فيس بوك ويوميات الثورة 1



24يناير 
-------------------
كل مرة كنت بشرح فيها مظاهرة عابدين كانت بتبقى من أسعد أوقاتى

والحماس كان بياخدنى وأنا بتخيل عرابى 

وهو بيعرض مطالب الامة بمنتهى الشجاعة

وازاى المصريين اتجمعوا فى ساحة عابدين لمساندته وازاى كان عندهم وعى

ولازم أنتهز الفرصة وأقول ان حالنا دلوقت أصعب من وقت عرابى لكن الفرق فينا علشان معندناش وعى

وان السبب الرئيسى لقيام الثورات وحدوث التغيير هو الوعى
وأخلى البنات الصغيرين زعلانين على نفسهم علشان مش واعيين

كنت فرحانة قوى

وانا بقول ان عرابى أعلن عن ميعاد المظاهرة السلمية من قبلها بفترة

وان توفيق والحكومة بذلوا جهود كتير لإفشال المظاهرة

لكن جهودهم باءت بالفشل

خيالى وصل لدرجة انى نفسى أحضر المشهد ده 

ولما كان مستحيل احضره فى الدنيا

تخيلت انى هاطلبه فى الجنة بعد عفو ورحمة ربنا
وان عرابى باشا شخصيا هيقولى عن تفاصيل اليوم من وجهة نظره

كنت عايزة أحضر سعد ورفاقه لما السير ونجت رفض طلبهم بالسفر

ولما جمعواالتوكيلات

كنت عايزة أشوف عمر مكرم لما اجتمع مع زعماء الشعب فى بيت القاضى

وقرروا عزل خورشيد واختاروا محمد على بشروطهم

وأمشى فى المظاهرات ضد البرديسى وأقوله بعلو صوتى 

ايش هيفيدك من تفليسى يابرديسى

ولما جنود خورشيد يعيثوا فى الارض فسادا ويفترى هو علينا بالضرايب

أخرج أهتف باشا ياباشا ياوش النملة مين قالك تعمل دى العملة

ولما جت الفرصة انى أخرج واشوف حاجة فيها حركة

وتشبه من بعيد أو من قريب للمشاهد العزيزة جدا على قلبى

أنا اسفة

أنا مش معاكم

ومعنديش للأسف غير الكلام وغير انى أقول

أناديكم

أشد على أياديكم..

أبوس الأرض تحت نعالكم

وأقول: أفديكم

وأهديكم ضيا عيني

ودفء القلب أعطيكم

أيا كان نتيجة بكرة واذا كان هيخلص بكرة ولا هيطول شوية 

فانا واثقة بإذن الله ان مجهودكم مش هيضيع
ويمكن لو اليوم بقى اكتر من يوم تلاقونى معاكم فى يوم

هادعيلكم وادعوا لى
 ------------------------------

 25يناير

- صباح الخير على الورد اللى فتح فى جناين مصر


- من الاخبار المستفزة
وزير الداخلية : القبض على 19 انتحاريا قبل تنفيذ مخطط ارهابى يستهدف دور العبادة

- مش عارفة يعنى كانوا ماشيين مع بعض فى الشارع لابسين الاحزمة الناسفة ولا الشرطى الهمام سمعهم بيتكلموا وهم بيشربوا عصير قصب


- اخيرا الجزيرة جابت حاجة

- المتظاهرون سيبيتون ليلتهم فى التحرير

- انشروا من فضلكم ونرجو الدعم ممن يستطيع

- مصر يامه ياسفينة مهما كان البحر عاتى فلاحينك ملاحينك يزعقوا للريح تواتى

- عايزة أنزل التحرير ومش هينفع وصعبان على جدا أقضى الوقت بسمع فى أغانى وطنية وبس

- الجزيرة
مش هسامحك طول عمرى على دورك النهارده

- طيب اللى يعرف يوصلهم أكل وبطاطين يتصرف
بيفكرونى بلبنان لما باتوا فى الشارع وموظفين الضرائب العقارية
يارب ثبتهم

- يعنى .....ممكن يبات فى التحرير النهارده :)

- مطلوب حاليا .. مساعدة المعتصمين في التحرير ومدهم بالأكل والماء ليستمر الاعتصام ولا تكل قواهم .. وده هيبقى صعب من الناس اللى بره انها توصلهم .. لكن هيبقى اسهل من اهالى المنطقة والمناطق المحيطة بانها تمدهم بما يحتاجونه .. الرسالة دي لازم تتنشر لاكبر عدد ممكن .. واللى يعرف ناس ساكنىة فى التحرير والقصر العينى وباب اللوق وكل مكان قريب يكلمه ويقوله يبلغ اكبر عدد ممكن بالرسالة

