اهو كلام


هو ده زى لما تمد ايدك تسلم على حد 
وعلى وشك ابتسامة كبيرة  
وقلبك مليان ود
فيسيبك ويمشى 
ولا ده حاجة تانية


مش هادخل فيلم الفاجومى 



سؤال علمى بحت 
البركان 
لو من وقت للتانى حس ان الضغط شديد عليه 
فانفجر انفجارات صغيرة 
ممكن يعنى الانفجارات الصغيرة دى 
تغنيه وتحميه وتمنعه 
من الانفجار الكبير 
ولا كده كده هو لازم ينفجر ويخلص بقى 
واللى يحصل يحصل 
على فكرة 
مينفعش تبقى بركان وتقعد تفكر فى الآثار المترتبة على انفجارك
ياتبقى بركان بجد 
ياتفضل ساكت بقى زى ماانت وخلاص


من حقك عزيزى المواطن انك ترتاح 
من حقك تبعد عن نفسك أى حاجة ممكن ترهقك 
نفسيا أو جسديا 
لكن بالله عليك وانت بترتاح 
ارمى عينك  كده وشوف تعبت مين 
منعت الهوا عن مين 
دمرت نفسية مين 
كام واحد تعب علشان انت ترتاح راحة بسيطة قوى 
كان ممكن تستغنى عنها 
لو بس فكرت 
لو بس حسيت 
لو بس بصيت حواليك
عزيزى المواطن ...قليل من الاحساس بالغير لن يضر 
ده أنا بقولك بالله عليك 



هو رئيس الجمهورية ده المفروض يبقى ازاى 
سيرته الذاتية المفروض يكون فيها ايه 
دماغة بتفكر ازاى 
ايه الصفات اللى لازم ادور عليها عنده 
قدراته تبقى ايه 
لازم يكون محسوب على الاسلاميين 
ولا كفاية انه يبقى غلبان زينا كده 
وتبقى مرجعيته الاسلام
طيب مرجعيته الاسلام اللى هو ايه برضه ؟؟


ومازال النيل يجرى... 



مع انى مش بحب الشخصيات 
اللى بهدلتهم دعاء سلطان فى توك شوز 
بس كمان 
مش حاسة ان دعاء تنفع مذيعة 
ومش عاجبانى أجزاء كتير من الحلقتين اللى شفتهم 
ومعجبتنيش لما ركزت فى سخريتها 
على برامج قنوات البدوى 
اللى أنا أصلا مش مقتنعة بيه رئيس حزب 
لكن هى عارفة اننا عارفين بالمشاكل اللى بينهم 


عبد الرحمن يوسف 
أنا ضد التيار 
وشايفة ان انت الغلطان 
أو ان الغلط كان عندك اكتر 
ممكن تزعل وتقول ان وصفك بالقطرى 
كان مقصود لاغراض خبيثة 
ممكن تعترض وتعرف نفسك زى ماانت عايز 
لكن رد فعلك كان عصبى ومبالغ فيه 
وكله استعلاء وتكبر 
أنا لو بعمل شغل وحد قالى باسلوبك ده 
انت مش بتعرفى تشتغلى وممكن اعلمك 
استحالة اشتغل معاه 
انت استغليت كراهية الناس لمقدمى البرنامج
ونزلت بيان مش مقنع بالنسبة لى 
علشان تحافظ على جزء من شعبيتك 
وده مش صح 
مع انى عاملة حسابى انى لغاية مااموت 
هاكون فى منتهى الامتنان لكل واحد قال لمبارك ارحل 
مهما كانت الطريقة اللى قالها بيها 
لكن قليل من التواضع مفيد ياسيدى 



عادل امام لو الكلام المنسوب ليه صح 
بيقول انه كان مخدوع فى مبارك 
هو الشاى بالياسمين ممكن نعتبره من الحاجات الاصفرا ؟؟



طاقة سلبية 



جمال المراكبى 
بالاضافة لعلمه ودماثة خلقه 
احترمته اكتر لما قال ان الثورة لو قامت بكره مش هيشارك فيها 
لان عقيدته بترفض الخروج على الحاكم تجنبا للفتن 
مع رفضى التام للمبدأ ده 
لكن عجبنى انه مفكرش يشترك مع جوقة المنافقين الجدد للثورة 



