عن الدستور والاستفتاء والعيب

الجمعية الوطنية للتغيير وغيرها من القوى السياسية بتبذل محاولات كتير للضغط على مجلس الوزراء والمجلس العسكرى من أجل (الدستور أولا) 


لازم اعترف ان الدستور أولا مطلب عقلانى ومنطقى جدا وانى بتمناه لمصر 

لكن فى ظروف غير دى 

الدستور محتاج مننا اتفاق على شكل الدولة ونظامها 
احنا متفقين ؟؟؟ لأ طبعا 
احنا فى بلوجر وفيس بوك وتويتر اغلبنا متفقين 
ياريت نشوف عددنا كام وتأثيرنا اد ايه فى الشارع 


الدستور أولا محتاج لجنة تأسيسية ....جميل 
واللجنة دى معينة ولا منتخبة 
لو معينة هتبقى طبعا من اختيار المجلس العسكرى اللى مهنينا من يوم 11 فبراير 
وأنا مش موافقة على كده 

لو منتخبة  هنختلف وهنتخانق وهنضرب بعض زى مابيحصل فى الحوار والوفاق الوطنى وفى مؤتمرات عمرو موسى الانتخابية  على اختيارأعضاء اللجنة 
ومش هنوافق عليها لو فيها عضو واحد بس مش عاجبنا وهنخرج مظاهرات نطالب ببطلانها زى ماعملنا وبنعمل مع نتيجة الاستفتاء اللى مش على مزاج السادة النخبة قدوتنا فى الممارسة الديموقراطية 

الدستور أولا هيطول قوى الفترة الانتقالية اللى بيحكمنا فيها المجلس العسكرى 
اللى هو برضه مهنينا من يوم 11 فبراير للنهارده 
العجيب بجد واللى شغل تفكيرى علشان أفهم المنطق اللى فيه 
ان القوى اللى بتطالب بالدستور أولا وتأجيل الانتخابات هى اللى بتشتكى من تصرفات المجلس العسكرى 
وأنا معاهم والله فى الشكوى منه والخوف على الثورة من أساليبه وكان عندى أمل ان اتحادنا فى الضغط عليه هيجيب نتيجة ونوصل لمطالبنا 
نفس القوى اللى خايفة على الثورة من أسلوب المجلس هى اللى بتطلب منه الفترة الانتقالية تزيد لغاية مانعمل دستور ونقدر نستعد للانتخابات 
الكلام ده هياخد وقت اد ايه ؟ مش عارفة 

طبعا القوى السياسية أخذت تفكر وتفكر لغاية ماوصلت للانجاز الكبير
ايه الانجاز الرهيب ؟ان فيه تعارض بين المادة 189 مكرر فى التعديلات وبين الاعلان الدستورى 
وكانت حجة ظريفة حقيقى لان ببساطة وبدون الدخول فى تفاصيل 
لو الاعلان الدستورى مخالف للتعديلات يبقى مين الاحق بالالغاء ؟؟
أكيد الاعلان ياسادة مش الاستفتاء الشرعى سواء عجبتنا نتيجته أو لأ 


الحل ايه ؟

فى رأيى ان القوى السياسية والقانونيين يتفقوا على مبادىء اللى بيتقال عليها فوق دستورية وان المواد دى يتوافق عليها من الشعب ومن كل القوى السياسية وان أعضاء اللجنة التأسيسية للدستور المنتخبة من البرلمان اللى انتخاباته فى سبتمبر يلتزموا بيها 
لو حصل اتفاق على كده يبقى جميل قوى ونبقى عرفنا راسنا من رجلينا فى حكاية الدستور ونجحنا فى أول ممارسة ديموقراطية ..غير كده أنا مش موافقة 


لما الاقى قدوتى فى الممارسة الديموقراطية بيخالفوها فى أول مرة بعد رحيل مبارك
مطلوب منى اشوفهم ازاى واتعامل معاهم بثقة ازاى ؟؟


لأ ماهو انت مش واخدة بالك من استخدام الدين فى الترغيب لنعم فى الاستفتاء 
لأ والله واخدة بالى ..وده فيه كلام كتير مش وقته 
لكن سريعا كده ..أنا قلت نعم فى الاستفتاء من غير تأثير الاخوان ولا خطباء المساجد ولا أى تيار دينى 
والثورة دى قامت علشان صوتى يكون ليه قيمة ومش هاوافق ان حد يضيع الأثر ده للثورة 
محدش ممكن يوافق على استغلال الدين فى دعاية لرأى سياسى ما 
لكن حضراتكم مش واخدين بالكم ان المصرى البسيط كان ذكى جدا وفرض ارادته فى الاستفتاء ؟
مش واخدين بالكم انه راح الاستفتاء يجاوب على سؤال المادة التانية اللى مش موجود أصلا فى التعديلات ؟
مش واخدين بالكم من الستات اللى سنها فوق التمانين ونزلت تنصر الاسلام من وجهة نظرها فى انها تقول نعم ؟
خدنا بالنا كلنا من كده ؟ أنا واثقة
طيب ليه مااخدناش بالنا بالمرة من نقطة مهمة قوى ان بعض المتطرفين فى الدعوة لمدنية الدولة وبعض رجال الاعمال وبدون داعى لذكر أسماء ساويرس مثلا كانوا بيتكلموا عن الغاء المادة التانية ببساطة قبل الثورة وبعدها 
ليه مااخدناش بالنا ان ساويرس كمثال سكت ....لأ لأ مش سكت 
بالعكس ده الراجل كمان أعلن موافقته على المادة التانية  بعد الاستفتاء:)
كان لازم الابتسامة اللى فوق دى علشان تغنينى عن كلام كتير مالوش لازمة دلوقت
يبقى المصرى اللى كلنا تخيلنا انه مضحوك عليه كان هو الاذكى فى القصة دى 
عنده أولوية وهى الاسلام وعايز يموت وهو عارف ان مصر هويتها اسلامية 
 بس المادة التانية مش هى الاسلام ..صح جدا 
أنا وحضراتكم عارفين كده ...كام مليون تانى عارفين ومتأكدين زينا ؟
و المصرى نزل الاستفتاء قال للكل رأيه ..البعض استغل الحكاية دى ..؟ 
آه انا موافقة بس برضه بمزاج المصرى مش غصب عنه 
وحاجة تانية كمان ..احنا فين 
آه والله التيارات الدينية هاقول انها استغلت تدين الشعب وخدعته لمصلحتها 
احنا كنا فين باعتبار ان الكلام ده صح على اطلاقه يعنى 
نعرف ايه عن البلد دى وأهلها بيفكروا فى ايه 
مصر ياسادة بعد مبارك جريحة حرب بتنادى علينا  بتقولنا مين مستعد يشتغل فيها وهى مالكة الارض شرق وغرب ومين مستعد كمان للشغل وهى مرمية جريحة حرب
نفهمها ونغير منها براحة خالص اللى شايفين انه غلط من غير مانتعالى على أهلها 
نفهم اولوياتهم مش نسخر منهم 


عايزة تقولى ايه من الرغى ده 
عايزة اقول انى معترفة ان مصر كانت بتجاوب على أسئلة تانية فى الاستفتاء 
كتير جدا اعرفهم على المستوى الشخصى والافتراضى قالوا لا لانهم عايزين الافضل لمصر من وجهة نظرهم وكلامى مش عنهم 
كتير برضه قالوا نعم علشان الاستقرار ..رأيهم لازم يحترم 
مفيش مانع نكلمهم عن صبر وتحمل وبيت قديم بينهار وواحد جديد بيتبنى واننا هنتعب شوية لغاية مانوصل لمصر نستحقها 
لكن مش نعملهم نكتة علشان منهم ملايين حرفيا مش لاقيين شغل ولا عارفين يعيشوا 
مش الثورة السبب ..أنا متأكدة من كده وقلت الكلام ده كتير 
وقلت ان البلد دى كانت ماشية ناحية مصير محتوم وهو الانهيار وان مبارك ونظامه كانوا من الغباء لدرجة انهم احتكروا ثروات البلد ده وافسدوها اكتر ماكان بيعمل الاستعمار
كل ده مؤمنة بيه ...بس يتقال للناس ازاى ..نقنعهم مش بالسخرية منهم 
اللى يعرف يساعد يساعد من غير مايسمعونا بنعتبر الاستقرار ده كلمة عيب 


