عنى وعنهم

- هون على نفسك ياطيوب :)

-هو أنت كتبتها مؤنسة ليك ولا ليا ؟
عن قيس بن الملوح و أرق قصائده (المؤنسة )


-أنا أصغر منى بكتير ...آه والله


- بحب احضن وشوش اللى بحبهم بعنيا 
من كتر خوفى من اليوم اللى مش هلاقى فيه الوشوش دى قدامى 
 
- الخطاب الاول ...ربنا ياخدك 
الخطاب التانى ...لا ياشيخ !!
الخطاب التالت ....يابن الذين ..يانهار مش فايت ده بيقول سأظل :((

- مش هادية خالص على فكرة 

-ولما قررت انى من وقت للتانى اعاملكم بجزء من معاملتكم 
المفاجأة كانت فى رد فعلكم المندهش والمستنكر وشعوركم الطاغى بالظلم


-يعنى عايزين تفهمونى ان الظابط اللى كان راكب العربية المدرعة اللى بتجرى بسرعة دى وماسك بندقية غريبة وبيضرب فى المتظاهرين ده مصرى ؟؟؟؟
لأ طبعا...ده اسرائيلى ..هو أنا تايهة عن أشكال الصهاينة ؟؟
أعوذ بالله هى مصر ممكن تخلف عيال كده ؟؟


- عاشق وأنا مالى حبيب ....ماليش دعوة ده كاظم الساهر
 
-لامؤاخذة مدرس 


-يسقط ....يسقط حسنى مبارك ...ده مش هتاف ..ده مزيكا 


-أبو الفوارس بجد ياعنترة


- من ليس معنا فهو ضدنا 

- ولما عدمت بمصر الملوك جابوك الانجليز يافؤاد قعدوك 
مش الانجليز ولا فؤاد بالظبط يعنى


- ومع انها متعرفهمش ولا تعرف حد شبههم بس كل ماتفتكرهم يبقى نفسها تصالحهم على بعض من بدرى قوى 
عن على البدرى وزهرة سليمان


- اخر مرة قلت يارب ابعده بقى عن طريقى ....ابعده يارب 
والكل كان منتظر ان المرة اللى بعدها هتكون حاسمة واحتمال قاصمة 
بمنتهى البساطة والسلاسة لقيته بعد عن طريقى 


-كنت متأكدة انها مش بتحبنى بس معنديش ولا دليل على كلامى 
لغاية ماالصدفة عرفتنى ان قلبى دليلى...
وان عين الرضا عن كل عيب كليلة


-بخاف من الاسانسير


- أول قصة اشتريتها لأدهم صبرى كانت بخمسة وتلاتين قرش وبعدين خلوها بخمسين قرش  
ده الخمسين قرش دى كانت بتتحوش حرام عليكم


-كرهت عادل أدهم قوى وفضلت كتير على ماعرفت أقنع نفسى انه لما قال لميرفت أمين (ياقطة )كان بيمثل 



-ودى مين اللى ظلمها دى ؟؟
جارتنا العزيزة تعليقاً على صوتى اللى كان دايما بيصدح بكل الاغانى وأنا بغسل المواعين 
التعليق ده تحديدا كان على رائعة سميرة سعيد (آل جانى بعد يومين ) والكوبليه ده بالذات ( شايفين الظلم ياناس ..ده حلال ده ولاحرام )كانت مكسرة  الدنيا الأغنية دى


-كتبت شعر عن وعد بلفور وأنا فى رابعة ابتدائى .....
لأ ماهو كان باين عليا من بدرى انى مش نافعة 


-أول شريط اشتريته كان كوكب تانى لمدحت صالح وكان باربعه جنيه واكتشفت ان الراجل ضحك عليا فى الفلوس عادى يعنى 


-القرد أحلى ولا الغزال ..؟ القرد طبعا

4 التعليقات:



فاتيما يقول...

انا مش عارفة اعلق اقول ايه ؟!!

انا موجودة ف كام سطر ف دول
بالحرف يعنى ...


مضحكش عليكى ف شريط مدخت ولا حاجة
الشريط القديم كان بتلاتة ونص
والجديد بيبقى ازيد نص جنيه
كنوع من الإستغلال مش اكتر ...

ضحكت قووووى على

- الخطاب الاول ...ربنا ياخدك
الخطاب التانى ...لا ياشيخ !!
الخطاب التالت ....يابن الذين ..يانهار مش فايت ده بيقول سأظل :((

:))))

بحب غنوة كاظم دى جدااا
و شريط سميرة دا متهيألى محدش ف مصر مشترهوش ....

هه

ايااااااام

رجعتنى للذى مضى

تسلم ايدك
وتسلم يا شهر يونيو

:)

خلى بالك من نفسك

حفيدة عرابى يقول...

طمطم
:)
ميرسى ياحبيبتى انك رفعتى معنوياتى فى موضوع شريط مدحت :)))
دايما بيضحكوا عايا فى الفلوس اعمل ايه ؟ :)

اختنا سميرة كسرت الدنيا فعلا بالاغنية دى
أول صدمة عاطفية افتراضية فى حياتنا


قلت أحب الحب أحسن :)
ده كاظم الساهر برضه أنا ماليش دعوة


بس فيه حاجة ياطمطم متهيالى معرفتيش أقصد بيها ايه
القرد أحلى ولا الغزال ؟ :)

انت اللى تسلم ايديكى ياحبيبتى ونورتينى

خواطر شابة يقول...

انا سعيدة بحملة التدوين اليومي التي ستجعلنا نقرأ جديدا لك كل يوم
اغنية سميرة سعيد روعة ولا تزال حية ومسموعة الى اليوم
كاظم الساهر في فترة من الفترات كنت اسيرة اغانيه لكن بمرور الوقت تغير الحال ولا أدري ما السبب هل انا ام نوعية اغانيه
دمت بكل الود والمحبة عزيزتي

حفيدة عرابى يقول...

خواطر شابة
أنا اللى سعيدةبسعادتك وبوجودك فى مدونتى :)

من أجمل أغانى سميرة فعلا وسبحان الله السن ده بجب كل حاجة مرتبطة بيه قوى

أما الاستاذ كاظم فعلا كنت بحب اسمع أغانيه جدا
وانا اتغيرت وهو اتغير
هواتغير لما امريكا احتلت العراق ولقيته ساكت وانا بداياته معايا انه المطرب العراقى
وزهقت من السيدات فى حفلاته وبحبك ياكاااااظم
فبعدت وانا وقتها كمان بطلت اسمع

المدونة نورت ياخواطر ياللى بتخلى القلب ينغبش :)