتائج إسقاط مبارك ويبقى الحال على ما هو عليه
وعلى المتضرر اللجوء للتحرير حيث سيواجه التهم التالية

- تعطيل عجلة الانتاج
- عرقلة الاستقرار
- البلطجة
- الفئوية
- الخروج عن مبادىء الثورة

من يقوم بنصف ثورة .... اللهم احفظنا يا رب

الثورات الناجحة تقضي على الفساد بالقوة ... حتى الآن لم يضغط الشعب بقوة لانجاح ثورته

اللهم اكتب لنا أمر رشد

تحياتي للطرح المثمر

sony2000 يقول...

انا كتبتها فجمله

انا خيفه

بس خلااص

ابراهيم رزق يقول...

تعرفى مخلص الموضوع ايه

الشعب يريد ان يفهم

لانه بعد هذه الثورة عيب و عار انه لا يفهم

تحياتى و سعيد بزيارتى

حفيدة عرابى يقول...

لورنس العرب
أهلا بحضرتك
القلق يافندم
مليون حاجة حوالينا ماتغيرتش
نفس الطريقة اللى كنا بنتعامل بيها أيام مبارك موجودة فى كل المؤسسات والناس قربت تنسى ان فيه ثورة
لو خلصنا من الورقة البايخة الموترة المهمة اللى اسمها المحاكمات
البلد هتبقى كويسة والله وتبقى هادية اكتر
أنا بروح شغلى يافندم وملايين بيروحوا وبيشتغلوا
لو مبارك اتحاكم فعليا هو والعادلى وباقى العصابة
اكيد متخيل هنروح الشغل ازاى ونفسيتنا هتبقى ايه والبلد دى ممكن تبقى عاملة ازاى وبسرعة
احنا بنموت بالبطىء من تانى زى أيام مبارك وده اللى هيجننى انا شخصيا

بالنسبة للشخصية اللى قالت لحضرتك ان الشريف هو اللى فى التحرير
فأنا فهمتها كالتالى
التحرير مش أجندات ولا قلة مندسة ولا فئة مأجورة ولا كنتاكى ولا بلطجية
التحرير شرفاء
اكيد كانت تقصد كده
ومش ممكن تكون تقصد ان مفيش شرفاء الا فى التحرير
تقريبا أنا فهمت مين الشخصية دى يافندم وفهمت حضرتك ليه مش موافق على جملتها
لكن حضرتك عارف
وعين الرضا عن كل عيب كليلة
:)
وأنا علشان بحب الشخصية دى فمش بيزعلنى كلامها

تحياتى لحضرتك

حفيدة عرابى يقول...

استاذ تامر على
أهلا بحضرتك
كلام حضرتك مظبوط تمام
ومش عارفة أعلق عليه وكل مااكتب تعليق امسحه
اللهم آمين يافندم
يوحد قلوبنا ويخزى عدونا ونجبر اللى عمل صفقات يراجع تصرفاته وصفقاته

مبارك فعلا هو النقطة الحاسمة بينا وبين المجلس
متهيألى ده الخطوة الأهم اللى لو اتعملت أى اصلاح بعده هيكون اجراءات ووقت ان شاء الله

اللهم آمين يافندم
تحياتى لحضرتك

حفيدة عرابى يقول...

سونى
ازيك ياجميلة
ومين مش خايف :)
ربك كبير
بإنه الناس دى طلعت من بيوتها ونامت فى الشارع 18 يوم وهو بيقتل فيهم وكل مايزيد فى الغباوة يقولوا بصوت اعلى ارحل ورحل
قادر يوحد قلوبنا ونرجع تانى

بصرف النظر عن تونس اللى كانت قدوتنا أيام الثورة فانا كنت بفرح قوى بيوم الجمعة فى التحرير وحاسة ان الراجل ده هيمشى يوم جمعة :)
لأسباب مقنعة قوى لقيتها بعيط وبقولها لربنا فى كل مرة بيصلوا فى الميدان
خلاص يارب اهو خرجوا ورابطوا وصبروا ودعوا وفاضل نصرك بقى
وجه النصر الحمد لله
محتاجينها تانى ياسنسن
نلحق نفسنا ونعمل اللى علينا تانى
وربنا هيكملهالنا على خير بإذنه
قولى يارب

حفيدة عرابى يقول...

استاذ ابراهيم
أهلا بحضرتك
سعيدة جدا بالتعرف على حضرتك وعلى الثائرة الصغننة ربنا يبارك فيها ويفرحك بيها
مع ان الوقت كان قليل
تتعوض الجمعة الجاية ان شاء الله

آه يافندم والله عايزين نفهم
وهم بيعاملونا بنفس الطريقة القديمة
بيتصرفوا واحنا مالناش دعوة
وبعدين اتفضلوا القانون ده أو القرار ده
وده برضه من أسباب عدم الهدوء
عايزين العجلة تمشى عرفونا وفهونا يرحمكم الله

أنا اللى سعيدة بتشريف حضرتك لمدونتى
تحياتى لحضرتك