البعض قال نعم علشان المجلس العسكرى يتفضل بالسلامة ونقلل الفترة الانتقاليةوهرمنا من أجل اللحظة التى تفارقنا فيها  ومنهم أنا رأيهم لازم يحترم
كتير قالوا  نعم علشان خايفين على الهوية الاسلامية للدولة ..رأيهم لازم يحترم ونفهمهم براحه برضه اننا هنحافظ اكتر منهم على الهوية والمرجعية الاسلامية


الثورة ماقامتش ياسادة علشان الاقلية تعتبر نفسها بتحتكر الحقيقة والصح ومستقبل البلد وتنفرد بيه 
الملايين اللى أول مرة تنزل فى الاستفتاء لو حست ان صوتها ضاع مش هتنزل تانى ومش هيفرق معاها البرادعى وموسى وغيرهم عن مبارك

اخر حاجة بقى  


لو القوى السياسية معرفتش تفرض رأيها هتصعد الموقف وتعمل احتجاجات واعتصام 
ده الكلام اللى قرأته فى اكتر من مكان 
تعليقى ان ده عيب 

حاجة كمان ...مش موافقة على بالونات الايام دى عن دور ما للجيش فى الدستور فى حماية مدنية الدولة ......مش موافقة أيا كانت المبررات 

8 التعليقات:



شمس النهار يقول...

المفروض ان كل ده حسم في الاستفتاء

وان اللي اتفقنا عليه في الاستفتاء يتم
لكن بصراحة انا مش فاهمه اي حاجه
انا قلت لا
علشان مؤمنة ان الدستور هو من يرسم شكل الدولة وليس العكس
علشان نشتغل علي ميه بيضا زي مابيقولوا نعرف هننتخب مجلس شعب علي اي اساس وبعده رئيس جمهورية علي اساس
وماكناش دخلنا في ودنك منين ياجحا اللي حاصله دلوقتي
ننتخب مجلس ونعمل دستور وبعدين رئيس ونحل مجلس الشعب ونعمل انتخابات تاني
يعني دوخيني يالمونة
المفروض ان الحوار دلوقتي يكون علي دولة برلمانية ولا رئاسية ولا الاتنين في بعض
ربنا يسترها ان شاء الله محروسة مصر

مهندس مصري يقول...

طيب و ايه رأيك في وثيقة البرادعي
http://t.co/yLPYt7q

حفيدة عرابى يقول...

شمس هانم
أهلا بيكى
الصح ياشمس هانم لازم يتقال انه صح
أنا وقت الاستفتاء كتبت بوست اسمه نعم
وقلت فيه انى هاقول نعم وأنا مقتنعة بكل مبررات اللى هيقولوا لا
يعنى انا عمرى مادافعت عن التعديلات غير باعتبارها هتعدينى بسرعة من الفترة الانتقالية اللى لو طالت هتبقى خطر على مصر
اللى مالهمش مصلحة غير حب مصر وقالوا لا على راسى من فوق

اعتراضى كان على السياسيين اللى لا بالنسبة لهم فرصة للاستعداد وبتطول مدة المجلس العسكرى وده أكبر خطر على البلد