- (أَمَّن يُجِيبُ الْمُضْطَرَّ إِذَا دَعَاهُ وَيَكْشِفُ السُّوءَ وَيَجْعَلُكُمْ خُلَفَاء الْأَرْضِ أَإِلَهٌ مَّعَ اللَّهِ قَلِيلاً مَّا تَذَكَّرُونَ)

- حتى لو رجعوا ومعرفوش يباتوا هناك بس كانوا رجالة :)

- لما خالد بن الوليد انسحب من مؤته المسلمين فى المدينة قالوا للجيش يافرار
والنبى صلى الله عليه وسلم قال بل كرار ان شاء الله :)

- أبوس الارض تحت نعالكم .... وأقول أفديكم

-منى الشاذلى فى منتهى الرخامة النهارده

- كل دى عربيات مصفحة ياولاد اللذين وطبعا من فلوسنا !!
 اتارينا مش لاقيين ناكل


- برامج التوك شو النهارده حرام شرعا

-------------------
26 يناير

- رجالة وطول عمر ولادك يابلدنا رجالة وغلاوتك يابلدنا والله مش محتاجة قوالة


- ألا أيّها اللّيلُ الطّويلُ ألا انْجَلي ...... بصُبْحٍ وما الإصْباحَ مِنك بأمثَلِ

- اللهم ارزقهم كمثل حظ الحجاج فى سعيد بن جبير ولا تسلطهم علينا بعد الساعة

- ربنا إنا مغلوبون فانتصر

- حد يسكت البدوى علشان الحكاية مش ناقصاه

- جيش الدفاع الاسرائيلى احتل ميدان التحرير

- ياقسوة قلبك ياأخى مين اللى رباك واتربيت فين :((

- ايه قلة الادب دى !!
حاسة انى مستنية ناس راجعة من حرب وعايزة أعرف مين سليم وخايفة أعرف مين أسير

- طب والله أنت فهمت بس أنت مستكبر تقولها وعندك أمل فى كلابك
بس خلاص صدقنى حتى لو عملت ايه مش هتتهنى بيها لا أنت ولا ابنك

- الاهرام بتتكلم عن شيكولاته وورد هو الفالانتين كان امبارح من غير ماحد يقولى
- يعنى خلاص كده أقصى جهد ممكن ابذله انى اتابع الاخبار ومن ورا شاشة
أنا تعبت :(

27 يناير

- أنا مش زعلانة أبدا من أى رأى مخالف للى بيحصل وشايف انه غلط
اللى مضايقنى ان فيه اتنين مصر
واحدة على فيس بوك وفى التحرير والسويس وغيرها وعاجبانى ونفسى ابقى هناك
ومصر تانية فى الشغل والشارع ولا ليها دعوة بحاجة ولا عايزة تعرف نتيجة المظاهرات ايه وأنا عايشة فى مصر دى
مكنتش بتكلم أبدا لما اركب تاكسى
دلوقت بتعمد أفتح الموضوع مع صحابى يمكن السواق يسمع كلمتين أكسب فيه ثواب
النهارده لقيته مش سامع أصلا :(

- النيابة توجه للمتظاهرين تهمة قلب نظام الحكم
مااحنا قلنا حرام الانتخابات تتزور
قلنا حرام النقابات كلها ياتحت الحراسة يافى ايدين اياهم
قلنا الاحزاب الورق مبقتش تنفع عيل صغير يلعب بيها عصافير الجنة
تعمل ايه الناس اللى عيشتها بقت مرة وقفلتوها فى وشهم
ماشى يانيابة ...ماهو الورق ورقكم والدفاتر دفاتركم
طب احنا مش عايزين نقلب الحكم ...احنا طالبين الخلع
قولوا حرام بقى هو كمان

- يارب نور بصيرته ويفهم
-----------------------------

فكرة البوست مقتبسة من نجرو  ومن رانيا هانم

البوست تجميع لكلامى على فيس بوك عن الثورة 
متهيألى الذكريات المرتبطة بالكلام ده حواديت وتاريخ لوحدها 
المرة دى اخدت بس من يوم 24 ل27 
لان المخلوع قطع النت بعدها 
البوست الجاى نكمل بعد رجوع النت ان شاء الله 


0 التعليقات: