احفظ اسامى اللى ماتوا فى الشوارع صم

مش انه قتلهم بس
ولا انه بعد ماقتلهم موجود فين
ولا كمان اننا مش عارفين نوصله
ولا ان الايام بتبعدنا مش بتقربنا من القصاص منه
ولا انهم اتحرموا من الدفن كل المدة دى
ولا انهم ماتوا علشان خرجوا يقولوا انه ظالم ودى بديهية والدنيا كلها عارفاها
لأ
ان الظلم مكتوب عليهم منه ومن نظامه حتى فى أهم لحظات حياتهم
حتى وهم سايبين له الدنيا والارض يتهنى بيها
محرومين حتى فى لحظاتهم الاخيرة من أساميهم
مين مش بيتمنى يموت وسط أهله وبيوصيهم ابقوا قولوا وابقو اعملوا
مين مش بيتمنى ان أقرب الناس ليه هو بس اللى يكون موجود
ويخلى باله منه فى اللحظات دى
مين مش عايز دموع مع الدعاء فى صلاة جنازة ماتجيش غير من حبيب أو قريب
مين مش عايز أهله هم اللى يدفنوه ويستنوا جنب قبره شويه يونسوه قبل مايحس بالوحشة اياها 
الجندى المجهول كانت بتقتله اسرائيل وكنا بنقول حرب هنعمل ايه 
بس أول مرة اسمع عن الشهيد المجهول اللى اتفرق دمه بين أفرع الداخلية 
كده كتير
----------------------------

يا شعب ياللي دفع تمن الشوارع دم
احفظ اسامي اللي ماتوا في الشوارع صم
الشارع اللي اصطفى وقصر الامارة لم

تميم البرغوثى 
--------------------------------
مش لازم اسامى ياتميم

6 التعليقات:



خواطر شابة يقول...

عزيزتي تأكدي ان الله يمهل ولا يهمل ولن تضيع دماء هؤلاء الشهداء البررة ان أجلا أو عاجلا سنة الله في كونه عزيزتي

حفيدة عرابى يقول...

خواطر شابة
أنا متأكدة من كده :)
كل الموضوع ان فيه اجراءات كان ممكن تريح ناس كتير
لكن الاجراءات دى بتتأخر لاسباب مش مقبولة بالنسبة لنا
أنا متهيألى ان من أهم أسباب الثورة دى اننا مكانش لينا كرامة فى بلدنا وبالتالى بره
يبقى لما الثورة قامت ..المفروض الوضع ده يتغيروالجريح والشهيد وأنا نتعامل معاملة افضل
لسه ماتغيرش
ده اللى مزعلنا وبيخلينا اعصابنا تعبانة مع كل موقف جديد
لو أنا محاكمة مبارك جدية كنت سكت
لكن لو بتابعى الاخبار هتلاقى الجلسة الجاية فى اغسطس
فيه حالة من الخوف والهلع اننا فى يوم نقول فى نفسنا ياااه فاكرين لما كان فى ثورة

معلش دوشتك
شرفايتى ياخواطر :)

فاتيما يقول...

انا تعبانة م الموضوع دا
لدرجة اليأس

فيه تعمد لعدم الإنتظار
لحد ما تتعملهم جنازة مهيبة
ف يوم جمعة

انهم ينسوا الناس
زى ما بيدوا تعليمات
بعدم اذاعة لقطات عن معركة الجمل

الهدف واحد وباين
الناس تنسى جرايم الامن
والشرطة
والبهدلة والاهانة
والموت غرباء على قارعة الطريق


لما شوفت يسرى فودة
كنت عاوزة اروح اولع ف بتاعت الطب الشرعى اللى طلعت معاه ف حلقة السباعى تقول شعر ف المبادىءالمهنية
كانت بتتكلم بعد الترقية بنفس الاسلوب
انا موظفة وهما مجرد ارقام وحالات
واللى جابهم عارف انهم مساجين
وخلصنا
اللى له حاجة ييجى
انا مليش دعوة

ربنا ياخدها
معندهاش لا دم
ولا احساس
ولا رحمة
ولا عندها ادنى فكرة عن صلاحيتها الممنوحة ليها ومستنية يجيلها اوامر من البهوات ....
حاجة تقرف

قريت ردك على خواطر
وعاوزة اقولك ان بعد الغاء جمعة الداخلية كنت ناوية اعمل يافطة وانزل بيها التحرير اقف واكتب عليها
كان هنا ثورة
بس حتى التصرف دا
يئست اعمله
جاتهم القرف
ربنا يفرجها من عنده

انا اسفة ان التعليق سخيف
امسحه ولا اخليه ؟

انتى حضن ليا يا فيدو
خليه ..

واختيارك لتميم .. رائع
والأسامى فعلا مش مهمة
والمهم انهم عايشين ف القلوب
وبس

ربنا ينتقم من اللى خطف عمرهم
ويورينا فيهم آيات غضبه وانتقامه
اللهم آمين

تامر علي يقول...

أجر الشهداء عند الله غير منقوص

لكن تأخر حقهم عار يحمله كل مسئول

وعار مبارك لن يمحى من التاريخ
وافعاله الشائنة ستجعل تاريخة أسود سواء في حكمه أو بعده

حفيدة عرابى يقول...

طمطم
ازيك ياجبيبتى

أنا مستبشرة خير فى اللحظة دى ياطمطم
وآه هم تعمدوا الاستعجال والجنازة ماتبقاش الجمعة علشان انت عارفة كانت هتبقى شكلها عامل ازاى
وان الناس كلها كانت هتخرج فيها

هم خايفين ياطمطم
وحتى لو طلعوا مساجين حسب تقارير الاخت الموظفة
مش بنى ادمين وماتوا؟؟
وماتوا مقتلوين كمان ؟؟
ولا هو الحرامى ده مش بنى ادم ومن حق أى حد يموته

طب انا مستبشرة خير بايه ؟
انى شايفة ناس كتير قوى عندهم نفس اصرارى اللى عاهدت ربنا عليه يوم 11 فبراير
مش هاسكت
والله العظيم ماهخلى حد يغش فى امتحان
ولا هادفع رشوة
ولو شفت ظابط شرطة بيقل أدبه مش هاسكت
وأى بنى ادم هلاقيه حقه ضايع لو معرفتش اساعده انى اجيبه معاه
فانا هافضل ازن عليه لغاية مايقوم هو ويجيبه
ماهى مش هتنفع غير كده

مبارك خلى الفساد متوغل بطريقة بشعة
ومحتاج سنين علشان تشيلى فيه بس
مش نبنى مكانه
موقعة جمل ايه اللى بيدوا تعليمات ماتتعرضش اعلام عبد الله بن سلول
هى بتتشال من المخ
ده انا كنت فى بيتنا ومش عارفة اشيل شعور الخضة والرعب من منظر الجمال وهى داخلة عليهم الميدان
ومين ينسى ومين يقدر فى يوم ينسى

يعنى ال19 دول ورميتهم فى التلاجةالمدة دى كلها ودفنهم من غير أهاليهم ترضى ربنا ياطمطم ؟
ماتقلقيش

مبارك ربنا خده من وشنا بظلمه وانه افترى وافتكر انه جهز الدنيا لابنه زى ماكان عايز وخلاص كل حاجة بقت تمام
طب احنا كنا عارفين ان يوم 25 يناير هيغمل الفرق ده ؟
المعادلة كانت مظبوطة وهتفضل كده ان شاء الله
رب عادل يمهل ولا يهمل
وحاكم ظالم
وشعب خرج وقال لأ
مالهاش غير نهاية واحدة ومحسومة بإذن الله
وقتها بس هو اللى عايزين نلحقه

ماتزعليش نفسك ياطمطومنى

ده أنا يوم ماهتفوا أول مرة من غباوته معاهم الشعب يريد اسقاط النظام
كنت هاطير من الفرح اننا قلناها


الظلم لسه موجود ياطمطم
والعيال اللى باتت فى الشارع لسه موجودة حتى لو بان انها اتفرقت
وفى الاول وفى الاخر ربنا موجود
والحقوق كتيرة
ماتشيليش هم


فى اللحظة دى أنا عندى يقين انها هتتحل وهنفرح وهترجع الحقوق لاصحابها بإذن الله

مش انت ياهانم اللى كل شوية كنتى بتقولى ان الثورةة دى فيها شىء لله
وانه كل مانزعل شوية عليها
سبحان الله ربنا يسلط عليهم غباوتهم ترجع تنور من تانى

طب فاكرة الخطاب التانى ؟
بتاع لا ياشيخ :)
مش كنا هنشد فى شعرنا من مصر اللى عيطت عليه علشان يندفن فيها وهو قاتل ناسها
وماشاء الله عليه ربنا يسلط عليه نفسه تانى يوم كانت موقعة البغال والحمير

بلاش دى
فاكرة الخطاب التالت
انا كانت شغلانى جزئية ان الجلطة اللى هتجيلى هتبقى مخ ولا قلب
والله من غير مبالغة كنت حاسة انى هاموت

أنا اخويا طلع من فرح واحد صاحبهكان بيترجاه يفضل معاه علشان القلق اللى انت عارفاه وقتها
وكل شوية يقولى انا مش قادر
ايه البنى ادم ده ..عايز ايه مننا؟؟؟؟

فاكرة عمر سليمان اللى مش ممكن يفارق خيالى راسه وهى بتتهز زى الديب بالظبط مع انى مشفتش ديابة قبل كده :)
وهو بيقول عودوا الى دياركم
وساعتها قلت العيال ماتوا فى التحرير خلاص
وقبل ماتكمل اربعة وعشرين ساعة كانوا هم الاتنين بره

لا والله ده احنا ربنا معانا :)
بس احنا مستجدين فى الثورات :)

القادم أفضل ياقمر بإذن الله

حفيدة عرابى يقول...

استاذ تامر
ان شاء الله هتخلص كل حاجة على خير
وبعدين واحنا بنهد نظامه مش قلنا هنفكر نبنى ازاى
فين البوستات يافندم ؟ :)
تحياتى لحضرتك