اللى يضايق كمان الاصرار على الغاءنتيجة الاستفتاء
ممكن نوصل لحل وسط يخص الدستور ..لكن مينفعش نعامل الاغلبية باستعلاء واحنا بس اللى بنفهم واحنا بس اللى نعرف نقرر مستقبل البلد فين
ونقعد نتعب نفسنا فى المقارنة بين 189 مكرر فى التعديلات و60 فى الاعلان

الدنيا بسيطة
لو حضرانهم معترضين يكلموا المجلس اللى بيطلبوا منه الاستمرار يلغى الاعلان لان الاعلان هو اللى غير شرعى مش الاستفتاء

الناس اللى نزلت لو صوتها ضاع عمرها ماهتنزل تانى

المستشار البشرى قال ان مصر هتبدأ تعرف تمارس ديموقراطية بعد دورتين برلمانيتين على الاقل
بلاش النخبة اياها تزهق الناس من بدرى

اللهم أمين

تحياتى لحضرتك :)


---------------
مهندس مصرى

موافقة طبعا وفى البوست قلت انى موافقة على اتفاق على نقاط اساسية أو مواد فوق دستورية تخلينا مطمنيين على الدستور

لكن قلقانة من المادة 5 فى الباب الاول
لانها تشبه للاحتمال الرابع فى المقال ده
http://www.shorouknews.com/Columns/Column.aspx?id=476066

لانى برضه مش عايزة أى دور للجيش فى الحياة المدنية
وخايفة من كلام معتز والمادة 5 فى الاعلان للبرادعى تكون تمهيد

غير كده جميل جدا

تحياتى لحضرتك

فاتيما يقول...

صباح المناقشات يا فيدووو

حلو البوست قوى


بصى انتى قولتى كلام جميل
كنت هبقى موافقة على أغلبه
لو كان الاساس من البداية صح
لكن الواقع ف وجهة نظرى المتواضعة
ان الاساس مغشوش وملعوب فيه
وبالتالى البيت هيقع بعد شوية
ومش هيستحمل كام دور فوقيه
لما تفكرى تبنى عليه قدام

ازاى ؟

اقولك

ببساطة لو انتى تفتكرى
مطالب الناس بعد تخلى مبارك كانت متستفة ورا بعضها كدا ..
تبصى فيها هيا او غيرها من جماعات وقوى واشخاص حتى فرديين زى حالاتى ...
هتلاقينا كلنا تقريبا
اتفقنا على طلبين

1- اسقاط كل رموز نظام مبارك
2- دستور جديد

وباقى المطالب اتفق عليها وأختلف
لكن الدستور الجديد
كان المطلب الذى لا يختلف عليه أحد

جه المجلس العسكرى اللى مهنينا
فعمل ايه ؟
قالك بدل الدستور وقرفه
نعمل تعديلات و نستفتى عليها البشر ف السريع و نجيب لجنة لا تجمع كل الاطياف السياسية تقصلنا التعديلات على مقاسنا ...

التصرف دا
انا بعتبره شخصياً تواطؤ
لكن هنمشيها قلة خبرة وعدم قصد ..
ومكنوش قاصدين

خلاص
ماشى


نزل الناس تستفتى من غير ما حد
يقولهم
ماذا بعد ؟
يعنى لو تفتكرى الغالبية تصورت ان التعديلات دى هتخلصنا و هتسرع الخطى لعمل دستور جديد قبل السنة
ما تخلص ..صح ؟

قوم ييجوا بعد النتيجة
يبلغونا بأن الدستور هياخدله
بتاع سنة ونص تقريبا على ما يتعمل
وكماااان الله اعلم بالقوى السياسية اللى هتشكل البرلمان هيه ايه
.. وهتشكك لجنة وبعدين اللجنة تحط دستور ويقولولنا ازيكم مبسوطين ؟


طب انا راضية حكمك يا فيدو

دا يبقى اسمه ايه ؟!!

مش تدليس وغش ؟!!
مش ضحك ع البشر ؟!!
مش التفاف على مطالب الثورة ؟!!