مش بحب التضليل 
مش بحب التضليل 
مش بحب التضليل 
وصلت كده ولا لسه شوية ؟؟



يهمنى الانسان ولو مالوش عنوان 



عادل امام 
لو فى حياتك كلها ماعملتش مشهد 
غير لما خرجت والناس معاك 
تقولوا آه ..آه 
فده كفاية قوى 



اعمل نفسك عبيط 
هترتاح كتير 
المهم انك تدعى ربنا يثبتك 






6 التعليقات:



شمس النهار يقول...

بوست لطيف

علي فكرة في ناس كتير كانت مخدوعة في اللامبارك ولما ابتدت الحقائق تبان
وعرفوا الحقيقة كانوا من اكتر الناس حماس للثورة يمكن اكتر من اللي طلعوا اول يوم
ولما سألت واحد فيهم اشمعني يعني الحماس ده دلوقتي
(قال علشان اداني علي قفاية كنت فاكره كبييييييير طلع واطي )
واسفة علي الالفاظ بس حبيت انقل وجهة نظر كاملة من لسان احد معارضي الثورة في الاول

عبد الرحمن جمال المراكبي يقول...

الأستاذة : حفيدة عرابى
السلام عليكم
تعليقاً على كلام حضرتك عن الدكتور جمال
أحب ألفت نظر حضرتك إن عقيدة الدكتور جمال عدم الخروج على الحاكم ودي عقيدة أهل السنة والجماعة كلهم
بس أحب ألف نظر حضرتك إن الدكتور لم يقل إن المظاهرات خروج
وإنما قال أنا لا أشارك في مظاهرة لا أعلم نتائجها ولا أعلم إلى أين تقودني
أما عن رأيه في المظاهرات فأرجو سماع هذه الخطبة والتي كانت قبل تنحي مبارك بيومين وأجاب فيها عن هذه الأسئلة :
هل يعد التظاهر السلمي خروجاً على الحاكم ؟
هل ضحايا ثورة الغضب شهداء ؟
هل يطيع الجنود قائدهم في قتل المتظاهرين ؟
ما هي حدود طاعة ولي الأمر ؟
كيف الخلاص مما نحن فيه ؟

الرابط :
http://www.almarakby.com/web/play-508.html
وآسف على الإطالة

tarek momen يقول...

اهم حاجة انه مازال النيل يجري

حفيدة عرابى يقول...

شمس هانم
أهلا بحضرتك

أنا أعرف ناس كتير قوى كانت مخدوعة فيه وفاهمة ان البلد هى اللى فقيرة والريس هيجيب لنا منين
ده لو اختزلنا الفساد فى الفلوس بس
لكن عادل امام مش عارفة
انا شايفاه مستفيد من نظام مبارك
مش هو فنان ؟؟
يبقى لازم يتابع ويبقى ليه رأى وموقف وتوجه والكلام الكبير ده

حضرتك شرفتينى :)

-------------------
استاذ عبد الرحمن جمال المراكبى
وعليكم السلام ورحمة الله وبركاته

حاضر يافندم أسمع الخطبة ان شاء الله لكن عندى مشكلة فى تحميلها أو سماعها هحاول احلها بسرعة ان شاء الله

اللى عايزة اقوله لحضرتك انى قدرت ان الشيخ مقتنع برأى ومصر عليه

لأن حضرتك شفت كتير كانوا معارضين للثورة فى مجالات كتير ولما مبارك مشى بيمدحوا فيها ليل نهار
لو أى معنى سلبى وصل لحضرتك من كلامى عنه فانا آسفة لكن فعلا مكنتش أقصد

شكرا جزيلا لحضرتك على لينك الخطبة
وحضرتك شرفتنى

---------------------------
استاذ طارق
الحمد لله :)

عبد الرحمن جمال المراكبي يقول...

فقط حبيت أوضح رأي الشيخ جمال
بارك الله فيكم

حفيدة عرابى يقول...

استاذ عبد الرحمن
فى كل الاحوال حضرتك شرفتنى
بارك الله فيكم يافندم