انا لما بصر على دستور جديد دلوقتى
لا التف على نتايج الإستفتاء
المجلس هوه اللى إلتف على مطالبى
وخدعنى عينى عينك وسكنى ف شقة ايجار جديد هنطرد منها بعد شهور وانا كنت عاملة حسابى على ملك والفلوس ف جيبى ...
دلوقتى وقت الشرا ..هيكون البيت راح والفلوس ولا ليها لازمة


لو كنتى قولتى لغالبية الناس اللى راحت قالت نعم دى
ان الدستور هيتآخر فى وضعه سنة وشوية ... تفتكرى كانوا هيوافقوا ع التعديلات ؟!


انا شخصيا كل زملائى ف الشغل
اللى قالوا نعم .. ندموا
بعد مناقشات معاهم
كمان و بعد ما شافوا احوال البلد وانها فعلا فى إيد
اما هواة هيضيعوا مصالحنا
او متآمرين و مش عاوزين مصلحتنا


النتيجة بتاعة الأستفتاء د
ى من وجهة نظرى الغلبانة
مبينة على باطل
لا انتا شرحت للشعب حقوقه
ولا انتا فهمته
ولا انتا كنت قد مسولياتك
ولا انتا استمتعت للخبراء من كل اتجاه
ومشيت اللى ف دماغك وبس


انتى عارفة يا فيدو
واكيد سمعتى اراء بالهبل ف الفضائيات من ناس محترمة ف القانون وف غيره
ان الدستور كان زمانه اتكتب ف الأربع شهور دول !!!
وان الدستور هوه الأول ف كل بلد ف الدنيا
واننا كالعادة بنحاول نخترع العجلة
مش فاهمة ليه ؟

طب ليه انا اقبل كدا ؟!!!
انا لا نخب ولا نيلة
انا مواطنة عادية
ليه أقبل بأقل من حقى
واقبل بتعديلات معيوبة لا تحقق مطالبى
واحط نفسى ف مهب ريح المنتخبين ف مجلس شعب القادم الله وحده بيه اعلم ؟!!!

الضغط الحالى ليس نوعا من التبجح من النخبة يا فيدو ...
دا نوع من الرد على فعل
لو كان اولوى الامر ماشيين صح كنا هنتدخل ليه ونرجع تانى نقول دستور ؟


اصلك لما بتجيبى مدرسة لبنتك ف ثانوية عامة وتراقبى طريقة شرحها وتدريسها والتزامها
فتلاقيها مش اللى هيا ..
فتديها فرصة كافية
وتكتشفى انها مدرسة خيبانة
ومشيها خيبانة ...
ولا بتدرسها كويس
ولا بتتقى الله فيها
ولا ماشية معاها صح ...
هتتدخلى وتقوليلها انتى غلط واستوب ولا هتسيبيها تبوظ دماغ البنت عشان خلاص اتفقتى معاها م الاول
ودفعتيلها فلوس وكدا

طب لما النتيجة تيجى سقوط مريع
ف الأمتحان وضياع مستقبل
تعملى ايه ؟
تندمى انك م البداية موقفتيش وقفة حاسمة
ولا هتقولى قدر ؟!!

و مع فارق التشبيه ...
ان دا مستقبل بلد
مش مستقبل بنى آدم واحد ...

ربنا ان شاء الله يسهل
واللى عاوزه هيكون

بوسات وحضونات يا حبيبة قلب طمطم

فاتيما يقول...

شوفتى نسيت اقولك

انا كاتبة بوست خطاريف بقالى كام يوم
والريدر بيستندل معايا ومش راضى يطلعه
مهما حدثت التاريخ ...

ابقى اقريه بقى
عشان ليكى فيه خطروفة

يلا سلام

لورنس العرب يقول...

تعالي نعكس الآيه
لنفترض ان نتيجة الاستفتاء طلعت "لا" وطلعت انا وقلت ان البرادعي من ومن معه غلطانين وكلامهم لازم ينزل الارض ولازم نضغط على المجلس العسكري لتغيير النتيجه وعمل الانتخابات اولا
كان حصل ايه؟

حفيدة عرابى يقول...

طمطم
ازيك ياجميلة :)
شوفى ياستى هو أنا مقدرش افتح بقى فى ان العقل بيقول الدستور أولا
واتمنى ان القانونيين يتفقوا على حاجة قبل الانتخابات تطمنا شوية على الدستور

بس فى حاجات صغيرة ياطمطوم
زى ان لو الاساس باطل فيبقى احنا كمان غلطنا اننا وافقنا من الاول على نزولنا الاستفتاء
لكن مينفعش ننزل ونروح اللجان ولما النتيجة تكون مش زى مااحنا عايزين نقول لأ مش لاعبين

دى حاجة
الحاجة التانية ان كلامك صح جدا بالنسبة لك ياطمطم وبالنسبة لكل واحد قال لأ لانه عايز دستور جديد
لكن اللى استغلوا الاستفتاء علشان يجاوبوا على أسئلة تانية ومنهم أنا
مش موافقين على كده

الاستفتاء بالنسبة لى المجلس العسكرى هيسلم السلطة لرئيس منتخب ويمشى
ايه رأيك نطول المدة اللى هيحصل فيها الكلام ده ولا نقصرها ؟
الحكاية كانت بالنسبة لى كده

كمان لو أنا قلت لأ ولا هى اللى كسبت هل ساعتها كنت هسمح للى قالوا نعم يعترضوا على النتيجة ولا هاقول ده عيب وتهريج ولازم نحترم نتيجة الاستفتاء

ومين قال ان الدستور هياخد سنة ونص
طيب ولو هياخد سنة ونص فعلا ازاى متوقعين انه كان ممكن يتعمل فى الاربع شهور اللى فاتوا
وانت ياطمطم ممكن توافقى ان المجلس العسكرى يقعد معانا لغاية مانخلص اللى ورانا

شوفتى مقال معتز اللى انا حطيته فى تعليقى لمهندس مصرى
كل ماالوقت بيعدى المجلس بيخترع حاجة جديدة علشان يفضل معانا علطول

ولجنة التعديلات كان فيها كام واحد ؟
وقلنا عليها ايه ؟
تخيلى بقى لو مطلوب مننا نوافق على 100 عضو للجنة التأسيسية للدستور هنختلف كام مرة

يبقى نعم هتعدينا من فترة انتقالية بسرعة

عارفة هى الحكاية مش مين صح ومين غلط
لكن مبارك مكانش مخلينا لينا أى دور فى بلدنا ولما يمشى وانزل استفتاء والاقى البهوات النخبة بيضغطوا علشان يغيروا رأيى
حاجة من اتنين يااما هتحصل مشاكل بينى وبينهم يااما مش نازل تانى

الدستور ياطمطم محتاج اتفاق على على شكله واحنا اصلا لسه مش عارفين احنا عايزين دستورنا شكله ايه
احنا دى مش انا وانت و15 مليون
لأ الكل

غير كده حسب التعديلات المجلس هيسلم السلطة لرئيس مدنى ومقالش ان لازم الدستور يكون موجود وقتها

الخلاصة بقى
ربك يسترها ويلهمنا نمشى فى الطريق اللى فيه مصلحة للبلد اللى حيلتنا دى
مش احنا قلنا الثورة دى مبروكة وفيها شىء لله وربنا هينصرها وينصرنا ان شاء الله

الخطاريف شفتها امبارح سريعا ورايحة حالا اقول رأيى فى شوية حاجات كده سكر

بوسات وحضونات ياطمطومة

حفيدة عرابى يقول...

لورنس العرب
أهلا بحضرتك
متفقة مع رأى حضرتك يافندم
وشايفة ان اللى بيحصل غلط
ولو انا كل مرة مش هتعجبنى حاجة هاغيرها يبقى السكة اللى ماشيين فيها مش صح

تحياتى لحضرتك